香港中學文憑試(DSE)下周三(17日)放榜,一段名為「真‧DSE血淚史」實拍片流出,片中,一名Band 1中學女生,自拍逾一年備戰及應考DSE的情況。
如實記錄她因此出現心悸、失眠、作嘔、頭痛、持續低燒,甚至手部抽筋,最後更爆喊崩潰的苦況。
該女生就讀九龍一間天主教傳統女校,她由2022年3月起自拍Vlog,為準備及應考DSE作全紀錄,她早前將Vlog在個人影音帳戶公開,引來大批網民關注,有網民形容是「數一數二最真實嘅紀錄片」
女生開始時,即表示「近排一唸起DSE,就抖唔到氣,好唔舒服,好驚」,「好驚自己到時,都係好似依家咁一嚿飯,好驚入唔到大學......」她隨即哽咽起來:「都要繼續㗎啦......繼續溫書啦。」
她說,在這高中生涯,一直處於「一個唔舒服嘅狀態」,去到中五、中六時「越嚟越勁」,開始每一日都處於低燒(37.2度至37.4度),「長期都勁頭暈身㷫。」她在溫習及應考期間,因壓力,身體出現不少異常狀況,例如頭痛、失眠、手抽筋,甚至去試場時,要貼止痛貼。
該女生在全記錄細緻記錄了,自己面對DSE的各種變化及感受,她捱至應考最後一科,終於崩潰爆喊作出大控訴:「點解要用成績定義一齊!」「我哋唔係抗壓性低......DSE唔係我哋願意承受嘅壓力!」
「點解為DSE呢樣嘢而喊,其實DSE只係人生中一個好細好細好細嘅關卡,但係......香港嘅教育制度,係令到每一個香港嘅學生都覺得,成績定義你嘅一切,但係其實根本就冇呢件事。」「我唔適合讀書,我唔鍾意讀書,讀書唔係我叻嘅嘢,點解要攞成績讀書去定義一個人。」
「好似龜兔賽跑,你係龜你跑得輸嗰隻兔仔,正常啊......你咪去第二個賽道囉,我喺海島游水,我一定快過隻兔仔。」該女生在去年(2023年)完成DSE考試,她最後去向如何?DSE成績如何?她在Vlog及回應網民提問時,均有一一回覆,詳見上列圖輯。
網民:睇到喊幾次...
該段Vlog至今已有逾11萬人次瀏覽,網民紛紛留言為該女生打氣,有網民說:「係我睇過數一數二最真實嘅紀錄片,你講得好啱呀...呢條片真係出得好好,辛苦晒。」「睇呢條片都唔知喊咗幾多次。」「你很棒!能撐過真的很不容易,辛苦了!」
「『在香港讀書,DSE的成績定義你的一切』講得好啱,成日因成績唔理想,而感到焦慮,考DSE期間部分,我都睇到喊,多謝你嘅分享。」
網民又為女生送上祝福,並呼籲考生以平常心面對DSE:「真係辛苦了,祝你之後嘅生活,繼續開心熱血!」「Dse後才是人生的開始。」「DSE只係人生一個好少嘅部份,唔好比一個公開試定義自己,加油啦!!」