是咁的，我鍾意咗隻網絡人妖。

新讀者留名，追到live啦

咁多位唔好意思，個假放耐咗聽日開始更文！

好～等你呀樓主

(26)世界末日
十二月廿三號，下晝一點。

「點撚算呀！你哋睇吓！」月伶驚慌失措嘅聲劃破空氣，佢望向電腦螢幕上嘅海螢同穎怡，手震震咁指住額頭正中間。

月伶由細到大都甚少生暗瘡，當中學時期嘅海螢同穎怡嘅額頭同臉都深受暗瘡困擾嘅時候，皮膚完美無瑕嘅月伶就會一臉同情咁望住其餘兩個人。

但每一次月伶一生暗瘡嗰陣，嗰粒紅點就偏愛生喺顯眼嘅位置，例如鼻頭、人中、下巴中心，又或者好似月伶而家呢粒咁— 生喺兩條眉嘅正中間。

月伶堂皇咁望住嗰位紅色嘅不速之客，心入面萌生想留喺屋企嘅諗法— 曦銘見到自己嗰粒瘡一定會對自己印象變差。佢會唔會一嚟就指住自己眉心喺度笑呢？

「家燕媽媽！」穎怡一眼就注意到令月伶束手無策嘅罪魁禍首，自從月伶提起粒瘡嘅嗰一刻起，穎怡就會不知不覺咁望去佢眉心嘅位置。佢最後都係揞住面，成個人因為笑緊而喺度震。

「往好嗰方面諗，你今日異常地引人注目。」海螢嘴角抽搐，作為月伶嘅二號損友，佢當然會笑一輪先。

唔係喎，聽日都要同鐵馬秋軒出街，如果自己到時又生瘡咁點算？海螢緊張咁摸一摸自己額頭，似乎自己唔應該喺度幸災樂禍。

「我今日約咗曦銘啊—」月伶悲鳴道，佢拎住塊化妝鏡不斷咁照住對眼嘅位置：「而家咁點出街啊！」

穎怡望住月伶眉心嘅嗰粒紅點隨住佢皺眉而擠壓變形，佢忍唔住「噗」一聲笑咗出嚟。三個人之間最貪靚嘅月伶竟然都有今日。

「笑乜鳩啊！」月伶扁住嘴委屈咁講道，佢好奇咁用食指掂一掂眉心，然後即刻痛到縮手。假如月伶今日係同其他男仔出街，佢絕對會一口拒絕對方，寧願放人飛機，都唔要影響到自己嘅形象。

但係曦銘有幾可會主動單獨約佢出街？月伶愁眉不展咁嘆咗下氣，以往眉間嘅氣勢頓時蕩然無存。

「喂穎怡！你覺唔覺得佢好似俾對面大廈嘅狙擊手瞄準住咁…」海螢努力咁壓住嘴邊嘅笑意，點知佢一講完，月伶就一臉兇狠咁直直望住鏡頭，令海螢打咗個冷震。

「你敷個面膜先囉～」穎怡強忍住笑意咁提醒月伶，佢唔會再好似海螢咁作死。

「係，你講得啱！」月伶打咗個響指，內心重燃希望。冇錯，距離同曦銘約定嘅時間仲有幾個鐘，佢仲有機會可以急救。

只見月伶嘅身影離開鏡頭範圍，佢嗰邊傳嚟拖鞋快步行走嘅噠噠聲，仲隱隱約約聽到一啲野跌落地嘅聲，然後月伶喘住氣咁拎住一包面膜重新出現喺鏡頭前。

「我要定啲嚟，要冷靜。」月伶深呼吸，慢條斯理咁將包裝撕開，白色嘅面膜一下子準確無誤咁降落到佢嘅臉上。

「俾你搞到驚驚地添。」海螢同樣地將一塊面膜敷落臉上，作為一個聽日同網友有約會嘅人，佢唔想到時變成另一個月伶。

穎怡見兩個朋友紛紛敷起面膜，三個人各自拎起手機㩒開Instagram。佢百無聊賴咁喺螢幕上碌碌下，發現有一個似曾相識嘅icon出現喺眼前。

lhc_0820…穎怡喺心入面讀住嗰個account名，開始困惑起嚟。嗰個明明係穎怡冇follow嘅一個account，但係icon入面嘅男仔偏偏就似佢最近有見過嘅人。

到底係邊個呢？雖然Instagram有時會顯示一啲手機聯絡人嘅account出嚟，但係穎怡肯定自己最近冇識到任何男性朋友。於是好奇心旺盛嘅穎怡果斷㩒咗落請求追蹤嘅掣度。

