是咁的，我鍾意咗隻網絡人妖。

「我覺得呢件襯你多啲囉！」月伶拎起一條裙放喺海螢身前比對，強行將海螢扯返去現實。

海螢定眼一看，發現月伶所揀嘅衫原來係一條深藍色嘅短裙，貼身嘅設計會將身材曲線體現得淋漓盡致。海螢臉上泛起尷尬嘅微笑，佢將條裙放喺身上，一望到條裙短到上自己大髀位就打咗個冷震。

「第一次出街著短裙實冇死！」月伶感覺到海螢嘅擔憂，喺約會中身經百戰嘅佢有自己嘅一套秘訣。佢拍一拍海螢嘅屁股，強調短裙嘅重要性。

「你著嘅話會好睇啲。」海螢輕聲講道，將裙遞返俾月伶。佢嘅視線喺衫架嗰邊毫無方向咁游離，對自己應該揀咩衫仍然一頭霧水。

「又或者呢件呢？」穎怡喺其他衫架前徘徊咗一陣，將一件衫遞俾海螢。

穎怡所選擇嘅衫係一件咖啡色針織背心同一條奶茶色長裙，更加適合海螢文靜嘅氣質。

「屌！佢已經成屋都係呢啲衫，講到明係約會就唔好咁着到日常啦！」月伶無奈咁打斷兩個人，然後拎咗另外一條短裙俾海螢。

「你哋揀自己想著嗰啲衫啦。我自己睇就得。」海螢保持住同樣嘅微笑。

「拿，你要意見就問我哋啦！知你有選擇困難症。」穎怡拍一拍海螢嘅膊頭，走開咗去其他衫架度睇衫。

海螢怔怔地望住月伶俾佢嗰條格仔裙，喺度考慮究竟自己要唔要試吓著一次短裙出去。

「點解你又著成咁出去？」海螢嘅腦海浮現起屋企人對佢嘅批評，佢拎住短裙嘅手鬆咗鬆，內心開始退縮。

海螢喺一個傳統家庭中成長，重男輕女嘅父母對佢哥哥噓寒問暖，對海螢就冷嘲熱諷。海螢只要稍微用心打扮一下，父母就會惡言相向，問佢係咪勾引異性、問佢買衫嘅錢係邊度嚟。

喺屋企毫無地位嘅佢，自然養成沉默寡言、對任何人都可以百般遷就嘅性格。甚至係佢嘴邊一成不變嘅微笑都係一種保護機制，以免俾屋企人指責自己成日愁眉苦臉。

海螢唯一嘅發洩點就係打機，只有喺遊戲上佢先可以無視任何人嘅臉色，我行我素。只要自己一日仲可以喺網上自由自在咁做最真實嘅自己，海螢都可以忍受到苦澀嘅現實生活。

此時此刻，呢種想活得無拘無束嘅妄想終於燃燒到現實中，海螢緊緊握住條短裙，已經想像到父母到時變本加厲嘅責罵。

「你做乜望住條裙發吽哣？」月伶冰涼嘅手摸到海螢嘅臉，佢一臉疑惑咁望住不知所措嘅海螢，下一秒就記起海螢內心嘅掙扎。

「哦～我同穎怡夾份幫你俾囉！到時你撻我哋兩個出嚟咪得！」月伶知道海螢屋企嘅情況，體貼咁安慰道。

海螢向月伶投向感激嘅眼神，月伶唔好意思咁笑住揮一揮手，行去收銀處嗰邊排隊。

穎怡喺海螢手上拎走條短裙同針織背心，從容咁行去月伶隔離有講有笑。

「今次又係要靠佢哋幫手。」海螢嘅內心莫名其妙地煩躁起嚟，佢開始厭倦咁軟弱嘅自己、開始厭惡一直要低聲下氣嘅日子。

