Leveraged ETF 討論區 (5)

Leveraged ETF介紹
前言
受到全倉TQQQ巴打啟發，今年4月開始留意Leveraged ETF (槓桿ETF)依樣嘢。5月中開咗開咗post講leveraged ETF。
當時TQQQ股價仲係99.15，開第二個post嗰陣係141.79，開第三個post嗰陣係150，第四個post係170，而家係168。
由年初至今經歷多次回調，TQQQ, UPRO仍然頻頻破頂、越戰越勇。
同一時間ARKK浮浮沉沉、GME距離高位仲有一大段距離，一眾中概股長跌長有。

依個post會解釋乜嘢係leveraged ETF，同埋TQQQ點解咁勁。想寫嘅嘢非常多，我會分幾日嚟寫，大家可以用「追故模式」嚟睇。置頂會有目錄方便大家搵有興趣嘅topic嚟睇。

之前嘅post：
Leveraged ETF 討論區
https://lih.kg/2518419

Leveraged ETF 討論區 (2)
https://lih.kg/2714659

Leveraged ETF 討論區 (3)
https://lih.kg/2751539

Leveraged ETF 討論區 (4)
- 分享自 LIHKG 討論區
https://lih.kg/2762952

全倉TQQQ巴打嘅文章，我就係受到依篇文啟發：
【數學+歷史分析】 Leveraged ETF 可否長揸？
https://lih.kg/2409324

乜嘢係Leveraged ETF?
Leveraged ETF (槓桿ETF, 簡稱LETF)係一種高風險嘅投資產品，有機會輸哂大部份本金。
就算係最出名嘅TQQQ，如果喺最高位入市之後遇到科網股爆破可以輸99%，即係輸9成之後先入場都可以再輸9成。遇到金融海嘯可以輸95%，即係1萬蚊本金得返不到6百蚊。（註：TQQQ喺2010年先推出，以上計算係根據模擬結果）
單單係2020年Covid-19一役，TQQQ已經試過跌72.8%。
雖然長揸好多年係有機會升返（都有機會升唔返），不過用輸得起嘅錢去買就好。如果買得太多，有回調嗰陣會容易受唔住壓力。喺大型股災嗰陣好容易輸哂本金。

戴完頭盔入返正題。Leveraged ETF係用複雜嘅衍生工具去放大某種指數或者某種資產(benchmark)嘅每日回報。
例如TQQQ每日嘅回報大約等於Nasdaq 100指數嘅3倍。Nasdaq 100指數升1%，TQQQ就大約升3%；Nasdaq 100指數跌2%，TQQQ就大約跌6%，升幅跌幅都同樣會被放大3倍。

強帖留名

Leveraged ETF有咩種類？
睇一隻Leveraged ETF，首先要睇佢追蹤邊樣嘢，以及佢嘅倍數係幾多倍。
有啲Leveraged ETF追蹤大盤指數，亦都有啲追蹤個別行業。

追蹤Nasdaq 100指數：QLD (2倍) TQQQ (3倍) PSQ (負1倍) QID (負2倍) SQQQ (負3倍)
追蹤S&P 500指數：SSO (2倍) UPRO SPXL (3倍) SPDN (負1倍) SDS (負2倍) SPXU (負3倍)
追蹤恒生指數：7200 (2倍) 7500 (負2倍)
追蹤ICE半導體指數：SOXL (3倍) SOXS (負3倍)
追蹤羅素1000金融服務業指數：FAS (3倍) FAZ (負3倍)
追蹤20年以上美國國債：UBT (2倍), TMF (3倍) TBF (負1倍) TBT (負2倍) TMV, TTT (負3倍)
追蹤羅素2000指數：UWM (2倍) TNA (3倍) RWM (負1倍) TWM (負2倍) TZA (負3倍)
追蹤VIX期貨：UVXY (1.5倍), SVXY (負0.5倍)

大家想發挖更多可以喺google search "List of Leveraged ETFs"。
我嘅心得係「少人玩嘅嘢多數係伏」，即係每日成交量比較細、資產規模細嘅嘢，背後總會有啲原因。太偏門嘅嘢最好唔好玩。
TQQQ嘅資產規模大約130億美元，每日成交額幾十億美元，Leveraged ETF之首當之無愧。