桃味糖：醒咗啦？

穎怡啱啱先㩒落請求追蹤嘅嗰一刻，佢下一秒就收到桃味糖嘅whatsapp。又會咁啱得咁橋係桃味糖搵自己嘅？穎怡打咗個乞嗤。

驚驚：都成一點半啦，乜我睇落似係啲咁遲醒嘅人咩？

穎怡無奈咁搲搲頭，唔明點解對方會咁問自己。可能佢因為聽日第一次出嚟所以緊張？

桃味糖：唔係，其實我想問你
桃味糖：不如聽日我哋早啲出嚟見面先？

咁突然？早啲出嚟見？到底要唔要早啲出嚟呢？穎怡嘅內心一瞬間充滿問號。

「邊個搵你？」月伶好奇地問道。

「桃味糖。」

「佢搵你做—」月伶本身想追問落去，但佢講到一半就停咗，反而抬起手將面膜變得更加貼服：「算啦，今日本宮要同曦銘出街，我唔應該理佢。」

穎怡敷衍咁乾笑幾聲，將焦點講返起桃味糖嘅message上。

但係呢個機會又好似唔錯，穎怡諗道。只要早啲同桃味糖當面坦白，對方都仲有啲時間去消化穎怡係網絡人妖嘅事實，唔需要下一秒就即刻要強顏歡笑咁面對公會嘅其他人。

驚驚：好呀，你應該都係住元朗㗎喇
驚驚：五點地鐵站等？

係，到時同佢道歉先。咁夜晚同大家食飯嗰陣應該唔會咁尷尬，穎怡內心說服自己提早同桃味糖見面。

桃味糖：好呀^ ^

「桃味糖約我早啲出嚟見咗面先喎～」穎怡收到桃味糖嘅回覆後同兩個朋友講道。

「咩話？！」月伶塊面一下子湊近鏡頭，驚訝嘅表情同大動作令面膜由塊面跣落去。

「唔係，我唔應該理。」月伶慌張咁執喺枱上面嘅面膜，然後重新放返上臉。今日佢要同曦銘出街，冇錯，佢唔應該俾情敵騷擾到。

「到時有咩事就Whatsapp我哋囉～」海螢含糊不清咁講道。

穎怡若有所思咁托起腮，嗰個謎一般嘅Instagram account仍然未接受佢嘅追蹤請求。

感覺桃味糖同嗰個account好似有啲關係咁，但係…

桃味糖係女仔嚟㗎嘛，有咩可能會係嗰個account嘅主人呢？穎怡打消咗個念頭。

咁…咁多位大佬！我返嚟啦！

好yeahhh

樓主！

樓主加油

(27)
十二月廿三號，下晝四點四十五分。

月伶喺一間Cafe嘅角落危襟正坐，被稱為「遲到大王」嘅佢出乎意料地比約定時間早十五分鐘就出現。

​佢側頭打量自己喺落地玻璃上嘅倒影，奶油色嘅V領毛衣配一條咖啡色嘅格仔短裙，睇落去斯文大方，就算冇滿分都絕對有九十分。

下晝五點嘅光線唔會刺眼之餘仲會好似一盞自然嘅柔光燈咁，恰好照落月伶嘅身上。謹慎嘅月伶早就計好坐喺窗口隔籬嘅位置會顯得自己最好睇，佢邊會放過任何一個可以打動到曦銘嘅機會呢？

