是咁的，我鍾意咗隻網絡人妖。

「我會請返你哋食出pool飯㗎喇～」月伶臨收線前真誠咁講道：「多謝你哋。」

果不其然，月伶完美咁忽略咗海螢嘅威脅，頭也不回咁撲向曦銘嘅懷抱中。

原本吵吵鬧鬧嘅Facetime得返穎怡同海螢兩個人，穎怡伸咗個懶腰，啱啱懸起嚟嘅心終於放鬆落嚟。

「穎怡，你尋晚咪講過自己係行動派嘅？」海螢不懷好意地笑起嚟，開口問道：「其實你所謂嘅行動派，係咪前面應該加返個『唔』字？」

明明話自己唔會傷春悲秋，結果啱啱又一輪嘴咁阻止月伶主動搵曦銘，真係今天的我打倒昨天的我。海螢內心不禁笑起穎怡嘅自相矛盾。

「欲擒故縱呢啲嘢你識條鐵咩！」穎怡惱羞成怒，連忙反駁對方。一主動就會死㗎啦，穎怡內心嘅一把聲感嘆道。

係喎，唔講都唔記得要覆人。穎怡因海螢嘅取笑而醒起浩俊嘅訊息，睇落木訥嘅浩俊竟然都會有主動關心人嘅一日，穎怡內心不禁訝異起嚟。

穎怡：瞓著咗唔記得覆，返到去啦

喺螢幕嘅另一邊，浩俊原本緊繃住嘅臉喺收到回覆嘅時候稍為緩和，慶幸對方算係識相嘅正常人。

浩俊抬起頭望向坐喺梳化對面嘅曦銘，對方已經同月伶喺電話上相談甚歡，自己亦無意去打擾處於熱戀期嘅情侶。

最重要嘅係，浩俊唔想俾人燒春袋。

陪曦銘通宵打機嘅結果就係身體嘅所有力氣都好似被搾乾般疲憊，​浩俊打咗個喊路，忽然記起一陣要幫曦銘代班補習。

浩俊決定把握時間儘快補眠，佢擰轉身入房前啤咗曦銘一眼。

死嘢，掛住同條女拍拖就要我受苦。

--

「阿女，今晚啲親戚會嚟我哋度食飯啊！」房門外嘅叫聲引起穎怡嘅注意，穎怡興味索然咁「嗯」咗聲，恍如自己置身事外。

回想起當初陌生嘅遠房親戚總會堆起虛偽嘅笑臉，假裝關心穎怡嘅學業成績，實際上暗中拎嚟同其他年紀相近嘅表兄妹作比較。

「你今晚有咩搞啊？」穎怡漫不經心咁問道，內心開始計劃點逃避煩人嘅三姑六婆。

穎怡知道問題唔喺啲同輩身上，但對於呢類年度炫耀大會，佢總會抱住不屑嘅態度避而遠之— 所謂嘅禮尚往來只會令自己喘不過氣。

「Sorry呀大佬，今晚佢哋唔俾出。」海螢一臉歉意咁講道。海螢深知穎怡一向都厭惡應酬人，但蠻不講理嘅家人令自己愛莫能助。

「阿女，幫我拎啲蛋撻落街俾你阿叔啦！」家母嘅叫喚打斷穎怡嘅計劃，客廳嘅聲清晰咁傳到穎怡耳中：「記得提佢今晚上嚟食嘢呀！」

「睇嚟你今鋪走唔甩喎，我收線先啦。」海螢挑起眉望向螢幕上耷低頭嘆氣嘅穎怡，不禁揞住心口表示深感同情。

「個問題係我唔想去阿叔度…」穎怡沉住臉咁笠上厚厚嘅黑色外套，不情願地拎走枱上嘅蛋撻盒。

「後生女，叫你做少少嘢就嫌三嫌四！」楊師奶睇唔過眼，開口說教道：「你都有好一段時間冇去探佢啦，行去隔籬街咋嘛！」

每一次當穎怡去探阿叔，都會回想起幾年前不堪嘅回憶，身處喺嗰笪地方令自己如坐針氈，不斷催逼穎怡去面對當初愚蠢嘅自己。

今次都係冇得避…穎怡一言不發咁著上人字拖，打算速戰速決。

嗰度風水唔好。過馬路嗰陣穎怡記起當時每次拒絕探訪阿叔嘅時候，就會用呢個藉口。

穎怡逐步逐步行上樓梯，平日稍為急促嘅腳步此時此刻變得拖泥帶水。

刺骨冷氣混雜住煙味撲鼻而來，穎怡抬起頭，環視熟悉又陌生嘅網吧，昔日嘅回憶逐漸浮現喺腦海中。

