是咁的，我鍾意咗隻網絡人妖。

等你更新呀樓主

呢兩日會更新㗎喇，會一次過更兩至三章，好多謝大家仲未忘記呢個故

(30)
十二月廿四號，晏晝兩點，係海螢同佢嘅心上人第一次見面嘅日子。

海螢假裝漫不經心咁四處張望，實際上不斷掃描緊有冇熟悉嘅面孔。佢耷低頭整理好條深藍色短裙，希望對方會鍾意佢精心搭配出嚟嘅衫

到底應該點樣面對佢呢？佢會唔會嫌棄我同網上面嘅形象差太遠？海螢略為緊張咁握緊拳頭，手心冒出汗水。

明明平時已經同佢傾得好密，佢都應該熟悉自己嘅性格，但點解一出到嚟反而會咁焦慮呢？海螢諗到出神嗰陣，突然有隻手拍上佢嘅膊頭。

「唔好意思啊海螢，啱啱有客，所以遲咗少少。」一個陌生嘅男仔忽然映入海螢嘅眼簾，唔通呢個就係鐵馬秋軒？

雖然男仔戴住口罩同眼鏡，但海螢仍然見到對方稜角分明嘅輪廓，一對桃花眼水光瀲灩，有一種專屬少年時期嘅青澀氣質，同海螢想像中鐵馬秋軒嘅成熟形象大相逕庭。

明明佢當初話自己樣貌平平，好明顯就係語言偽術嚟！！海螢內心吶喊道。

「啊？」海螢一時間大腦未反應到，呆若木雞咁企咗喺原地望住對方。

「你叫我阿軒得㗎啦。」鐵馬秋軒覺得有啲尷尬，乾笑咗幾聲，海螢見到金絲眼鏡後笑成彎月嘅雙眼，心跳好似漏咗一拍。

海螢一向對網友嘅外貌冇任何期望，結果今次對方嘅外表竟然比起想像中更好睇。話就話海螢極度怕生，但佢面對靚仔嘅時候抵抗力一瞬間煙消雲散。

係咪應該試吓買下期六合彩？海螢內心激動道。

「唔緊要啦，都唔係遲好多啫。」海螢擰一擰頭唔敢再直視阿軒。本來佢喺陌生人面前已經十分內向，喺靚仔面前越發羞澀，平時講嘢輕聲細語嘅聲線再減弱幾分。

海螢害羞嘅模樣就好似怕醜草咁，輕易地激發其他人嘅保護欲。阿軒饒感興趣咁望住海螢嘅反應，毫無唔耐煩嘅情緒。

「你係咪等到好肚餓？我帶你食好西好無？」阿軒體貼咁問道，令海螢緊繃嘅狀態開始放鬆。

海螢岌咗下頭，再一次默默咁望向阿軒嗰邊，個心唔爭氣咁開始亂跳。

衰嘢，見到靚仔就激動。試吓唔好咁毒呀林海螢！！振作啲呀！！海螢喺阿軒身後無奈地拍咗下額頭。

行喺前面嘅阿軒餘光打量到海螢嘅動作，眼波盈盈，嘴角染上一絲笑意。佢不動聲色咁放慢腳步，拉近同海螢之間嘅距離，令嬌小嘅海螢更加似一隻被自己保護嘅小動物咁。

「你諗住食咩？」海螢細聲咁問道，兩個人喺熙熙攘攘嘅人群中寸步難行，怕生嘅佢不安咁捉住阿軒恤衫嘅一角。

「我哋去食串燒好無？之前聽你講過鍾意食吖嘛。」阿軒隨口答道。

「咁耐之前講過嘅嘢你都記得？」海螢受寵若驚，佢回想起當初識阿軒嗰陣純粹略略帶過自己鍾意食串燒一事，冇諗過對方會將自己嘅說話放喺心入面。

「邊會唔記得呢？」阿軒疑惑咁擰轉頭望向海螢，彷彿自己理應記低對方嘅愛好。

平時除咗穎怡佢哋都唔會有人咁認真看待自己……海螢抬頭望住阿軒高高瘦瘦嘅身形，碰巧同對方四目交投，佢剎那間有種想依賴對方嘅感覺。

「係冇諗過你記憶咁好啫…」海螢移開視線嗰陣，左邊經過兩手拎住嘢食嘅中學生，對方似乎俾地下嘅雜物絆倒，成個人向海螢倒過嚟。

「小心啲。」阿軒眼明手快咁將海螢拉近自己嘅方向，令海螢成功避開一劫。

