是咁的，我鍾意咗隻網絡人妖。

是咁的，小妹平日最鍾意就係FF唔同嘅故事情節，於是屎忽痕決定開始寫故。
希望咁多位巴打絲打可以包容一下咁不堪入目嘅文筆，如果有意見嘅話歡迎留言！！我一定會儘量改善！！
紙言：https://www.shikoto.com/articles/220931.html

「是咁的，我終於喺地鐵見到靚仔啦！！」楊穎怡飛快咁喺whatsapp group度send出一行字。

「香港島怡紅院」由包括楊穎怡在內嘅三個名瞬間變成輸入中…

張月伶：冇圖你話佢係乳硬都得啦
林海螢：你有十秒救返伯母

「成班人饑渴到呢…」楊穎怡內心責怪著欲求不滿嘅兩個損友，握住電話嘅手卻無意識地收緊。

自稱「閱仔無數」嘅穎怡喺呢一刻竟然開始緊張起嚟，佢別扭地將頭髮撥向耳後，對眼不受控制地望向面前嘅人。

下午五點嘅地鐵不急不徐地行駛著，溫暖嘅夕陽映照喺靚仔嘅臉上。佢琥珀色嘅瞳孔喺斑駁光線嘅折射下變得晶瑩剔透，彷彿兩粒透明嘅玻璃彈珠。

楊穎怡目不轉睛咁欣賞面前嘅男仔，由對方烏黑嘅頭髮、白皙嘅皮膚、甚至係高䠷嘅身形，佢感覺到自己嘅心跳漸漸加速。

「下一站，元朗。Next station…」

地鐵廣播將楊穎怡扯回現實，佢用力地搖一搖頭，嘗試尋找返理智。然後小心翼翼咁抬起手機，對準對面嘅人，打算悄悄地幫靚仔「留倩影」。

正當穎怡要撳落快門嘅嗰一刻，地鐵突然震咗一下。佢亦都隨住車廂晃動，腳步一個踉蹌，未拎穩鏡頭就已經影咗幾張相。

「頂…」穎怡嘅頭不幸地撞向車門，佢不耐煩地摸摸頭頂，心入面喺度責怪腳下嘅車軌。

穎怡嘅動靜吸引到對面靚仔嘅注意力，佢感受到靚仔嘅視線直直咁投喺自己身上，深諳不妙 v

「仆街」穎怡壓抑住自己想即刻搵窿捐嘅衝動，佢不自然咁搲一搲啱啱撞到車門嘅頭頂，偷偷地觀察靚仔嘅表情。

「死啦最近先見到個批鬥偷拍狂嘅post，我唔想見到自己呀」穎怡開始想像起自己嘅下場，面色變得愈嚟愈差。

「用錢收買佢得唔得呢？但係今日又冇咩現金喎…」佢耷低頭故意逃避靚仔赤裸裸嘅視線，大腦飛快地思考各種各樣嘅解決方法。

「見佢好似幾後生咁…唔知佢會唔會收Payme補償呢？」穎怡突然產生天馬行空嘅諗法，佢再一次悄悄望去靚仔嗰邊，觀察對方嘅動靜。

「唔係喎到時死口唔認咪得」穎怡意識到自己嘅思緒開始往奇怪嘅方向發展，佢嘅理智及時控制住自己躁動不安嘅內心。

果然不出佢所料，靚仔似乎發現楊穎怡偷拍自己嘅舉動，皺住眉頭咁望住始作俑者。佢突然低頭喺手機度打咗幾行字，然後繼續望住穎怡。

「死啦真係俾佢發現咗，佢會唔會已經喺度打緊post數臭我」穎怡嗰刻恨不得即刻人間蒸發，佢咬緊嘴唇，鬼鬼祟祟哋偷望企喺對面嘅靚仔。

「大佬呀唔好再望我啦…」穎怡俾靚仔望到周身唔自在，開始扮四圍望去緩解自己繃緊嘅神經。

「我會唔會俾人話係地鐵痴漢㗎…」穎怡心虛哋將電話塞落外套袋度，緊張到手心出汗。佢游離嘅視線唔小心同靚仔有眼神接觸，令佢慌慌張張咁移開目光。

「條友望撚完未呀！！」被望到愈來愈羞愧嘅穎怡開始焦急起嚟，又重新將手伸入衫袋入面。

對面嘅靚仔望住穎怡反反覆嘅動作仍然無動於衷，不屑地望住佢。

「點算啊！！佢好似等緊我開口咁，但真係好柒呀媽咪！！」此時此刻嘅穎怡一早已經驚到失去常識，佢嘅大腦開始停止運作。

「但係反正下次都唔一定會再偶遇靚仔，柒唔柒好似已經唔再重要…」穎怡抬頭望向靚仔嘅方向，感覺到對方變得愈嚟愈唔耐煩。

