[是咁的] 丫屌,我細個響朵條村搬鬼咗

歡迎

開始懷念舊時加拿大post淨係用英文單字做名嘅日子,而家要用中文名, 好撚煩

撞警車嗰單嘢, 嚴格嚟講只係我個人對強權嘅一次以卵擊石、以生命捍衛路權, 但之後嗰啲全部都要多謝一個人.

一個當年選擇自己跳海都唔射我落海, 搞到我成家被警察煩足一世嘅人.

戴定頭盔先, 以下發生嘅事純屬發夢嗰陣聽返嚟, 如有雷同, 實屬家門不幸.

話說好耐好耐、好耐好耐之前, 有個煮得一手好菜而相識滿天下嘅廚房佬, 有一年為咗搵食去咗做行船廚師.

當廚房佬咁啱去到澳洲悉尼落船嗰陣, 有個朋友叫佢去港口幫手接個人, 因為呢個朋友正正就係永X郭氏嘅後人, 當時廚房佬聽見就沾沾自喜, 認為人哋郭家喺澳洲咁多人脈都唔搵、偏偏搵佢幫手一定係睇得起佢.

所以廚房佬諗都唔諗、問都唔問就半夜一點鐘戇鳩鳩揸住架車去過碼頭食西北風, 等個連佢都唔知係咩嘅人.

當廚房佬食食下風, 等咗大半個鐘終於見到有個三唔識七、孭住大大個手提袋嘅人鬼鬼鼠鼠行過嚟搵佢, 廚房佬為咗表示佢熱情好客嘅一面, 即刻車匙都唔抆就落車準備幫人開車門.

正當呢個人準備上車嗰陣, 突然四方八面湧出勁多晨早就喺碼頭埋伏好嘅澳洲差佬, 而呢個人亦都極速將個手提袋掉咗畀廚房佬, 之後自己跳上廚房佬租返嚟嗰架車殺出重圍.

一向錫身嘅澳洲差佬當然唔會以命相搏, 只能夠同廚房佬一樣, 戇鳩鳩、企定定咁望住架車駛走咗.

當架車走離開大家嘅視線範圍之後, 淨低嘅澳洲差佬自不然張予頭轉向呢個攬住個手提袋嘅廚房佬.

喺咁嘅情況吓, 大家如果係廚房佬, 反正完全唔知發生緊咩事, 亦都唔關自己事, 前面又有廿幾支槍對住自己, 會點揀？

1. 第一時間掉低個袋, 再舉高手投降.

2. 乖乖地唔反抗, 慢慢同班差佬解釋清楚.

3. 隔離就係海, 不如掉低個袋跳落去博一博, 話唔定以佢接近米九嘅身型, 可以游得快過班鬼佬？

4. 永X後人開到聲幫手, 梗係誓死反抗.

5. 永X後人派離嗰條友自己都走咗佬, 既然佢不仁、我當然不義, 梗係爆佢大鑊同警方合作.

猶疑咗幾秒之後, 廚房佬決定選擇咗一個連海水洗都唔清嘅方法, 就係攬住手提袋嘢跳落海....

當廚房佬喺海面浮浮沉沉、同班差老僵持咗一大輪之後, 終於記得自己雖然係一個行船廚師, 但其實泳術極差, 跳海呢個舉動純熟只係搞到自己成身濕曬同浪費警力.

所以到最後都係戇鳩鳩咁被班警察喺海入面執返上嚟.

到第二日報紙亦都將廚房佬報導為價值千萬嘅男人.

點解呢條廚房佬價值咁高？

因為佢攬住嗰個手提袋入邊嘅毒品真係值咁多錢.

可喜可賀.

咁有責任心

邊位？google完都唔識

冇 以為你係我一個以前識既人 認錯sorry

好似有故仔聽？

冇故仔 你講返故仔

當廚房佬個老婆喺香港一收到呢個消息之後, 第一時間梗係衝上去屌鳩永X後人.

永X後人當時拍曬心口應承廚房佬老婆, 佢哋一定會幫廚房佬擺平件事, 叫佢返去等消息.

但廚房佬老婆直覺覺得信佢哋唔過, 就唔理自己個肚入便已經陀住個幾個月大嘅仆街仔, 狗衝去澳洲救廚房佬.

中間麻麻煩煩嗰啲無謂提, 總之不出佢所料, 永X後人果然射後不理, 當廚房佬係condom.

