是咁的，我鍾意咗隻網絡人妖。

lm

(17)爾虞我詐
元朗桃味糖：秘密嚟㗎(〃°ω°〃)

「咁在意做咩呢？」浩俊不屑道：「已經有曦銘喇，仲想要埋驚驚？」

浩俊刻意隱瞞佢同驚驚之間嘅事，嘗試令其他人對兩人之間嘅關係浮想聯翩。當佢嗰句話send到出嚟嗰陣，穎怡嚇到倒吸一口氣，意識到自己似乎已經成為風暴嘅中心。

「哦～」月伶若無其事咁笑道：「對唔住，我份人好奇心比較重。」

「佢唔係以為我真係會信佢呀？」螢幕後嘅月伶咬牙切齒咁喺內心鬧道，佢一向唔會浪費時間出手接觸自己嘅情敵，然而月伶今次感覺桃味糖零舍難應付。

「講起秘密—」月伶欲言又止：「阿桃你把聲都幾神秘㗎喎～幾時賞面開個mic，嚟俾我哋聽下你把聲啊？」佢講完之後嘴角不知不覺咁扯起一個意味深長嘅微笑。

「佢以為我冇俾人問過呢種問題咩？」浩俊聽到月伶嘅挑釁之後愣咗愣，隨即得心應手咁覆咗對方。

元朗桃味糖：我把聲冇你咁好聽，怕醜啊(o´罒`o)

「阿桃你唔使驚㗎喎！」胖虎出聲附和月伶：「睇你icon就知係靚女嚟，把聲一定唔會難聽！」

浩俊清楚自己而家處於不利嘅處境，然而如果將佢哋嘅請求視若無睹，反而會令其他人起疑。

正當浩俊仲考慮緊最恰當嘅解決方法嘅時候，驚驚忽然英雄救美，緩解咗令浩俊難堪嘅氣氛。

西鐵線驚驚：人哋怕醜就唔好逼人啦

雖然穎怡對桃味糖嘅印象唔好，但係佢仍然會惜香憐玉，唔忍心見到對方俾人逼到無路可退。

「點解要幫我？」浩俊望住驚驚幫手解圍嘅舉動，心入面迷茫咁問道：「佢唔係鍾意月伶架咩？」

「驚驚。」月伶故意喺叫穎怡嗰陣加重語氣：「我哋女仔傾偈，你哋啲男人就唔好插嘴啦。」

穎怡深知自己嘅一時心軟令到月伶開始唔耐煩，佢即刻識相咁唔再出聲。

「係喎！你哋sem break未？」月伶見冇人再敢講嘢，就開咗另外一個話題：「你哋聖誕有無約啊？」

「毒撚邊會又人約呀？」小明一臉嫌棄咁講道：「月姐你擺明想笑我哋。」

「唔係想笑你哋啊！」月伶用住委屈嘅語氣解釋道：「喺度諗緊我哋公會要唔要嚟聚下咋～」

「好呀好呀！」胖虎心花怒放咁答道：「月姐叫得一定去！」

月伶眼見驚驚同小明都表示會出現，下一秒就開始關心仍然未出聲嘅桃味糖。

「咁阿桃你呢？」月伶溫柔咁問道：「你入咗我哋公會嗰一刻，我就當咗你係自己人㗎喇～」

「就俾我睇吓你有幾靚！」月伶心入面輕蔑咁諗，佢冇再問落去，興趣盎然咁等待桃味糖嘅回覆。

元朗桃味糖：下～但係我嗰排好忙喎(๑´ㅁ`)

浩俊聽到月伶嘅問題後深諳不妙，佢暫時唔想就咁暴露自己嘅性別，唯有作咗個藉口去婉拒對方。

「但點解唔去呢？」浩俊嘅內心突然有把聲問道：「你唔係好想玩佢哋嘅咩？」浩俊嘅眉頭瞬間緊皺起嚟，努力咁將呢種危險嘅諗法壓落去。

「我仲好好奇究竟阿桃真人會有幾靚添！」月伶惋惜咁講道：「咁唯有下次再約你啦！」

浩俊彷彿放下心頭大石咁唞咗啖氣，然而佢腦海入面仍然有種衝動鼓勵緊佢出去。

「話時話，最近呢隻game嘅人妖變得愈嚟愈多。」月伶氣定神閒咁提起新話題：「我真係唔明點解佢哋唔講嘢、又唔見得人，仲會有人上釣。」

「係啊！我早排先聽到朋友話遇到一個人妖。」胖虎和應道：「嗰個床上的手指呀！唔知你哋仲記唔記得佢。」

「唔係呀嘛…佢講嗰個人妖應該係我嚟。」浩俊一聽到熟悉嘅名就開始頭痛。

「係囉～」月伶憂心忡忡咁認同道：「阿桃你要小心啲啊！」

「你真係鍥而不捨。」浩俊冷笑咗一聲，深知月伶意指自己係人妖。

元朗桃味糖：其實我可以出嚟嘅(๑¯∀¯๑)