眼見雙方僵持咗好幾秒，穎怡咬緊牙關咁重新將電話拎出嚟，手震震咁將電話遞出去。

「你收唔收Pay…」穎怡誠懇地望向靚仔，然而佢講到一半嗰陣突然被地鐵嘅廣播打斷。

「嘟嘟嘟嘟…」地鐵到站後開門嘅聲響去到楊穎怡耳中突然變成救世福音，佢連講埋下半句嘅力氣都慳番，頭也不回地立刻逃離現場。

「好彩我走得夠快啫！」穎怡得戚咁笑道，將啱啱影低嘅戰果隨便揀一張send上whatsapp group。

林海螢：唔係呀嘛…你咁都鍾意？
林海螢：你係咪返學太大壓力？突然口味唔同曬嘅？？
張月伶：作為朋友我永遠都會支持你嘅選擇嘅

「有圖都要屌？」楊穎怡茫然不解咁望住不斷彈出嚟嘅訊息，然後撳入啱啱send出去嘅相，眉頭突然一皺。

相入面根本唔係穎彤口中所講嘅靚仔，而係靚仔背後喺關愛座倒頭大睡嘅阿伯。楊穎怡無奈地打量嗰個識發光嘅頭、遍佈污漬嘅白背心，專屬中年男人嘅油膩撲面而來。靚仔嘅身影就淨係佔去相片中嘅一個角落，最麻煩嘅係穎怡仲要喺未睇清楚嘅情況下加多句：「佢真係超養眼，阿姐我都心動了」

張月伶：我明白你可能會對成熟啲嘅人有興趣，但係下次你都係留番俾自己睇啦
林海螢：乖女，出面世界好危險，不如你都係快啲返嚟同我哋打機啦

「唉，俾我再見到個靚仔我一定叫佢俾返精神賠償。圖可以冇，面子唔可以丟呀！」楊穎怡懊惱地回想起來自靚仔嘅鄙視，返屋企嘅步伐逐漸加快。

(2)
返到屋企之後，穎怡匆匆踏入自己間房、拎起耳機，撳入熟悉嘅傳說對決，一系列動作彷彿重複過幾千次般行雲流水地完成。

「要同靚女打機治癒翻先得！」癱坐喺電腦櫈上嘅穎怡伸個懶腰，開始期待接落嚟幾個鐘嘅打機馬拉松。

遊戲顯示著載入中，穎怡雙手輕輕拍一拍臉，整理好啱啱被擾亂嘅心情。只見月伶同海螢嘅account同時on緊，佢不加思索就加入到兩個人所組成嘅隊伍。

「哇穎怡你今日真係要多謝我哋。」海螢一見穎怡嘅account出現喺隊伍中，就自豪地講道。

「多謝啲咩，你哋冇屌到我自尊心受創？」穎怡一開始唔明海螢想表達啲咩，佢撳開chatrbox發現自己今日收到嘅訊息數量特別多。

「今日咁多人搵我嘅，你哋幫我講好說話嚟？」穎怡喺撳入去訊息內容前興奮咁問道：「你哋兩個終於開竅啦～見我唔開心識幫我搵靚女返嚟！」

「呃…而家的確會係多靚女關心你嘅…」海螢尷尬咁笑道。

麵包貓：估唔到你竟然呃咗我咁耐，唔會再同你玩 898
粉紅色魚蛋：賤男！定賤女？？我都唔知點鬧你好，你真係不知所謂！
太陽是個大菊花：睇嚟得我一個有認真看待過我地之間嘅感情，對你好失望，就咁先。

「做乜鳩？」穎怡目瞪口呆咁望住佢溝緊嘅女玩家突然對自己惡言相向。

「你睇到啦？係咪要多謝我哋呢？」月伶對穎怡嘅反應毫不驚訝，甚至笑笑口咁講出嚟。

「點解啲女突然知道曬我真身係女人？」穎怡堂皇咁問道除咗月伶、海螢，同一班相熟嘅網友外，唔會有人知道穎怡係網絡人妖嘅事實。

「咩呀，我哋見你轉口味鍾意大叔，咪幫你切斷哂啲關係先。廢時你要親自坦白咁麻煩啦！」海螢解釋道。

「你平時打機扮男人扮得太入戲，又同時間溝咁多女，知唔知我同月伶要逐個逐個拉入嚟說服真係唔易㗎？不過都講得七七八八啦！」海螢見穎怡嗰頭突然間靜過太空，不忘加多句。

坐喺螢幕面前嘅穎怡懊惱地雙手抱頭，明明尋晚自己仍然係深受女性玩家歡迎嘅電競交際草，而家反而俾豬隊友一腳踢落神枱。佢回想起當初同靚女談笑風生嘅風流往事，冇諗過自己會落到如斯田地。