上面你會見到Leveraged ETF多數都係2倍或者3倍。
倍數越高風險就會越高，即係3倍會比2倍更高風險。上面提過大型股災嗰陣可以輸9成以上係指3倍ETF。2倍嘅風險細啲，不過喺最高位入市QLD (納指100 2倍)嘅話，遇到科網股爆破都可以輸94%、遇到金融海嘯可以輸超過8成。喺2020年Covid-19一役，QLD都試過由最高位跌55%。雖然都跌得多，不過比3倍ETF已經算好好多。

至於倍數係負嗰啲叫Inverse ETF (反向ETF)，係用嚟做淡嗰陣用嘅。美股氣勢如烈，就算睇淡都唔好做淡，不過下面都會學術討論吓。

雖然我講到Leveraged ETF好恐怖，喺股災嘅時候隨時可以輸哂所有本金咁。但係喺好景嘅時候，佢都可以升得好勁。
由今年年頭開盤到而家，Nasdaq 100同S&P 500指數都係升咗18.4%左右，但係三倍槓桿TQQQ已經升咗54.1%，UPRO已經升咗62.3%。至於兩倍槓桿嘅QLD同SSO都分別升咗36.5%同39.7%。

過去10年，Nasdaq 100指數升咗6.8倍左右，TQQQ升咗差唔多100倍。S&P 500指數升咗2.8倍左右，UPRO升咗差唔多32倍。
如果1985年10月1日嗰陣開始用1萬蚊揸TQQQ ，即使中間經歷過87股災、科網股爆破、金融海嘯，嚟到今日你都會有1400萬。(當年未有TQQQ，以上純粹係模擬結果)

支持

用危險嘅方法玩安全嘅嘢
既然投資指數咁勁，點解大多數人唔會咁做呢？
點解唔見啲大學生、姨媽姑姐投資麥當勞、可口可樂依啲公司？

巴菲特都相當推崇投資指數，佢多次建議其他人買跟蹤指數嘅指數基金(e.g. VOO)，並指只要長揸50年就會變得富有。
Amazon創辦人Jeff Bezos曾經問過巴菲特：「既然你嘅方法咁簡單，點解其他人唔學你呢？」
巴菲特回答「Because no one wants to get rich slowly （因為無人想慢慢發達）」
其實好多散戶都知道指數基金勁，但係佢地唔想等足50年，等到老咗先發達。
所以散戶寧願買啲無人識嘅細公司（俗稱妖股），好多人對依啲妖股一無所知，但仍然成副身家擺落去，博佢短時間內升幾倍，偏偏唔肯買世界上最優質嘅公司，然後一年慢慢賺5%。
「買妖股回報高但勝算低，買優質公司回報低但勝算高」就係一般散戶面對嘅難題。

點樣解決依個問題呢？我諗到嘅答案就係「用危險嘅方法玩安全嘅嘢」。

用現金買指數，屬於「用安全嘅方法玩安全嘅嘢」。
用現金買妖股，屬於「用安全嘅方法玩危險嘅嘢」。
用槓桿買指數，屬於「用危險嘅方法玩安全嘅嘢」。

一般最安全嘅指數基金係指QQQ, VOO依種。巴菲特建議嘅係長揸VOO 50年。依種非槓桿嘅ETF比較安全，唔係依個post一直講嘅槓桿ETF。
但係我依種平民心急唔想get rich slowly，就需要用槓桿嚟買啲跟蹤指數嘅嘢，放大回報。

槓桿嘅方法有好多，例如孖展、leveraged ETF、期權、期貨。之後會詳細討論。
我衡量過之後覺得2-3倍槓桿嘅話leveraged ETF係最合適，即係跟蹤Nasdaq 100指數就QLD (2倍) TQQQ (3倍)，跟蹤S&P 500指數就SSO (2倍) UPRO (3倍)。
孖展有斬倉嘅風險、期權期貨知識要求較高，操作上亦無leveraged ETF咁簡單。
如果再高啲槓桿就可以揀孖展期權期貨，不過槓桿水平越高，勝算都會越低。指數雖然勁，但係槓桿得太盡都會令你由贏變輸。

3倍槓桿已經足以令一般打工仔十幾廿年內get rich。如果你想一兩年內get rich？咁六合彩可能會更加合適。

TQQQ咁好？我all in啦！
TQQQ好又唔代表要all in 凡事太盡，緣份勢必早盡
首先指數雖然長線嘅講會係升，但係短線都可以插得好勁，亦都有機會橫行一年以上。而且leveraged ETF係用一種危險嘅方法嚟玩指數。做危險嘅嘢就更加要小心謹慎。