月伶耷低頭摸一摸俾太陽曬暖嘅膝頭，慶幸下晝嘅溫度仍然和暖，今晚對自己嘅腳而言肯定係一場苦戰。

月伶甚至開始喺度考慮要用咩姿勢坐喺度會顯得最自然，到底要唔要挨喺張凳度等呢？咁樣會唔會睇落自己等咗好耐？

定係坐直啲形態會好啲？但係曦銘咪會睇得出自己好緊張？翹唔翹腳好呢？托唔托住個頭好呢？

各種各樣嘅疑問將月伶慢慢扯入去一個旋渦入面，苦惱嘅佢正想揞住額頭思考嗰陣，手板咁啱掂到眉心位置，突如其來嘅刺痛令月伶隻手縮起嚟。

係喎屌，仲有粒瘡。

月伶耷低頭拎起手機照一照自己眉心位置，估唔到佢幾個鐘前敷嘅面膜反而令粒紅點更引人注目。

本來月伶萬般不情願咁唔想出嚟，但一諗到約佢嘅對象係佢嘅心上人，月伶咬緊牙關，最後決定都係帶住頭上嗰粒炸彈赴約。

月伶重新抬起頭，結果見到曦銘喺遠處嘅門口往自己嘅方向行過嚟。

咁早嘅！？月伶嚇到本身托住頭嘅右手一瞬間失去力量，一個不穩就令自己嘅上半身向前傾咗一下。

曦銘著住駝色嘅長褸，入面襯白色嘅樽領毛衣，佢呢一身配搭簡直係月伶理想中嘅溫柔大哥哥風格。

柔和嘅陽光為曦銘全身披上一層薄紗，令佢喺月伶眼中好似識發光咁。曦銘察覺到月伶放喺自己身上嘅視線，抬起隻手左右左右咁揈起嚟。

左右左右咁揈手？做乜鳩啊？！咪即係佢對自己揮手囉！月伶嘅腦好似lag咗機咁，佢竟然連最基本嘅動作都分析唔到。

唔得，既然佢對自己揮手就一定要反應下。月伶將垂落嚟嘅頭髮撥去耳後，然後對住曦銘嘅方向扯起一個自然嘅微笑。

唔係喎，自己戴住口罩，曦銘都睇唔到自己對住佢笑！月伶又再一次因為太緊張而柒咗。

「本身諗住早少少到然後坐住等你—」曦銘拉開喺月伶對面嘅凳：「冇諗過你仲早過我。」

佢諗住等我！？月伶當下好似俾人㩒咗暫停掣咁呆咗呆，曦銘係咪特登為咗佢而早到？

唔係，一向擅於社交嘅曦銘平時對任何人都咁好，唔好自作多情。月伶說服自己。

月伶直視坐喺對面嘅人— 金黃色嘅光芒灑落曦銘嘅身上，令曦銘嘅瞳孔化成一片喺夕陽照耀下波光鱗鱗嘅大海。

「想提早搵定位啫。」月伶拎起餐牌嘗試去擋住自己塊面。唔係，其實個位一早就book好。

「咁你想飲啲咩？」曦銘輕輕咁笑咗聲，眼神充滿寵溺。佢嘅一頭捲髮喺陽光下變得蓬鬆柔軟，令佢睇落似一隻無辜嘅小動物。

「我冇所謂。」月伶再一次無語凝噎，手指喺餐牌上隨便指咗杯嘢飲，眼神開始有意無意咁避開曦銘。

​「點解唔敢望我嘅？」曦銘發現月伶思思縮縮嘅神情，佢好奇咁湊去前面，望住對面微微耷低頭嘅人。

點解要咁近啊！？月伶一望上去就見到曦銘突然放大嘅臉，佢嚇得坐返起身，慌張咁望住曦銘。

喺月伶抬頭嘅嗰一刻，曦銘就見到佢眉心之間嘅暗瘡。佢即刻移開視線，故意唔望月伶嘅額頭。

哦～原來係咁。曦銘內心笑道。，佢一諗到月伶怕醜嘅樣就覺得對方愈嚟愈可愛。

月伶尷尬咁擰轉頭：「今日狀態唔太好，所以就…」唉，果然都係逃唔過曦銘嘅法眼，點避都冇用。

早知唔出嚟啦，月伶垂頭喪氣咁耷低頭摸一摸裙擺。睇嚟佢喺曦銘心目中嘅形象已經徹底冧咗落去了。

曦銘靠前摸咗下月伶嘅頭：「唔緊要啦，我出嚟又唔係為咗見最完美嘅你。」

好yeah 牛年第一文！
祝樓主

新年快樂！

(28)
月伶嘅腦隨住曦銘嘅一句話「轟」一聲炸開咗，佢不可置信咁直視面前一臉真誠嘅人。

唔係為咗見最完美嘅我？咁即係點？即係佢唔介意我今日皮膚咁差？

點解佢要對我咁溫柔？月伶有一刻以為自己發緊夢，以往嘅對象都係因為佢嘅外貌而加以追求，以致月伶對自己嘅樣貌甚至有種淡淡嘅壓力。

而家曦銘意外地一下子撫平佢嘅擔憂，就好似……

曦銘根本就唔在意自己嘅外表咁。

月伶內心糾結咗幾秒，隨口搵咗個理由：「怕我喺你心目中嘅形象會就咁冇咗吖嘛～」佢望咗一眼面前嘅人，自卑咁耷低頭用手捉緊裙擺，原本熨得服服帖帖嘅百摺裙已經俾月伶搞到皺晒。