元朗桃味糖：你哋唔會係人妖架可(`3´)

浩俊語氣一轉，突然答應月伶嘅邀約。

「緊係唔會係人妖啦！」月伶見自己成功引蛇出洞，興奮咁講道。

「當你發現原來自己嘅假想敵係男人嗰陣，你會點呢？」浩俊一諗起月伶見到佢真人嘅反應，就開始期待起聚會嘅到臨。

自從桃味糖應承咗會出嚟之後，月伶就冇再刁難對方，吱吱喳喳咁同胖虎討論聚會嘅地址同日期。

場遊戲好快就結束咗，浩俊返到去同其他人組隊嘅介面嗰陣，望到來自驚驚嘅message。

西鐵線驚驚：你如果唔想出嚟嘅話唔好逼自己

「如果你突然發現，傾開偈嗰個女仔原來係有賓周嘅—」浩俊喺心入面冷嘲熱諷道：「你會點反應呢？」

浩俊飛快咁回覆對方，臉上泛起一個耐人尋味嘅微笑。

元朗桃味糖：唔會勉強啊～

元朗桃味糖：我好期待見到你真人(`・ω・´)

you原來是個boy?!

冇錯想當年都係因為呢篇漫畫啟發到去寫呢個故

(18) 戰略會議
「點解唔早啲講？」穎怡忐忑不安咁直視電腦螢幕上嘅月伶，佢抱怨道：「至少俾個心理準備嚟呀。」

啱啱打完幾舖機嘅穎怡仍然未冷靜落嚟，雖然佢口頭上應承咗月伶會同公會嘅其他成員見面，但係佢冇諗過月伶會叫埋桃味糖。

「咪係，未問過我就約曬咁多人。」海螢都不滿咁附和道：「你有冇放過我呢個公會會長喺眼內？」

「好呀！」月伶淡定咁講道：「俾我睇吓你哋兩個下星期嘅行程。」

穎怡同海螢唔情願咁拎起手機，㩒入日曆嗰度，然後對準鏡頭影俾月伶過目。

「咪又係聖誕冇人約。」月伶見到兩個人日曆空空如也嘅行程，不禁輕蔑咁笑咗一聲：「咁即係幾時都得啦？」

「可能突然有人約呢…」穎怡忿忿不平咁細聲抱怨道，然而佢見到月伶嘅臉色一變嗰陣，就即刻講道：「即係咁講，你叫得我一定會去嘅～但係人哋唔知我係女人喎。」

「冇錯！我就係諗到點做啦！」月伶拍一拍手，躊躇滿志咁講道：「而家係十九號呀嘛，我哋約廿四號出嚟。」

「我俾幾日你儘量溝個桃味糖，等佢對你有意思嗰陣呢—」月伶繼續講道：「出到嚟就發現你係女人！淨係諗到佢嗰陣嚇親嘅樣都心涼！」

「穎怡，你個friend係咪俾愛情沖昏頭腦？」海螢聽完月伶嘅計劃後，一臉正經咁講道：「點解會諗到要整蠱自己情敵呢啲咁…醒目嘅計劃？」

穎怡對住螢幕無奈咁苦笑，佢果然又係月伶計劃中最重要嗰環。

「放心啦～我之後會請你食餐好嘅！」月伶安慰道，令穎怡都開始俾佢嗰套說服。

「但係我平安夜有約—」海螢小心翼翼咁觀測月伶嘅表情變化，最後都係補充道：「可以變做平安日嘅。」

