是咁的，我鍾意咗隻網絡人妖。

穎怡嬲到醒咗，上一秒仲笑得開朗嘅浩俊煙消雲散，就連嗰塊葉都變咗做踢咗落床嘅公仔。

一起身就撲去張枱前面，眼屎都未抹就開電腦，滿心打算去搵嗰位夢入面即將錫落去嘅對象。

估唔到一開game就見到浩俊同嘉琪一齊打機，酸意瞬間漫上心頭，微不可察咁扁咗扁嘴。

兩邊膊頭上隨即冒出一隻惡魔同天使，前者就話「你唔好太多幻想啦，佢生得咁靚仔，溝多條女有咩出奇？」，後者就不滿咁反駁：「都係一齊打場機啫，證明到啲咩啫！」

係囉，唔好諗咁多啦。

穎怡眼睜睜咁望住浩俊同嘉琪顯示住「遊戲中」嘅狀態，內心仍然有兩把聲爭執緊。

正當穎怡恨不得可以偷聽到浩俊同嘉琪之間嘅對話嗰陣，兩個人嗰邊偏偏氣氛跌到冰點。

嘉琪本來諗住趁見到浩俊終於自己一個online嘅時候搵佢玩，好好「交流」一下。畢竟，自從被穎怡傷害過之後，嘉琪下一個目標就係攻略浩俊。

邊個會唔鍾意黐住靚仔呢？

更何況，嘉琪就係刻意地想同穎怡玩作對，根本就睇對方唔順眼，恨不得將當時受到嘅傷害十倍奉還。

只不過，件事又往另外一個方向發展。

浩俊唔單止冇點應過自己，更加喺自己主動搭嗲嗰陣敷衍幾句就算，講得最多嘢嗰陣就係描述尋晚大家點幫自己慶祝生日。

點解呢？點解可以咁唔公平呢？明明都係同一日第一次見面，明明我已經主動貼埋去你嗰邊，點解你就係偏偏唔食我呢套？

嘉琪根本唔知道穎怡同浩俊嘅淵源，憤怒同嫉妒已經一秒間沖昏頭腦，已經冇辦法理性思考。

男仔唔係用下本身思考㗎咩？到底係邊度出咗問題呢？唔通我谷得唔夠痕？

嘉琪握緊拳頭，有種衝動想捉住對方衫領歇斯底里咁尖叫。

點解從來唔會有人可憐我？

呢啲賤人就係要俾人公開佢啲罪行先會知錯。可能唱通街之後就終於有人理解自己。

嘉琪望住另一個視窗上嘅相幽幽咁笑起嚟。

應該係網聚嗰陣借機偷拍嘅相，當時穎怡笑逐顏開咁企喺月伶隔籬，無論點睇都唔似嘉琪口中咁十惡不赦。

知人知面不知心呀。

嘉琪㩒開論壇，毫不猶豫地將穎怡嘅所有資料放上去。

電話號碼，所讀嘅大學，遊戲ID，應有盡有。要摧毀一個人就係一秒之間嘅事。

嘉琪望住回應逐漸變多，笑意亦漸濃。

我要為自己爭取正義。

凌晨時分一口氣寫出嚟嘅劇情，就好似裝咗摩打咁發展得好快
最近周不時會有放棄嘅念頭，但一上到嚟見到有人推文同留言又會重新充滿力量堅持落去無論係咪喺現實生活中識我嘅人都好，好多謝你哋仲會支持呢篇文想即刻攬住你哋逐個逐個錫返啖先！！

