是咁的，我鍾意咗隻網絡人妖。

睇咗就啱架啦最緊要睇得開心

星期日係咪冇文

幫緊你幫緊你

「唔係，建議你唔好自視過高。」穎怡加重語氣咁講道，佢即刻移開視線，唔想再俾浩俊捉到痛腳。

明明生得咁好睇，但係把口臭過屎渠……真係寧願佢唔開口講嘢。穎怡喺內心反咗個白眼。

「咁你之前又偷影我？」浩俊饒有趣味咁望住穎怡，期待緊對方又會諗到咩新藉口。

雖然之前浩俊都試過俾其他人偷拍，但影完仲會開口同自己講嘢嘅人……得企喺對面嘅奇行種先會咁做。

「誤會嚟。」穎怡下意識咁拉高口罩：「我只不過諗住你嗰件衫好睇，所以先諗住影低。」

冇錯，我絕對淨係影緊佢當時著緊嘅嗰件衫！絕對唔係因為佢靚仔而偷影佢！穎怡使出自欺欺人大法，開始不斷幫自己洗腦。

「係呀？」浩俊打算追問落去：「咁點解你又唔直接問我嘅？」

今次就睇你點解釋。浩俊喺內心不屑咁笑道，你今鋪仲唔死？

「你記唔記得我當時諗住同你講嘢？」穎怡理直氣壯咁解釋道：「其實嗰陣我係諗住問你架，係之後趕住落車所以就問唔成。」

今次到浩俊無言以對。佢都係第一次見人將偷拍呢件事講得咁清新脫俗，甚至令自己冇心機再問落去。

之前咁寸啊嗱？想當年我返學遲到，作嘅藉口多到可以出書啦！穎怡望到浩俊吃虧嘅模樣，內心忍唔住仰天長笑幾聲。

「你Game入面嗰張icon邊度嚟？」穎怡見氣氛開始緩和，主動問道：「睇個款又唔似係網上面偷返嚟。」

如果係偷圖嘅話，我一早靠Google大神幫我查個水落石出…穎怡內心唔忿氣咁諗道。

「上年同讀U嗰啲朋友一齊玩，賭輸咗。」浩俊無奈咁講道：「佢哋幫我影。」

「哦～」穎怡岌咗下頭：「咁你讀邊間架？」

穎怡仲記得之前諗住試探浩俊，結果反被調戲嘅事。

今次出到嚟睇你點避！穎怡直視浩俊，彷彿對眼識發射死光咁攻擊對方。

「關你咩事？」浩俊冷冷咁喺穎怡身上掃咗眼：「你對我咁有興趣做咩？」

人類總要重複同樣的錯誤，之前明明已經問過，點解又要中伏呢？浩俊內心輕蔑咁諗道。

雖然喺現實生活中同浩俊搭訕嘅異性大有人在，但係佢之前總係覺得穎怡同其他人唔同…睇嚟今次都係睇錯人。

「其實用個屎忽諗吓都估到啦—」穎怡平日最唔啹嘅就係浩俊呢種高高在上嘅人，連講嘢嘅語氣都差咗幾倍，佢再一次開口：「初步估計應該係紅磡嗰間。」

廢柴，你唔係以為我會好似之前咁怕醜吖嘛？我絕對唔會輸俾同一個人，Twice。穎怡對於浩俊嘅挑釁一笑置之。

話知你有幾靚仔，講嘢愈串我就愈想一拳盅去你塊面度…都係打個肚算，毀容嘅話太嘥。穎怡喺內心咒罵對方。

「你估啱咗。」浩俊唔情願咁承認對方嘅答案係啱嘅，佢內心仍然睇唔起呢個偷拍狂，條氣仍然唔順。

