《你聽說過嗎?奈良夢幻樂園》
47 目標人物
我、偽日本妹里奈、大隻鬼妹Octivia、消極彩香均無受重傷,而且能再次重聚,其實已經算是好事了。
趁在片刻的安全時間,我們總結各自的遭遇,慢慢找到提示和線索,理出醫院的指令。
***
此故事只適合十八歲或以上人士觀看。此故事內容可能令人反感;不可將此故事的內容派發、傳閱、出售、出租、交給或借予年齡未滿十八歲的人士或向該人士出示、播放或放映。
***
Octivia沒理會誤了重點的彩香,繼續說:「總結嚟講,有無發覺傷害我哋嘅人全部都係醫護人員,而班病人無搞過我哋,甚至有啲俾班醫生搞?」
我仔細地回想,傷害過我們的有血腥護士、黑澤醫生、新郎也罩了件醫生袍。病人方面,婦產科的破肚孕婦、精神病科的優子與麻美、吃人肉怪等,統統沒碰過我們,甚至疑似警告或提示我們去向似的,即使菊人形和咧嘴異形快要把我嚇到靈魂出竅,可還真的沒弄傷過我⋯⋯
我道出以上,里奈消化完Octivia和我的話後,推敲說:「所以,指令提示就係『我哋嘅敵人係醫護人員』?」
我同意,「唔唔,確實係咁無錯。」
彩香事不關己地坐在一角,反對說:「唔係喎,我同Octivia有俾病人搞㗎喎。」
Octivia再次無視彩香,對我們說:「不如你哋再細心諗諗,仲有咩提示啦。」
自從走失後,我隱約感到Octivia對彩香的態度好像變差了,大概彩香做了甚麼或說錯話得罪了Octivia吧。
「目前我哋有兩個提示,」我整理思緒,「一個係啱啱嗰個。另一個係入嚟之前,天韻直接講嘅,佢叫我哋殺一個人,唔可以殺多一個。」
「Group埋兩個指令!」Octivia激動地豎起食指,「我哋要殺死敵人,即係殺死班醫護人員!」
這也我有想過,可是不符合條件,我說:「唔係喎,我哋淨係可以殺一個人,醫院入面咁多醫生,唔可以殺晒佢哋⋯⋯」
「咪住,」Octivia坐到我旁邊問:「Cole你再講清楚啲先,你頭先話班病人有警告過你,或者畀提示你哋?」
里奈摸了摸下巴,「我哋婦產科嗰度,有個女病人暗示過樂園入面,可能有另一班人同時做緊指令⋯⋯」
Octivia捉住里奈的手腕,緊張地問:「有無講嗰班係咩人?」
「無講呀,」里奈愕一愕,慶幸她抓的不是自己受傷那隻手,「我同Cole覺得係園方想話畀我哋知有同伴喺度,鼓勵我哋玩落去。」
我想了想,嘗試說:「其實有個食人肉怪講咗另外一堆嘢,令我有啲介意⋯⋯唔知關唔關事⋯⋯」
當時新郎擄走里奈,我待雙眼的疼痛一過後步出客廳,就在那時,於走廊遇上一個正吃屍體的病人。由於太焦急要去救里奈,沒仔細推敲食人肉怪那謎語般的話。現在經Octivia這麼一提,說不定部分病人在醫院內是負責給我們提示的。
「佢嗰陣講嘢1999,仲以為佢講嘢無句真。」我坦承,「點知俾食人肉怪講中咗,佢話如果『佢』捉咗人,會帶去教堂。事後我又真係喺教堂搵返里奈,咁我諗食人肉怪講嘅『佢』,應該就係指新郎。」
「頭先你無同我提起有呢個人嘅。」里奈皺皺眉,「佢仲有無講啲咩呀?」
「佢講咗一大堆嘢㗎⋯⋯」我絞盡腦汁地努力回想。沒想到當時純粹認為是支離破碎的瘋話,現在或許是救我們一命的重要提示。
終於,我聽見腦海「叮」了一聲,立即說:「呀係喇,食人肉怪話咩咩人數夠呢,就可以玩遊戲,仲話如果『佢』依家過嚟呢,要避開『佢』嘅!」
見謎霧逐一散開,里奈的雙眼晶晶發亮,「咁好明顯,佢呢次講嘅『佢』唔係新郎,而係另一個人。因為你搵到新郎而無避開佢,最後都無事呀。」
「無錯,」Octivia進一步推理,「而嗰陣你哋係得兩個人,佢話人數夠先可以玩遊戲,係咪即係話,我哋四個要會合咗,先可以做某件事?」
里奈扯高嗓子道:「係喎!我同Cole遇過一個叫麻美嘅病人,佢有講過話,得我哋兩個係唔夠『佢』鬥,嗰陣佢一講完新郎就出現,咁我哋好自然以為麻美講嗰個人係新郎。會唔會,麻美同食人肉怪講嘅係同一個人呢?」
她的話不無道理。我和里奈勉強算是成功對付了新郎,表示新郎不是麻美他們提示裡指的人。要找的人,是我們二人無力招架的,才需要會合四人去對付。
我進一步整理線索,「得兩個人嗰陣要避開某個人,而四個人齊嘅時候,就可以唔使避開佢?」
里奈本想舉手表示同意,傷口傳來疼痛讓她急急垂下手。
「再加埋之前嘅線索嚟諗,」Octivia急道:「即係話,我哋四個人要合力,先可以殺死目標人物!」
我腦內立即有個畫面,嚴格來說,是聽見一種聲音。我連忙說:「要四個人先殺得死嘅人,一定係勁難對付,大有來頭啦!」
豈料,Octivia和彩香聽罷,異口同聲驚呼:「Doctor Monster!」
我和里奈也來個眼神交流:Monster⋯⋯大怪獸!我耳邊再次響起的,正是初到精神病科,房外那震撼的重撃聲和鐵鏈聲!
始終我們和Octivia所到之處不同,為了印證大家說的是同一個人,里奈遲疑地問:「你哋講嘅Doctor Monster,係點樣㗎?」
Octivia接下來的形容,駭人到讓我和里奈無話可說⋯⋯
===待續===
不少讀者話想加更,請注意:
此facebook post share數夠20個即時加一更
幫幫手share等個故唔好沉底丫
有勞大家加速了
*********
《你聽說過嗎?聖地牙哥鬼屋》
已於各大書店上架,
誠邀各位領養回家