「我有無俾人公審？」穎怡虛弱咁問道，估唔到自己嗰頭擔心完偷拍被放上網之後，返到屋企仲要面對被尋仇嘅風險。佢心急如焚咁撳入去討論區度東尋西覓，睇吓有冇人提起自己。

「咁又冇喎…咦？你又有一隻兵要入嚟啦。」海螢講道，嚇到穎怡起曬雞皮。

「有咩事搵我？」一把嬌蠻女聲突然響起，一個熟悉嘅icon突然出現喺隊伍中。穎怡當然認得嗰把聲嘅主人，係一個有末期公主病嘅十六歲少女。平時對方少少事已經要穎怡氹到2048，今次同佢直接攤牌肯定會額外棘手。

「驚驚你要唔要自己講？」海螢早就喺穎怡口中得知公主病嘅臭脾氣，佢小心翼翼咁提起穎怡嘅網名，嘗試將個波射俾穎怡。

然而穎怡一言不發，故意避開海螢嘅問題。

「呃…驚驚佢而家應該唔得閒，咁我幫佢講啦。」海螢感覺到氣氛突然開始變得尷尬，幫自己打圓場。佢深呼一口氣，然後直接開口：「其實佢唔鍾意你。」

「冇可能！！呢隻game仲有人可愛得過我咩？！」公主病果斷地否認海螢嘅講法。海螢俾公主病強硬嘅態度嚇到怯咗下，決定要打擊一下對方嘅自信心。

「驚驚佢鍾意啲成熟啲嘅人。」海螢諗起穎怡send出嚟嗰張大叔圖，婉轉地講道。

「乜我唔夠成熟咩！？我有咩唔好！？驚驚鍾意點樣樣嘅成熟法？講嚟聽下？」公主病尖銳哋質問海螢。

「著住黃黃地嘅白色背心、短褲、踢住人字拖…」海螢一下子消化唔到咁多問題，唯有喺電腦打開張大叔相照直形容。雖然話海螢形容得十分貼切，但係穎怡愈聽愈覺得唔對路。

「大概四、五十歲啦，仲有佢光…」海螢都未講完，就俾公主病強硬地打斷咗。

「即係驚驚佢鍾意男人？？」公主病幾乎係尖叫住咁問道。

「佢係咪撞壞咗個腦？有咩可能揀麻甩佬都唔揀我？」公主病用高八度嘅聲線去叫罵道。

「唉，成件事去到佢度反而搞到更加複雜」穎怡苦惱地扶住頭，佢feel到自己嘅形象愈抹愈黑。平時怕麻煩嘅穎怡凡事都想息事寧人，寧願忍耐都唔想同人理論到底。然而今日發生過嘅事已經令穎怡疲憊不堪，聽住公主病發癲更加令佢更加煩躁。

「唉，交際草呢啲嘢唔做咪唔做」穎怡聽住海螢吃力咁說服公主病，突然覺得自己無謂為咗保持所謂嘅形象令朋友應付咁惡頂嘅人。佢對準耳機嘅咪，清一清喉嚨。

「驚驚翻嚟啦！！你啲朋友啱啱係咪有啲誤會咋？你快啲同佢哋解釋！」公主病聽到穎怡嘅動靜，態度即刻嚟個一百八十度轉變，嬌滴滴咁問道。

「其實我係女人。」穎怡斬釘截鐵咁講道。

「你係咪有病呀？？鍾意扮男人溝女人？仲要欺騙我感情？」公主病歇斯底里地大叫，令穎怡忍唔住拎開兩邊耳機。

「屌你啦死人妖！」「原來淨係得我一個一廂情願，喺度妄想可以同你發展。」公主病氣急敗壞咁破口大罵，提起過往同穎怡促膝長談嘅時候，把聲更加漸漸染上哭腔。

「想當年你仲會話好鍾意同我玩嘅…」公主病委屈咁講道，佢心入面變得愈嚟愈難受。

「對唔住。」穎怡諗起當初同公主病相處嘅時光，亦難免有啲慚愧。佢意識到再點安慰已經無補於事，呢一刻唯一可以做嘅就係道歉。

「點解唔早啲同我坦白？點解要等我咁鍾意你嗰陣先嚟hurt我？」公主病嘅鼻音變得愈來愈重，最後哭哭啼啼咁連一句完整嘅句子都講唔完。

「佢呃你係有問題，但係你同佢玩咗咁耐都冇聽過佢把聲都應該估到啦下話？」原本喺度食花生嘅月伶突然認真咁開口反問翻公主病，令對方呆咗幾秒。

「其實我一開始都有懷疑過嘅…但之後發現原來唔需要聽把聲，就咁同驚驚打字傾偈就已經好滿足，至少嗰陣我會覺得同佢好夾…」公主病斷斷續續咁講完自己嘅諗法，令穎怡更加內疚，感覺自己個心好似俾人揸皺咗咁。可惜為時已晚，穎怡已經冇辦法再去彌補自己對人所造成嘅傷害。