穎怡聽到浩俊嘅肯定之後幸災樂禍，好彩啱啫。佢抬頭望住渾身上下都寫住生人勿近嘅浩俊，喺內心嘆咗口氣。

話就話自己開始適應點同對方溝通啫……只不過，啲靚仔係咪本身就咁難相處？

「係估唔到原來你個腦生喺屎忽度。」浩俊望到穎怡得戚嘅樣就開始不爽，於是忍唔住開口反駁對方。

「下？」穎怡一時間反應唔切，佢冇諗過浩俊冷漠嘅外表下竟然係一隻小學雞。

「定係你冇？」浩俊不以為然，拉一拉頸巾就行出車廂。

穎怡似乎俾浩俊一瞬間嘅反差嚇到目瞪口呆，佢唔會係覺得咁串會有殺傷力啊？

「行啦，到啦。」浩俊喺車廂外不耐煩咁催促道，穎怡回過神先發現已經差唔多到目的地。

睇嚟真係好難相處，今次出完去之後都係少接觸為妙…穎怡用住望奇珍異獸嘅眼光去打量浩俊。

但係佢Year幾呢？讀咩呢？點解咁靚仔都冇人講過嘅？定係自己太孤陋寡聞？穎怡嘅內心逐漸產生更多嘅疑問。

一開始寫故都係諗住同朋友一齊圍威喂算，結果比起想像中更加多人睇（定係其實全部都係自己人嚟），總之真係好感激一直喺度催更，同埋冇嫌棄個故太鳩嘅大家最緊要睇得開心

(35)
穎怡同浩俊平排咁企咗喺𨋢入面，兩個人一言不發咁僵持住，秉承住「敵不動，我不動」嘅精神。

唉，明明只係四樓，但點解可以咁漫長？穎怡透過𨋢門望到身高同自己差至少兩個頭嘅浩俊，突然有種想將對方好似打地鼠咁打落地下嘅衝動。

一米五幾嘅身高受唔起刺激啊……穎怡唔滿意咁「積」咗聲，無意中引起浩俊嘅注意。

「我又做錯啲咩得罪你？」浩俊瞇起眼，一臉疑惑咁問道，明明企喺自己隔籬嘅穎怡就好似小矮人咁，但對方嘅氣勢從來都冇減弱過。

「你嘅存在就係一個錯誤。」穎怡擰轉頭向浩俊投向鄙視嘅眼神，唔知道係因為緊張，定係因為自己仍然未放得低俾浩俊呃咗嘅事實，穎怡有種莫名其妙嘅煩躁感。

啲女人真係麻煩……浩俊懶得同穎怡爭論。佢眼見到咗四樓，就下意識㩒住𨋢門俾對方行先。

「一陣你唔好叫我網名，叫我阿怡就得。」穎怡一馬當先咁行喺浩俊前面，內心喺度諗緊一陣點樣同公會嘅成員解釋浩俊嘅存在。

自己一隻網絡人妖已經夠多，而家又嚟多隻…仲要大家都以為浩俊係貨真價實嘅女神。穎怡一諗起就頭都大埋。

不出穎怡所料，浩俊仍然冇出聲，佢唯有當對方默默咁同自己達成共識。

「Ladies first」穎怡一手推開房門，惡趣味咁對浩俊講道。

「喂～～女呢？」一把熟悉嘅聲喺房入面傳出嚟，浩俊探頭一望，就見到一個體形龐大嘅人企喺房中間嘅枱隔籬。附近仲有一個女仔興致勃勃咁將幾片牛肉咁放落去枱上面嘅爐度，輕快咁夾住肉喺入面攪動。