最後多得廚房佬老婆頻頻撲撲、再加廚房佬自己本身驚人嘅廚藝令佢深得所有長官喜愛同信賴（監獄入邊下至囚犯、上次監獄長嘅生日嘅飯都係佢負責煮）, 身為一個亞洲人喺當時仲係歧視大國嘅期監倉入面受萬人景仰, 只係坐咗二年就遞解返香港.

落機嗰日仲趕得切幫個細仔慶祝佢三歲嘅生日.

可喜可賀x2.

當然, 澳洲唔同你計香港都會同你玩落去, 所以一慶祝完, 廚房佬即俾香港警察拉返入去坐監.

可喜可賀x3.

呢個時候之前消失咗幾年嘅永X後人為咗黯住廚房佬把口, 又衝出嚟拍曬心口話會幫廚房佬搞掂呢壇嘢, 至於當年點解澳洲唔幫佢, 藉口係澳洲鞭長莫及, 而家返到嚟香港就一定冇問題.

雖然廚房佬老婆極力遊說廚房老爆大鑊自保, 因為佢知永X後人得把口, 而且廚房佬已經做咗一次condom, 唔好咁蠢做第二次嗰陣, 廚房佬當然唔會聽佢老婆講嘢, 覺得永安後人咁有錢又有頭有面, 而且後人平時十指不沾陽春水嘅老婆仲親自下廚煮咗餐飯慰勞佢, 所以一定唔會呃鳩人.

結果, 只能夠話廚房佬份人為環保出心出力, 估唔到有人真係會做一個condom兩次.

可喜可賀x4.

到最後, 又係廚房佬個老婆撲心撲命變賣家當四圍搵律師幫手, 最後廚房佬喺香港只係坐咗幾年就出返嚟.

去到呢度, 大家應該覺得廚房佬坐完監出嚟應該會洗心革面、珍惜老婆好好做人.

Sor9ry.

只能夠話廚房佬份人為環保,真係可以去到好盡.

小弟當年俾警車撞飛, 就正正係因為廚房佬放監出嚟接我去食生日飯, 一時興奮得滯一時冇睇路引致.

當時警察落車第一件事, 係屌鳩我橫過馬路、而唔係問我有冇事.

由嗰一瞬間開始, 我就覺得電視廣告上面嗰啲警察全部都係呃鳩人.

所以當廚房佬喺小弟四年級戇鳩鳩幫永安後人返大陸拎包裹嗰陣斷到正, 又再做多一次condom、搞到我哋全家夜半警察敲門, 阻撚住我瞓覺嗰陣, 我幼小嘅心靈入面, 留低咗警察正仆街呢五隻大字.

呢壇嘢到最後喺廚房屋個老婆傾家蕩產、賣曬所有家當, 搞到要廚房老婆帶住兩個細路返佢老母屋企瞓廳, 終於幫佢拗到個假釋, 然後今次廚房佬終於醒覺.

與其繼續做condom, 不如先下手為強, 推個為佢仆心仆命咁多年嘅老婆去做condom穩陣啲, 所以佢呃埋佢老婆最後嘅所有財產棄保潛逃過撚咗台灣.

可喜可賀x5.

當然佢走嗰陣, 仲拍曬心口話喺台灣站穩陣腳之後,會接埋我哋成家過去, 所以先引伸後期我有機會去台灣住咗一年.

爭啲講漏咗, 喺呢件事入邊, 特別鳴謝一位姓黃、專門負責為國家過你一棟嘅律師, 除咗喺德福買咗個玩具畀我之外, 仲喺我屋企最唔掂嘅時候, 唔單止收凸律師費又乜撚都唔做, 仲想夾埋個地產婆趁機會賤價食埋我屋企層樓.

個價衰到我老母寧願畀法庭充公再拍賣, 都賺得多過賣畀佢.

所以係仆街呢個層面, 警察、廚房佬同埋呢位好黃嘅律師, 喺我心目中係排名係不分先後.

Super.

懷疑你d驚人選擇 係遺傳病嚟

我唔用condom嘅

你嘅經歷咁精彩，唔分返十集八集出書真係浪費

上面嗰part我發夢嗰陣喺平行世界經歷過㗎咋, 瞓醒覺先知乜事都冇發生過, 郭生後人同黃到發金嗰位議員嘅支持者有咩事唔好搵我呀

貓巴最後都係忍唔住打左永安出嚟