是咁的，我鍾意咗隻網絡人妖。

「冇嘢啦！你唔使擔心我點諗嘅！」曦銘嘗試以最自然嘅語氣掩飾自己嘅情緒。

曦銘喺場遊戲完咗嘅嗰一刻即刻退出隊伍，月伶感覺自己就快壓抑唔住就快湧出嚟嘅眼淚，同時登出遊戲，想一個人靜下。

​穎怡默不作聲咁旁觀完場鬧劇，發現自己愈嚟愈摸唔透桃味糖嘅心態。點解佢要特登令曦銘誤會自己同月伶嘅關係？

西鐵線驚驚：點解要咁做？

喺另外一邊，浩俊嘅心情同樣地消沉。佢望住驚驚嘅質問，選擇㩒熄螢幕，唔想面對現實。

「我究竟係發生咩事？」

一直性格木訥嘅浩俊從來未試過有咁大嘅情緒起伏— 佢唔單止會在乎一個人有冇搵佢，更加會為咗對方同其他人爭風呷醋，啱啱甚至一氣之下令曦銘同月伶之間產生咁大嘅誤會。

佢發現自己嘅異常竟然都係源於對一個素未謀面嘅男仔嘅關心。

「唔通我中途轉基？」浩俊嘅內心變得愈嚟愈迷茫。

好彩趕得切！走數成功！

好彩趕得切！找數成功！

唔好意思太激動打錯字

樓主真係好勤力，故事都好好睇樓主加油G持你

(24)
曦銘登出咗遊戲後垂頭喪氣咁除低耳機，佢對於啱啱嘅情緒起伏感到困惑，點解自己會咁介意呢？

佢挨喺張電腦凳上望住天花板發吽哣，明明自己啱啱先起身，但只不過係打咗一舖機就心力交瘁。

可能係瞓得唔夠？一向充滿活力嘅曦銘好少會喺其他人面前露出自己嘅疲態，甚至係負面情緒。佢合埋眼，嘗試去平息心煩意亂嘅內心。

佢腦海浮現嘅第一個畫面係幾年前嘅月伶，起初月伶喺補習班入面係橫行霸道嘅大魔王，雖然佢樣貌標緻，但係成日都面色陰沉，散發住生人勿近嘅氣場。

而曦銘同月伶嘅性格南轅北轍，佢無時無刻嘴邊一直掛住溫暖嘅笑容，喺人哋眼中係平易近人嘅學長。

曦銘當時對月伶最深刻嘅印象就係佢嗰條馬尾— 當曦銘注意到月伶不斷偷望自己嗰邊嘅方向，佢就會好奇咁望返過去。一旦月伶同曦銘嘅眼神互相交匯，月伶就會即刻擰轉頭，若無其事咁做返自己嘅練習。

當曦銘仲擔心緊同月伶會唔會相處到嗰陣，月伶見到曦銘嘅嗰一瞬間就眉開眼笑咁同佢傾訴自己學業上嘅難題。

月伶嘅反差令曦銘頓時呆咗呆，原來令人聞風喪膽嘅大魔王笑起嚟係可以咁人畜無害。

可能係因為月伶嘅氣場過於強勢，得自己願意去接近佢，所以佢先對自己咁好，曦銘喺內心解釋道。

月伶總係可以激發曦銘嘅保護欲，曦銘亦都樂於給予額外嘅關心俾對方，然而永遠都點到即止。

每一次月伶同曦銘分享自己嘅心事嗰陣，曦銘都會摸一摸對方嘅頭去安慰佢，而月伶就會抬起頭，用意味深長嘅眼神望住曦銘。

即使曦銘開始感覺到月伶對自己抱住曖昧不明嘅感情，佢仍然選擇視若無睹，刻意保持距離。

到底係出於對後輩嘅照顧，定係其他更複雜嘅情感呢？實際上曦銘連自己對月伶嘅感覺都未搞清楚。

嗰種只不過係對前輩嘅仰慕，又或者係日久生情— 曦銘不斷咁搵各種各樣嘅藉口去解釋月伶嘅少女情愫。

曦銘仲記得當佢中學畢業後返到補習社嘅嗰一日，月伶握緊拳頭保證自己一定做到佢嘅大學師妹。佢嗰陣笑住咁話會等月伶，仍然唔敢認真看待對方嘅誓言— 挑燈夜讀從來唔係月伶嘅風格，佢考到先再算啦。