「阿怡你幾時出咗pool架？」胖虎望到浩俊嘅時候就問道：「一場兄弟，有對象都唔講嘅！」

「同佢出pool？下世先啦！」穎怡見浩俊唔肯出聲介紹自己，自己率先行入去同胖虎寒暄幾句。

如果淨係睇樣都可以考慮下，但智商唔喺同一個水平線上，根本就溝通唔到，穎怡同胖虎開玩笑嗰陣不忘喺內心數落浩俊。

「你同佢係咪一齊其實都唔關我事。」胖虎夾起一塊牛肉，放入口內咀嚼：「我要嘅係桃味糖，唔係仔喎！」

穎怡擰轉頭向浩俊打眼色，提醒對方識相咁自我介紹。

點知浩俊彷彿特登無視穎怡，默默無言咁咁除鞋，坐咗喺近門口嘅梳化位食花生。

「係囉！人呢？」坐喺電視前面打緊機嘅小明都擰轉身搭嘴道，坐喺小明隔籬嘅海螢都好奇咁擰轉面睇吓發生咩事。但係當佢望到浩俊嘅時候竟然出乎意料地冷靜，就好似佢一早就知件事嘅來龍去脈咁。

頂你真係有心玩鳩我…穎怡知道自己嘅求救信號慘被拒絕，唯有自己開口介紹浩俊嘅身份。

「你要嘅桃味糖咪喺度囉！」穎怡隻手指向若無其事嘅浩俊，口罩內傳出無奈嘅聲線：「同行嚟！」

「而家係平安夜唔係愚人節喎大佬！」胖虎尷尬咁笑道，佢嘅視線不斷喺浩俊身上游離：「即係你指嘅係嗰個講嘢嗲到令人手腳捲曲，仲要啲顏文字多到唔會重複嗰個桃味糖，係佢！？」