「咁懦弱嘅我，係咪真係可以同佢行得愈嚟愈近？」海螢咬緊嘴唇，眉頭深深咁皺埋一齊，腳步開始不受控咁行去月伶嗰邊。

「今次我俾啦。」

正當月伶要俾錢嗰陣，海螢把聲突然打斷咗佢嘅動作。

海螢漲紅住臉咁喺自己銀包拎咗幾張銀紙遞俾收銀員，令穎怡同月伶用詫異嘅眼光打量住佢。

「你肯定唔使我哋幫你？」穎怡擔憂咁問道。

「儲咗成十幾年嘅氣，我終於夠力踏出呢一步。」

幫自己打個氣先

我又返嚟啦

多謝你返嚟我仲以為要一直單機落去

今日仲有無貨仔

冇啦，每日都好努力咁盡量出多啲貨終有一日會做到一日兩更嘅

加油呀樓主

好睇呀！
樓主呢個故我追硬㗎啦！

樓主，我今日開始追故啦！你加油呀

多謝你

多謝你

等你更

(22) 呷醋
「十二月二十二日」浩俊一瞓醒就睇到手機上顯示嘅日期，佢一反平時會賴床嘅常態，精神奕奕咁㩒開Whatsapp。

下一秒浩俊就冷哼一聲，將電話揼去枕頭隔籬，氣沖沖咁行去洗手間梳洗。浩俊由尋日起身開始就不斷睇自己有冇收到新message，然而隨住驚驚嘅名逐漸俾其他新嘅message刷落去，佢嘅心情亦都愈嚟愈低沉。

「佢會唔會係出咗意外？」浩俊刷牙嗰陣突發奇想，佢從來未試過咁在意一個人有冇搵佢。浩俊耷低頭吐走牙膏，快步行返睡房度拎起手機。

當浩俊㩒入同驚驚嘅對話嗰陣，驚驚咁啱顯示住在線上，浩俊即刻㩒熄螢幕，唔想對方知道自己一直等緊佢嘅事實。

浩俊等咗一秒又一秒，仍然未收到驚驚嘅message，餓腸轆轆嘅佢放棄內心嘅掙扎，拎住手機去廚房。

「唔搵我都正常嘅，要搵都搵女神先。」浩俊扭開煤氣爐嘅力道無緣無故咁加重，佢諗起前日同驚驚嘅對話就愈嚟愈唔甘心。如果冇興趣就唔好同自己傾足一日偈，然後第二日就人間蒸發啦係咪？！

浩俊嫻熟咁將蛋打落平底鑊度，嘗試靠煮早餐去打消內心嘅煩躁。透亮嘅蛋液一受熱就滋滋作響，瞬間就凝固成形，散發令人垂涎欲滴嘅蛋香。

出生於單親家庭嘅浩俊碰巧遇著一個唔擅長煮飯嘅阿媽，芫茜釀薯仔、吞拿魚焗皮蛋等黑暗料理就係佢細個嘅日常飲食。於是浩俊唔單止練成鋼鐵一般嘅腸胃，更加鍊出一手好廚藝。

一隻金黃嘅太陽蛋喺平底鑊成形，圓碌碌嘅蛋黃同焦脆嘅邊緣更加可以刺激到任何一個人嘅食慾。

浩俊正想將自己嘅傑作放入碟度嗰陣，突然電話「叮」一聲響起，令佢隻手一震，完美無缺嘅蛋一下子跌落碟上。

佢望住搖搖晃晃嘅蛋黃鬆咗口氣，然後拎起手機，睇吓係邊個破壞佢好事。結果浩俊一望到message自己嘅對象嗰刻，深鎖嘅眉頭瞬間釋然，感覺心情就好似面前塊太陽蛋咁溫暖。

