是咁的，我鍾意咗隻網絡人妖。

遲咗少少先更，唔知啲位夠唔夠心動，大家有咩意見記得留低

好sweet

甜撚死我

好正好sweet

樓主篇故會唔會有甜

遲啲可以試下寫

甜到陰陰嘴笑

(41)
「其實我一早就估到佢鍾意我。」月伶滿面春風咁講道，佢回想起尋晚種種令人心動嘅場面，洋洋得意咁向朋友炫耀一切來龍去脈。

月伶高興得將自己塑造成明察秋毫，運籌帷幄嘅軍師，一早就將曦銘嘅心牢牢捉住。而幕後主腦就無奈地坐喺電腦前，靜靜咁望住月伶雀躍嘅模樣。

「講到你尋晚冇呷過醋咁。」穎怡皺住眉講道，本來仲期望月伶可以稱讚下自己尋晚嘅決定，結果月伶竟然先行搶過功勞。

唔緊要，真正嘅高手就係要深藏功與名。穎怡自我安慰道，佢望向月伶臉上甜蜜嘅微笑，啱啱起身所累積嘅起床氣都一掃而空。

只不過點解好似有啲嘢唔記得做咁嘅？穎怡不禁問道，一種淡淡嘅空虛感一直纏擾住自己，但感覺上又唔係一件重要嘅事。

啊！會唔會係未刷牙呢？穎怡起身走出鏡頭嘅範圍外。

「馬後炮！」海螢滿臉嫌棄咁向鏡頭豎起一隻中指：「揼低我哋執手尾。」

只要海螢一返到去自己間房，就恍如返到去安全領域般展露出一反常態嘅豪邁真面目。

「一次半次啫～」月伶興奮得轉身撲落身後嘅床，情不自禁咁抱住厚厚嘅被：「尋晚我攬咗佢啊～」

「其實我平時最睇唔起就係呢種旁敲側擊嘅表白方法。」月伶抱住被褥嘅手變得愈嚟愈緊。

「但係你而家擺明好爽喎～」海螢模仿起月伶抱住被褥，裝模作樣咁做起嬌羞嘅表情：「明明一直都受，睇對象咋嘛！」

穎怡面無表情咁帶住一口白泡行返去鏡頭前，表示對月伶興奮嘅模樣司空見慣。

唔係刷牙。穎怡耷低頭啷口嘅時候想道，究竟係漏咗啲咩呢？

「咁你哋幾時請食出pool飯？」穎怡隨口問道，佢坐返喺電腦前，仍然諗緊到底自己係咪斷片。

「等佢醒咗再講啦。」月伶答道，曦銘應該未瞓醒，畢竟對方尋晚一定好夜先返到屋企。

穎怡繼續不斷回想當時嘅一舉一動：安撫海螢，叫曦銘送月伶返去，然後就瞓醒……

「咩呀！」海螢突然變大嘅聲線打斷穎怡嘅思緒，一臉驚恐咁望住曦銘嘅遊戲紀錄：「凌晨四點到而家一直都打緊機喎！」

明明曦銘同月伶都係健談嘅人，但兩個人竟然出乎意料地冇搵過對方。

「即係自從曦銘送到你返屋企之後，你哋一句嘢都冇講過？」穎怡一臉不可思議咁問道，突然間醒起自己當初漏咗啲咩。

穎怡問完之後㩒開Whatsapp紀錄，發現原來尋晚所見到嘅唔係幻覺—原來浩俊真係有搵過自己。

但朋友嘅事比較重要，穎怡不加思索就將電話放返喺枱面，一心一意咁關心月伶嘅情況。

月伶失神地點一點頭，抱緊被褥嘅手臂一瞬間鬆開，默認穎怡嘅問題。

「出事啦！」海螢大聲笑道，激動得雙手用力拍落枱上：「你哋唔係好sweet㗎咩？」

「靜啦！」月伶尖銳嘅聲線同海螢房門外嘅叫罵聲重疊埋一齊，海螢嘅氣勢一下子被淋熄，唔忿氣咁反咗個白眼作無聲抗議。

「點算好？我應唔應該主動搵佢啊？」月伶錯愕嘅神情變得焦急起嚟，倉皇失措咁望向穎怡嘅畫面。

你一個情場老手，走嚟問一個冇拍拖經驗嘅人，正常咩？穎怡表面上作思考嘅表情，但內心不禁反問對方。

「係我就唔會搵啦。」穎怡斬釘截鐵道。

「點解嘅？」月伶不知所措咁打量電話上同曦銘嘅對話內容。

「你都主動咗幾年啦！」穎怡理直氣壯道：「連尋晚都係你攬佢喎～點解曦銘連句早晨都唔肯主動講先？」

