P牌說故事
2020-05-15 16:43:56
「咁我約你又得唔得先?」我試探道。
「唔知呢,我唔係咁隨便㗎,同埋都有essay要做。」
「咁都要休息嘅,成日對住deadline人都顛,不如聽日出街抖下氣,最多我陪你。」我主動出擊。
「聽日?不了,武肺咁嚴重,啲廢老又唔戴好個罩,一個唔小心中招點算,仲會連累埋係班醫護。」
她居然拒絕了我?她不是暗示我嗎?
我裝傻道:「你唔係想出街咩?」
「想㗎,不過都係遲啲等無咁多確診先。」她再次配合笑喊的表情符號,令我難以分辨她是開玩笑還是認真。
女人果然是善變的,我完全無法猜透她的真正想法。
「好難捉摸啊!」我回應。
「你估咁易捉㗎?btw你玩緊咩Game,我最近玩緊動森喎。」她快速轉移話題,使我無法重提約會的話題,可惜,我竟錯過約會她的最佳時機。
唯有繼續維持網上談天的階段吧,要不是武肺,我肯定可以成功約會她,定不會被拒絕。
接下來的幾天,我繼續與Janice維繫感情,由於我亦有玩動森,所以更順利地跟她打好關係。
而這天,我又看到一則新聞,其內容為Zoom的安全問題再度備受關注,而警方亦已經拘捕疑犯,表示對方意圖散佈電腦病毒……
難道那個人就是小丑講師?
也有這個可能性,到底他有的動機是甚麼呢?
既要我們體驗這些奇怪的經歷,又要刪除記憶。
算了,反正都無法得到答案,還是先去睡覺。
……
……
……
「你好似仲記得好多嘢喎。」
我驚慌道:「邊個?邊個講嘢?呢度又係邊度?」
那個人戴上小丑面具現身:「呢度係你嘅夢境,放心,我唔會好似之前咁,我淨係想知點解你仲記得曬啲嘢。」
「你係……小丑lecturer?點解你會係度?你唔係比人拉咗?點解你又會知我咁多嘢?」我仍然處於驚嚇狀態。
「乜你真係信佢哋嘅辦事能力?嗰個根本就唔係我嚟,仲有,要知一個人嘅事係好容易,你都可以喺網上揾曬到其他人出嚟,點解你會覺得我會唔知呢?」
「你監視我?」這是我唯一想到的解釋。
「唔解釋咁多,反正你唔會明,總之我好心提醒你一句,唔好以為網絡好安全。
等等,我唔係嚟講呢啲嘢,你仲未講,點解你會記得曬所有嘢,仲要揾佢哋出嚟?」
我無奈地說:「咁我用紙記低咗,所以咪記得囉,點知我發現温Sir係真實存在喺世界,同時都係我結他老師,所以想知其他人係咪都一樣。
話時話,你到底想搞咩,點解要咁玩我哋?」
他冷笑一聲:「我玩你定幫你,你到呢一刻仲未分清楚?唔怪得啲人話好心無好報,好人當賊扮,你用腦諗下啦,你哋呢班想做老師嘅人都唔係真心為下一代努力嘅?所有人都係各懷鬼胎,真正想為教育出力嘅係好少,教畜亦一年比一年多。
人越大,就越容易迷失,越容易無咗初心,越容易唔記得咗嗰一個最純真嘅自己。
我哋每個人都做過學生,知道老師對自己嘅重要性,好嘅老師會記一世同受益終生,同樣地,遇上教畜嘅話,嗰種陰影都一樣係成世,甚至影響一生。
所以與其實習做老師,倒不如做翻學生,真正體驗多次做學生嘅辛酸,唔好成為自己討厭嘅人。」
「既然係咁,點解你仲要抹去我哋嘅記憶?你唔係想我哋記住同提醒自己咩?」我理解他的原意,但不明他的做法。
「重要嘅事唔係用腦記,而係用心去記住。就算無咗嗰段回憶,你都係會記得當時嘅心情,記憶會呃人,但感受永遠都唔會講大話。」
用心去記住重要的事……
真的可行嗎?
「點解你要幫我哋?」我心中有很多疑惑。
「你就當我無嘢好做,想玩你哋。」
他接着說:「好啦,係時候又要走,我今次嚟都係想了解下你點解會記得,不過我今次一定會好小心咁delete,廢事你又記得咁多嘢。」
「喂你唔可以走住!我仲有好多嘢想問!到底佢哋係咪真實?佢哋會唔會記得我?」
他一口氣解答:「佢哋係真實,但佢哋唔會記得你。」
聽到這裏,我有點失落,原來他們的記憶中,「我」從不存在。
「無嘢問我就走㗎啦。」
「咪住!你有冇佢哋現實嘅聯絡方法?我……想揾佢哋。」那怕只有一秒也好,我很好奇他們現時的生活。
「嗄……好,我破例比你,但你最多只可以知你個,你想知邊個人?」
只有兩個名額,我應該選誰?
A、陳樹力
B、譚仙怡
C、張紫彤
D、張子博
E、林逸峰
F、鄭任然
G、王志聰