舉個例子：大家平時出街會唔會一路行一路睇手機？會唔會紅燈嗰陣過馬路？我其中一個人生座右銘就係：「睇手機就唔好亂過馬路，亂過馬路就唔好睇手機」。
你要做危險嘅嘢，就應該謹慎啲。你唔想咁謹慎，就唔好做危險嘅嘢。人無事先做到世界冠軍。TQQQ咁勁，就算你唔all in，你最終都會發達。唔需要咁心急一嚟就all in去盡。就算TQQQ最後真係升100倍，你捱唔住中間嘅過程都係無用。跟住落嚟就會講吓資產配置。

用咩心態去揸TQQQ
心態方面，全倉TQQQ巴打講得好啱：

1. 要有本，得一萬幾千不如買多本書算
2. 要夠膽，齋睇唔買講咩都嘥氣
3. 要有耐性，發達唔係一年半載既事
4. 要情緒穩定，輸唔起就唔好賭
5. 要有自知之明，唔好以為自己識預知未來
6. 對世界要有基本理解，買終丐股就死得
7. 要適可而止，孖展孖太大就算隻股票真係十年百倍，中間跌三成都夠你破產
https://lih.kg/beaJRPV

如果你本金只係得一萬幾千，TQQQ唔會幫你馬上財自，但係你唔好因為心急而愈賭愈大。雖然大家都唔想get rich slowly，但係短時間內發達真係唔realistic，投資要有一定嘅耐性。賭得太大一來容易令你情緒波動做錯決定，二來容易令你喺逆境爆煲。

建議大家可以睇返全倉TQQQ巴打嘅勸世文：
［勸世］最近龍市多咗人講TQQQ，我想同大家講千祈唔好愈買愈大
https://lih.kg/2760022

繼續坐等財自

正皮先

留名
繼續訓到開市

LM

LM

長渣tqqq應該點做rebalance ?
同埋需唔需要入入出出 定係只入就夠?

樓主會唔會寫下hedgefundie?

點樣做資產配置？ (Part 1)
無標準答案嘅，連登巴打們都分幾個門派。
我整理吓唔同人嘅睇法，大家自己判斷。

1. 全倉TQQQ
正如上面所講，做危險嘅嘢應該謹慎啲，考慮清楚自己承受能力。連登有巴打全倉TQQQ，但係佢無叫你跟佢一樣咁做。

如果出現特大股災、長期熊市嘅話，TQQQ可以跌9成以上，但如果依啲災難唔出現，all in TQQQ回報會係最高。
人性就係會恐懼，所以先要揸其他非槓桿股票ETF、債券ETF嚟防範，所以即使全倉TQQQ或者全倉UPRO嘅回報很可能最高，但依個post入面好少人咁樣做。

2. TQQQ / UPRO + TMF
依個post入面最流行的門派，reddit亦都有唔少支持者。

話說外國有個blogger叫hedgefundie，佢採用40% UPRO 60% TMF嘅策略（後來改做55% UPRO 45% TMF），然後定期rebalance。
好處就係一開始可以保留購買力喺債券，等股市下跌嗰陣低價入場。

可以睇吓FX戰士巴打講點樣用計exposure去砌portfolio
https://lih.kg/veNKsiX

關於TMF可以睇吓FX戰士巴打嘅其他文章：
點解係60% TQQQ 40% TMF？
https://lih.kg/vbjHtoX
TLT/TMF係賺20年同30年美國國債利率的息差
https://lih.kg/bdofjnV
美國加息係加Fed Funds Rate (隔夜拆息)，對長期債息影響有限
https://lih.kg/uGqRJRX

Reddit有一位Adderalin嘅人亦都寫過兩篇好好嘅文章去講解UPRO + TMF策略，都好值得睇。
Part 1
https://www.reddit.com/r/financialindependence/comments/o7tnm5/my_guide_to_hedgefundies_portfolio_and_why_im_100/
Part 2
https://www.reddit.com/r/financialindependence/comments/oaiw3h/part_2_of_my_guide_to_hedgefundies_portfolio_for/

