是咁的，我鍾意咗隻網絡人妖。

(37)
對曦銘而言，只要係月伶有份出席嘅聚會，自己嘅心情就會不自覺地愉快起嚟。就算要應酬幾多人都好，只要可以望到月伶一面，曦銘就會心滿意足咁繼續默默關心對方。

只不過……今次嘅情況有啲尷尬。個距離會唔會太遠？！

曦銘坐咗喺間房嘅角落頭，而月伶就企咗喺間房嘅另外一個角落，兩個人彷彿被厚厚嘅人牆擋住咁。

曦銘一臉無奈咁望咗眼坐喺隔籬嘅浩俊，有時候同浩俊出去聚會真係好掃興，對方一直都面無表情咁拒人千里，成塊面就好似寫住「我被迫出嚟㗎放過我啦」。

都係月伶好。

「喂～點解今日你嚟嘅？」胖虎拎住一包薯片行去曦銘嗰邊，一下子搭上曦銘嘅膊頭。

作為月伶嘅熟人，曦銘唔單止同公會入面嘅人素有來往，尤其係胖虎等平易近人嘅成員，令曦銘更快同佢哋打成一片。

「係囉，點解嘅。」胖虎嘅問題篤中浩俊嘅好奇心，佢雙眼直視住曦銘，似笑非笑咁問道。

雖然浩俊一直知道曦銘對月伶有意思，但點解偏偏係揀自己同穎怡相認嘅日子先出現嘅？浩俊回想起曦銘當時心虛嘅表情，已經大概估到自己嘅好兄弟係俾花生嘅香味吸引過嚟，但佢仍然想聽對方嘅解釋。

