是咁的，我鍾意咗隻網絡人妖。

我都係咁話，希望唔會半途而廢

屌負

對唔住而家send

男主示意圖

穎怡示意圖

(8)
李浩俊喺打機嘅時候有一個特殊癖好，就係鍾意扮女仔去整蠱其他人。

當浩俊上完堂如常同曦銘喺自己屋企打機嗰陣，又開始手痕想禍害百姓。

「不如我陪你玩啦。」曦銘鬱悶咁望住浩俊咁講道：「你尋晚已經拖累咗驚驚佢哋，你唔好再害人啦…」

「不了。」浩俊聽到「驚驚」兩字嗰陣呆咗呆，然後言簡意賅咁拒絕曦銘嘅提議。

佢眼見畫面已經到揀角色嘅介面，毫不猶疑地打咗行字。

元朗桃味糖：我唔太識玩呢隻角色TAT求carry

床上的手指：當然啦靚女

「正呀，有女女！」床上的手指背後嘅人係一個滿面暗瘡、不修邊幅嘅猥瑣男，佢望住自己同「元朗桃味糖」嘅對話，不禁想入非非。

床上的手指：不過我可以揸你的奶嗎

床上的手指：sorry，係加你的Line

「哇，乜家陣啲人咁猴擒嘅？」浩俊驚訝道。

元朗桃味糖：唔好啦，你咁心急嘅⁄(⁄ ⁄•⁄ω⁄•⁄ ⁄)⁄

「屌，扮矜持！」猥瑣男不由自主咁幻想起桃味糖嘅樣貌，手心開始冒汗。

遊戲話咁快就加載到熟悉嘅戰場中，浩俊得戚咁笑咗笑，對之後嘅發展胸有成竹。

床上的手指：靚女你幾大呀？

元朗桃味糖：16歲咋(▰˘◡˘▰)

「今次我仲唔撞彩？」猥瑣男對住螢幕奸笑道，佢嘅心跳漸漸加速，更下定決心要喺對方面前展示自己嘅實力。

元朗桃味糖：啊(╥﹏╥)我又死咗啦

浩俊喺自己角色死亡嗰陣不忘撒嬌，激發對方嘅保護欲。

床上的手指：放心，我一定會保護你

「咁樣做嘅話，我死幾多次佢都唔會鬧我。」浩俊得意洋洋咁對住曦銘講道。

床上的手指：妹妹你平時除咗打機之外，仲鍾意做啲咩呀？

「都冇啲新意嘅。」浩俊逐漸厭倦呢種固定嘅溝女模式，佢毫不猶豫就回應咗對方。

元朗桃味糖：冇啊，做下運動咁囉(◕ܫ◕)

「仲唔俾我捉到你？」猥瑣男嘅呼吸變得沉重起嚟，佢已經諗好要點調戲呢個欲拒還迎嘅妹妹。

床上的手指：想唔想學相撲？喺床上面嗰種

「快啲答啦！」猥瑣男如坐針氈，佢搲一搲褲襠嘅位置，不斷望去chatroom嘅方向。

元朗桃味糖：耶～你咁曳嘅？(๑´ㅂ`๑)