3. TQQQ + VOO + Cash
我自己係屬於依個門派。
首先決定一個TQQQ : VOO : Cash嘅比例，例如TQQQ : VOO : Cash = 3 : 5 : 2。(我自己個倉嘅實際配置比依個進取好多。)
比例可以自己再調節，窮嘅時候可以進取啲，加大啲TQQQ嘅比例。有錢之後就可以漸漸加大VOO嘅比例，以防股災嗰陣失去大部分財富，但係Cash嘅比例可以唔洗專登增加。然後每季rebalance去保持返依一個比例。

而依個做法可以有幾種變化嘅。唔想揸TQQQ可以轉UPRO，VOO可以換QQQ。

雖然股災嗰陣TQQQ同VOO都會一齊跌，但係我相信VOO / QQQ一定升得返。
留一定比例cash係因為始終有可能出現大型長期股災，又或者現實生活出現需要用錢嘅突發情況。

以下係唔同組合2011至2021年10月嘅backtest結果(rebalance quarterly)：
100% TQQQ: CAGR = 53.11% Max. Drawdown = -49.12% Sharpe ratio = 1.11
100% UPRO: CAGR = 34.55% Max. Drawdown = -60.44% Sharpe ratio = 0.92

60% TQQQ + 40% TMF: CAGR = 46.22% Max. Drawdown = -26.90% Sharpe ratio = 1.43
60% UPRO + 40% TMF: CAGR = 35.46% Max. Drawdown = -20.56% Sharpe ratio = 1.39

30% TQQQ + 50% VOO + 20% Cash: CAGR = 24.78% Max. Drawdown = -25.05% Sharpe ratio = 1.13
30% UPRO + 50% QQQ + 20% Cash: CAGR = 27.77% Max. Drawdown = -23.11% Sharpe ratio = 1.18
Backtest結果顯示係TQQQ / UPRO + TMF風險回報比例最佳。

pish

點樣做資產配置？ (Part 2)
上面介紹完依個post入面嘅巴打分唔同門派。咁各個門派嘅巴打又點睇其他門派嘅策略呢？

(以下純粹係我整合，可能描述得唔準確)
1. 全倉LETF點睇其他門派
全倉TQQQ巴打會認為人人風險承受能力唔同，因應自己風險承受能力去揸一部分債券ETF、非槓桿ETF (e.g. VOO/QQQ)甚至現金都唔係壞事。全倉都揸TQQQ係個人嘅選擇，唔代表其他人都要跟。

2. TQQQ/UPRO + TMF點睇其他門派
TQQQ + TMF門派嘅巴打會認為適當嘅資產配置可以減低波動，喺股災嘅時候債券可以發揮作用，可以安心咁跨越牛熊。QQQ / VOO喺股災嗰陣都會跟住TQQQ / UPRO一齊跌，做唔到對沖風險的效果。

3. 我點睇其他門派
我自己目前無買TMF，係因為人性嘅弱點容易令TQQQ/UPRO + TMF依個策略唔容易堅持落去。依個post都有幾位巴打曾經揸過TMF但後來放棄咗。
雖然聯儲局加息唔代表長期債息會升，但而家長期債息都處於非常低嘅水平。而且儘管長期債息上升長遠嚟講唔代表TLT/TMF會跌，但係人性係短視。長遠會升唔代表捱得過中間嘅波幅。
https://lih.kg/veNKspX

同時我都唔夠膽全倉TQQQ / UPRO。理性上我相信依個組合回報最高，但我真係唔夠膽。
揸VOO / QQQ可以產生「就算有股災都終有一日會升返」嘅安全感。
揸現金可以產生「就算所有股票輸哂都仲有錢剩」嘅安全感。
因為TQQQ喺大型股災可以跌95%以上，就算手持價值幾千萬嘅TQQQ仍然會感覺唔安全，所以揸一部分VOO / QQQ / 現金會比較符合追求安全感嘅人性。至於揸幾多就視乎你需要幾多安全感。
雖然理性上知道將VOO/QQQ換做UPRO/TQQQ、將現金換做TMF可以提高資金運用嘅效率，達到最佳嘅風險回報比例，不過心理上始終有啲唔安心。我唔排除將來都會揸TMF，但唔係而家。

我覺得All in得就必須全程SH
記住就算上年溶斷3次都會彈得返
唔好諗住賣出避風頭，逃避嘅心態遲早導致左一巴右一巴

我係upro 加 cash派

強いポスト名前を残す

lm

講就易

果時連登d post我仲記得，4次熔斷果陣恐慌到呢…