支持文+樓主呀

愛你愛你

gchi等你繼續出文

係文啊哈利！

開心仔

(60)
八卦宛如一小團火苗，放喺適當嘅環境下，會一瞬間變成燎原之火。

「大家點睇呢隻網絡人妖」嘅post喺有圖。有個人資料嘅助長下迅速上咗熱門，當中即使有人認為嘉琪小事化大，但更多係嘲笑穎怡，認為穎怡有心理障礙等人身攻擊。

作為熱衷於論壇嘅用家，海螢自然好快就發現自己朋友陷於危險。隨住每一秒刷新個post，就有更多人喺度湊熱鬧，肆意留低最惡毒嘅說話去搏大家認同。

而家輿論傾向於指控穎怡心理扭曲，更有零零星星留言自稱喺現實生活中認識穎怡，話佢一個萬年宅女要靠欺騙感情去充實生活。

「扭曲嘅先係你哋…」海螢喃喃自語道，已經睇唔過眼。

然後海螢打咗俾穎怡。

穎怡嗰一刻仍然對件事懵然不知，專心咁同浩俊打機，而嘉琪自從出咗post之後就offline，唔知走咗去邊。

「喂？咩事？」海螢打咗第十次電話嗰陣，穎怡先聽到。

「大佬，你俾人post咗上去公審。」

下？

穎怡本來對呢類所謂嘅公審視若無睹，平日周不時已經會遇到啲人喺細論壇上單單打打，就好似放咗個屁咁，只要影響唔到日常生活，佢唔會理。

但穎怡從海螢嘅語氣中大概估到，今次比以往更嚴重。

點算？

注意力轉移到論壇上關於自己嘅post，穎怡大腦一片空白，望住源源不絕嘅謾罵感到束手無策。

場遊戲就咁草草結束咗，當浩俊打算問穎怡點解突然咁靜嗰陣，對方連回應嘅心情都冇，粒聲唔出咁quit咗。

到底點解要扮男人呢？唔通係點數雞嘅新伎倆？

佢老母應該會想塞返佢入去個西度

穎怡愈碌愈覺得個感覺好唔真實，好似睇緊一個唔屬於自己嘅故事咁，但螢幕上確確實實係自己張相，對方係衝住自己而嚟。

冇錯，就好似而家電話上不斷彈一啲所謂慰問嘅Whatsapp咁。所有唔熟嘅朋友都突然過嚟問論壇上被討伐嘅人係咪穎怡。

嘴上打住關心嘅名號，但實際上又有幾多成係想食花生？

正當穎怡對住電腦發吽哣嗰陣，月伶忽然打過嚟。

「唔好再睇人哋講嘅嘢，而家即刻去換電話號碼先。」

「我會幫你搵到post出嚟條友，呢段時間你避避風頭先。」

對方肯定嘅語氣喚醒穎怡，促使佢即刻衝出門口解決燃眉之急。

明明只不過又係一個平平淡淡嘅一日，但穎怡行出街就周身唔自在，好似路過嘅人望多自己一眼都額外奇怪咁。

佢哋有冇睇過個post呢？會唔會認到我呢？

穎怡餘光不斷打量喺身邊行過嘅人，雙手不知不覺咁將連帽衛衣捉得更緊，恨不得想將成個人包晒喺入面咁。

出咗街之後想返屋企，返到屋企又會忍唔住睇個post，穎怡有種無處可去嘅無奈。

論係咪做錯咗，穎怡唔怕認自己確實有問題，但係咪惡劣到要俾人公審呢？

算，唔好再諗。

不斷徘徊唔會得到任何答案，同時亦無力再去思考到底自己係咪罪該萬死。

穎怡趕緊處理好轉電話號碼，暫時停用社交平台嘅事，然後行去公園嘅一個角落坐低。

好攰。

穎怡熄咗電話，望向灰茫茫嘅天空。

如果可以暫時消失一段時間就好。

大家好！！新故生咗出嚟啦！比起呢個故會有好大變化，然後因為第一次嘗試寫甜故所以可能有啲奇怪，希望大家可以支持下！
呢邊會繼續更新所以唔使擔心

新故： https://lihkg.com/thread/2599306/page/1