喺兩個人冇再見面嘅期間，曦銘都有聽過月伶身邊不乏追求者，甚至有佢同其他男仔交往嘅傳聞。

曦銘知道自己喺月伶嘅心目中只不過係曇花一現，佢鬆咗一口氣嘅同時，內心卻產生咗一絲空虛感。

同時間，曦銘唔知道月伶同其他人拍拖只係為咗沖淡自己對曦銘嘅思念。曦銘唔知道嗰一年半內月伶無時無刻都同放棄嘅念頭作鬥爭，認真讀書對月伶而言唔容易。

曦銘唔知道每一次月伶處於半途而廢嘅邊緣嗰陣，月伶都會㩒開曦銘嘅Instagram尋求慰藉。只要一望到曦銘多姿多彩嘅大學生活，月伶總會幻想自己可以名正言順咁坐喺曦銘隔籬一齊上堂，同曦銘一齊返學，同曦銘一齊食飯。

只要係曦銘，月伶都會不顧一切，重新埋首於自己最厭惡嘅書籍之中。

於是一年半後月伶遵守諾言，出乎意料地考入曦銘就讀嘅大學，兩個人順理成章咁相約一齊返學。

「曦銘！」月伶一見到曦銘就綻開燦爛嘅笑容，一路小跑到曦銘嘅隔籬。曦銘怔怔咁企咗喺度，因為太緊張嘅關係而一動不動。

「恭喜你啊！」曦銘滿面笑容咁恭賀月伶，佢哋終於又重新變返師兄同師妹嘅關係。

佢滿心歡喜咁計劃自己一定要同月伶介紹邊一間canteen好食，邊一個course係大伏。曦銘有千言萬語堆積喺自己內心深處，但係佢總係講唔出口。

月伶會唔會覺得自己好煩？自己會唔會做多咗？

「我係咪好叻呢？」月伶得戚咁側一側頭嘅時候，曦銘發現月伶中學時紮嘅高馬尾已經放返落嚟，以往傲慢嘅眼神亦蕩然無存。

佢係成熟咗啫，大個咗識打扮自己，陌生咗好正常。曦銘又再一次搵藉口解釋月伶嘅變化。

「係呀。」曦銘習慣性咁抬起手，打算摸落月伶嘅頭。但當佢手掌去到喺月伶頭髮上方嗰陣停咗下，曦銘突然遲疑不決起嚟。

月伶會唔會已經有男朋友呢？摸頭會唔會太曖昧？

最後曦銘輕輕咁拍咗一下月伶嘅頭就作罷，月伶隨即詫異咁望向曦銘。而曦銘隨即避開對方嘅視線，不知所措咁四圍望。

只不過係短短嘅一年半，月伶唔再係嗰個隨心所欲嘅師妹，曦銘不得不承認對方已經變成一個亭亭玉立嘅女人。

自從嗰一日起，有一種無形嘅壓力喺度催促曦銘要儘快面對段關係。只要曦銘仍然未整理好自己嘅感情，佢每一次同月伶相處嘅時間都好似跑馬燈咁飛快掠過。

儘管如此，曦銘依舊有意無意咁逃避現實。一切直到啱啱佢親耳聽到月伶同其他人約會嘅嗰刻，曦銘嘅心情剎那間跌到落谷底，嗰種空虛感再一次油然而生。

曦銘重新擘大眼望住天花板，記憶中嘅月伶瞬間煙消雲散。原來月伶嘅身影一直留喺自己嘅內心深處，自己對佢嘅真情實感亦未曾變淡。

「我真係廢。」曦銘自嘲道，佢懊惱咁雙手抱頭，後悔自己唔願意同月伶坦誠相對。

放喺枱上嘅手機突然「叮」一聲響起，曦銘好奇咁解鎖螢幕，就見到月伶send過嚟嘅message。

月伶：其實我同驚驚係普通朋友咋

曦銘如釋重負咁揞住面，腦海中再一次浮現月伶笑住咁向自己行過嚟嘅情景。

「今次我唔會再咁懦弱。」曦銘堅定咁講道，佢嘅視線停喺手機上面。

曦銘：你呢幾日得唔得閒？我哋搵日一齊出街？

今次，佢一定會勇敢咁同月伶坦白從寬。

正呀咁多篇文 G持樓主

又有新文！！樓主好嘢！！

