P牌說故事
2020-05-12 15:48:05
既然遵守了承諾,那我好應該繼續保守秘密,不讓其他人知道。
「可能佢真係眼痛。」我說。
但他們依然苦惱着,似乎認為事有蹺蹊。
「你估温Sir做咩事?」肥同學問我。
「唔好咁八卦啦,快啲入去上堂,你又話好想上嘅?」我嘗試轉移視線。
「係喎,掛住參觀都唔記得要上堂添。」說罷,我倆一併進入房間。
開門的一瞬間,我們聽到温Sir正在自彈自唱,旋律雖與剛才表演的一樣,但歌詞就好像有出入,而他一看到我們就停止唱歌,並且把我贈送的結他放在角落:「你哋入嚟啦?有冇諗邊個上先?
無嘅話呢,逸峰上先,我可以有多啲時間睇同提醒,而樹力你悟性高,基本上要執嘅位唔多,所以到你上嗰時,逸峰就可以自己練下習,或者出去揾下佢哋。」
「嗯,咁就照你講嘅次序,但我想問下,頭先首歌你自己改咗歌詞?」我好奇問道。
「仲以為你聽唔到添,係啊,我作多咗個Version比自己。」
「我又想聽下!」肥同學插嘴。
温Sir拒絕:「唔啦,我都係作嚟玩下,我哋都係上堂啦。」
然後,我們都專注在結他上,把温Sir的事拋諸腦後。
而我倆臨走時,肥同學提點他們:「你哋開Youtube之餘,仲要記得整埋Facebook、Instagram嗰堆嘢。」
Dan自言自語:「連F1仔都要教我哋,我哋係咪被潮流拋棄咗?」
Anson無視他的言論且回應道:「我哋識㗎啦,放心,到時整好就Send比你哋睇。」
其後,我們就離開工作室,而在我回家後,我亦收到他們傳來的Youtube片段,不過只有幾個人觀看,這也算正常吧?我們又不算是甚麼名人。
但過幾天,張紫彤卻出奇地傳來訊息且向我問:「呢個係你嚟?」,除了文字訊息之外,還有一個連結傳送過來。
而那連結正正就是我表演的影片。
她怎麼會知道?
「你點解會睇?」我問。
「最近無啦啦爆紅,好多人都話好聽,仲有……」
「仲有啲咩?」我追問。
「你自己睇下評論就知。」她沒有直接回應我。
我疑惑地按下連結,觀看人數居然有一萬多人!而讚好亦有不少,證明普遍人們都較喜歡,那評論又是怎麼一回事?
我向下掃並且查看,發現有很多人讚賞我的歌聲及整體表演不錯,但更多人把注意力轉移在我的胎記身上。
「雖然係唱得幾好同彈得唔錯,但我接受唔到望住佢個樣。」
「睇畫面係地獄,淨聽聲係天堂。」
「完美示範如何用樣破壞一首歌。」
「建議主唱整下容先。」
「大家想養眼就睇上一條片,主唱靚仔好多,利申:非Gay。」
這些都是最多人讚好的評論。
總而言之,他們全都針對我的胎記,更有人批評 我的外表破壞整首歌……
我越看越覺得心寒,為何他們可以毫不猶豫就說出這些話呢?
難道樣子真的代表人的所有嗎?
難道他們沒有想過……
我的感受嗎?
我無法選擇自己的外表,胎記可算是我與生俱來的,這也算是我的錯嗎?
戛然,肥同學致電給我。
「做咩。」我沒精打彩地接聽電話。
「你應該有睇條片嘅留言?對唔住……如果我當時唔係貪玩影低,就唔會搞成今日咁,要你受咗咁多人批評。
但你唔洗理佢哋講咩㗎,雖然我哋只係識咗一段時間,或者你無當我係咩朋友,不過你想嘅話,你可以同我傾下,仲有……我從來都唔認為有胎記係大問題,人最重要係有內在美。」
沒想到,他竟然會對我道歉,更明白我的感受。
「嗯,我明,不過唔影都影咗,算啦。」我有點自暴自棄。
他突然欲言又止:「不過……你其實可以趁呢個機會賺下錢。」
「你講咩?」
「其實你自彈自唱咁好聽,你大可趁住呢個機會開Youtube channel,開樣又得,唔開都得。
人係好奇怪嘅生物嚟,越多人討論同批評,佢哋就越想睇多啲,你可以順便展示更多自己嘅優點,話比人聽自己係有才能,樣係點都好,一啲都唔重要。」
他的說話出其地有種說服力,真的可以這樣嗎?
