是咁的,我鍾意咗隻網絡人妖。

760 回覆
40 Like 13 Dislike
2021-03-26 10:40:22
呢個轉折我鐘意
2021-03-28 00:21:05
樓主返嚟啦淋得好爽!
2021-03-29 17:15:17
(32)
十二月廿四號,下晝五點十五分。

人呢?穎怡唔耐煩咁望咗眼電話右上角所顯示嘅時間,發現桃味糖已經遲咗成十五分鐘。而對方彷彿人間蒸發咗咁,連Whatsapp都冇上線。

佢百無聊賴咁喺社交網站上睇其他人嘅近況,突然間醒起月伶同海螢嘅事。

自從月伶同曦銘出咗去之後,月伶就對嗰日約會嘅事隻字不提,令穎怡同海螢諗到一頭霧水,但又唔夠膽主動問對方。

扮唔知總好過主動踩中人哋地雷。
2021-03-29 17:15:29
咁海螢呢?今日佢同嗰個鐵馬秋軒出去之後又係粒聲唔出,穎怡發現原本熱鬧嘅Whatsapp group此時此刻變得無比冷清。

穎怡:喂冇人講嘢嘅??旺一旺個Group先!
穎怡:想問而家啲人係咪都興遲到,我已經等咗好耐啦

喺螢幕嘅另一邊,月伶一望到穎怡嘅Whatsapp就下意識想忽略對方。

時間已經所剩無幾,到底要唔要同穎怡講桃味糖係浩俊好呢?穎怡又會唔會因為自己有份隱瞞事實,而嬲埋自己呢?

但係作為穎怡嘅最佳損友,自己又有咩可能錯過食花生嘅機會呢?
2021-03-29 17:15:40
月伶思考片刻,喺Whatsapp度send咗一段字出去。

月伶:遲到是常識吧?你咁準時其實對人嚟講好大壓力架

扮唔知總好過主動踩中人哋地雷!

海螢:你有冇諗過係朋友先會遲到?

穎怡一臉無奈咁望住朋友理直氣壯咁顛倒黑白,悻悻然咁熄咗手機螢幕。

今時今日有一班咁支持自己嘅朋友,其實唔係一件容易嘅事。佢內心自嘲道。
2021-03-29 17:16:19
地鐵站入面人來人往,淨係得幾個人企喺附近四處張望,但係仍然冇一個人符合到穎怡心目中對桃味糖嘅印象。

著白色T Shirt嘅阿伯、帶住黑框眼鏡嘅中學生、一臉疲倦嘅上班族,同埋一個睇落同自己年紀相近嘅女大學生……咦?

穎怡仔細打量企喺自己不遠處嘅女仔,對方著住碎花短裙,留住長頭髮,一睇就覺得係桃味糖嗰類嬌滴滴嘅女仔。

放鬆心情,當自己一早已經識佢。簡單直接咁同對方講自己男扮女裝,然後道歉。記得企遠啲,避免對方太激動打到自己。

紙巾,Ready。台詞,Ready。拳頭,Ready。

穎怡喺大腦彩排過一次一陣間嘅行動,然後深深咁唞咗一啖氣,向目標人物行過去。

當穎怡行到離女仔嘅位置仍然有幾步之遙嗰陣,女仔突然間抬起頭望過去自己嘅方向。

唔係吖嘛,咁易就穿煲?!穎怡驚訝咁望住女仔。
2021-03-29 17:16:30
「點解咁耐架BB~我等咗你好耐啊~」女仔向穎怡嘅方向講道。

正當穎怡仍然唔知道應該點反應嗰陣,一個男人係自己身後行過去女仔隔籬,拖起女仔隻手就帶走對方。

穎怡不知所措咁企喺原地,大腦不斷咁重複啱啱所發生嘅事。

穎怡腦海浮現起一年前嘅記憶,當時自己諗住喺地鐵站交收最鍾意嘅動漫模型,結果認錯人,遇著一個交收寫真集嘅賣家。

佢仲記得嗰陣自己尷尬到想瞬間憑空消失,但事與願違,佢淨係可以乾笑住咁搵番本應同自己交收嘅對象。

好彩啱啱未開口講嘢啫,唔係嘅話就柒到飛天。穎怡嘅思緒返到現實,內心幸災樂禍道,但內心開始有道莫名其妙嘅怒火。

所以桃味糖人喺邊??
2021-03-29 17:16:43
穎怡:你去到邊?係咪有急事?我可以等埋你(翻譯:你死咗去邊呀大佬,等你等到頸都長啦,係咪俾車撞???)

當穎怡將段字send俾桃味糖嘅時候,穎怡身後響起「叮」一聲嘅Whatsapp提示音。

咦,唔通佢到咗?穎怡好奇咁隨住聲音嘅來源轉身去睇吓係邊個,結果一眼就見到令自己不寒而慄嘅熟悉面孔。

當上帝閂咗一道門,令自己認錯人嘅時候;必定會閂埋另外一道窗,俾自己遇到最想迴避嘅人。
2021-03-29 17:17:26
拍個手先,終於寫返主線劇情
2021-03-29 23:22:10
已經期待緊下一篇
2021-03-30 02:43:32
lm!!!!!!
2021-03-30 12:38:17
(33)
幻覺嚟㗎啫,嚇我唔到嘅!