「網絡世界多感情陷阱呀，你所見到嘅，只不過係佢想俾你見到嘅嗰一面啫。」月伶罕有地開始講起道理：「Move the fuck on啦屌你。」

「唔會咁好彩次次識到嘅人都係白馬王子啦。」海螢忍唔住附和道，成日喺網絡世界中打滾嘅佢對於感情陷阱嘅存在早已見慣不怪。

「收皮啦，我唔需要聽你地講經！」公主病呻咗下鼻涕，唔服氣咁反駁道。

「你哋喺現實生活中肯定係生得柒，又冇仔溝嘅…」公主病惱羞成怒，開始辱罵其餘三個人。然而佢罵到一半，就俾月伶毫不留情咁踢出隊伍。

「太多嗲，拜鳩拜。」月伶笑道：「穎怡你都唔好太上心，雖然呃人係仆街㗎喇，但係如果你要照顧哂你啲兵嘅心情，咁你會好辛苦。」

眼見鬧劇終於告一段落，穎怡漫不經心咁「嗯」咗聲，鬆咗一口氣。實際上穎怡當初只不過係因為貪玩，即使明知自己冇辦法一直毫無破綻咁扮男人，佢都諗住到時直接喺遊戲中拍拍屁股就消失。

穎怡飲咗啖水定一定驚，喺度回想返喺短短幾個鐘內發生嘅咁多事，心入面唔知點解仍然有根刺。佢不禁開始諗返一切鬧劇嘅起源，突然拍一拍頭，如夢初醒。

「其實我有冇講過嗰張相係影錯⋯」穎怡沉聲靜氣咁解釋道：「如果我對麻甩佬有興趣，咁我每日照一次鏡咪要打一次丁。」

「噢⋯」月伶同海螢不約而同咁有同樣嘅反應，佢哋終於意識到自己一開始嘅誤會有幾大。

「咁點解你唔早啲同我哋講？」海螢忍唔住開口問道。

「我都未有解釋嘅時間，你哋就幫我搞咁大單嘢出嚟…」穎怡無奈咁答道：「算啦，至少仲有啲人未知道真相。」

「今鋪仆街啦…」月伶突然細細聲咁感嘆咗句，令穎怡打咗個冷震。

「你哋仲有同邊個講？」穎怡抱住疑惑咁問道，佢心入面開始有種不祥嘅預感。

「冇…冇呀！你放心啦，仲有啲女女係未知嘅！」月伶心虛咁狡辯道：「你識咗我哋咁耐，我哋有幾可爆曬你啲嘢出去？」螢幕後嘅月伶緊張到不禁想幫自己抹一抹汗。

穎怡見兩人有意隱瞞，自己都廢時繼續追問落去。

「乜我嘅口味有咁奇怪咩？」穎怡哭笑不得咁問，按照月伶同海螢嘅熟悉程度，正常應該對自己嘅取向瞭如指掌。

「有。」月伶直率咁答道：「乜你覺得你扮男人打機溝女呢件事好正常咩？」

「呢隻game大把網絡人妖啦，我只不過係將『原來you是個boy』變做girl咁解咋嘛⋯」穎怡理直氣壯咁解釋道：「更何況你哋都知我鍾意啲皮膚白、眼大大、生得又高嗰啲⋯」

