是咁的，我鍾意咗隻網絡人妖。

我返嚟啦見到有人lm肯等我嗰陣真係好開心啊！！！今晚更多一章賀賀佢！

樓主好波！

留名

文呢

今日更咗兩章啦，聽日會再早啲更新

欺騙我感情

絕對冇欺騙你！！聽日會照一次更兩章！！同埋多謝你一直有cm啊

正評

LM支持！

樓主好人一生平安

(15)
晏晝十二點半，熾熱嘅陽光啱啱好曬到浩俊嘅背脊。一向怕熱嘅浩俊遇到呢種情況一定會心煩氣躁，然而佢而家毫不動搖咁喺傳說對決咁同新識嘅朋友傾偈，心情變得愈嚟愈好。

「哦～所以你都係因為驚驚所以入嚟！」一個外號叫胖虎嘅男人講道：「唔怪得你成朝都喺度問佢啲嘢啦！」

元朗桃味糖：都？有其他人咩？

浩俊興致勃勃咁打字問道，佢冇諗過驚驚會有能力吸引到咁多人。

尋晚跑完步嘅浩俊仍然未諗通心入面嘅謎團，於是佢採用自己最擅長嘅方法— 同公會嘅其他成員打好關係，去打聽月伶同驚驚之間嘅事。浩俊一朝早就起咗身，搵到平日經常同驚驚組隊嘅公會成員，然後一一邀請佢哋打機。

人類總係會被外表亮麗嘅嘢吸引住，浩俊嘅女裝icon果然成功咁吸引到驚驚嘅兄弟，更加令對方開始將自己當成好朋友。

「呃…哈哈哈哈哈！」胖虎知道自己啱啱唔小心講多咗，唯有尷尬咁笑道：「講錯嘢啫！」

浩俊知道繼續追問落去只會暴露自己嘅諗法，佢唯有問其他嘢轉移話題。

元朗桃味糖：你哋啱啱話佢二十歲，咁佢係咪仲讀緊書？

「係呀！」另一個叫小明嘅人答道：「紅磡嗰間呀嘛～」

「師弟？」浩俊疑惑咁摸一摸下巴，發現原來自己同驚驚係同校。

「嗰陣佢仲話有靚女同學搵佢帶打機吖嘛！」胖虎笑住附和道：「屌！識靚女又唔叫！」

「咩唔叫呀！」小明留意到桃味糖冇再打字回覆，開始打圓場：「呢度咪有呀桃囉！」

元朗桃味糖：唔好咁啦，我怕醜 (´,,•ω•,,)

