月牙
2021-09-08 00:45:27
接下來西狗將會迎來人生的轉捩點….
而另一邊廂
「天蒼地茫!起!」
「起啊!起!!!」
「點解唔得嘅……」啊仁失落的望著桃木劍
「你估我地天才咩,一學就識」同樣在練習的我也未能升起桃木劍
「唉….我唔信!」啊仁閉上眼,集中精神
「天蒼地茫!!起!!!」再次唸咒
咔….咔….咔咔…
啊仁聽到聲音,張開眼睛,放在地上的桃木劍輕易的在抖動
「啊!!郁啊!!佢郁啦!!」啊仁興奮的大叫
而我的桃木劍連動都沒動過….
「郁少少好叻咩?幾時先升到上天?」九叔對興奮的啊仁潑一盤大大的冷水
九叔轉向閉眼的我
「航,唔好急,沉住氣,集中精神」
「嗯」我點頭
「車~九叔,我成日覺得你偏心啊航」啊仁在旁說
「嗯?」九叔皺眉
「得!明!練野!」啊仁也再次閉上眼注著練習
「你都係啊!死仔!唔好分心偷聽人講野!」
嘭!!!
「睇下!又中啦!叫你專心啲㗎啦死仔」英叔對著倒坐在地上的啊武搖頭
「唉啊!點解成日都比你打中㗎!!」啊武頹喪的咆哮
「你成日諗太多啦」英叔說
「諗太多?我冇啊,我淨係諗點贏咋嘛」啊武滿臉疑惑
「你成日下一招點打,打咗之後點,咁太慢啦!」
「下?咁唔諗點打啊….」啊武快抓爆自己的頭
「唉~係自然反應,好似依家咁我每日同你練習對打,每一次大家出嘅招式都好似唔同,但其實你身體係會幫你記住,只要下次你再遇到差不多嘅招數,你身體就有個自然反應,久而久之你愈練習得多,你個反應就愈快,咁就唔洗諗啦」
「點解好似好普通但又好難明咁….」啊武雙手按著腦袋,前後抓起來
「放鬆啲武仔,你比起啱啱識我個陣已經進步咗好多㗎啦」英叔嘗試安慰啊武
「唉….」相信啊武在武道上也從未試過出現如此的樽口位
「今日差唔多,你地都練咗好耐,返去休息,聽日準時返工」九叔說完這句話,就回到自己房間裏
「呃…..咁….」啊仁看著我
「九叔,咁我地走啦,聽日見」我大聲的說
「嗯」門後傳來九叔的回應
「好啦武仔,你都返去休息啦」英叔拍拍啊武
「好,咁我聽晚再過嚟」啊武跟著我們離去
離開象山後,我們三人回家的路各不同,所以也在此分散了
我住在關門口村,跟象山距離不遠,所以可以走路回家,沿著城門谷公園旁的一條馬路好快便可回到我家
這條路在夜裏特別陰森恐怖,人跡罕至,要不是習慣了鬼怪世界,我也不會選擇這條路
突然
「啊!!!」一把女生的尖叫聲在前方傳來
我也管不了是人是鬼了,馬上跑上前查看!!