人命關天,我決定去找佢,萬一出事就為時已晚。
於是,我立即趕到該地,並且不斷重看張紫彤的相片,她最新上傳的相片影到一張大型的廣告招牌,正好成為我尋找她蹤影的關鍵。
「揾到啦!」我按照地理環境及廣告招牌,最終來到人煙稀少的小巷,巷入有一個隱蔽的入口。我估計這是大廈的入口,但經已荒廢多時,沒有人會居住,加上位置偏僻,故此甚少有人進出或發現此地。
到底張紫彤是如何找到這個地方?
當我看見她時,就會知道答案。
我小心翼翼地步入大廈,內裏因長年無人打理的緣故,所以大廈佈滿着蜘蛛網、老鼠及蟑螂等昆蟲經過,加上天色開始昏暗,令到整個氣氛都變得陰深可怕。
我莫名感到一陣寒意,於是決定加快腳步去找她,未幾,我終於到達天台,同時看到她的身影,她非常危險地坐到天台邊緣,嚇得我緊張大喊:
「你做咩坐到咁出,快啲落地啦!」
她轉身吃驚問道:「點解會係你?」
我走上前且打算扶她下來,怎料她一口拒絕:「唔得,我一定要等到鄧廣祥嚟。」
我無可奈何亦害怕強行拉她下來會傷害到她,所以嘗試了解其動機原因。
「我唔勉強你,但可唔可以話我知,到底發生咩事?」
她飲泣道:「今……今日係情人節,我本來已經預備好曬同佢慶祝,點知佢竟然話要分手!
我問佢點解,佢唔肯答,我以為自己做得唔好,但原來佢偷偷地一腳踏兩船,仲要揀其他人而唔揀我!」
「我都一早同你講過佢有古怪,既然佢都咁對你,點解你仲唔死心?你唔應該為佢而犧牲!」
她激動道:「唔可以!因為我真係好鐘意佢!就算佢曾經鐘意過其他人都好,我都唔會介意,我只係想佢同我一齊。
我真係唔明嗰個人憑咩喎!我由開學就識佢,點解我最後都會比唔上人哋?佢到底有咩好?」
我擔心道:「你冷靜啲先,你不如落嚟啦。」
她仍然無法保持冷靜,越說越激動:「你唔明我點諗,我真係唔可以同佢分手,我已經習慣有佢嘅生活,無佢同我一齊,我唔知自己仲可以點生存落去……
我明明同佢講咗,如果佢唔嚟揾我,我就會跳落去,但點解嚟嘅人偏偏係你?佢係咪真係想我死?」
我又怎會不明白她的感受?我比任何人都要明白失去的感受。
失去的確很可怕,令人很畏懼,但正因為我們都失去過,才學會去珍惜眼前所擁有的一切。
但是她現在的情緒不太穩定,我應該怎樣勸說她張紫彤?
A、以心平氣和的方式
B、以激將法的方式
C、強行把她拉下來