樓主好勤力呀

好多文呀

屌 live咗

加油樓主 好好睇 唔好放棄

(25) 錯覺
十二月廿二號，下午一點半。距離平安夜又近咗一日。

穎怡一臉大惑不解咁望住手機，究竟桃味糖背後嘅意圖係咩？究竟佢係有心定無意咁令月伶同曦銘之間產生咁大嘅誤會呢？

雖然穎怡一向都唔鍾意同人嘈交，但係當佢一諗起月伶當時急急忙忙咁退出遊戲嘅樣，佢嘅怒火就好似撻著咗咁。

驚驚：你啱啱係咩事？

穎怡開始後悔自己當初按照月伶嘅計劃同桃味糖行得愈嚟愈近，感覺自己最近嘅日常生活好似俾人搞到亂七八糟咁，而佢心目中嘅罪魁禍首就係桃味糖。

當浩俊收到驚驚嘅Message嗰陣內心竟然產生一絲內疚感，佢從來都冇諗過要製造麻煩，亦冇諗過自己會因為一時衝動而傷害到曦銘。

桃味糖：我只不過諗住開個玩笑…

係，一個玩笑。浩俊此時此刻不知幾希望呢幾日發生嘅所有事只不過係一個無傷大雅嘅玩笑。

桃味糖：對唔住，我唔知道佢哋會介意…

浩俊講咗個大話，佢根本對曦銘同月伶嘅關係一目了然。佢亦都知道自己啱啱講嘅說話對月伶同曦銘所造成嘅傷害有幾大。但佢除咗掩飾事實之外仲可以做啲咩？

唔通同驚驚承認自己係曦銘嘅兄弟？唔通同驚驚坦白自己嘅真正身份？

驚驚：對唔住，我啱啱語氣重咗

穎怡意識到桃味糖僅僅係曦月伶銘一個熟悉嘅朋友，更何況自己一直都負責幫月伶刺探軍情，對方可能真係對月伶嘅心思一無所知。

可能一切都係源於自己對桃味糖嘅偏見，導致每一次出事都會怪喺對方身上。

桃味糖：冇事嘅！我以後唔會再開類似嘅玩笑啦～

曦銘疲倦咁按一按太陽穴，琥珀色嘅瞳孔好似失去焦點咁，一個又一個大話就好似一張又一張白紙包住火苗咁，終有一日所有嘢都會燃燒殆盡。

穎怡見到桃味糖嘅message嗰刻，佢嘅心又唔爭氣咁軟咗。

但桃味糖到底係咪真係乜都唔知呢？穎怡又忍唔住想質疑對方，點解對方一知道佢同其他人單獨出街嗰陣會咁大反應？

傾得一日偈就沉船？唔撚係掛？

驚驚：其實我哋尋日係三個人出街，冇月伶所講咁曖昧

穎怡今次選擇誠實。

浩俊見到驚驚嘅message嗰一刻抿嘴偷笑，但係佢下一秒瞬間整理好思緒— 佢唔應該再干預月伶同曦銘之間嘅關係。

根本係因為自己一時間貪玩，而導致曦銘而家咁沮喪。只要自己一開始冇咁衝動，只要自己一開始冇咁意氣用事— 可能成件事唔會落成如此田地。

桃味糖：唔緊要啦～其實我唔介意，反正我哋廿四號都會見面啦！

冇錯，自己唔應該咁介意驚驚嘅事，對方到頭來只不過係佢要整蠱嘅對象。

可能佢一開始所謂嘅「呷醋」不過係因為佢擔心自己嘅身份俾人發現，又或者係因為佢覺得驚驚彷彿係自己嘅玩具— 所以佢會咁介意。

可能嗰種「鍾意」只不過係種錯覺。

唔好意思啊今日遲咗更新下章更可愛！！！
(本身諗住呢個星期內可以post到男女主角相認嗰一part，但係計劃趕不上變化好想快啲寫到佢地見面呀！！！！)

對唔住啊今日太趕所以錯漏百出請兩日假回下氣先(為咗令大家睇得更開心)

樓主好好休息吓啦！等你！

新文

樓主勤力咗咁耐已經好叻休息是為了走更遠的路，加油