驚驚：打唔打機？

「打啊！」浩俊內心誠實咁大叫道，但係佢反而㩒熄手機，暫時唔想回應驚驚。咁快就覆嘅話，咪會令到自己好似好急不及待想同對方玩咁。

浩俊魂不守舍咁篤爆太陽蛋嘅中心，誘人嘅蛋黃瞬間潺潺而流，佢又再次將視線放喺手機上。到底要唔要覆佢呢？

浩俊嘅身體最後選擇誠實咁行動，佢狼吞虎嚥咁完成早餐，右手飛快咁喺手機上打咗一行字send出去。

桃味糖：好啊，我而家online

「佢覆咗我話會玩喎，我熄mic去個廁所先。」穎怡本來同月伶喺遊戲上組隊閒聊。佢尋日行咗成日街之後，早已筋疲力盡，一掂到張床就即刻一覺瞓天光，啱啱起身先記得桃味糖嘅存在。

浩俊一登入到傳說對決就收到來自驚驚嘅組隊邀請，浩俊等咗一日嘅鬱悶心情瞬間一掃而空，佢嘴邊嘅笑意變濃，終於可以同對方打機啦！

「早晨啊阿桃！」

「點解又係月伶？」月伶把聲喺浩俊耳邊響起嗰刻，浩俊嘅表情就沉咗落去。果不其然，驚驚同佢女神又喺埋一齊組隊。咁究竟叫自己過嚟打機嘅意義喺邊？

元朗桃味糖：早晨(✪ω✪)
元朗桃味糖：尋日成日都唔見驚驚online嘅？

浩俊按捺住惱火，裝作若無其事咁問道。佢苦苦咁等咗一日，估唔到到頭嚟都係要做電燈膽。

「尋日我同驚驚出咗成日街，所以冇時間打機～」月伶從容咁講道：「佢特登為咗你買咗套新衫，話想留個好印象俾你喎～」

今日月伶碰巧心情好，放棄同桃味糖明爭暗鬥。佢意識到桃味糖嘅問題意有所指，決定調戲下對方。

浩俊終於明白咩叫一啖砂糖一啖屎，原來驚驚成日唔搵自己係因為同女神出街。佢一諗起就唔啹，感覺自己好似俾驚驚用咗嚟攝時間咁。

但係驚驚為咗自己買衫？即係佢在意自己？

浩俊得知驚驚有顧及到自己嗰一刻，沉咗落去嘅心又俾人拉返上嚟。

元朗桃味糖：出街又唔叫～

浩俊知道自己唔覆嘅話會顯得自己特別在意兩個人出街嘅事，佢唯有開個玩笑敷衍了事。

「我哋要二人世界吖嘛～」月伶講咗個大話，尋日三人行嘅事俾佢扭曲到曖昧不清嘅二人約會。佢臉上泛起狡猾嘅笑容，內心摩拳擦掌咁打算要刺激一下桃味糖。

「二，二人世界？！」浩俊聽到月伶嘅說話嗰陣，大腦一瞬間變成一堆亂碼，月伶唔係鍾意曦銘㗎咩？

浩俊目瞪口呆咁停咗喺度，唔知道應該點回覆對方。有一絲酸溜溜嘅感覺喺浩俊嘅內心萌芽。點解佢會咁在意驚驚係咪出咗街嘅事呢？點解佢咁在乎對方係咪同女神一齊嘅事呢？

「唔得，我要定啲嚟。」浩俊強行鎮定躁動不安嘅內心，今次佢決定要尋求援助。

今日早啲更新一章先！希望夜晚趕得切更多一篇

留名先

Lmlm

(23)
「既然你咁鍾意曦銘，咁我就幫下手啦。」浩俊對曦銘喺月伶心目中嘅位置仍然抱有一絲希望，佢果斷地Whatsapp召喚對方嚟打機。

浩俊：打機？月伶喺度
曦銘：OK!