「懷疑呢隻game唔再係推塔遊戲，而係tinder啲friend嚟。」曦銘望住浩俊同人嘅激情對話，忍唔住抱怨幾句。

幸好床上的手指嘅實力唔錯，令場遊戲一直進行得十分順利，而浩俊亦可以專心咁繼續佢嘅大計。

床上的手指：乜妹妹你唔鍾意咩

猥瑣男已經等到唔耐煩，佢恨不得即刻穿過螢幕將想像中嘅桃味糖「就地正法」。

元朗桃味糖：鍾意啊，到時候睇吓邊個勁啲^ ^

「啊！哈哈哈哈哈哈—」猥瑣男怪叫一聲，開始喺度淫笑。

床上的手指：妹妹可唔可以開mic俾哥哥聽下你把聲？

浩俊望一望場遊戲嘅走勢，眼見自己嘅隊友開始打入對面嘅主堡，佢將耳機嘅mic帶近嘴邊。

元朗桃味糖：好呀，你等等

猥瑣男望到桃味糖過咗幾秒突然㩒著咗支mic，佢頓時瞪大對眼。

「啊…佢把聲肯定好正…」猥瑣男吞一吞口水，喘住氣咁托托眼鏡，左手慢慢咁伸入去褲襠度。

「喂？我把聲正唔正呀？鍾唔鍾意呀？」浩俊開mic後笑住講道。

「我屌！」猥瑣男剎那間嚇到縮咗縮，隻手迅速地喺褲度抽出嚟，佢瞬間意識到自己俾人呃嘅事實。

「我屌你老—」猥瑣男惱羞成怒咁鬧道，但係佢話口未完就已經被遊戲結束嘅聲效打斷咗。

「做你嘅隊友真係慘…」曦銘苦笑道：「又要carry你，又要俾你撚。」

「係喎，尋晚驚驚佢同我傾咗陣偈—」浩俊似笑非笑咁講到一半就停咗，令曦銘一臉驚恐咁望住佢。

「唔好啦。」曦銘愁眉苦臉咁講道：「佢識我師妹架…」

雖然曦銘仍然未知道西鐵線驚驚嘅真身，但係對方就係同佢一齊打機上分嘅好兄弟。假如浩俊又當驚驚係另一個整蠱對象，恐怕自己日後都唔洗旨意再輕鬆打機。

「我睇下點先。」浩俊講道。佢頗感興趣咁㩒入去西鐵線驚驚嘅簡介度，突然諗起啲嘢，嘴角微微揚起。

樓主好快手好抵讚

lm

等出文 感覺唔錯

有點噁，拉

(9)
「要唔要食埋飯？」浩俊巧妙咁轉開話題：「今晚我煮。」佢眼見時間已經差唔多六點半，就喺梳化度起返身，捋起衫袖走向廚房嘅方向。

「見係你煮先食咋～」曦銘笑笑口講道：「你阿媽上次煮嘅雞翼蒸蛋搞到我有陰影。」佢諗起上次李太煮飯嘅經歷，忍唔住打咗個冷震。

「如果你係女人嘅話，我實溝你。」曦銘挨喺廚房邊，感興趣咁望住浩俊喺度洗菜。浩俊對曦銘嘅視線不以為然，自顧自咁扭開水龍頭，佢白皙嘅手同鮮紅嘅番茄形成強烈嘅對比。

「我打機嗰陣咪係女人。」浩俊答道。佢揚起嘴角，嫻熟咁將鮮紅嘅番茄去皮切片，然後轉身將幾隻蛋用筷子攪勻。

「屌！又講呢啲…」曦銘知自己自討沒趣，寧願落場幫手洗米。兩個人逼喺狹窄嘅廚房入面默默無言咁煮飯，場面一度十分和諧。

客廳嗰邊響起扭門鎖嘅聲，一把充滿活力嘅女聲講道：「好彩趕得切返嚟啫，俾返個廚房我！」曦銘嚇到起曬雞皮，不停向浩俊打眼神求救，點知對方反而側側頭，叫佢行出客廳。

「Hi Auntie！」曦銘原本仍然驚到面色發青，但係一行出客廳就和顏悅色咁同李太打招呼。李太笑住咁敲一敲曦銘嘅頭，捲起恤衫就大搖大擺咁行入廚房。

「今晚我要煮新嘢！」李太笑住講道，浩俊知道為時已晚，靜靜雞咁將手上嗰碟番茄炒蛋拎出去，讓返個廚房俾自己阿媽。