「但我完全唔識呢啲嘢。」
「我識啊,你想拍片嘅我可以幫你。其實我一直對呢啲都好有興趣,但知無咩人會想睇自己,難得有人討論你,你不如試下啦,我一定會幫你㗎。」肥同學極力遊說我。
我應該聽從他的建議嗎?
A、接納
B、拒絕拍片
P牌說故事
2020-05-12 21:32:18
「咁……試下都無壞嘅?」我帶點不確定。
「最多咪無人睇,但你咁有音樂天份,話唔定遲啲仲可以好似温sir咁教人添!」他越說越起勁。
「但我要點拍?我咩器材都無。」
「你淨係影自己彈結他就唔洗要好高級嘅器材,淨係手機都夠用,不過背景就要靚啲,唔好比人見到屋企啲嘢就得。至於收音……而加都係啱啱開始,你就咁對住手機都可以應付到,如果遲啲多人睇,咁到時再決定啦。」他說得頭頭是道,聽得我也不自覺地點頭。
「即係我只要揾個好睇嘅背景,然後用手機影住自己彈結他就可以?就係咁簡單?」
「係啊,之後你再Send比我,等我幫你剪片。」
「Okok,咁等我搞好就同你講。」說罷,我就掛線。
接着,我亦注意到Anson向我傳來訊息:「阿迪,即係你哋叫嘅温Sir病咗,所以你哋星期六可以唔嚟,仲有就係Youtube件事……唔知你有冇睇到,但希望你唔好太介意佢哋講嘅嘢。」
温Sir又會無故生病了?他沒事吧?
「我唔會太介意佢哋講嘅嘢,但温Sir無嘢嘛?」
「佢……我哋都唔知,不過可能下星期都上唔到堂。」他說得非常模糊,但到底是甚麼病,以致温Sir下星期亦未能出席呢?
我親自傳送訊息及問候温Sir,但他並沒有回應我,上線時間也停留在昨天,希望他早日康復吧。
不管了,先去找個合適的地方拍攝。
我開始找個地方去拍攝,由於睡房的空間少,所以不太適合拍攝。
我最終決定於客廳拍攝,在餐桌設好手機鏡頭,角度只能看到我的上半身,雖然曾想過展示自己的外貌,但我還是想以音樂為主要,而且面對鏡頭我也有點緊張,故此決定影着我的手及結他則可。
我選擇了自己較為喜歡的歌曲,也就是周國賢的《密封罩》。
我對他那種對生活的頹廢感覺唏噓,只因入世太深受過太傷,所以才想逃離及失去任何情感。
只要沒有情感,就不會再感到傷心或是快樂,同時斷絕與其他人接觸,只顧自己的話,那就不會留下甚麼遺憾。
我曾經也想過要這樣子生活,但現在的我想通了,正因為我經歷過種種,所以我才珍惜自己所擁有的情感,開心也好,傷心也好,全都是我活着的證明。
而且,我從這段經歷也領悟了不少道理,對於只有十三歲的我而言,似乎有點早熟?
沒關係吧,總好過我從未經歷過知,迷迷糊糊地白過人生。
我最終抱着這種心態完成了拍攝,並且連同歌詞資料傳送給肥同學,他的回應為:「等我呢兩日幫你整,應該加啲開場effect就得,預最快聽日可以Up上去,但你有冇諗住整個簡介?類似係講下自己點解會整channel同埋回應下大家對你嘅攻擊?」
我還以為只發佈自己的結他影片就已足夠,沒想到還要弄這樣多東西,我應順度拍攝一條簡介影片嗎?
A、拍攝
B、只發佈自彈自唱影片
如選擇A,請揀選簡介內容 (最多可揀兩樣)
C、講解創立目的
D、公開回應網民的言論
E、講述自己喜愛音樂的原因