海螢見到中學生手上嘅小食全數跌落地下，手腕喺阿軒手中不斷掙扎，對方亦識相地鬆開手。

海螢默不作聲咁摸一摸手腕，然後繼續跟喺阿軒身後。到底係阿軒嘅手掌太暖，定係呢度太熱，點解俾佢握住嘅地方好似會特別暖咁嘅？

明明只係喺網上面傾得多，但點解佢同我之間嘅身體接觸喺佢眼中會咁自然呢？海螢百思不得其解，側起頭打量喺面前帶路嘅阿軒。

(31)
正值午市時間嘅餐廳入面充滿密密麻麻嘅人頭，阿軒同海螢平排咁坐喺吧檯前，兩個人之間嘅距離隨住行過嘅人愈嚟愈多，變得愈嚟愈近。

「你想食啲咩？」阿軒靠近海螢嘅側邊，膊頭有意無意咁掂到對方。

當海螢感覺到佢同阿軒嘅膊頭撞埋一齊嗰陣，佢好似觸電咁即刻同阿軒扯開距離，慌張咁望住一臉疑惑嘅阿軒。

「你話事啦。」海螢尷尬咁望去另一邊，佢知道自己喺阿軒眼中顯得反應過大，但一向抗拒身體接觸嘅佢根本控制唔到當刻嘅本能反應。

阿軒神色自若咁當啱啱啱啱乜都冇發生過，嫻熟咁喺落單紙上面剔嚟剔去。

海螢望住阿軒所揀嘅九成食物都係自己曾經講過話鍾意食嘅類型，個心開始不受控咁亂跳起嚟。佢喺枱底狠狠咁捏住手心，提醒自己唔好咁快鬆懈。

但係諗多兩諗，又好似真係未遇過對我咁溫柔嘅異性…體貼到會記低我最鍾意食嘅嘢，甚至無時無刻都照顧住我…

俾啲矜持好冇！人哋對你好啲就即刻對人有好感？！唔好因為人哋對自己稍微溫柔少少就自作多情！海螢托起腮側起頭望坐喺隔離嘅阿軒，內心波濤洶湧。

佢眼睫毛真係長啊，點解皮膚又可以咁白嘅？佢認真嗰陣個樣好好睇啊……海螢喺勸完自己之後嘅下一秒重新陷入花痴模式。

「做咩一直望住我？」阿軒被海螢望到開始唔好意思，佢下意識咁托一托眼鏡，將張紙推去海螢面前。

「冇啊。」海螢本身望住阿軒個樣發吽哣，佢一時間反應唔切，唯有心虛咁望去其他地方。

試下唔好咁柒？！海螢內心大叫道，佢恨不得即刻將個頭冚去牆撞醒自己。

「一開始以為你話自己好內向嗰陣係開玩笑—」阿軒揮揮手，將落單紙遞俾侍應。

上天真係唔公平，個樣好睇都算，連隻手都要生得咁修長⋯海螢彷彿聽唔到阿軒嘅說話，視線停留喺對方骨節分明嘅手上。

「原來你的確好怕醜。」阿軒再一次開口，佢屈起手指喺枱上面敲咗幾下，將海螢拉返去現實。

海螢有種俾人篤穿咗嘅感覺，佢嘅指尖不知不覺地摸上裝住可樂嘅玻璃杯，嘗試為內心降溫。

佢唔敢抬起頭同阿軒對視，唯有望住喺可樂上浮浮沉沉嘅冰塊，就好似自己個心咁，慢慢咁沉淪喺對方嘅溫柔……

唔係！唔好再諗咁多！海螢嘅理智強行打斷海螢嘅思緒飄到幾千萬里外。

「網上面冇人知道我嘅真實身份，可以自在啲—」海螢見到阿軒一臉認真咁望住自己嗰陣，下意識頓咗頓：「喺現實生活就要睇人臉色。」

一碟串燒喺海螢講緊嘢嗰陣放咗上枱面，海螢嘅目光隨即由阿軒塊面轉移到金黃色嘅雞軟骨上。

「咁要多謝螢姐肯賞面出嚟同我食飯先。」阿軒嘅嘴角染上笑意，佢彷彿上貢俾海螢咁，將一串雞軟骨舉到對方眼前：「呢餐我請。」

「邊會係姐姐啊…明明你仲大過我兩年。」海螢無奈咁講道，身體反而誠實咁抬起手拎走串雞軟骨。

