P牌說故事
2020-05-19 21:21:06
「唔知道,我無諗過,可能想可能唔想。」我回應。
「5050……我都係。」她眼神空洞。
她接著說:「不過我哋遲啲教書都要對住班小朋友,為錢而做嘅話,咁都幾難挨。」
「我諗我會教中學,應該都無小學生咁細路嘅,但認真諗落,教書其實都係一樣幾神聖嘅工作,老土啲講句,就係以生命影響生命嘅職業。以前我唔會諗到咁深入,但而加唔知點解,我想好好做好呢個職業。」我不知不覺認真起來。
「雖然好老土,但呢個道理係幾時都啱用。」她認同我的說話。
Janice接着說:「我哋再行下囉,咦?有間賣電器,睇下入面有冇相機先。」
「相機?我仲以為你話想睇下電器添,你想買相機?我見你平時好Pro,好似好有研究咁。」
「睇下最近啲機咩樣咋,相機同鏡頭好貴,會窮三代。」她自嘲。
「咁你自己有冇買一部?」不得不說,大型的相機及長鏡頭確實有種莫名的吸引力。即使我甚麼都不懂也好,我也可以把相機拿上手,裝作自己為專業的攝影師,單是想像經已感覺自己帥氣不已。
「有啊,當時Grad din貪玩所以買咗單反同埋大光圈嘅鏡頭,簡直係燒錢,雖然重咗啲,但影出嚟真係幾靚,所以得閒都會去行山影下相,買咗唔好浪費嘛。」她看完相機後,就已經走到電話配件位置。
單反?大光圈?
這些說話我全都聽不懂,「單反即係咩?有冇雙反、三反、四反?」我開玩笑道。
她目無表情對我說:「我係咪要笑?」
空氣猶如停頓一樣,温度忽然變得冷凍起來……尷尬了。
「噫……呃……你都可以唔笑嘅,哈,哈哈。」我尷尬得不知所措,尷尬得不知自己笑甚麼。
「唔得,呢個我比0/10,聽到我反曬白眼,相機得無反同單反咋。」她恥笑道。
「好囉,咁我走先。」我假裝離開。
「唔準走啊,翻嚟陪我睇嘢。」她温柔地說
我乖乖地返回她身旁:「你睇緊咩啊,你想買耳機?」
她左顧右盼:「想要個無線藍芽耳機,不過呢啲都好貴,又唔知好唔好用,都係算數,走囉。」
步出商店後,她歎氣:「好似無咩好睇,我哋做咩好?」
我指着服裝店問她:「你唔睇衫?女仔應該好鐘意睇衫。」
「一睇就會睇唔停,唔想悶親你,不過話時話,你著衫真係幾好睇,好鐘意你呢種文青style。」果然,我沒有選錯衣服,這完全切合她的喜好。
我自豪地說:「當然,我每日照鏡都會疑惑點解有人咁靚仔。」
「做多咗啦你。
我哋做咩好?食我又唔肚餓,玩又無咩好玩,行又好似無嘢好睇。」她苦惱道。
「睇下而加有冇落雨?有就出去行下。」
「都好,去睇下先。」
接着我倆走出商場,發現天氣陽光普照,像是沒有下過雨一樣。
「我哋快啲做下光合作用。」我對她說。
「哈哈,好啊。」
「疫情完結咗之後,你第一時間想做咩?」我問。
「同我鐘意嘅人食餐飯,好耐無見班friend。」
「你頭先唔係食咗啦咩?」
「吓?」
然後她馬上反應過來:「最多食咗半餐咋。」
「等等,有人Call我。」她接過電話,「咩話?點解會咁㗎?我而加翻嚟睇下。」她語氣非常緊張焦急。
「做咩事?」我問。
「屋企隻狗突然行得好怪,我而加要翻去睇下佢。」
「我送你,你係坐巴士?」可惜,還打算花多點時間去了解她。
雖然在這短時間內,我倆的互動不算特別及有火花,可是就初次見面而言,我認為這經已算是一個好開始。
「係呀,我啱啱Check咗班次,應該幾分鐘就有車。」
「咁就好,你隻狗幾大?」
問到她的狗隻時,她傷心回應:「十三四歲,其實都好老啦,我雖然一直有心理準備,但原來要面對嗰時,我都係接受唔到。」
「一定會無事,如果你想揾人傾嘅話,我可以做嗰個人。」
「嗯……多謝你,車到啦,我上車先。」
「拜拜。」我與她道別。
「6789 5463。」她忽然說出這串數字,接着就進入車廂,使我無法追問。
難道……這是她的手機號碼?
我馬上用手機記下剛才的號碼,然後再用IG詢問她。
「頭先嗰個係你手機number?」
「係啊,因為有人話可以隨時揾佢喎,睇下真定假 。」
「一定係真,唔會呃你。」
我倆就以這個形式結束了第一次會面,未知她會否有跟我發展的想法呢?按這個情況的話……大概見面多幾次就可以成功追到她吧?
到底她對我有甚麼想法呢?
剛才走得太匆忙,害我都無法詢問她,讓我現在試探她的想法。
「下次去邊好?」我直接詢問下次的約會地點,看看她有甚麼想法。
「無所謂。」
「咁唔知你個心要點去?」我嘗試說得曖昧點,測試她的反應。
「咁就有啲難度,但我可以帶你去嘅。」很好!她肯定了我的存在,看來讓Janice成為我女友的日子指日可待。
下一步……我應該怎樣把她追到手?
A、詢問下一次的見面日期
B、要求每天聊電話,暫不提約會事宜
C、單純以訊息聊天
P牌說故事
2020-05-20 13:52:33
立即詢問下一次的見面時間似乎會太急進,只見面一次就每天聊電話也可能讓她感到不自在,繼續以訊息聊天應為最安全的方法。
回家後,我傳送一段訊息給她:「你翻到去未?我翻到啦。」
她只簡單回應一句:「yes。」
對了,她剛才提及家中小狗的健康有問題,未知現在情況如何?
「你隻狗點樣?」
然而,她雖看了訊息,但沒有回覆我,只有兩個無情的藍色剔號。
算了,還是玩遊戲打發時間。
過了好一陣子,她終於回覆我:「頭先睇咗獸醫,佢話bobo年紀大,所以啲關節開始退化,應該係有關節炎,遲啲仲有機會變得更嚴重。
唉,見住佢身體一日比一日差,我都唔知可以點做。」
「我諗你要做嘅事好簡單,就係喺身邊陪住佢。啲人唔係成日話,對寵物嚟講,主人就係佢哋一生,你就係佢所有。」
「嗯……所以我都想花多啲時間係佢身上,陪佢走過最後一段路。」
「佢會feel到你對佢嘅好。」
「係啊,bobo真係好有人性,會喺我唔開心嗰時安慰我,考dse又陪住我,可惜前排住hall,所以少咗好多時間同佢一齊,唔知仲有幾多時間可以陪佢。」
她的情緒似乎很低落,我要怎樣去安慰她?
A、用結他彈奏輕鬆的音樂給她
B、上網尋找更多犬隻關節炎的資料以了解更多
C、邀請她玩遊戲以釋放壓力
D、轉移話題