「冇啊。」曦銘知道自己已經無路可退，又唔想將責任推卸俾月伶，佢唯有從實招來：「其實我都係早幾日先知穎怡係女人，今日諗住你哋出嚟，咪湊下熱鬧囉。」

「你唔早啲同我講？」浩俊一開始聽到事實嗰陣的確有啲不快，佢從來冇諗過曦銘會有同自己講大話嘅一日。

仲要係俾另外一隻網絡人妖玩番轉頭……浩俊條件反射咁望向穎怡嗰邊嘅時候，佢咁啱就同穎怡四目相對。

但當穎怡下一秒就慌張咁移開視線嘅時候，浩俊感覺對方就好似做錯事俾人捉到咁，佢忍唔住想笑。

算。個體驗冇想像中咁差。浩俊推咗罐啤酒去曦銘面前，聲線毫無起伏咁講道：「你爭我一份人情。」

「知啦知啦。」曦銘悶悶不樂咁一飲而盡，然後擰轉面望住胖虎：「點解你咁快就適應到桃味糖係男人嘅？」

想當初自己都要段時間先接受到個事實…不過都好嘅，至少代表自己少咗個對手。曦銘望向同穎怡有傾有講嘅月伶，心情開始暢快起嚟。

「好快就接受到啦！已經經歷過一次喇嘛～」胖虎拍住大髀笑道：「知道穎怡喺女人嗰陣，已經係幾個月前嘅事啦！」

咁即係胖虎同小明都有份呃埋自己。浩俊諗起當初同佢哋打機嗰陣嘅事，喺心入面嘅小器簿寫上胖虎同小明嘅名。

「點解你講到做網絡人妖好似好平常咁嘅？」嘉琪嘅聲喺胖虎身後響起，佢一手揸住骰盅，慢悠悠咁行過去曦銘一行人坐嘅梳化隔籬。

邊位？浩俊嘅腦海入面彷彿冇同嘉琪交流過咁，佢匆匆咁望咗嘉琪一眼就冇再理過對方。

「都OK平常㗎！」曦銘一見係唔熟嘅人就進入交際草模式，佢笑住開口：「你睇吓，呢度已經有兩隻喇喎～」

「係咩？男仔嘅話我還好。」嘉琪目光炯炯咁望住浩俊，佢頓咗頓：「但係女仔做網絡人妖就…我會覺得佢生活太枯燥囉。」

條女咩事？浩俊打咗個冷震，對住第一次見嘅人就咁講嘢㗎咩？

「係呀？」曦銘知道嘉琪嘅說話意有所指，但佢又唔敢仔細問穎怡同嘉琪之間嘅過節。

曦銘見過唔少唔識相嘅人，咁唔要面嘅人都係第一個。但出於禮貌，佢又唔好意思拒絕人，唯有尷尬咁坐喺度儘量陪笑。

都係月伶好。曦銘再一次望向月伶坐嘅位置，至少月伶唔會咁刻意。

今次終於到曦銘同月伶四目交投，月伶望到曦銘同嘉琪嗰陣僵咗下。

月伶下一秒就擰轉面，有意逃避曦銘嘅視線。曦銘見到月伶臉上嘅笑容一下子煙消雲散，而佢忽然覺得佢同月伶之間嘅距離好似返到去啱啱識嗰陣咁。

曦銘恨不得即刻同月伶解釋清楚，但係佢知道自己只不過係對方嘅師兄，根本冇澄清嘅必要。

但係當佢望到月伶強顏歡笑嗰陣，個心都好似跌咗落谷底咁。

「你唔肚餓咩？」胖虎意識到氣氛有啲奇怪，佢將包薯片舉到嘉琪眼前：「見你好似食得嗰幾啖咋喎。」

「你知道我不嬲都咁細食㗎喇～」嘉琪推開包薯片，夾硬坐落浩俊同曦銘中間，令浩俊一臉厭煩咁褪開個位俾個不速之客。

「我都係第一次聽。」胖虎用住誇張嘅口型同浩俊講道，浩俊若有所思咁笑咗笑，決定將專注力放喺電話度。

而可憐嘅曦銘就成為嘉琪嘅目標，佢臉上努力保持住不失禮貌嘅微笑，上半身慢慢咁褪後，嘗試同嘉琪維持一段距離。

「你識唔識玩大話骰啊？」嘉琪突然問道，佢有意無意咁湊近曦銘嘅位置。

「識啊識啊！」曦銘俾嘉琪嘅熱情嚇親，佢好似捉住救命稻草咁做揸實放喺枱面嘅骰盅，目光喺月伶坐嘅嗰一帶徘徊。

「咁你可唔可以教我啊？」嘉琪掛上嫵媚嘅笑容，故意摸上曦銘捉住骰盅嘅手。

金翅仆街鳥。

曦銘嘅餘光見到月伶目擊到呢一幕，而當佢縮開隻手嗰陣，月伶已經擰轉身走開咗。

「三唔識七就摸嚟摸去。」浩俊似乎睇唔過眼，開口道：「你唔尷尬架咩？」

「唔好意思。」嘉琪笑道：「可能我醉醉地。」

對曦銘而言，只要係月伶有份出席嘅聚會，自己嘅心情就會不自覺地愉快起嚟。

但今次嘅情況有啲尷尬……月伶竟然開始逃避佢。

曦銘嘆咗口氣，點解佢今日可以咁失敗呢？

準時送到

樓主好勤力

有冇人仲有睇呢個故架正正因為係第一次落筆寫故，如果有bug同覺得有地方要改善歡迎講出黎啊你地每一個cm對我黎講係最大嘅動力

個嘉琪係咩料係公會啲人嚟？
無啦啦登場想食咗㬢㬢咁嘅，好似冇咩鋪排
仲有㬢㬢係咪未出過嚟網聚，點解好似唔似得三寶同其他人咁熟稔嘅

其實嘉琪係咪一開始公主病嗰個

我都覺得好似有啲突兀，但劇情需要

嘉琪嘅話，佢的確係公會入面嘅人之後會寫返點解呢條女會出現架啦
至於曦銘點解會冇咁熟，主要係因為佢唔係公會入面嘅人，你當係hi bye friend咁啦嗰陣覺得唔太重要所以冇特登提，好多謝你肯去問啊愛你愛你

咁快估到嘅，懷疑我已經注定冇得寫懸疑故

好多文！大愛樓主

多謝你等咗你嘅cm好耐啦

報到 覺得樓主寫故比較細緻 會好用心咁交代每個人物嘅動態 但都好同意樓上所講嘉琪突然出嚟會有少少突兀 如果樓主形容多啲新（而又會幾重要）角色嘅衣著打扮會唔會令成件事具體少少？

加油啊！

加油加油~！

唔知點解一睇就覺得係
睇多次先發現開頭原來冇提過個名

樓主快啲寫

(38)
穎怡都唔太記得個聚會之後到底係點完嘅，佢印象最深刻嘅係當嘉琪埋去曦銘嗰邊搭訕嗰陣，月伶黑過墨汁嘅面色、仲有醉咗嘅胖虎捉住小明隻手話「我要進來了！！」，仲有浩俊臨走之前叫自己返到屋企講一聲嗰陣……

