基本上,我放棄對大多數藍絲既價值輸出,
只會對少數親近既人做一啲溫水煮蛙既遊說,
你可以起我底,我寫過一篇同藍絲家人遊說既方法。
順手share一下我對價值觀既睇法。
人既價值觀,係源於對世界既了解,
包括由你出生開始接觸到既一切,猶其係孩提時代。
唔單止知識,亦包括左你父母既行為,
佢地對待你既方式,你既家庭所經歷過既一切,
都會塑造你最初既模樣。
家庭就係你認識既第一個世界
(澤仔套人民公僕都有講過,一個人如何變成混蛋
就係由佢既父母造成。段片幾有意思。
https://youtu.be/oEeUY-exs74 )
學校係你第二個世界,中小學正係你開始認識世界既黃金時期
學校既知識會影響你,同學會影響你,
同時,你讀到既課外讀物更加會影響你,
(呢個時段如果睇到精采既書,可以影響你一生)
你既人際關係亦會影響你既價值觀,
上網都係,你上連登,其他人既留言都會影響你。
點解我地見到咁多小粉紅?因為喺學生既黃金時期,
佢地接觸既資訊都係被攏斷,睇既書都係被審查過,
佢地無辦法型成中國社會以外既世界觀,
官方資訊成為唯一渠道,而朋友圈一樣係睇呢啲資料大,
同溫層互相影響,呢種環境就模造出藍絲甚至小粉紅。
當佢習慣左喺呢啲圈子,即使有一日佢地長大去到外地,
呢份習慣會令佢地留喺同溫層,
因為外界資訊同佢既世界觀唔一樣,本能地拒絕。
習慣會決定我地靈魂既顏色。
長大後,即使知道真相想要改變,可能要花十年時間,
因為黃金期已經過左。
當你同藍絲接觸,你係佢既圈外人,你同佢對世界既認識不一,
佢只會當你亂咁up想昆鳩佢。就算你同佢講完,
佢睇到既依然係嗰啲被閹割既資訊,你既說話佢好快會忘記。
所以你無辦法同藍絲溝通
更重要既一點係,佢地既思維方式係點運作。
做事憑理性根據邏輯,或者憑立場睇利益
以上兩者並非非黑即白既關係,可以並存,
無私既人一樣可以無邏輯,有邏輯既人可以因私利而無視邏輯。
如果真係想對藍絲做到價值輸出,
你就要摧毀佢既世界觀,甚至改變佢地既思維方式。
一般情況下,三言兩語係唔可能做到,要花好長時間,
溫水煮蛙慢慢話俾佢知,你既世界觀係錯。
過程中佢會反對,無視,除左理性探討直線抽擊,
更重要係關注對話既氣氛與情緒,有失控先兆就要停止或降溫,
老實講一啲都唔易做,我用左十年時間去改變我父母,
由佢地堅稱中國人去到而家唔再堅持,已經好大進步。
外面千百藍絲小粉紅,我唔去遊說,或者仲有其他人去做
父母親人無得揀,我唔做,無人會幫我做。
我之前都有提過,當有藍絲鬧美國佬搞事,
我唔會反對佢,但會同佢講,“美國佬就係咁衰,
所以你千祈唔好得罪美國佬,否則屎都無得你食”
呢番說話既背後,就係因為我知道佢既世界觀離我太遠,
根本無得傾,無謂浪費時間。
能夠喺中國咁既環境維持清醒既人,我佩服,
但唔代表佢無沾染中共既色彩,所以我一律敬而遠之,
並唔係針對徐某人,亦唔係法西斯。
奉勸大家一句,如果你依然想保留自己既價值觀世界觀,
就唔好留喺香港。因為催毀價值觀係有捷徑:文革
寫得好長,希望唔會1999