「約咗邊個呀？」穎怡好奇咁問道：「呢排都見你成日同同一個男仔打機，係咪佢？」

穎怡諗起海螢最近成日打機都會同一個佢唔識嘅男仔組隊，連月伶嗰晚唔開心仍然無阻海螢去搵嗰條仔，佢感覺海螢終於迎來自己嘅春天。

「係呀～同佢傾咗都有一段時間，都幾夾嘅。」海螢羞澀咁微笑道：「不過嚟緊想買衫，到時著好睇啲出去。」

海螢一回想起同嗰個男仔相處嘅時間，心情自自然然就會變得輕快起嚟。

「好呀！」月伶對於打扮一事特別感興趣，佢興奮咁問道：「後日要唔要去旺角行吓？」

穎怡見海螢下一秒就應承咗月伶，自己都點點頭表示會出去。

「到時著咩好呢？」穎怡情不自禁咁緊張起嚟。然而當佢打開衣櫃去搵下有冇適合嘅衫嗰陣，佢一眼望過去，發現入面係清一色嘅頹T、衛衣同褲。

「點算，而家個樣唔見得人喎。」穎怡視線停留喺手機螢幕上嘅倒影度，距離佢上次剪頭髮已經有段時間。假如穎怡唔好好梳理嘅話，佢個頭亂到足以媲美喺精神病院跑出嚟嘅病人。

正當穎怡仲因為自己嘅外貌而苦惱緊嗰陣，佢忽然醒起自己要見嘅對象，令穎怡輕輕力咁打咗自己塊面一下。

「點解我會喺度擔心自己好唔好睇？」穎怡忍唔住問返自己：「唔係應該要諗定都時點收場咩？」

「定啲嚟啦～」海螢感受到穎怡坐立不安嘅心情，溫柔咁安慰道：「到時一定有我同月伶陪你。」

「嗯。」穎怡漫不經心咁回應道，個心仍然躁動不安，今次係佢第一次喺現實生活中向另一個女仔揭曉自己性別。

今個星期六日會照常更新

加速

係咪啲情節太無聊，定係因為文筆太廢好似冇咩人睇咁，如果有咩想我改善儘管講啊

樓主我一直都追緊故！

多謝你

(28) 同步
「十二月二十號，距離出去又近咗一日。」穎怡望住手機螢幕，心入面惴惴不安。

自從尋日同月伶、海螢決定咗要廿三號出去後，穎怡就渾渾噩噩咁過咗半日，唔知道出到去應該點面對桃味糖。

「咁你咪剪個頭髮先囉，至少執好自己個樣先。」月伶喺聽到穎怡嘅煩惱之後，直接提議佢去修一修嗰頭雜草。

「點算啊—」此時此刻嘅穎怡仍然無助咁坐喺凳上面，任由髮型師喺佢頭上面作法。佢苦惱咁托住下巴，喺度諗緊到時候嘅對策。

「但係我絕對唔會坐以待斃！」穎怡似乎受夠自己一直處於猶豫不決嘅狀態，佢一鼓作氣，登入傳說對決，然後send咗個message俾桃味糖。

西鐵線驚驚：介唔介意俾你嘅電話號碼嚟？

西鐵線驚驚：方便聯絡

「咁快就抄我牌？」浩俊一朝早就收到來自驚驚嘅message，佢嘅心情莫名地變得愉快。

元朗桃味糖：好啊(｡◕∀◕｡)