佢唔敢諗太多，曦銘一向對人都咁好，佢只不過係曦銘眾多朋友中其中一個渺小嘅存在。

「已經識咗咁耐啦喎，喺我面前可以做返自己。」曦銘除低口罩，抿起嘴角，用手指指住嘴邊嘅一粒瘡：「今日唔止你一個咁慘㗎。」

點解曦銘要拎自己粒瘡嚟安慰我？月伶哭笑不得，內心嘅窘迫感逐漸消散。

佢果然冇鍾意錯人。

「點比啊！」月伶同時除低口罩，兩邊面微微泛紅：「你仲有得用口罩遮住喎！」佢委屈咁望住曦銘，比起自己額頭嗰粒嘢，曦銘所講嘅根本就係微不足道嘅問題。

兩個人所嗌嘅嘢食好快就到咗，月伶此時此刻仍然感覺成件事好唔真實，曦銘啱啱竟然不厭其煩咁安慰自己。

明明月伶已經唔係第一次同異性食飯，唯獨係對住曦銘嗰陣就冷靜唔到，緊張到好似行緊鋼線咁。

佢抬頭望向日夜思慕嘅心上人。

曦銘一副滿足嘅樣喺度享受緊面前嘅All-day breakfast，佢支叉移到薯仔上方嗰陣突然停咗下，面有難色咁講道：「月伶，不如你幫我一個忙…」

月伶「嗯」咗聲，即刻將薯仔拮到自己嘅碟上。

記憶中曦銘好似唔會揀飲擇食㗎喎，點解而家突然就好似同薯仔有仇咁嘅？月伶皺起眉頭，對曦銘嘅變化感到疑惑。

「之前去朋友屋企食薯仔食到有陰影…」曦銘一臉歉意咁笑道：「你唔想食嘅話可以由佢。」曦銘一諗起上次喺浩俊屋企食嘅芫茜釀薯仔就打咗個冷震。

月伶嘴角嘅笑意頓時僵住咗，最近佢對於「朋友屋企」呢幾隻字極其敏感，尤其係由曦銘講出嚟嗰陣令佢更介懷。

佢嘅思緒又亂成一團，心入面忍唔住諗起桃味糖當初講過曦銘上過自己屋企嘅事。

孤男寡女共處一室……月伶覺得自己激動到就快可以一拳打爛隔籬嘅玻璃。

月伶按捺不住好奇心，佢脫口而出：「你講嘅朋友係咪桃味糖？」

點解要咁衝動啊！！點解要咁多事啊！！！月伶問完嘅下一秒就開始後悔，佢明明冇資格去過問曦銘嘅私事。

「係啊，你好介意咩？」曦銘理所當然咁答道，令坐喺對面嘅月伶欲哭無淚。

點解要問呀！明知故問有意思咩！月伶內心責怪上一秒嘅自己。

明知自己聽完會唔開心，點解仲要問呢？

但係佢的確好介意…

月伶嘅好奇心再一次戰勝理性，佢抬起頭：「冇聽過你會上女仔屋企吖嘛，所以對你哋兩個之間嘅關係有啲好奇…」

點解要咁明顯啊！月伶恨不得當場摑醒自己。

「女仔？」曦銘嘅聲音充滿疑惑。

點解佢會問返自己轉頭嘅？

「係呀，你啱啱唔係話去過桃味糖屋企咩？」月伶反問。

曦銘忽然哦咗出聲，好似領悟到一啲嘢咁。喺夕陽嘅照耀下。佢淺棕色嘅眼帶住淡淡嘅笑意，令月伶再一次望得出神。

呢個時候唔好發花痴住！月伶搖一搖頭，佢一定要搞清楚件事先。

「桃味糖唔係女仔咩？」月伶問道。

天色漸暗，顯得曦銘嘅面孔更加溫柔。

「理論上我唔應該講嘅—」曦銘慢條斯理咁講道：「但係見係你，我就澄清返個誤會先。」

好柒啊…我而家顯得自己好小器。月伶心虛咁耷低頭飲果汁，手指撫摸住玻璃杯上冰涼嘅水滴。

「其實桃味糖唔係女仔。」

月伶口中嘅果汁一瞬間哽住喉嚨。

「你之前咪喺學校撞到我同浩俊嘅？」曦銘思考片刻，繼續講道：「浩俊咪係桃味糖囉！」

推推推

推！！！
一邊睇一邊笑