《聽說過日本的恐怖樂園嗎》
21 初勝一局
儘管我在商店街的生死對決上佔在上風、面具人不得不讓我通過,但距離終點還差幾步。
我使出畢生所有力氣,勢要在最後十秒到達終點線內!
殊不知縱使猛然撲去,人還是停在終點線外!
***
警告:
本小說含血腥、暴力、色情描述,未滿十八歲請勿閱讀。
本小說不鼓吹任何暴力/虐待行為,切勿模仿。
***
「恭!喜!你!呀!」喇叭大聲傳出天韻的歡呼聲,聲音之大甚至令喇叭產生刺耳的雜音。
眨眨眼,我人已坐在終點線內!
成功了!
「Cole!」里奈激動得哭出來抱住我,Octivia和彩香也跟著和我們抱在一起!
她們暖暖的體溫貫入我的身體。
得救了!
我們贏了這一局!
在最後一刻,里奈奮不顧身跑出終點把我拖回去,加上大隻Octivia出手相助,我們全員成功到達樂園正門!
「我淨係想救到一個得一個
喺依家我哋人數少嘅形勢嚟講已經輸晒,
如果再唔團結互相幫忙,我哋最後只會少吓一個、少吓一個……」
——我想起在翔正被園方手剝頭皮時,里奈這番話。
大概在她心底裡認為,她所作的一切事情最後會反饋於她。盡力去幫助同伴,等於幫了自己。
種因,得果。
「多謝你,里奈。」我由衷道。
若果沒有她率先跳出來幫助,Octivia應該不敢莽動。再加上,利用人妻遺照威脅樂園這點也是出自里奈,她可說是我這關的救命恩人!
紅了雙眼的她只是咬唇點點頭,沒說半句多餘話。
婉柔漂亮的外表,有她故作硬朗的作風,大概是為了保護自己所養成的習慣。只要細心觀察她的一舉一動,絕不難察覺她只不過是個外剛內柔的女子。
不知道為何,我突然有股想親吻她的衝動,可能被勝了一仗沖昏頭腦。
或許,待成功逃離樂園再說吧。
「呃,你哋冷靜小小,可唔可以放開我先。」我道。
「你流緊血呀!」彩香驚呼。
「恭喜我哋可愛嘅四人組順利過關,」天韻始終沒現身,透過喇叭說。「俾小小時間大家休息吓啦,麻煩合作一下。」
幾名西裝友警戒地走到我們面前,大家明白所謂的「合作」是要我們遵守諾言、把所有人身上的電話交給他們,以免再有同類威脅事件發生。
收齊電話後他們離去、看完戲的人潮散去、我們四人坐在正門附近休息,幾名黑衣人站在正門前,有木板擋住正門令我們看不見園外的情況。
想起最初在園外,天韻搬開其中一塊木板,帶住滿心期待的我們爬進樂園來,現在我們卻千方百計想爬出去,多麼諷刺。
我壓低聲問Octivia:「依家得幾條友企喺度,有無機會打低佢哋出去?」
她搖頭:「佢哋一定會有防範,就算出到去,我相信外面都會有班人等住捉番我哋入嚟。」
先前我們已經成功逃出樂園一次,最後還是被巡邏車抓回。
不行,得先有個萬全方法才好嘗試衝出樂園……
彩香拿了長桌上的水來喝,被里奈截住:「你唔驚佢哋落咗嘢咩?」
她聳聳肩:「既然天韻講得依家係休息時間,無人喺度睇表演,樂園唔會對我哋出手住囉。」
Octivia同意:「如果佢哋係想搞我哋,唔駛落藥。」
我們四人相比園方,處於絕對的弱勢。他們之所以遲遲未殺光我們,純粹為班變態客人增添樂趣而已。
事實總是如此絕望。
傷害我們的是人心中的惡魔,同時也是這隻惡魔拖延我們被殺害的時間,多麼諷刺。
Octivia使用長桌上的醫療用品替我包紮,里奈滿臉悲傷瑟縮在一旁。
「里奈,你無事嘛?」我想不出安慰的話。
「點解我要咁貪心……」她幽幽道。「樹理本來搵咗第二個嚟頂替佢,只係……我為咗收個小小錢入嚟呢度……」
Octivia停下手上動作,緊張問:「為咗錢?你究竟係咩人!?」
「喔,里奈係我俾錢請嘅Model,」我忙道。「本來約果個女仔今日唔舒服,里奈算係替班。」
「特登俾舊錢請多個人入嚟?」
「未見過龍友咩你!」看來Octivia質問的語氣觸動了里奈的神經,她替我辯護。
要不是被樂園沒收的話,我倒想揚揚掛頸寶貝相機。
有點愕然的我只好實話實說:「本來book好咗兩位,最後佢唔嚟喇。」
「邊個佢?點解唔嚟呀?」
「做乜啫你?Cole做錯咗咩得罪你呀。」
「因為本身嚟果個係女朋友,依家變咗做我個ex喇。」我唏噓答,問Octivia:「咁你呢?點解入嚟嘅?」
我的反問倒令她怔一怔:「參觀吓、影吓相,我諗彩香都係啦?」
「如果唔係我話要嚟……」彩香低頭、狀似準備啜泣道。「純子同久美子就唔駛死……係我害死佢哋……」
「照你咁講,咁我咪害死里奈!?」
「邊可以咁講呢!我係自願入嚟㗎。」里奈道。
「但純子佢哋——」
「——好喇,唔好再諗點解會入嚟呢度,」里奈打斷負能量彩香、安撫大家。「我哋依家要專注嘅係,樂園佢哋今次會落咩指令。」
我同意:「啱,我哋要預先準備好,呢一關都要嬴!」
如此便沒有人再被送上虐殺舞台!
彷佛算好時間,喇叭停止播放走音的背景音樂,換來是天韻清脆的聲音:「好喇,大家都休息夠喇,係時間做吓飯後運動——」
天韻說的話往往包含過關暗示,我們打醒精神把她一字一話記下。
她續說:「大家拎齊工具,去鬼屋區集合啦。呢局俾你哋殺死一個人,記住呀,只准一個,唔可以多呀。」
咦?!
「咁依家開始啦!Game start!」說完喇叭再度播放背景音樂。
這次她直接道出過關指令,可我卻完全聽不明白!
「咩意思呀?!」我驚訝叫道!
===待續===
睇完麻煩俾個like 同留言,你嘅小小鼓勵係我寫落去最大嘅動力
當然share埋等我呢個故唔好沉底~
請Follow
facebook: 橘子綠茶
https://www.facebook.com/greenizmstory/
ig: greenizmstory
https://www.instagram.com/greenizmstory/
想最快知道有故事更新,
記得Follow同喺我fb首頁禁"搶先看/See First"
另外,fb裡面嘅相薄有齊晒我嘅其他故