穎怡嗰邊都冇諗過桃味糖會咁快就回覆，佢呆咗呆，順便將自己嘅電話號碼send出去，件事竟然比佢想像中順利。

幾分鐘過後，穎怡有啲詫異咁打量桃味糖嘅Whatsapp。對方唔單止淨係用咗一隻貓嘅相做icon，狀態嗰欄仲要留空咗，令穎怡有一剎那以為自己入錯電話。

「點撃此處與猛男展開激情對話？」浩俊忍俊不禁，下意識將驚驚嘅Whatsapp狀態讀出嚟。

穎怡提前將原本嘅Whatsapp icon刪除，佢望住桃味糖嗰邊顯示住在線上，打算由自己去打開話題。

「點開頭好呢？」穎怡考慮到要保持自己嘅形象，打咗一行又一行嘅字去打招呼，然後又即刻反悔，刪走嗰行字。

浩俊睇住驚驚反反覆覆咁喺「輸入中⋯」同「在線上」之間轉換，佢嘴角微微上揚，喺keyboard度打咗兩隻字send出去。

桃味糖：點擊

驚驚：抱抱三百蚊，錫五百，其他服務另議

「屌，佢係咪睇到我Status？」穎怡又有種被調戲嘅感覺，但今次佢唔會再輸俾對方。

桃味糖：咁一齊打機嘅價錢呢？

驚驚：如果係你嘅話就免費

「啊—」穎怡有啲坐立不安，今次係佢第一次喺遊戲以外嘅地方同人咁傾偈。​當佢緊張到想用手捧住塊面嗰陣，喺後面嘅髮型師就用力擺直佢個頭，提醒穎怡唔好亂郁。

驚驚：今晚先？我而家喺街

桃味糖：我都係

浩俊唔知點解今日特別關心自己嘅手機，不斷咁喺度睇有冇來自驚驚嘅新message。佢眼見驚驚同自己一樣出咗街，就順手影咗張髮廊嘅地板send咗出去。

驚驚：咁啱嘅？我都剪緊頭髮

「估唔到佢都會特登修剪一下。」穎怡喺心入面感嘆自己同桃味糖嘅巧合，佢開始好奇到底對方嘅造型。

驚驚：你諗住點剪？

桃味糖：冇啊，通常叫佢哋是但修剪下就算

「又真係冇認真諗過要點剪。」浩俊回想起一直以嚟剪頭髮嘅經歷，自己好似從來冇考慮過有咩髮型適合自己。

「靚女果然係靚女，點剪都冇所謂。」穎怡嘆咗一口氣，慨嘆自己同桃味糖之間巨大嘅差距。

「點解唔覆嘅？」浩俊一臉疑惑咁望住同驚驚嘅對話，佢內心擔心道：「死啦，我係咪講多咗？」

浩俊開始慌張起嚟，佢絞盡腦汁咁想再解釋去補救個情況，但係又覺得自己多此一舉。

「剪完啦，滿唔滿意？」髮型師信心十足咁講道。穎怡望住自己夾直咗嘅頭髮，冇再開叉嘅髮尾，心滿意足咁點一點頭。

「真係唔差喎～」穎怡俾完錢之後望住鏡入面嘅自己，滿心歡喜咁帶住清爽嘅新髮型行出街，而佢已經唔記得去回覆桃味糖嘅Whatsapp。

「大佬，覆機未啊？」浩俊全神貫注咁留意驚驚有冇上線，對手不安咁喺鍵盤度打完字又秒速刪除。

於是喺穎怡茫然不知嘅情況下，桃味糖嗰邊嘅「輸入中⋯」同「在線上」足足重複咗十分鐘。

一直追緊

多謝你啊

(20)同步（2）
下晝一點半，拉麵舖內人聲鼎沸，唯獨係穎怡獨自一人坐喺角落頭度心不在焉咁碌緊手機。

驚驚：食咗飯未？
桃味糖：食緊

「點解而家先嚟搵我啊？」浩俊回想起自己一個鐘前因為怕自己暴露而焦急萬分嘅情緒，此時此刻唔太想理驚驚。佢望住面前碗招牌拉麵，突然覺得淡而無味。

驚驚：食咩飯？
桃味糖：麵
驚驚：食咩麵？
桃味糖：拉麵
驚驚：咁啱嘅我都係喎

「又咁啱得咁橋食同一樣嘢？」穎怡詫異道，佢影咗自己嗰碗拉麵send俾桃味糖睇。

「算啦，可能佢啱啱係唔記得覆。」浩俊收到驚驚張相嗰陣心情變得愉悅起嚟，佢硬係覺得對方嗰碗拉麵比起自己嗰碗更加吸引人。

驚驚：有冇加辣？
桃味糖：冇

浩俊本來習慣食飯嗰陣唔會睇手機，今日佢卻一反常態，對眼不斷咁望去手機嘅方向。當佢收到驚驚嘅Message嗰陣，心頭一喜，但係又唔想顯得自己對對方太上心。

驚驚：食唔食筍？
桃味糖：唔食
驚驚：點解嘅？
桃味糖：食唔到辣，唔鍾意食筍
驚驚：咁啱嘅我同你一樣喎

「哇！佢係咪抄我？」穎怡邊大快朵頤，邊回覆桃味糖。佢一直都俾人嫌棄自己揀飲擇食，好少會遇到同樣走筍嘅同伴。