推下。

呢邊星期一會更新！

支持

好！

期待！

今晚九點！

(61)
浩俊從來未試過咁緊張，好地地一個人打完一舖機突然人間蒸發，Whatsapp顯示單剔之餘，Instagram下一秒都消失咗。

明明上一秒仲笑笑口咁互相批評所用嘅變聲器有幾不濟，下一秒就靜咗落嚟，點搵都搵唔到。

就好似一部機器少咗個齒輪咁，失靈，錯亂，冇辦法正常運作。

唔通係啱啱講錯嘢？

浩俊扶住下巴思考，彷彿諗緊人生大事咁苦惱。

有種不詳預感圍繞心頭，但貿貿然打電話過去又會顯得太chur。

穎怡Whatsapp嘅最後上線時間停留喺今朝早，之後就冇再on過。

點算好呢…

浩俊挨住櫈背，望住天花板發吽哣，對穎怡嘅事舉棋不定。

到底穎怡呢一刻做緊啲咩呢？

一個鐘就咁過咗去，浩俊漫不經心咁做吓家務，睇吓書，利用各種瑣事去打發時間，但對眼總會對上Whatsapp介面，希望穎怡嗰邊會有動靜。

然後又再過多半個鐘，浩俊終於忍唔住問月伶到底係發生咩事，而得到嘅答案反而令自己愈益緊張。

穎怡唔喺屋企，電話又打唔通，到底可以去到邊？

於是浩俊決定衝出門口，喺附近開始尋找穎怡嘅蹤跡。

由於仍然係冬天嘅關係，氣溫仍然凍得可怕，浩俊本來都唔係一個怕凍嘅人，但今日都久違地著咗件羽絨。

浩俊行過當初同穎心補習嗰間Cafe，再經過網吧，尋人不果嘅下場係變得愈來愈心急如焚，更加不禁擔心起穎怡嗰邊嘅情況。

到底穎怡著得夠唔夠衫呢？會唔會好似上次咁凍病呢？

愈憂心只會令思緒愈亂，失焦嘅眼神過咗段時間先搵返理智，最終鎖定喺一個地方。

唔係公園吖嘛？

浩俊抱住半信半疑咁走咗入去，心諗再蠢嘅人都未至於傻到喺出面吹個幾兩粒鐘風。

結果穎怡果然刷新浩俊對「白痴」嘅認知，但而家唔係要嘲笑對方嘅時候，浩俊反而心疼起穎怡。

由見到穎怡衣著單薄嘅嗰刻起，浩俊個心就好似俾人捏住咗咁，胸口發痛。

浩俊眼見穎怡雙手抱肩，毫不猶豫咁除低件羽絨包住對方嘅身軀：「你唔凍咩？」

「凍呀。」穎怡終於耷低頭，唔敢直視浩俊，滿腔委屈一時傾盤而出：「但個心凍啲。」

穎怡從來都冇想像過自己會講得出呢類陳腔濫調，但此時此刻確實無比心寒。

「老實講，我一早預咗會俾人尋仇，係冇諗過會發到咁大。」穎怡將羽絨拉得更緊，就好似保護起自己咁：「到底我係咪做咗啲咩類近殺人放火嘅事，所以先要面對咁多指責呢？」

作為同行，浩俊自然心同感受，穎怡又未至於做到呃人錢，更加會見好就收。到底憑咩去摧毀穎怡呢？

浩俊嘗試去安慰對方，但發現根本開唔到口，對方嘅遭遇未免過於沉重，嗰一兩句說話並唔會救到對方。

「你真係唔想返屋企？」浩俊皺眉，上下打量臉色蒼白嘅穎怡：「睇你個款仲係好似好凍咁。」

穎怡縮埋一嚿，宛如一隻受咗傷嘅小型犬咁，輕易惹人憐愛。

「唔想返。」穎怡索一索個鼻，眼角突然紅紅地：「冇一個地方適合我留低。」

「我陪你。」浩俊聽畢，一言不發咁抬手將穎怡上半身推近自己嗰邊，令對方可以挨住自己。

穎怡冇反抗，聽聽話話咁靠住浩俊嘅膊頭，眼淚悄悄咁流落嚟，沾濕口罩。

浩俊依舊冇出聲，遞咗張紙巾過去，任由對方發洩情緒。

可能…或許…有嗰一絲絲機會，穎怡最適合留低喺自己隔籬。

可能自己可以做到對方最堅強嘅後盾。