當穎怡形容起自己嘅理想型嗰陣，腦海突然浮起靚仔嘅身影，令佢講到一半欲言又止。

「其實今日見到嗰條友真係幾好睇⋯⋯」穎怡摸摸下巴，最後得出以上嘅結論。

「冇圖點討論呀？洗唔洗講埋佢把聲好溫柔？」海螢激動咁講道，佢嗰邊傳嚟重重嘅拍枱聲。

「講到差唔多食飯都未打到一舖，散會！食完再打！」月伶冇興趣再同其餘兩個人爭論，佢果斷咁解散隊伍然後offline。

「好彩最後都記得同佢哋解釋，唔係嘅話真係水洗都唔清。」穎怡眼見朋友陸續offline，佢開始喺度自我安慰。佢嘆咗口氣，身心疲憊咁行出客廳。

平日食飯嗰陣喋喋不休嘅楊師奶今日出乎意料地安靜，佢小心翼翼咁不斷夾餸去穎怡嘅飯碗度，然後不斷觀察穎怡嘅面色。

「阿媽你今日搞咩嚟？」穎怡一臉疑惑咁望住楊師奶。

「冇…冇嘢呀！老公食多啲！」楊師奶尷尬地笑道，然後將目標轉移到楊生嘅碗。

穎怡趕緊同阿爸打眼色，希望對方知道阿媽一反常態嘅原因，然而對方都聳聳膊頭，表示自己同樣地一頭霧水。

楊師奶見自己夾到就快塞滿楊生嘅碗之後悻悻然收手，然後即刻耷低頭扒飯，用餘光去偷望喺隔離皺起眉嘅穎怡。穎怡同楊生默默無語坐咗喺度你眼望我眼，場面十分尷尬。

「阿…阿怡呀？」楊師奶突然放低筷子，故意逃避穎怡嘅視線。

「阿媽從來唔會干涉你同邊個拍拖…」楊師奶吞吞吐吐咁講道：「但係我哋都未窮到要你去犧牲自己嘅…」佢講完之後誠懇咁望住穎怡。

「下？你講緊啲乜？」穎怡嚇到連飯都吞唔落，而坐喺佢對面嘅阿爸更加用住錯愕嘅神情望住自己。

「啱啱咪同張師奶喺度傾電話嘅…」楊師奶欲言又止：「佢提起個女話你最近鍾意啲四五十歲嘅男人喎…」

「咳…咳咳！」穎怡差啲連飯都噴出嚟，佢冇諗過月伶原來講到連自己阿媽都知道咗，會唔會第二日A1頭條都會見到自己嘅事。

「穎怡，你細個嗰陣我係咪對你唔夠好？」楊生做出一副受傷嘅表情，擔憂咁講道：「我聽人講呢，通常啲人鍾意阿叔係因為缺乏父愛…」

「件事唔係咁架…」穎怡見自己阿爸開始亂諗嘢，欲哭無淚咁講道：「我廿年以嚟都冇戀愛經歷，有咩可能會同阿叔拍拖呀…」

楊師奶聽完穎怡嘅一番說話之後茅塞頓開，大聲講道：「係喎！你平時成個隱青咁，都唔會識到人啦！」

穎怡被楊師奶喺自己傷口上灑鹽嘅舉動搞到更加無地自容，佢用手按摩太陽穴，唔想繼續講落去。

「之不過呢，點解你會突然同個阿叔扯上關係嘅？」楊生似乎已經解開對穎怡「缺乏父愛」一事嘅誤會，佢反而開始對件事嘅起源感到好奇。

「呃…」穎怡頓咗頓，佢唔知道應唔應該同屋企人講自己偷拍人嘅事實。但事到如今，唔解釋好似又等於重新默認咗佢哋對自己嘅誤會咁。

穎怡挺直條腰，吸咗口氣，諗住誠實咁同自己父母解釋成件事嘅來龍去脈。

「其實係我一開始諗住偷拍一個靚仔…」穎怡慢慢咁講道：「只不過係影錯靚仔後面嘅一個阿伯，令到其他人誤會咗。」

「你…你偷拍？」楊師奶露出不可思議嘅表情，語氣間透露出佢嘅驚訝。佢不知所措咁望向楊生嘅方向，睇吓對方嘅反應。

「你係咪太dry？」楊生嘗試裝作鎮定，但係佢腦海中不斷將自己個女同新聞成日出現嘅偷拍狂嘅身影重疊埋一齊。

「死啦，我好似養咗個變態出嚟…」楊師奶心入面諗道，佢抬一抬頭望住哭喪住臉嘅女，個心一軟，忍唔住開始安慰佢。

「往好嗰方面諗，至少你唔洗俾人告呀！」楊師奶強顏歡笑道：「下次唔好做咪得囉！」


「今日冇咩胃口，我返房抖抖先。」穎怡望住面面相覷嘅父母，頓時覺得面前嘅晚餐變得索然無味。佢拎起飯碗行入廚房，扭開水龍頭洗碗嘅同時將注意力放喺客廳嘅動靜上。

「唔好咁大反應啦，嗰陣我追你咪又係成日偷望你⋯」阿爸低聲道。

「咁唔同㗎嘛⋯個女都唔識條友⋯」楊師奶支支吾吾道，佢從來冇諗過自己個女會做咁出格嘅行為。

穎怡嘆咗口氣，感覺自己身心嘅力氣都俾人榨乾曬咁。佢象徵式咁輕力打一打左手，後悔自己今日一時衝動導致到宜家嘅情況。

佢垂頭喪氣咁返到房，一撳開電話就見到張月伶不斷喺whatsapp group度轟炸大家。

「打機要人！！」「快啲啦我就快撐唔住啦！！」「人呢？？＠穎怡＠海螢」

單機寫故都係種浪漫嚟希望總有一日會有人睇到個故

睇緊

支持

(5)
講起穎怡、月伶，同海螢三個人之間，月伶喺外貌無庸置疑係最為出眾嗰個。縱使佢性格一向脾氣剛烈、牙尖嘴利，月伶嘅外表同凹凸有致嘅身材仍然無阻一眾異性對佢抱有好感。

然而月伶一直對身邊嘅狂蜂浪蝶嗤之以鼻，佢心目中嘅白月光永遠係中學時喺補習社識嘅師兄— 洪曦銘。雖然兩個人喺洪曦銘畢業後就各散東西，但月伶為咗可以偶遇佢嘅心上人，當時考文憑試前不惜挑燈夜讀，後來掹車邊做到洪曦銘嘅同校師妹。