「咁咪即係佢同月伶係同學？」浩俊心入面諗道，隨便敷衍隊伍入面嗰兩個人。

元朗桃味糖：咁佢同阿月熟唔熟？

浩俊一提到月伶嘅網名嘅時候，小明同胖虎即刻喺一秒內回答佢嘅問題。

「好撚熟！佢哋成日黐埋一齊架！」佢哋異口同聲咁講道。

「咁又係，之前曦銘嚟食飯都提過佢哋識對方。」浩俊冇再加入佢哋嘅話題，佢眼見其他人未有開game嘅傾向，開始自己喺度思考。

浩俊坐喺張凳度望住天花板，幻想有兩個叫曦銘同月伶嘅圓形，然後喺佢哋之間畫咗粒心。

「佢哋兩個之間有嘢就一定㗎喇，但關驚驚咩事呢？」浩俊努力咁諗返以往嘅事。

喺浩俊心目中，驚驚同月伶之間嘅關係唔簡單。淨係尋晚驚驚話朋友有事嗰陣，浩俊已經篤定對方指嘅嗰位朋友係月伶，更加肯定對方係去安慰佢。

「肯定唔止係朋友。」浩俊再幻想多個叫驚驚嘅圓形，然後喺佢同月伶之間畫條直線，三個圈嘅位置完美變成一個三角形。

「三角戀？」浩俊感覺事實距離自己愈嚟愈近，但係佢心入面同時問道：「咁點解會係驚驚過嚟問關於我同曦銘嘅嘢嘅？」

浩俊隱隱約約記起月伶尋日對住電話提過「收兵」兩隻字，頓時如夢初醒。

「唔通佢係月伶隻兵？！」浩俊突然大膽咁假設道：「咁唔怪得啦！」

然而，雖然浩俊終於認為件事水落石出嗰陣，佢莫名其妙地有啲唔啹。

「咁咪即係佢唔係對我有興趣。」浩俊想道：「原來淨係為咗討好女神。」

浩俊回想起驚驚一直以嚟同自己嘅對話，一諗起佢會用同樣嘅態度對住其他人，就好似嚿玩具唔再屬於自己嘅咁。

「喂！驚驚要入嚟玩啦！」胖虎把聲喺手機傳出嚟：「呀桃你仲喺唔喺度？」

元朗桃味糖：喺度啊～

「今鋪我仲唔玩死你。」浩俊耷低頭望住西鐵線驚驚嘅icon出現喺隊伍入面，成個人仍然有啲心煩意悶。

寫到嚟呢度，已經唔希望會有幾多人睇呢篇嘢了，淨係想正正常常咁完咗個故佢，唔棄故當贏

我覺得個故仔幾得意幾好睇
樓主唔好放棄

多謝你

好多畫家都係死咗先出名 所以樓主你唔使驚

你咁講都唔知開心定唔開心好

咁只係一個比喻，可能你完咗之後會好出名呢

呢個故唔變糞作已經要劏雞還神尋晚應承咗你今日會更兩章，想遲啲再補返(對唔住大佬)

都幾新奇個題材，文筆我就唔批評啦，因為我都冇咁嘅墨水總括嚟睇都可以話唔錯 唔好睇小自己

(16)
「原來已經差唔多一點，好彩已經完sem。」頭痛欲裂嘅穎怡俾刺眼嘅陽光曬醒，佢唔情願咁轉身望去枱上面嘅鐘，然後拖住腰酸背痛嘅身軀行出房，慢條斯理咁梳洗好。

穎怡揞住自己額頭，唞咗啖氣。佢坐返喺床上面，開始回想起尋晚發生嘅事。

「我要繼續飲呀～」成身酒味嘅月伶想喺穎怡手上搶走罐酒。穎怡一手扶住爛醉如泥嘅月伶，一手拎住袋飲剩嘅酒。佢恨不得即刻將月伶綁喺燈柱度，等佢酒醒再送佢返屋企。

兩個人搖搖晃晃咁行到月伶屋企樓下嗰陣，月伶突然擺脫穎怡原本圈住自己嘅手臂，轉身正面望住穎怡。

「點呀白卡婆？」穎怡企咗喺月伶對面，無奈咁翹起雙手望住對方。

「我今年完之前會努力放低佢㗎啦。」月伶指住穎怡，一本正經咁講道。而穎怡企咗喺月伶對面粒聲唔出，好似等緊佢講埋下一句咁。

「但仲有個幾禮拜就下一年啦喎～」穎怡開玩笑咁講道。一陣冷風忽然吹過，令兩個人開始清醒過嚟。

「其實我鳩噏。」月伶愣咗愣，然後苦笑道：「我成世人都唔會走得出佢手指罅㗎喇。」

「嗯。」穎怡好似預咗會聽到呢個答案咁，點一點頭就擰轉身返屋企。

「叮！」穎怡嘅手機突然響起Whatsapp嘅提示聲，將佢嘅思緒扯返去現實。

佢望住月伶大張聲勢咁喺Whatsapp度召喚朋友打機，即刻識相咁㩒入傳說對決。

一加載到遊戲大廳，佢就收到來自胖虎嘅組隊邀請。

「月伶、胖虎、小明，仲有桃味糖？」穎怡內心詫異道：「點解個組合咁奇怪嘅？」

「點解可以咁冤魂不散？」月伶望住桃味糖嘅icon，感到愈嚟愈唔耐煩。佢深深咁唞咗啖氣，決定同桃味糖今日嚟個了斷。

「胖虎、小明、驚驚，早晨啊！」月伶充滿活力嘅聲喺穎怡耳邊響起，穎怡反而打咗個冷震，感覺月伶今日有啲異常。

「早呀！齊人就開Game啦！」胖虎興高采烈咁講道。

張月伶：你一陣最好唔好出聲

穎怡望到螢幕上方彈出嚟嘅message，終於知道點解會有種不祥預感。

喺另外一邊嘅螢幕，浩俊一見到月伶同驚驚同時出現就冷笑咗一聲。佢喺畫面一加載到戰場嗰刻就飛快咁打咗行字。

元朗桃味糖：早晨啊驚驚～

「女神同兵一齊出現…」浩俊摩拳擦掌咁諗道：「今鋪一定好好玩。」

元朗桃味糖：驚驚你應承過會carry我

元朗桃味糖：但係你成日打完一鋪就走，好傷心

「哇。今日玩攻心計？」穎怡明明打算呢舖扮啞唔出聲，點知一嚟就收到桃味糖衝住自己而嚟嘅問題。

西鐵線驚驚：而家咪補償緊你

穎怡言簡意賅咁覆咗桃味糖，費盡心思咁逃避成為炮灰嘅下場。

「呀桃，睇嚟你同驚驚好熟喎～」月伶別有用意咁拖長自己嘅語氣，蠢蠢欲動咁想開始刁難桃味糖。