雖然之前都見到佢喺屋企附近嘅公園跑步,都估到佢應該係住呢頭㗎喇,但—

到底再一次遇返之前偷拍過嘅人係咩運氣?穎怡嘅大腦不斷咁諗出唔同嘅應對方法,行開?定係若無其事咁企喺度?
2021-03-30 12:38:41
穎怡僵喺原地一動不動,佢餘光打量到男仔企咗喺自己隔籬。睇嚟對方都喺度等緊人。

佢提心吊膽咁繼續耷低頭望電話,明明桃味糖喺Whatsapp度顯示在線上,但對方仍然唔覆自己嘅訊息。

唔通佢想放飛機?

快啲覆啦!!!穎怡內心吶喊道,唔知道係因為隔籬嘅人身材高挑,定係因為自己作賊心虛,穎怡總係感覺到有種濃濃嘅壓迫感。
2021-03-30 12:39:04
其實放飛機都幾好啊?至少而家自己可以即刻拍拍籮柚走人,唔需要再企喺仇家隔籬。

穎怡:喺邊?

穎怡膽戰心驚咁作最後掙扎,打算如果對方仍然唔覆嘅話就即刻逃離現場。

「叮」

唔撚係掛?
2021-03-30 12:40:27
穎怡嘅大腦一瞬間變成一片空白,佢難以置信咁抬起頭,一臉驚嚇咁望住企喺隔籬嘅人。

佢嚇到即刻望返手機,發現佢同桃味糖之間嘅對話多咗行新訊息。

桃味糖:喺你隔籬

成件事對穎怡而言仲恐怖過親眼目睹貞子爬出電視,佢成世人都未試過經歷類似嘅事。

「桃…桃味糖?」穎怡再一次望去男仔嘅方向,戰戰兢兢咁講道。
2021-03-30 12:40:41
You竟然是個boy???

但同時點解偏偏要係之前捉到自己偷拍嘅人啊—

「驚驚?」浩俊神色自若咁問道,彷彿已經唔記得穎怡之前對佢所做過嘅事。

「你…唔係女人嚟架咩?」穎怡驚慌失措咁問道,一向唔怕生嘅佢呢一刻發生故障。

「你唔係男人嚟架咩?」

對方嘅反問令穎怡無言以對,佢同浩俊你眼望我眼,場面一時間陷入寂靜。
2021-03-30 12:40:55
即係我媾嘅唔係女,而係仔?而我一直都估唔到?穎怡內心問道。

「你好人好者做咩網絡人妖?」穎怡已經將得罪過對方嘅事拋諸腦後,反而被怒氣沖昏頭腦。

佢冇諗過俾人欺騙嘅感受會咁複雜,由桃味糖調戲自己嘅嗰陣,到開始同對方傾偈,逐漸了解對方,到而家發現原來對方竟然係一個男仔……到底一直以嚟嘅相處有幾分係真?
2021-03-30 12:41:13
「你係咪應該問返自己?」浩俊不怒反笑,佢都冇諗過一直以嚟同自己傾偈嘅人原來係一個女仔。

「咁打和囉…」穎怡唔忿氣咁迴避男仔嘅視線,生得咁好睇但就有啲咁奇怪嘅癖好…真係暴殄天物。

「再唔搭車就會遲。」浩俊似乎唔想再喺啱啱嘅話題上糾纏落去,佢行前幾步,示意穎怡跟住佢一齊走。

「你一陣叫我阿怡就得。」穎怡整理好思緒,決定行去浩俊隔籬。

「你可以叫我阿俊。」浩俊言簡意賅咁答道,然後快步行入車廂。

俊?邊撚度俊呀?穎怡內心嘲笑道。
2021-03-30 12:41:24
然後下一秒穎怡就親身體驗咗次自打嘴巴嘅滋味。

接近六點嘅太陽就好似粒鹹蛋黃咁,陽光恰好照到浩俊嘅臉上,令穎怡再一次陷入花痴模式。

又真係幾俊嘅…穎怡再一次睇到入神,由對方又濃又長嘅眼睫毛,到佢對清澈見底嘅眼。

穎怡都係第一次見識到原來有人塊面係可以完全符合佢嘅取向。
2021-03-30 12:41:38
佢好似已經唔記得我之前嘅事,睇嚟可以挽救下形象…穎怡抬頭望咗眼企喺對面嘅浩俊。

「你望乜鳩?係咪又諗住偷拍我?」浩俊被穎怡望得唔耐煩,忍唔住開口問道。

我都係收返啱啱嗰句算⋯穎怡內心欲哭無淚。
2021-03-30 23:26:47
live!
2021-03-30 23:31:47
樓主好勤力
2021-03-31 19:06:24
2021-04-03 21:56:27
一個鐘live咗
2021-04-03 23:33:48
乜撚野鳩故黎
點解我係到睇成半個鐘
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