很遺憾地，月伶自從再次做返曦銘嘅師妹後仍然唔敢輕舉妄動。到目前為止，佢認為自己做得最大膽嘅舉動係邀請曦銘同佢一齊打傳說對決。

月伶一直覺得只要可以保持同曦銘打機，自己就心滿意足。事實上佢此時此刻就曦銘嘅事嬲到火冒三丈。

穎怡眼見月伶激動到好似世界末日咁就選擇㩒開隻game，一on就見到自己被邀請到月伶、海螢、曦銘，同另一個女仔嘅隊伍入面，而佢都未反應到就收到來自月伶嘅電話。

「條女邊個嚟？」穎怡見嗰個女仔嘅account名十分陌生，好奇地問道：「元朗桃味糖？佢個icon幾好睇喎～」

穎怡好奇咁㩒入去桃味糖張icon度，入面係一個女仔嘅背影，個女仔染住啡色頭髮，就咁著住簡約嘅白色T-shirt同牛仔褲已經足以顯出個女仔嘅曲線美。就算睇唔清楚佢嘅樣，都可以一口咬定佢絕對生得十分標緻。

「難怪月伶會咁大反應啦，原來係遇到對手～」穎怡想道。

「我點撚知呀！！嗰陣曦銘突然話要搵一個朋友過嚟玩，我點知係條女嚟！」月伶嗰邊傳來拍枱嘅聲，可想而知佢而家就好似嚿不定時炸彈咁，隨時會爆發將世界夷為平地。

元朗桃味糖：齊人啦～我開場㗎啦(˶‾᷄ ⁻̫ ‾᷅˵)

「朋友啫！冇嘢嘅！」海螢亦都嘗試安慰坐立不安嘅朋友。月伶嘴上「嗯」咗一聲，但自己嘅興致早已雲消雨散，嗰一股莫名其妙嘅不安感更加愈來愈強烈。

雖然月伶知道曦銘平時都會同其他朋友打機，但唯獨係桃味糖好似同曦銘特別熟咁。對方仲要應該係靚女嚟，令一向充滿自信嘅月伶都有啲惶惶不安。

遊戲轉眼間就加載到熟悉嘅地圖中，然而穎怡無緣無故地都開始緊張起嚟。佢拎起杯飲落一大啖水，仔細咁觀察場內嘅走勢，心入面有一股淡淡嘅不詳預感。

果不其然，桃味糖唔單止鍾意跟住曦銘嘅角色行，更加會不斷主動同曦銘搵話題，彷彿對其餘三人視若無睹。

元朗桃味糖：對唔住，我唔太識玩呢個角色〒.〒
南山南將軍：唔緊要，你跟住我就得。

「唉，我同佢玩咗咁耐，佢都未試過叫我跟住佢…」月伶意氣消沉咁講道，佢突然有種想退出場遊戲嘅衝動。

「哇…佢啲顏文字真係多到我驚，扮可愛應該有一手。」穎怡好似喺另一個次元咁，喺度感嘆桃味糖嗰啲用極都唔會重複嘅表情符號。作為電競交際草嘅佢平時都見唔少呢類嗲人嘅方法，但佢冇預想到桃味糖咁有心。

元朗桃味糖：多謝你呀曦曦(´･ω･`)

桃味糖嘅一句說話令三個人嘅對話突然陷入寂靜。

「咁close得唔得架…」穎怡低聲笑道，佢已經估到月伶會有咩反應。

「曦曦？？我係咪眼花，佢夠膽死叫佢嘅花名？！」穎怡耳邊傳嚟月伶高八度嘅怒吼。

桃味糖稱呼洪曦銘嘅方式無疑係想宣示佢哋之間嘅親密關係。 嗰兩隻字猶如幾廿粒原子彈一下子喺月伶嘅心入面炸開。

「定啲嚟，可能佢開玩笑啫。你睇我哋都會叫對方做八…八婆啦。」海螢講道，絞盡腦汁去嘗試拯救場面。

「點比較呀…佢哋肯定好熟，至少熟過我同曦銘囉…」月伶難過咁講道，佢感覺到啲負面情緒喺心底不斷咁湧緊出嚟。

穎怡感覺到月伶沮喪嘅心情，開始為佢打抱不平。

穎怡飛快咁喺keyboard度打出一行字，希望可以暫時唔使再見到桃味糖喺度擾亂月伶嘅心情。

西鐵線驚驚：傾偈還傾偈，唔好掛住打字然後輸俾人

「靚波！」海螢讚賞道。

元朗桃味糖：唔會啦，你哋會保護我嘅(≧▽≦)