幾年前穎怡係一個敢愛敢恨，心直口快嘅中學生。正值青春期嘅少女輕易地會對異性產生好奇，甚至曖昧不明嘅情愫。

當時天真爛漫嘅穎怡從來冇過問對方所讀嘅學校，亦冇認真探究過對方喺現實世界中嘅樣貌，佢唯一知道嘅係對方同自己年齡相近，而且係一個男仔。

儘管穎怡對對方嘅真實身份一無所知，佢仍然一心一意咁將自己嘅愛慕之心毫不遮攔咁展露出嚟，而對方嘅一舉一動總會令穎怡心動不已。

穎怡每日放學都會一支箭咁衝去電腦面前，第一則訊息一定係send俾當時嘅心上人。一切都過得平平穩穩，直到有一日穎怡屋企嘅電腦壞咗，無可奈何咁嚟到阿叔所經營嘅網吧度同心上人聯絡。

嗰一日，穎怡嘅心上人突然同佢承認自己唔係一個男仔嘅事實，毅然切斷同穎怡嘅所有聯絡方式。

穎怡當下即刻哭成淚人，佢從來冇想像過被最信任嘅人欺騙嘅味道竟然可以如此苦澀，嚎啕大哭嘅穎怡嚇到周遭嘅人都為之側目。

穎怡隱約起起坐喺後邊嘅一個高中生拋咗包紙巾俾佢，但淚眼朦朧嘅穎怡已經唔記得對方嘅外貌。

冇錯，穎怡第一次所受嘅情傷正正就喺面前嘅網吧發生，令自己心如刀割嘅對象就係一隻網絡人妖。

穎怡之所以成為網絡人妖，某程度上係因為想提醒自己唔好再咁愚蠢，主動袒露心意只會提早面對失敗嘅結局。

「喂～稀客喎！」一把低沈嘅聲將穎怡由悲傷嘅回憶拉回現實，穎怡望向面前嘅收銀處，發現阿叔原來坐咗喺度望自己發呆。

穎怡嘅阿叔只不過大穎怡幾年，因此交談嘅語氣比較隨意。同樣喜愛打機嘅兩個人基本上係無話不談，阿叔就係穎怡喺每一次親戚聚會中嘅避風港。

「阿媽提你今晚上嚟食飯。」穎怡悶悶不樂咁講道，腳下所踏前嘅每一步都格外沉重。

「記得食啦。」穎怡深深咁呼吸一下，手上嘅蛋撻盒一下子放到阿叔面前，下一秒轉身就走。

「喂！做咩咁急住走啫！」阿叔喺穎怡落樓梯之前叫住對方，一臉疑惑咁開口問道：「你細個嗰陣成日會嚟架，點解自從嗰日之後就咁避忌嘅？」

「呢度風水差呀。」穎怡面無表情咁擰轉身望向阿叔，背得滾瓜爛熟嘅謊言純熟咁衝出口。

我唔想再返嚟呢片傷心地啊— 真心話總會滯留喺嘴邊，永遠唔會有講出嚟嘅一日。連月伶同海螢都唔知道嘅事，穎怡又點會輕易向其他人提起呢？

網吧嘅環境隨住穎怡轉身時再次映入眼簾，唔願面對嘅回憶亦同時伴住排山倒海嘅傷感重重包圍住自己，就連心臟都隱隱作痛，穎怡恨不得即刻逃離現場。

「知啦知啦！你等我一陣，我同你一齊上去。」阿叔當時目擊住穎怡帶住兩行眼淚跑出網吧，因此對穎怡嘅真實想法略知一二，但懶得深究。

等穎怡放低件事嗰陣，佢就自然會講嘅。阿叔拎起背囊，快步行到穎怡隔籬，打算陪對方返屋企。
 

阿叔俾人誤會就

睇嚟男主要呷醋了

今日大執篇文，會補充細節同改善下文筆令故事冇咁突兀，同埋大家可以睇得舒服啲，所以決定停更一日。然後紙言嗰邊都會隱藏個故到下一次更新為止，然後聽日就會一次過更兩至三章，不便之處敬請原諒

Lm好睇

留個靚名

Lm

傳說對決

樓主幾點出文 如果冇文我訓先

瞓先啦呢幾日會出到架啦，唔好意思啊要你等

其實我都知道有問題，但一時間諗唔到其他game名去代替求建議