是咁的，我鍾意咗隻網絡人妖。

樓主呢排好勤力！支持支持

樓主勤力豬加油

幫p推

想知浩俊個示意圖係冰個梨巧靚仔

坂口健太郎

大家好今日有啲忙所以寫唔切，聽日會更多啲！！！

感謝樓主

好！如果有嘢想知一定會問你

(51)
客廳個鐘係咪壞咗呢？穎怡望向前方，感覺今日時間流逝嘅速度有啲異常。例如當穎怡諗起再過多陣就要見到浩俊嗰陣，連秒針都好似無力向前行，而難得分心去應酬親戚嘅時候，個鐘就飲咗支Red Bull咁，頃刻就到咗夜晚十點半。

「你今日咁心不在焉嘅？」穎心隻手喺穎怡眼前揮咗揮：「唔通係上次同我補習嗰個人？」

穎心一條隨口噏出嚟嘅問題恰巧正中穎怡下懷，後者眼神瞬間變得閃閃縮縮，婉轉地宣告穎心嘅勝利。

「冇啊。」穎怡眉間輕泛不滿，內心皺摺無法被熨平：「唔關你事。」

散漫眼神咁啱對上電視機，漆黑畫面反射出兩個着住大紅色冷衫嘅人。穎怡重重嘆咗口氣，唔明白點解屋企連除夕夜都會堅持要穿戴紅色衣物。

幸好一陣間可以換返套無咁老土嘅衫。穎怡再望多眼個鐘— 點解突然又過多十分鐘嘅？

唔得啦就快冇時間！穎怡一諗起浩俊話十一點半會嚟接自己，就匆忙起身打算換咗身裝束先，唔通到時要成個紅孩兒咁見人？！

可惜事與願違，穎怡行去間房嘅途中就俾一隻手擋住咗。

「大佬可唔可以幫我打一圈？」叔叔嘴唇泛白，另一隻手揞住胃：「我有啲急，一陣順便換埋紅底褲先。」

話畢，叔叔就腳下生風咁跑走，然後「砰」一聲順便閂門，留低穎怡獨自凌亂。

幫人打麻將簡直係壓力山大，雖然面前嘅錢並唔屬於自己，但贏錢總好過輸得一塌糊塗。穎怡打咗幾局之後忠於明白點解叔叔今日對紅底褲如此執著，個位唔單止風水唔好，自己手氣差之餘仲要不時望到個鐘而心神不寧。

「唉！我幫你打啦！」時鐘指向十一點半，穎心一見到穎怡坐立不安就忍唔住出手相助。最重要嘅係，穎怡竟然可以喺叔叔解決嗰短短四十五分鐘內再輸多兩嚿水，確實係此風不可長。