「哇屌…」穎怡見到桃味糖咁厚顏無恥嘅回應，自己忍唔住擰擰頭。

「牙怡…不如你幫我個忙當積下陰德…」月伶陰沈嘅聲忽然喺穎怡耳邊響起，嚇到佢打咗個冷震。

「你…你想點？」穎怡戰戰兢兢咁問道，佢feel到月伶已經準備好推佢入火坑。

「幫我溝咗個桃味糖佢」月伶斬釘截鐵咁講道：「反正佢又唔知你係女人。」

多謝你

最新個篇幾好笑

多謝你巧感動

LM支持！

留名G持樓主

(6)溝女應該要考牌
「我堅決拒絕！」穎怡毅然謝絕咗月伶嘅請求，佢言正辭嚴咁講道：「我唔會再迫害良家婦女。」

月伶嗰邊瞬間陷入沉默，佢大腦飛快咁轉動緊，嘗試諗出唔同嘅方法去剷除嗰個桃味糖。

元朗桃味糖：點解得我同曦曦講嘢嘅？

「因為你無視曬我哋囉…」海螢嘴上不滿咁講道，但都唔敢直接打喺chatroom度諷刺佢。

「點解佢可以叫曦曦叫得咁順口？！」月伶嘅角色碰巧喺嗰刻死咗，佢握緊拳頭，咬牙切齒咁講道：「邊個再俾我聽到用疊字叫人，我見一個打一個！」

西鐵線驚驚：咁我陪埋你傾偈好無？

穎怡有啲睇唔過眼，佢摸一摸鼻，決定回應桃味糖。

「實不相瞞，其實我都係娘家婦女嚟…」月伶楚楚可憐咁講道：「係野蠻咗啲、粗魯咗啲…同惡咗啲咁解啫～」

「你唔幫我其實都係迫害緊良家婦女。」月伶理直氣壯咁將自己嘅動機合理化。

佢眼見穎怡開始有心軟嘅跡象，決定發動攻勢，用嗲聲嗲氣嘅聲叫著「怡怡～」，「怡怡幫下手啦～」

「得啦得啦，幫咪幫囉！」穎怡冇月伶咁好氣，佢疲倦地講道：「大佬你以為我係加藤鷹咩，唔係下下都成功㗎…」

「都唔知啱啱邊個話講疊字就見一個打一個～」海螢幸災樂禍咁笑道。

元朗桃味糖：靚仔你咁溫柔得唔得架(✪ω✪)

穎怡被桃味糖咁順攤嘅態度嚇到呆咗呆，然後即刻擰擰頭，嘗試冷靜落嚟。

​平日最鍾意調戲女玩家嘅穎怡明明早已對呢種回應見慣不怪，但係今次係佢第一次另有企圖咁接近人，佢一定要比起以前更加謹慎，唔可以露出馬腳。

西鐵線驚驚：淨係對你一個咁好咋

「今舖仆街了，佢肯定會覺得我係嗰啲漁翁撒網嘅狗公…」穎怡喺send出去嘅下一秒就即刻後悔咁諗道。

「你做乜鳩呀哈哈哈哈哈哈哈哈—」月伶被穎怡做作嘅回應逗笑，佢忍唔住問：「喂你一嚟就咁狗公得唔得㗎？」

「我同佢啱啱識你就要我溝佢…」」穎怡無奈咁答道，佢望返自己講嘅嗰句嘢，開始有啲反胃。

正當穎怡打定輸數覺得對方有所推卻嘅時候，件事永遠往意想不到嘅方向發展。

元朗桃味糖：靚仔不如add個friend呀(〃∀〃)想深入了解你

「第一屆鬥厚臉皮比賽正式開始—」海螢笑到個肚開始痛，佢冇諗過穎怡嘅策略竟然會成功。

「我…唔係好識點應…」穎怡突然怯咗怯，佢好少見到主動到咁嘅女玩家，主動到令佢覺得對方似係故意咁講。

「唔得，我應該要考個溝女牌先。」穎怡摸著下巴咁講道：「呢個人好難捉摸呀！」

元朗桃味糖：點解唔理我嘅？(´･_･`)係咪唔想add我

桃味糖似乎開始等到唔耐煩，主動追問穎怡。穎怡下意識咁摸一摸個鼻，決定繼續自己嘅大計。

西鐵線驚驚：唔係呀，見到你話add我嗰下太興奮唔記得覆你啫～

「你個藉口爛到呢—」月伶笑到上氣唔接下氣，佢諗咗諗然後講道：「仲廢過以前中學遲到嗰陣話扶阿婆過馬路！」

南山南將軍：唔好再掛住打字啦

曦銘認真咁提醒其他人，順便send咗個要打團戰嘅信號出去。穎怡見桃味糖冇再回覆，亦開始專注返喺場遊戲上。不出佢所料，桃味糖所用嘅角色喺團戰一開始嘅時候就已經瞬間蒸發，成為第一個犧牲者。