「不過對住我嗰陣唔需要咁拘謹。」阿軒直視海螢，真誠咁講道：「我比較鍾意你做返自己。」

鍾意我？？做返自己？！我係咪聽錯？點解而家啲男人講嘢咁引人誤會架！！

海螢當下大腦直接彈出Error 404嘅窗口，佢嚇到連串燒都食唔落，直接咬到自己條脷。

阿軒見到海螢吃痛嘅表情，笑住開口：「你咁樣去見工一定炒車架喎。」

不出海螢所料，阿軒又開始提起搵工嘅事。作為即將畢業嘅大學生，阿軒提過自己一早就有豐富嘅實習生經驗，最近更加搵到份有豐厚收入嘅工作，令阿軒不斷喺海螢面前炫耀自己前途一片光明。

「係喎，你搵到工未？」阿軒再一次開口，而海螢淨係擰擰頭，繼續將專注力放喺串燒上。

每一次海螢聽到阿軒講起工作嘅事就會開始羨慕對方，當自己仍然係一張白紙嗰陣，阿軒彷彿已經係一張充滿色彩嘅畫作。

「其實我之前都好似你咁怕醜。」阿軒突然坦白道，佢嗰對攝人心魄嘅桃花眼再一次對上海螢嘅目光，海螢今次冇再迴避對方，反而一動不動咁呆咗喺度。

之前同佢傾偈都知道佢有段時間比較怕醜，但點解要再講多次嘅？海螢內心疑惑道。

「但係自從我報名參加咗個course，我就好似改頭換面咁變咗另一個人。」阿軒繼續講道，而海螢原本羞澀嘅微笑逐漸消退。

唔撚係掛，佢係咪想推銷嗰啲改變人生嘅課程？定係佢認真架？海螢內心七上八落，一下子唔知道應該點反應好，到底應唔應該信阿軒好呢？

「我唔係個個朋友都介紹架，係見你性格都咁內向所以想幫吓你。」阿軒見海螢冇咩反應，滔滔不絕咁介紹佢所講嘅課程。

但你啱啱唔係話鍾意我做返自己㗎咩？！呢秒的我打倒上一秒的我？？海螢忍唔住喺內心反問道，佢臉上開始泛起充滿距離感嘅微笑。

「過來人同你分享心得咋，讀完個課程之後佢地仲會俾個證書你，一舉兩得。」阿軒望到海螢嘅笑容，以為自己嘅宣傳有用，更加起勁咁講落去。

過來人？過主啦大佬⋯海螢第一次經歷呢種約人出街食飯嘅推銷手法，仲要係自己有好感嘅對象。佢忽然覺得口入面𡁻緊嘅串燒難食過屎，但又唔敢輕舉妄動，唯有保持住一成不變嘅微笑。

「其實我一開始識你已經想介紹你去架啦，但我怕你以為我係推銷啲洗腦課程，所以唔敢咁快講住。」阿軒一本正經咁解釋嘅時候，自然咁拍上海螢嘅膊頭。

「係咩？」海螢亁笑道，下意識避開阿軒嘅手。

一開始識我就已經想介紹？咁傾咗咁耐係咪為咗令我更加容易中伏嘅手段？咁佢突登記低我鍾意嘅嘢食係咪都係⋯為咗呃我？咁我哋一齊度過嘅時間呢？阿軒彷彿踩到海螢條尾，令海螢嘅怒氣值一瞬間到頂。

海螢望到玻璃杯中自己嘅倒影，感覺今日突登為咗阿軒嘅自己就好似一個小丑咁令人發笑。

「係啊，我地一場朋友—」阿軒話語未落，突然一杯冰涼嘅可樂兜頭淋落自己身上。

隨住阿軒提到「朋友」兩隻字嘅嗰一刻，海螢嘅內心好似有層樓冧咗落去咁，睇嚟呢段時間發生嘅一切只不過係自己嘅一廂情願。

當初買衫嗰陣以為自己踏出嘅第一步會有相對嘅回報，結果就踩中陷阱⋯海螢慨嘆道，發洩完怒氣後嘅內心被無盡嘅失落感填滿。

海螢趁阿軒未反應到嘅時候頭也不回咁行出餐廳，留低阿軒一個手忙腳亂咁收拾現場。

好多！樓主好波

樓主你翻嚟了

終於等到！！！！