傻啦！肯定係記錯咗！佢邊會咁好人啊！

此時此刻嘅穎怡懵盛盛咁同飲到醉醉地嘅月伶坐喺梳化邊，而海螢嫻熟咁拉開幾罐啤酒放喺枱面。

「唔係吖嘛？」穎怡一向飲酒都點到即止，佢一臉為難咁望住海螢：「啱啱已經飲咗好多啦喎。」

「要借酒消愁啊。」飲到滿面通紅嘅海螢眉開眼笑，佢舉起一罐啤酒一飲而盡。

海螢好少會一下子飲到咁醉…穎怡疑惑咁望住對方，唔通晏晝出街嗰陣炒咗車？

「做咩啊？」穎怡一下子抱住海螢，飲咗酒之後嘅身體感覺特別笨重。

「係咪同你出街嗰條友做咗啲咩對你唔住嘅事！」穎怡將海螢嘅髮絲撥去佢耳後，心平氣和咁問道。

「嗯。」海螢一臉委屈咁望住穎怡，雙眼閃過淚光：「原來係傳銷狗嚟。」

海螢性格靦腆，更加不擅交際。難得遇到一個可以令佢敞開心扉嘅人，結果發現對方別有用心…佢一定好難過。穎怡一瞬間啞口無言，唯有陪住海螢一齊飲多罐啤酒。

「我覺得我唔值得俾人愛。」海螢攤咗喺梳化上面，垂頭喪氣咁講道。

喺屋企又俾人無視、朋友又唔多，連同出街嘅約會對象都諗住呃自己…海螢瞌埋眼，嘗試逃避苦澀嘅現實。

都係飲酒好，飲完一覺瞓天光，唔洗煩咁多嘢。

「你以為得你一個唔開心咩？」穎怡正打算將自己件外套披喺海螢身上嗰陣，月伶突然彈起身。

「有咩慘得過望住你鍾意嘅人俾人媾—」飲醉咗嘅月伶斷斷續續咁講道：「而你連嬲嘅資格都冇。」

穎怡諗起當時嘉琪笑意盈盈咁向浩俊同曦銘示好，而曦銘亦都好大方咁同對方傾咗一段時間，然而去到月伶眼中就變成曦銘貪新厭舊嘅證據。

「但係曦銘本身就係咁平易近人。」穎怡雖然同嘉琪之間有過節，但都嘗試保持理性咁解釋道：「可能佢都係出於禮貌所以先咁做呢？」

都唔知嘉琪條友係咪想報復所以先咁做。早知唔同佢講自己係人妖啦，又唔係唔知佢記仇。穎怡揞住額頭，開始後悔當初同嘉琪坦白從寬嘅事。

「就係咁先煩啊。」月伶一臉嫌棄咁望住穎怡：「我有時寧願曦銘可以好似浩俊咁，對住任何人嘅態度都一樣— 唔講嘢。」

「俾著係我嘅話就唔會揀碌木。」好？穎怡內心輕蔑咁笑道，佢唔會將一個咁傲慢嘅人同個「好」字扯上關係。

「之前同你喺公園飲酒嗰陣已經講過啦。」月伶講道：「我唔想再活喺呢種不停呷醋嘅循環中。」

月伶一諗起嘉琪恨不得貼住曦銘嘅時候，內心一下子苦澀起嚟。

穎怡再一次無話可說，佢望咗眼不斷飲悶酒嘅海螢，突然覺得自己當下企咗喺修羅場嘅正中心。

死啦，曦銘走之前仲提我要照顧月伶…今次真係尷尬。穎怡內心慨嘆道。

「點解佢好似盲咗咁嘅？」兩行淚水喺月伶嘅眼眶度流落嚟：「乜我唔夠主動咩？」

「唔係。」穎怡知道月伶一直以嚟嘅付出，佢冇辦法再由客觀嘅角度去分析月伶同曦銘嘅關係。

月伶回想起自己一直不斷咁爭取同曦銘嘅相處時間，更加會無時無刻都關注對方嘅一舉一動。佢鼻頭一酸，眼淚流得更厲害。

「鍾意一個人明明係一件開心嘅事，但點解去到我哋度可以咁一波三折？」海螢搭嘴道。

海螢諗起當初同阿軒促膝暢談嘅日子，內心突然更加寂寞。

「真。」月伶舉起一罐啤酒同海螢乾杯：「穎怡你而家可能唔明，但係遲早總會有一個人會令你嘅心情七上八落。」

邊會唔明啊…穎怡內心無奈咁反駁道，佢自己又何嘗未試過對一個人心動，只不過每一次都無疾而終。

「係，尤其是又酸又甜嘅嗰種感覺。」海螢附和道：「真係好易令人上癮。」

「我好享受呢種冇鍾意人嘅日子，唔好諗住講完我就會動容。」穎怡固執己見：「絕對唔會俾其他人控制到自己嘅心情。」

我就快頂唔住啦大佬…穎怡唔想再同兩個飲醉咗嘅人雞同鴨講，佢偷偷地咁拎起月伶嘅電話，然後靜雞雞咁send咗個Whatsapp俾曦銘。

「唔係，你真係會遇到嗰條友。」月伶企起身，搖搖晃晃咁指住穎怡講道：「總會有一個人令你覺得：就算係為咗佢赴湯蹈火都好，只要你望到佢笑嘅嗰一刻，你就會心滿意足。」

月伶發表完偉論之後，就轉身攤坐喺海螢嘅腳邊陷入睡眠。

「我先唔會變到好似你哋咁。」穎怡笑住講道：「我行動派嚟，邊會有呢個時間傷春悲秋。」

可能係酒精影響大腦嘅判斷能力，又或者會令一個人更加衝動，穎怡果斷咁召喚曦銘幫手送月伶返屋企。

「辛苦哂你啦。」曦銘轉眼間就返到去佢哋打邊爐嘅場地，佢一臉擔憂咁扶起醉醺醺嘅月伶。