「其實你溝佢都幾容易呀～」月伶講道：「佢咁廢，你咪有大把機會carry佢囉。」

「點解你講到好似食生菜咁？」穎怡邊打機邊問道：「鋪鋪都好似得四個人打咁喎…」

「咁係咪即係你有意見？」月伶喺大家打到對方基地嗰陣沉聲問道。

場遊戲就咁就結束咗，穎怡眼見右上角突然彈出元朗桃味糖嘅好友邀請，輕輕咁嘆咗口氣，睇嚟佢已經洗濕咗個頭。

「臣…臣妾」穎怡委屈咁講道：「臣妾會做到嘅…」

(7)糖衣陷阱
穎怡眼見月伶同海螢默默咁offline之後，選擇退出隊伍。佢接受咗桃味糖嘅好友邀請後，下一秒就收到嚟自桃味糖嘅message。

元朗桃味糖：靚仔唔玩啦？

「咁積極嘅？」穎怡喺心中詫異道，佢絕對唔會放棄呢個機會去了解桃味糖。

穎怡正打算覆嘅時候，手指突然頓咗頓。佢對桃味糖總有一種莫名其妙嘅戒備心，感覺對方熱情過頭，似係特登有備而來。

然而幫朋友刺探軍情嘅重任在身，穎怡貿貿然退卻只會令月伶嘅希望破滅。

「要點樣先可以打探到佢嘅歲數呢…」穎怡沉思道，突然靈機一觸，飛快咁打出一行字。

西鐵線驚驚：聽日九半堂啊，你唔洗上堂咩？

「睇嚟當初應該聽多啲三姑六婆點講嘢…」穎怡耷低頭思考道，喺度等待對方嘅回應。

元朗桃味糖：唔洗呀，小學停課呀嘛(๑•́ ₃ •̀๑)我唔洗返學

「條友鳩㗎？」穎怡頓時感到一陣惡寒，佢千算萬算都冇計到桃味糖竟然會派膠，就咁就巧妙地避開咗佢嘅問題。

「點睇你都唔係小學生啦…」穎怡再一次陷入思考，桃味糖嘅一粒膠就好似一隻拍緊翼嘅蝴蝶咁，喺穎怡嘅腦海中捲起擾亂佢思緒嘅龍捲風。

「你鍾意鳩噏吖嘛？ok我陪你癲！」穎怡望實同桃味糖短短嘅幾句說話，決定開始自暴自棄。

西鐵線驚驚：絲打你好幽默喎，我真係笑到爆咗肚，依家一路打字一路執返啲腸呀內臟呀腎呀，塞返落個肚度。你有冇諗過未來幾個月去紅館開棟篤笑？

穎怡按咗按太陽穴，見對方又重新開始打下字又停下咁，篤定對方好似幾秒前嘅自己咁亂晒陣腳。

西鐵線驚驚：你同曦銘識咗幾耐？平時同佢玩嗰陣冇見過你嘅

為咗唔俾機會對方再亂咁鳩噏，穎怡把握時間，嘗試令自己喺對話中佔上風。

元朗桃味糖：同曦曦識咗好耐㗎喇～平時各有各玩，呢排先多啲一齊打機啫

「唔通係青梅竹馬？」穎怡心入面又多咗個疑問，眼見桃味糖難得認真地回覆佢，自然繼續將對話延續落去。

西鐵線驚驚：你哋同學嚟？

穎怡今次選擇旁敲側擊，希望可以得到更多資訊。

元朗桃味糖：點解感覺你對我同曦曦之間嘅關係特別好奇嘅？(✧≖‿ゝ≖)

桃味糖突如其來嘅直線球成功地剎穎怡一個措手不及，穎怡不禁慌張起嚟，手忙腳亂咁去解釋。

西鐵線驚驚：我淨係對你一個好奇，因為你都住大西北吖嘛

「點解好似俾佢撚緊咁嘅？」穎怡想道，佢腦入面嘅摩打就快轉到出煙。

穎怡嗰一刻有啲不知所措，佢望住桃味糖嘅icon，彷彿自己好似俾人放咗喺手上面把玩咁。

元朗桃味糖：平時啲人都會用carry我嘅藉口去同我傾偈先，但係你好似直接skip咗嗰步驟(´ΘωΘ`)

「係喎屌，點解我醒唔起？」穎怡倉皇咁拍一拍額頭，佢一開始太過心急，反而令自己更加唔自然。

西鐵線驚驚：唔係嘅，其實我聽日都可以帶你玩，係而家有啲攰

穎怡絞盡腦汁咁去掩飾自己嘅破綻，盡失自己十幾分鐘前嘅氣勢。

元朗桃味糖：點解我哋淨係玩咗一舖你就問咁多嘢嘅？( ¯•ω•¯ )

桃味糖變得愈來愈咄咄逼人，穎怡感覺自己好似俾人睇穿咗咁。佢嘅食指喺螢幕面前郁咗郁，完全諗唔到應該點回應對方。

桃味糖好似預咗穎怡唔會識點回應，繼續自說自話。

元朗桃味糖：睇嚟你真係對我好有興趣喎
元朗桃味糖：你真係好可愛

眼見桃味糖send出嚟嘅最後一行字，穎怡嘅心跳重重漏咗一拍，大腦「嗡」一聲直接停止運作。佢驚慌失措咁即刻熄咗隻game，手腳無力咁灘坐喺咗張凳度。

「我啱啱係咪俾人調戲完嚟？」佢喘住氣咁細聲問道。

一開始就係會忍唔住手去po曬啲存貨

出得好快！好好睇！

加速

冇相？

留名 希望唔好爛尾

好快會有

好快

呢兩日會有㗎啦