呢啲果然係患難見真情！穎怡幾乎想抱住懂事嘅表妹熱淚盈眶，佢急急腳就帶住一件黑色外套跑出門口。

𨋢門合上嘅嗰一刻，穎怡防不勝防咁望到一隻熟悉嘅生物— 黑色身，伴隨下面冷衫隱約嘅紅。

原來今日自己做咗熊本熊。

穎怡恨不得可以將時光倒退到五分鐘前，但為時已晚，自己已經無處可逃。

「咚咚，咚咚」

自己已經分唔出到底係部𨋢太舊定係心跳聲太大。

穎怡抱住戰鬥嘅心情靜靜等待。隨住樓層愈降愈低，呼吸亦變得急促起嚟。

「咚咚咚咚咚，轟呀！」𨋢門緩緩分開嘅一刻，穎怡就望到浩俊企喺出面，而心臟好似炸開咗咁。

浩俊今日碰巧著咗件藍色衫，出面笠住黑色羊毛外套，一貫冷漠嘅神情被磨平，穎怡甚至開始覺得對方有啲……可愛。

「當你覺得一個人可愛嗰陣你就冇無藥可救㗎喇！」穎怡腦海中突然閃過月伶幾年前嘅一句話。

傻啦。先識得浩俊一陣，只不過係俾對方個樣迷惑一陣啫！穎怡下一秒就打消不切實際嘅念頭。

「你遲咗。」浩俊先發制人，言簡意賅咁嫌棄起穎怡。而穎怡只能夠笑笑口講聲「對唔住」，浩俊果然一開口講嘢就能夠令人好感直線下降。

穎怡仍舊莫名地忐忑，喺浩俊隔籬小心翼翼咁行去公園。

奇怪……浩俊今日睇落特別高大，令穎怡不禁有種小鳥依人嘅錯覺。

今日個腦似乎不斷胡思亂想。穎怡不知覺地埋首於樽領冷衫中，紅卜卜嘅面珠墩同件衫融為一體，由熊本熊變成一嚿蘋果。

穎怡再抬起頭嗰陣，就已經見到當時同月伶海螢一齊打鬧嘅公園。

月伶上個月仲喺度因為曦銘而喊苦喊忽，穎怡而家望返又係另一番滋味— 大概係一陣戀愛嘅酸臭味。

「搵次真係要多謝月伶同曦銘。」浩俊突然自言自語道。

如果唔係佢哋，我都唔會再遇到穎怡，甚至同對方變得更加熟。

「你又搞咩嚟？」穎怡挑起眉，一臉疑惑咁望住對方。然而浩俊表情寡淡，令人睇唔清真正嘅情緒。

(52)
「冇，唔關你事。」浩俊強行打斷穎怡嘅好奇心：「你咁擔心佢哋段感情做咩？俾人哋自己發展咪得。」

如果你可以理少一陣朋友嘅感情問題，開始留意下周圍嘅人—

算，呢個要求未免太自私。浩俊默默無言咁搵位坐低。

「好似你講咁容易嘅話就唔會拖到幾年啦！」穎怡仍然未明白浩俊背後嘅意思，唔忿氣咁反駁道。

浩俊無奈得嘆咗口氣，穎怡嘅腦總會係關鍵時刻人間蒸發，而家同雞同鴨講冇分別。

穎怡順勢就坐咗喺浩俊隔籬，理直氣壯咁等待對方嘅回應。

「我嘅意思係，鍾意人嗰陣就應該要主動。」浩俊慢條斯理地解釋道：「就算冇機會都好，都要試吓。」

「講人話啦，我呢啲凡夫俗子聽唔明呀！」穎怡聽得一頭霧水，皺住眉望咗眼電話，原來已經踏十。睇嚟講經環節要提早結束。

「所以我唔會理曦銘同月伶嘅事—」浩俊直直望住穎怡：「因為我知道其中一個人會主動豁出去。」

你真係先知嚟㗎喎，連對方幾時拍拖都預知到。穎怡冇講出口，一臉鄙夷咁望向浩俊，對方竟然鳩噏得咁認真。

「即係你覺得就算講出口會傷害到自己都要試？」穎怡反問道，腦海又浮現起幾年前世界崩塌嘅一刻。

「你唔試嘅話又點會知傷唔傷到？」

個天似乎有心玩弄自己，當時喺心尖上留下致命傷口嘅人，同此時此刻主張要勇敢示愛嘅人都叫阿俊。

「算啦。」穎怡茫然苦笑：「你講到咁簡單，又有冇試過呀？」

好似浩俊呢種人根本就唔需要擔心會唔會俾人拒絕，唔明都好正常嘅…

而家咪試緊囉。浩俊未有講出口嘅勇氣，雙眼輕輕掃過穎怡。

氣氛又變得奇怪起嚟，浩俊嘅話令穎怡唔自在咁摸一摸頭，拎起電話打開天文台嘅鐘：「用呢個倒數一定準時。」

「你會唔會想熱鬧啲？」浩俊㩒開公會嘅Discord server，加入小明同胖虎等人所在嘅語音頻道。

「好呀。」穎怡眼前一亮，熱鬧啲當然好，總好過要一直同浩俊單獨相處— 個心似乎會承受唔住。

「喂阿俊你冇人約咁慘呀？」胖虎調侃道，其餘小明、嘉琪等人都忍唔住笑起嚟。

「唔係喎。全公會最靚仔嗰個喺佢隔籬。」穎怡忍唔住插嘴，餘光打量起浩俊嘅表情變化。

浩俊一時間消化唔到穎怡自爆同佢一齊出去嘅事，目瞪口呆地望住穎怡。

「哇～兩個人一齊倒數又唔叫。」嘉琪酸溜溜咁講道。

「唔講啦～」穎怡刻意唔回答對方，咧嘴傻笑：「倒數啦喂！」

電話上顯示出23:59:50，另一部電話響起七零八落嘅叫喚。

「十、九、八、七—」

穎怡突然心頭一暖，原來就算換咗一班人一齊慶祝，個感覺都冇想像中咁差。

然後關於而家坐喺隔籬嘅人…

「六、五！四！」

有啲嘢都係唔講出口好。穎怡擰轉頭直視浩俊，雙眼隨住嘴角上揚而彎起嚟。

「三！二！一！」

浩俊同時對上穎怡嘅視線，月光恰巧為浩俊鍍上銀光，令穎怡一時恍神。

兩個人之間醞釀起一種莫名其妙嘅情緒。

「新年快樂！」穎怡率先開口講道。

公園如常地冷清，四周圍靜英英，頭上亦無煙花去點亮漆黑夜空，唯獨浩俊同穎怡相視而笑。

「新年快樂。」浩俊嘅聲喺Discord嘅歡呼聲中零舍突出，佢忽然靠近去穎怡嗰邊。

咚咚、咚咚、咚咚

穎怡記起被浩俊惹得怦然心動嘅感覺，胸口已經困唔住怦怦亂跳嘅心臟。

咚咚咚咚咚咚咚咚

浩俊忽然伸出手摸咗下穎怡嘅頭頂。

嗶——

穎怡嘅心跳戛然而止，內心爆出無數火花。

穎怡下意識想要閃躲浩俊雙眼，但發現成個人好似運作唔到咁。

「你幾多日冇洗頭？」浩俊好不轉彎抹角咁問道：「點解頭上面會有蚊嘅？」

「哈哈哈哈哈頂—」浩俊講出嚟嗰陣清晰無比咁傳到公會其他人耳中，下一秒電話中隨即響起轟耳笑聲。

穎怡有種想即刻跑返屋企嘅衝動。

今日心情好！更兩章，下次應該會喺星期六日更新！

助推

唔通下章就表白!?

What唔會咁快啦
咁搞法個故咪好快完

有柒頭