「下一句會唔會就係問你喜歡孔子嗎？」浩俊將電話放返入褲袋，嘴角染上笑意。

穎怡一諗到過幾日就要面對桃味糖，心情就變得複雜起嚟。佢嘆咗口氣，繼續默默咁進食。

驚驚：自己一個食緊？

穎怡望住隔籬枱一齊食飯嘅幾個女仔，開始羨慕起佢哋。

桃味糖：係呀，自己一個食唔好咩？
桃味糖：又唔洗應酬人，自己想食咩都得

浩俊望到驚驚嘅message嘅時候，理所當然咁答道。佢喺現實生活中比較寡言，亦懶得同人社交，淨係得曦銘會同佢保持聯絡，所以佢從來唔介意要自己一個食飯。

驚驚：但係有時都幾寂寞

穎怡收到桃味糖嘅回覆嗰陣，亦都覺得對方講得有道理，然而佢實際上冇想像中咁鍾意做獨行俠。

桃味糖：唔緊要架，我而家都陪緊你啦

浩俊感受到驚驚嘅情緒，罕有地開始安慰對方。

喺螢幕嘅另外一邊，穎怡彷彿望到一個同自己年紀相若嘅女仔，坐喺自己對面，同自己相談甚歡。

驚驚：醒目，我陪傾偈唔收錢架～

浩俊見到驚驚同佢開返玩笑嗰陣，個心終於安樂返。

兩個人由嘢食到打機到八卦，一來一回咁喺Whatsapp度傾偈，轉眼間就到下晝六點。穎怡行到屋企樓下公園嗰陣，咁啱望到日落嗰一刻。

驚驚：你望吓個天

拎住兩袋餸嘅浩俊見到message之後，即刻抬頭望上去— 黃昏時份嘅太陽格外溫暖，橘紅色嘅晚霞斑斑駁駁咁灑落地下。浩俊企咗喺街邊，忍唔住對住夕陽影咗張相send俾驚驚。

桃味糖：有冇我地一齊睇日落嘅感覺呢？

「下？呢度咪我附近？」穎怡見到桃味糖嗰張相後，眉頭頓時皺埋一齊。

桃味糖影相嘅地方正正就隔穎怡兩條街左右，穎怡此時此刻有種即刻同對方相認嘅衝動。但係佢一望到手機上面自己嘅倒影，就垂頭喪氣咁打消咗個念頭。

驚驚：有啊！

「點解明明你離我咁近，但又感覺好似隔咗成個宇宙咁呢？」穎怡喺Whatsapp度附和完桃味糖嗰句說話之後，帶住遺憾咁行返屋企。

一直以嚟，穎怡喺遊戲上已經習慣咗講大話嘅日常。然而隨住桃味糖同佢行得愈嚟愈近，佢嘅心情亦都開始變得複雜起嚟。

「如果可以永遠停留喺呢一刻就好啦。」浩俊喺心入面諗道。佢開始希望時間可以過得慢啲，無限推遲要同驚驚坦白嘅嗰一日。

(21)
「點解冇聽過你講佢嘅？」月伶漫不經心咁攪動枱上嗰杯凍檸茶，對眼瞄向海螢嗰邊。

「見你哋呢排煩緊桃味糖嘅事，所以咪冇點提過。」海螢如實交代。佢一向性格被動，唔會主動同其他人提及自己嘅事，就算係面對穎怡同月伶亦一樣。

坐喺海螢隔籬嘅穎怡做咗個「哦～」嘅口型，佢已經對海螢內向嘅性格見怪不怪。海螢耷低頭，將頭埋喺厚厚嘅頸巾入面，雙手握緊杯冒住熱氣嘅咖啡。

「咁你覺得佢點？」穎怡輕輕撞咗撞海螢嘅手臂。

「佢啊？雖然打機唔算勁，但人幾好。」海螢言簡意賅咁答道，塊面唔知係因為暖定因為怕醜而變紅。

海螢喺網上同現實世界中嘅性格截然不同，只要唔係當面傾偈，佢都顯得大大咧咧，性情豪邁。然而去到現實生活中，佢更加似一隻需要保護嘅小動物咁，待人處事小心翼翼，無時無刻都保持住羞澀嘅微笑。

「你睇得上眼嘅男仔肯定唔簡單。」月伶揮一揮手叫侍應埋單。海螢聽到月伶嘅肯定之後，嘴上嘅笑意變得更濃。

「點解會鍾意佢嘅？」海螢心入面疑惑道，到底係幾時開始對佢咁上心嘅呢？

海螢諗起當初望到對方嘅名— 「鐵馬秋軒」，佢嘅第一印象係對方肯定係個中二病末期嘅小朋友。結果自己嘅判斷大錯特錯，原來對方係一個大過自己兩年嘅男人。

鐵馬秋軒對佢而言有種難以言喻嘅吸引力，由對方成熟嘅談吐、再到兩個人喺文學上嘅志趣相投、再到佢豁達嘅人生觀，佢好似成身都充滿令海螢仰慕嘅魅力咁。

由海螢每日都期待可以同鐵馬秋軒傾偈嘅嗰一刻起，佢意識到自己已經變咗做鐵達尼號，深深咁沉咗喺嗰片叫鐵馬秋軒嘅大海中，無法自拔。

但到底係啲咩令自己咁心動呢？