漫長嘅廿分鐘就咁過咗去，曦銘聽住廚房入面好似打仗咁嘅聲，撞一撞浩俊嘅手臂，表示佢嘅擔憂。

「今晚會唔會屙到瞓唔到？我哋聽日有朝早堂架…」曦銘緊張咁問道，佢聽到微波爐「叮」一聲嘅時候，彷彿已經見到死神企喺佢面前揮手。

浩俊聳聳肩，表示自己愛莫能助，繼續喺傳說對決度同一個男仔展開激情對話。眼見西鐵線驚驚喺呢個時候online，浩俊戚一戚眉，突然醒起一啲嘢。

「哇！大佬你想點？」曦銘望住浩俊喺遊戲度申請加入西鐵線驚驚所在嘅公會，嚇咗一跳。

「你哋尋晚到底傾咗啲咩—」曦銘問都未問完，就被李太放落枱嘅一碟餸分散注意力。

「登登登凳！芫茜釀薯仔！」李太自豪咁公佈自己研發嘅新菜式。曦銘聽完碟餸嘅來頭後瞬間臉色發青，佢擰轉頭望住面不改容嘅浩俊，懷疑對方已經被訓練到習以為常。

曦銘目不轉精咁望住前面嗰碟不明物體，感覺似係幾條奄奄一息嘅蟲扒喺發生異變嘅薯仔。佢毫不遲疑咁選擇隔籬嘅蕃茄炒蛋，享受酸酸甜甜嘅味道。

「浩俊，你幾時搵下parttime呀？」李太隨口問道：「你成日都淨係識留喺間房打機，出到去冇人請你㗎喎。」

李太作為一個上班族，自然深知工作經驗嘅重要性。然而浩俊一直以嚟都鍾意宅喺屋企，叫極都叫唔郁。

「我要讀好啲書先。」浩俊言簡意賅咁拒絕咗自己阿媽。

「成日都係用呢個理由敷衍我。」李太反咗個白眼，無奈咁講道：「我遲早退休唔會養到你㗎喇～」

「放心啦auntie！」曦銘講道：「遲啲我有學生想補習數學嘅話，會介紹俾浩俊㗎喇！」佢眼見浩俊唔打算繼續講落去，決定救場。

「曦銘你真係乖！」李太頓時眉開眼笑，夾咗嚿芫茜釀薯仔落曦銘嘅碗度當獎賞。

曦銘望住嗰嚿異形薯仔瞓喺隻碗度，突然覺得自己嘅生命目前受到前所未有嘅威脅。

「多謝auntie！」曦銘夾硬扯起一個笑容，然後拎起隻碗開始扒飯。此時此刻，白飯喺曦銘心目中榮登最美味嘅佳餚。

「你雪櫃有無酒呀？我想壯下膽…」曦銘細細聲咁喺浩俊耳邊講道。浩俊思考咗片刻，點點頭。曦銘見機行事，即刻喺雪櫃拎咗幾罐啤酒出嚟。

「點解你唔食嚿薯仔嘅？」李太喺曦銘行開嗰陣見到佢隻碗入面嘅飯食得七七八八，好奇咁問道：「定係因為你嫌棄我煮嘅嘢食？」

「唔…唔係！絕對唔係！」曦銘猛咁擰頭否認道：「我鍾意將最好嘅嘢留去最後先食啫！」曦銘嘗試向浩俊投去求救嘅視線，然而對方直接無視咗佢，神色自若咁將嗰嚿又綠又黃嘅物體放入口內。

曦銘知道自己死期已到，佢無助咁搲搲頭，望住嗰嚿薯仔吞咗一大啖啤酒。佢視死如歸嘅目光對上李太開始唔耐煩嘅眼神，即刻心虛咁再飲咗大半罐酒。

「食啦？仲等咩？」隨住李太一聲催促，曦銘手震震咁夾住嚿炸彈送去嘴入面。

嗰一刻，曦銘嘗試將口入面嘅物體幻想成其他嘢食，表情扭曲嘅佢合埋咗對眼。

(10)
「當電影放到一半，放映機由於過熱嘅關係，令到菲林燒溶咗。我哋俗稱：『斷片』— 冇咗畫面。人有時飲大咗都會斷片，你會唔記得咗自己做過啲咩嘢，發生過啲咩事。咁當然如果嗰單嘢你係特別唔想記得嘅話呢，仲會強逼自己嘅大腦斷片添。」—《低俗喜劇》（2012）