「係呀，你冇睇錯。」穎怡抬起手拍咗拍胖虎嘅膊頭，用住充滿同情嘅眼光望住對方：「個分別係比較大，我到而家都未完全消化到。」

坐喺梳化上嘅浩俊仍然冇出聲嘅意欲，佢望住矮耷耷嘅穎怡安慰身材魁梧嘅胖虎，感覺對方好似個小朋友喺度懶成熟咁講道理，嗰種奇怪嘅反差令自己莫名地想笑。

「好彩我冇對住桃味講啲奇奇怪怪嘅嘢啫！」小明突然感嘆道：「如果一開始諗住媾佢，結果出到嚟發現有賓周嘅……」

「啋過你！唔好再講啦！」胖虎打咗個冷震，再夾起一塊肉放喺口度：「都係啲嘢食唔會背叛我。」

「又唔係第一次見識呢種人。」企喺胖虎隔籬嘅嘉琪笑瞇瞇咁講道：「放過佢啦。」

點樣為之「呢種人」啊…穎怡不滿咁喺內心反咗下白眼，佢知道嘉琪一向對自己有種微妙嘅敵意，但係自己一直都選擇視而不見。

正當穎怡諗住回應嘅時候，門外傳嚟一陣騷動，令佢好奇咁望過去。

「喂喂喂！今日多個嘉賓嚟～」月伶嘅聲喺門後傳過嚟：「所以我買多咗啲嘢嚟加餸！」

「你喺度嘅？」呢句係浩俊入去間房之後嘅第一句說話，佢驚訝咁望住拎住一袋二袋嘅曦銘。

「哇—咁啱得咁橋嘅」曦銘乾笑道，佢一同浩俊對上視線就心虛咁望向月伶。

「我哋係咪錯過咗啲嘢？」月伶知道自己最期待嘅畫面已經消失咗，唯有扮唔知情咁問道。

聽日會繼續更新一齊做加速師！

Live

姐係點
公會一早知主角條撚樣係女人？

永遠G持樓主

係可能寫得唔夠清楚 梳

等待樓主中

(36)
「係呀，錯過哂啦。」穎怡笑住講道，一陣牛肉嘅香味突然傳入鼻內，佢下意識摸一摸個肚，發現原來自己已經餓腸轆轆。

「你一陣間同我解釋下。」浩俊一臉認真咁望住心虛嘅曦銘，對方就扮聽唔到咁拎住幾袋餸放去枱隔籬。

嘉琪夾起幾塊肉放喺一個碗度，然後行去浩俊嗰邊開口道：「靚仔我應該點稱呼你啊。」

點知浩俊不但繼續一粒聲都唔出，更加唔領情咁冇接受嘉琪嘅好意，令對方一時尷尬咁企喺原地。

「你叫佢桃味……」穎怡打算打圓場嗰陣，結果就望到浩俊一眼啤過嚟，唯有無奈咁澄清道：「佢叫阿俊。」

「我朋友係比較慢熱，大家體諒下啦！」曦銘幫手解釋嘅時候，穎怡就代替浩俊拎起嘉琪手入面嘅碗。

無論點都好，啲食物係無辜嘅。

「你唔食嘅話我食！」穎怡目不轉睛咁同碗入面嘅牛肉做深情對望，另外一隻手冇停過咁除低口罩。

都唔係好難睇啫。以上係浩俊望到穎怡除口罩嗰陣嘅結論，浩俊一向對外表嘅評價淨係得「好睇」同「唔好睇」嘅兩個分區。

浩俊從來唔識點去仔細咁稱讚一個人嘅外貌，但當佢望到穎怡真面目嘅時候，佢嘅腦海突然多咗個分區—「順眼」。

「邊個話過我唔食？」浩俊嘅聲喺穎怡背後響起，結果穎怡手入面嘅碗俾浩俊搶走，而佢只能夠怒氣沖沖咁望住罪魁禍首理所當然咁行去另外一邊坐低。

佢係咪睇我唔順眼啊…穎怡內心問道，啱啱唔受人，而家又要夾硬同我搶。

「小學雞！」穎怡細聲咒罵道，雙眼惡狠狠咁望住同曦銘傾偈嘅浩俊。

原來佢哋識嘅，咁睇嚟係師兄。穎怡一早就喺月伶口中聽聞過曦銘嘅存在，所以佢一望到浩俊同對方傾偈嘅時候，就為對方嘅年齡落咗定論。

「唔好嬲唔好嬲，擘大口先。」海螢行去穎怡身邊，體貼咁將一嚿牛脷夾到佢面前，穎怡唔忿氣咁咬咗幾啖，一瞬間就被牛脷嘅口感俘虜。

「點解你見到佢嗰陣可以咁冷靜嘅？」穎怡邊食邊同海螢埋怨：「我一開始同佢相認嘅時候嚇到瀨咁滯。」

穎怡講緊嗰陣不時望向浩俊嗰邊，佢一望見浩俊除口罩之後露出精緻嘅五官輪廓，差啲唔爭氣咁放下戒心。

「冇呀…」海螢被穎怡問到口窒窒，佢唯有向月伶嗰邊投向求教嘅眼神。

「喂。」穎怡有種不祥預感，佢用筷子指向海螢嘅鼻頭：「你哋係咪有咩瞞住我唔講。」

「嗱，你應承我一樣嘢先。」月伶出現喺海螢同穎怡中間，佢滿面笑容咁攬住兩個人行去梳化坐低：「你聽完唔可以打我哋。」

「講啦。」穎怡下意識望去浩俊嘅方向，發現對方同樣地望緊自己嗰邊，佢慌亂咁重新將視線放到月伶身上：「唔會打。」

雖然喺三個人入面月伶嘅脾氣最為火爆，但係大家都知道穎怡一嬲起上嚟就會開啟暴走模式。所以月伶今次都小心翼翼咁拆彈，希望唔會引起第三次世界大戰。

「其實曦銘喺同我出街嗰陣已經講咗浩俊嘅事。」月伶心平氣和咁講道：「咁之後我就同海螢講，就諗住俾個驚喜你。」

「真係驚多過喜喎。」穎怡深深咁唞咗下氣，一時間無言以對。所以今次啲朋友都有份隱瞞佢？

「呵返呵返。」海螢抱住穎怡嘅手臂撒嬌道：「我一陣夾多幾嚿肉俾你好無？」

「嗯。」穎怡嘅脾氣一下子一掃而空。