月伶聽完穎怡嘅解釋後逐漸冷靜落嚟，但內心仍舊忐忑不安。

「你咁樣不斷主動呢～」海螢搭嘴道：「會縱壞佢㗎！」

但係我又唔介意縱壞佢嘅…月伶忽然心軟起嚟。

「啱㗎喇～自古以嚟都係啲男仔主動㗎喇，你對住曦銘咁軟做咩啫？」穎怡答道：「振婦綱！」

月伶面有難色咁「嗯」咗聲，遲疑不決咁停留喺對話介面上，內心不由自主咁擔心起曦銘嗰邊嘅情況。

事實證明月伶並唔係杞人憂天，此時此刻嘅曦銘帶住重重黑眼圈，心慌意亂咁坐喺浩俊屋企嘅梳化上。

「傻架？」浩俊冷淡嘅聲線喺曦銘耳邊響起：「你尋晚明明係開口表白嘅人，點解而家又要再主動多次？」

「但……」曦銘顧慮重重，一夜不眠嘅結果係令反應愈發遲鈍，曦銘嘅行事作風變得更加優柔寡斷。

「講句早晨好難咩？」浩俊反問道：「理論上你唔需要講早晨，你冇瞓過。」

曦銘無言以對，佢嘆咗口氣，將注意力重新放喺遊戲上。

第十舖遊戲以戰敗告終，浩俊同曦銘心照不宣咁退出遊戲，同時㩒入Whatsapp。

「嗯？」曦銘好奇咁偷望浩俊嘅Whatsapp介面：「你要搵邊個啊？」

平日嘅浩俊懶得回覆大部份訊息，置頂嘅對話永遠都係屋企人或者曦銘，所有狂蜂浪蝶通通被一個「永久封鎖」嘅制打入冷宮。

對曦銘而言，浩俊會主動㩒入Whatsapp嘅舉動絕對非比尋常。

「冇。」浩俊言簡意賅地打斷曦銘嘅遐想，默默掃咗眼最近嘅幾則對話，心情莫名其妙地煩躁起嚟。

明明已經破天荒地主動關心人，點解可以已讀不回？

「咁即係搵唔搵佢好…」曦銘迷茫地問道，視線停留喺同月伶嘅對話上。

「唔搵！」浩俊不自覺地帶上個人感情，加重語氣道：「第一日唔應該對人咁好，佢哋唔會珍惜。」

「佢哋？」曦銘困惑咁望向浩俊，到底今日係邊個踩中自己嘅好兄弟條尾呢？

咁到底應唔應該主動搵月伶好呢？

係就好啦真係好緊張會唔會夠甜，之後會再努力啲寫的 多謝你嘅cm

搵啦 要甜呀

簽到～

佢哋成班喺海瑩房到？

(42)
雙方仍舊唔敢輕舉妄動，戰局以僵持不下嘅局勢延續落去，月伶同曦銘背後嘅軍師都不謀而合地唔願讓步。

曦銘同月伶此刻彷彿企喺戰場上對峙，全神貫注地等待敵方嘅下一步動作，隨時準備決一死戰。

「唉，你自己諗。」浩俊突然將個波拋返去俾曦銘，其實決定權一直都喺曦銘手中，佢只不過係需要一份勇氣。

曦銘望向一臉煩躁嘅浩俊，最終決定跟隨內心想法。

只不過係一句簡簡單單嘅問候，點解可以變得咁複雜呢？曦銘拎起電話，一睇到月伶嗰邊顯示住在線上就緊張起嚟。

曦銘修長嘅手指㩒落每一隻字嘅毫秒間彷彿變得特別漫長，佢一動不動咁凝視住發送欄中嘅兩隻字，仍然遲疑不決。

「麻鬼煩。」浩俊無法理解曦銘嘅內心掙扎，一手㩒落對方嘅電話螢幕上，幫手將訊息send出去。

曦銘：早晨

喺螢幕嘅另一邊，月伶喺見到曦銘「正在輸入中」嘅時候會心微笑，將穎怡嘅計謀左耳入右耳出，上一秒嘅戰略會議一瞬間化為泡影。

只不過係一句早晨啫，咁多內心戲做咩啫？月伶心入面笑道。

月伶：早晨

兩個人不約而同咁同時間send咗個信息俾對方，局面終於有所緩和。月伶喺收到句「早晨」嘅時候，心臟一下子受唔住曦銘嘅攻勢，不受控咁跳動著，看似平凡嘅一句話喺曦銘口中講出嚟嘅感覺係如此與眾不同。

「唔講啦，我要打俾佢。」月伶笑笑口咁將電話舉到鏡頭前，俾海螢同穎怡睇清楚最後嘅戰況，上揚嘅嘴邊滿溢著甜蜜。

「走啦！」海螢再次對住鏡頭豎起筆直嘅中指：「走咗唔好返嚟呀！」