啱啱上堂瞌著咗嘅曦銘腦海中突然浮起低俗喜劇嘅台詞，佢捽一捽對眼，睡眼惺忪咁見其他同學陸續執嘢離開，自己都拎起背囊企翻起身。

「尋晚發生過啲咩事呢？」曦銘喃喃自語道：「我淨係記得自己食咗一餐飯，個番茄炒蛋幾好食…」佢摸一摸下巴，慨嘆自己嘅酒量退步咗唔少。

「咁除咗番茄炒蛋之外仲食咗啲咩呢…」曦銘認真咁回想尋晚嘅事，但係個頭突然開始痛起嚟，彷彿唔想佢繼續諗落去咁。

「喂！你喺度嘅？」曦銘好奇咁問道。佢行出演講廳後，見到浩俊企咗喺度等佢落堂。

浩俊冇出聲，直接由背囊度拎出一盒腸胃藥，然後遞俾曦銘。曦銘不明所以咁拎住盒腸胃藥，唔明白浩俊嘅用意。

「點解我要食嘅？」曦銘一臉疑惑咁問道，尋晚發生過嘅事對佢而言已經變得模糊不清。

「尋晚我阿媽煮咗牛歡喜。」浩俊理所當然咁講道：「你食完唔舒服。」雖然牛歡喜的確係李太會煮得出嘅餸，但曦銘聽完之後覺得有種講唔出口嘅怪異感。

「食飯？」浩俊問道，佢唔想曦銘繼續探究落去。

「哦…好呀…」曦銘心不在焉咁答道。

浩俊一下子搭住曦銘嘅膊頭往canteen嘅方向行過去，兩個人行行吓，曦銘突然聽到一把熟悉嘅聲。

「我屌佢個嘴啦，又周圍講我收兵！」個女仔怒氣冲冲咁對住電話講道，佢「屌」咗一聲就cut咗線。

曦銘見女仔嘅身形似曾相識，佢撥開浩俊嘅手，行去女仔嘅身後。

「月伶？」曦銘問道，對女仔啱啱嘅怒氣視若無睹。

「邊撚個…！啊！曦銘？！」月伶驚訝道。

月伶一開始仲處於暴怒嘅狀態，佢原本仲罵罵咧咧咁抱怨緊係邊個咁唔識時務。點知當佢轉身見到曦銘嗰陣，上一秒仲兇神惡煞嘅表情瞬間變得溫順起嚟微。

「你個學系唔係喺度㗎喎，等緊人呀？」曦銘一確認係月伶之後就忍唔住嘴角上揚，一下子將啱啱嘅疑惑拋諸腦後。

「哦，係呀～」月伶見自己嘅一臉變臉術成功咗，輕聲講道：「等緊朋友。」

月伶抬頭望咗一眼自己思念已久嘅師兄，然後又耷低頭，唔敢望得太明顯。

「哦，咁洗唔洗陪你等啊？」曦銘把聲變得溫柔起嚟，唔知點解佢想陪多月伶一陣。

「哦，好啊。」月伶嘅眼神游離不定，佢感覺到自己個心就快跳出嚟。

平日健談嘅曦銘喺呢一刻突然搵唔到話題，佢不知所措咁企喺月伶隔籬，兩個人默默無語咁喺牆邊等月伶嘅朋友。

「話時話…」曦銘慢悠悠咁講道。

「係？」月伶對曦銘要講嘅內容特別上心，佢頓時轉頭直視曦銘。

機緣巧合之下，嗰一刻曦銘真摯咁望住月伶，月伶亦碰巧抬頭望到曦銘。兩個人嘅視線相碰後即刻分開扮四圍望。

企喺兩個人後面嘅浩俊見氣氛變得尷尬起嚟，故意乾咳幾聲。

「係！介紹返，我朋友— 浩俊。咁呢位係我師妹月伶。」曦銘俾嗰幾聲乾咳扯返去現實。

「久仰大名。」浩俊笑著咁對住月伶講道。

月伶敷衍咁「嗯」咗一聲，忽略咗浩俊嗰句說話。佢望咗浩俊一眼就重新將注意力放返喺曦銘身上。呢一刻，月伶希望自己嘅朋友可以再遲啲先到。

「我見到朋友啦。」月伶輕聲細語道，佢唔自然咁將頭髮撥去耳背，同曦銘揮手告別。

「今晚打機？」曦銘問道，佢睇住月伶逐漸跑遠，忽然有啲唔捨得。

「佢終於肯主動啦！月伶聽到曦銘問佢嘅嗰一刻塊面紅哂，佢舉起手做咗個「OK」嘅手勢，然後繼續跑開。