曦銘一見到月伶嘅名就充滿活力，佢不加思索就登入傳說對決，下一秒就加入到月伶同浩俊所在嘅隊伍中。

「曦…曦銘早晨！」月伶一見到曦銘嘅存在就心如亂麻，聲線間帶住顯而易見嘅慌張。此時此刻嘅佢內心好似倒瀉咗樽調味料咁，對曦銘嘅出現又驚又喜，同時妒忌桃味糖同曦銘之間嘅關係。

西鐵線驚驚：啱啱肚痛所以唔喺度，你哋講到邊？

穎怡揞住胃咁行返去睡房，估唔到自己俾腸胃折磨嘅期間咁快就齊人。佢望到月伶、曦銘，同桃味糖一言不發嘅模樣，已經預想到一陣會有場腥風血雨嘅戰爭。

「一叫曦銘嚟打機佢就即刻on，真係好。」月伶嘅視線停留喺桃味糖嘅icon度，露出羨慕嘅眼神。

「開game啦喂！」曦銘罕有地開mic講嘢打破僵局，雀躍嘅聲線帶動場內嘅氣氛。原本仍然坐立不安嘅月伶亦都冷靜落嚟，曦銘溫柔嘅聲線就好似鎮靜劑咁撫平佢焦慮嘅心情。

元朗桃味糖：曦曦，我哋幾時再出街啊( つ•̀ω•́)

浩俊諗住以其人之道還治其人之身，既然月伶故意拎佢同驚驚約會嘅事去刺激自己，咁自己都冇必要再客氣落去。

「小姐，你太年輕了。」月伶不屑咁喺內心取笑對方，桃味糖唔係以為佢會介意曦銘同對方單獨出街啊？

平日月伶一向不乏追求者，佢對於同異性出街已經慣以為常，普通朋友之間出去行吓又點會影響到佢心態呢？

「咩啊～我早排先去完你屋企咋喎！」曦銘似乎仲喺狀況外，直率咁回答道。

「屋…屋企！？」月伶頭上剎那間行雷閃電，佢不可置信咁「下」咗一聲。

究竟知道咗自己男神去另外一個女仔嘅屋企係咩感受呢？月伶冇辦法準確描述自己嘅心情，佢呆若木雞咁停咗喺度，無言以對。

月伶想像到曦銘一臉寵溺咁摸住另外一個女仔嘅頭，兩個人坐喺梳化上面你儂我儂，佢愈諗心入面就愈難受。

睇嚟月伶同曦銘之間嘅距離比想像中更加遙遠。

元朗桃味糖：阿月嗰邊點解會咁靜嘅？

浩俊見月伶一時間默不作聲，篤定佢肯定係俾曦銘嘅說話嚇親。

「冇，冇諗過你哋會咁熟啫。」月伶吞咗啖口水，成個人已經失去一開始洋洋得意嘅氣勢。

元朗桃味糖：點解咁講呢？我都冇諗過你同驚驚咁熟啦～
元朗桃味糖：尋日你哋二人世界喎( ಠ ಠ )

抱住報復心態嘅浩俊一口氣咁將自己嘅不滿發洩出去，故意將月伶同驚驚之間嘅關係變得含糊不清。

「哦…原來你同驚驚係呢種關係？」曦銘突然出聲講道，浩俊嘅一番說話令佢對驚驚同月伶嘅關係另眼相看。

曦銘莫名其妙地失望起嚟，但係佢清楚自己冇權去干預人哋嘅感情生活。

畢竟曦銘只不過係月伶嘅一個師兄。

「件事唔係咁嘅—」月伶聽到曦銘語氣嘅變化，焦急咁解釋道：「咁啱約出街咋…」

「唔緊要架，我明！」曦銘尷尬咁笑住打圓場：「我打完呢場有啲嘢做，遲啲再一齊玩。」

「…好。」月伶欲言又止，佢恨不得即刻同曦銘解釋一切嘅來龍去脈。

「其實驚驚根本就係女仔嚟—」月伶內心吶喊道：「我淨係想同你二人世界咋…」

曦銘見月伶冇再解釋落去，令佢更加肯定月伶同驚驚之間嘅關係唔簡單。佢重重咁嘆咗一口氣，冇諗過今日同月伶一齊打嘅第一場遊戲就要面對翻天覆地嘅轉變。

「件事唔係好似你諗咁架…」