「屌！點解你咁遲先嚟呀？」月伶見到穎怡嗰陣抱怨道：「我啱啱緊張到唔識講嘢啦！」

「下？係你話要喺曦銘上堂嗰度附近等㗎喎…」穎怡無奈咁講道。

「走啦！我肚餓啦！」曦銘眼見月伶攬住咗另一個女仔，就放心咁轉身行返去canteen嗰度。

「嗯。」浩俊漫不經心咁答道，佢喺走之前望多咗眼，感覺月伶隔籬嗰個女仔嘅身影有啲熟口熟面。

以後都會喺夜晚八點嗰陣update返一至兩章

師兄妹唔通係雙箭頭好撚得意，浩俊好人妻

Btw芫茜好食樓主唔識貨

下但芫茜係生化武器嚟

(11)
月伶一見到穎怡之後，就唔敢再望返轉頭。佢耷低頭拉住穎怡嘅手臂，快步行到一間日式餐廳門前，諗咗諗就行咗入去。

「佢啱啱約我今晚打機啊！」月伶興高采烈咁講道：「佢今日著得好可愛啊！」佢雙手揞住左邊心口，感覺啱啱面對曦銘嗰陣就快心臟病發。

「你日日都話佢可愛㗎喇…」穎怡無奈咁講道。

「你覺得我今日好唔好睇？」月伶問道：「唔知點解佢啱啱唔係點望我…」佢拎起手機開始照起鏡嚟，擔心自己今日嘅形象唔啱曦銘嘅口味。

「幾正常啊～」穎怡放低餐牌，認真打量月伶嘅裝束— 冷衫配格仔裙，符合曦銘所鍾意嘅清純系女仔。

「今日見到佢個friend…唔記得咩名添。」月伶摸一摸下巴，若有所思咁講道：「幾高，不過唔夠曦銘靚仔。」佢講完之後嘴角不自覺咁升起嚟。

「咁你今晚打唔打機啊？」月伶仲沉浸喺啱啱同曦銘相處嘅時光度。

「考…考慮下？」穎怡窒咗窒，佢一諗起自己可能要面對桃味糖，就有啲猶豫。

「話時話，你同桃味糖嘅進度如何？」月伶彷彿睇穿咗穎怡嘅心思咁，一針見血咁問起穎怡最想逃避嘅話題。

「呃…冇呀！」穎怡俾月伶嘅話題嚇咗嚇，佢下意識咁摸一摸個鼻，喺度諗到底要唔要講返尋晚發生過嘅事。

然而穎怡最唔擅長嘅事就係講大話，佢心虛嘅神情反而令月伶疑心更重。

「快啲從實招來！」月伶唔耐煩咁講道，啱啱溫柔嘅樣貌盡然消失。

「尋晚有同佢傾偈嘅…」穎怡細聲講道：「知道咗佢同曦銘好熟咁囉…」穎怡欲言又止，打死都唔肯講自己尋晚反而俾桃味糖調戲嘅事實。

「雖然呢樣知嚟冇咩用。」月伶冷靜咁講道：「咁點解你咁抗拒同佢玩？」佢托住頭直視坐喺對面嘅穎怡，令穎怡恨不得即刻掘個窿走佬。

「點算啊…」穎怡諗道，佢就快將口入面嘅飲管咬爛，個腦飛快咁諗緊各種各樣嘅藉口去解釋。

當兩個人仲僵持緊嗰陣，突然佢哋嘅手機同時間響起Whatsapp嘅通知聲。

林海螢：桃味糖想入我哋公會喎，收唔收？

「唔撚係掛…」穎怡心入面諗道，佢偷偷地咁觀察月伶嘅臉色。穎怡本身以為月伶又會再一次爆炸，然而月伶成個人反而心平氣和咁鬆弛返落嚟。

張月伶：收！點解唔收？

穎怡見到月伶嘅回覆，疑惑咁望住月伶一反常態嘅反應。

「你隱瞞緊嘅就係呢樣嘢？」月伶笑笑口講道，佢以為穎怡尋晚主動邀請桃味糖加入佢哋所在嘅公會。

「係呀！」穎怡雙眼發光，佢眼見月伶冇咩所謂嘅樣，理直氣壯咁認咗樣自己冇做過嘅嘢。

「點解要咁驚啫！」月伶笑咗笑：「咁咪即係俾咗個機會你去接近佢囉！」​穎怡見已經保住咗自己條命，唯有尷尬咁喺度乾笑。

「但點解咁似係佢想接近我嘅…」穎怡心入面開始擔憂起嚟，諗唔透桃味糖背後嘅企圖。