[是咁的] 丫屌,我細個響朵條村搬鬼咗

大sir 一開始預計我哋全部都係剛剛放學就換衫趕過嚟, 正常都攰到仆街, 而且入到斬竹灣基本上都已經成七點幾,所以佢一早講好咗當晚求其搵啲嘢畀我哋食完之後大家吹吓水hea吓就算, 到第二朝早開始先會去學canoe.

但嗰日搬完房之後, 唔知做乜鬼突然大家精力旺盛, 好似用咗超淫博士突然滿血復活咁, 個個都要嘈住落水玩.

呢個情況大sir當然唔會阻止啦, 一來有泳裝囡囡睇, 二來趁機會消耗曬我哋班仆街淨低嘅精力, 佢夜晚就有搞好瞓.

但我心諗而家咁嘅狀態仲要落水真係隨時浸撚死, 到時成個斬竹灣都係水鬼, HKSCC都唔知要掉幾多個西瓜、燒幾多金銀衣紙先搞得掂...

猶豫咗幾秒就決定唔跟大隊, 合埋眼大覺瞓.

一直瞓到feel到張床畀人踢咗幾腳, 同時隱約聽到詩坐喺我床邊同我講：哥...起身呀....夠曬鐘燒嘢啦..

我因為真係攰到仆街,所以就勁敷衍咁答佢：妹...燒嘢呢啲....好死嘅啫...唔預我都得㗎.....

詩：噏乜鬼嘢呀你又？

我：...你出去數下人頭, 睇下跌咗幾多個落水就計人頭燒啦....

詩：喂屌！夜媽媽仲係海邊講啲咁嘅嘢, 真係啋過你呀仆街..

我：......

詩：喂, 認真呀, 燒嘢啦....

我：你加油..慢慢燒...
講完我就唔再理詩, 擰轉身面向另一邊繼續瞓.

詩：丫屌, 一間後悔嗰陣你唔好求...

我隨便揮一揮手、當應咗佢就算.

又隔咗陣, 突然貨櫃盞燈畀人打開咗, 之後其他男隊員一入嚟就好驚訝嘅話：嘩！C叔你個仆街仲喺到瞓緊呀！？

既然燈都著埋, 我唯有勉為其難咁坐起身：乜料呀？

男隊員A：你唔肚餓咩？定食咗嘢先入嚟？

我：吓？未食嘢呀...唔係話今晚求其搵啲嘢食完就算喇咩？

男隊員B：吓？我哋食曬啦！阿詩入咗嚟幾次叫你, 你都唔願出嚟, 我哋咪以為你一早食咗唔肚餓囉..

我：吓？...佢..好...似淨係入嚟嗌我去燒野咋喎..

男隊員C：係呀, 大sir買曬嘢入嚟燒嘢食吖嘛！

我：丫屌..
心諗阿妹你份人有冇咁懶？講多個字都唔得嘅..

男隊員D：你屌乜都冇用㗎, 你肚餓就拿拿聲出去望下仲有冇廚餘淨低啦？我哋沖完涼返嚟嗰陣, 見大sir佢哋將我哋食淨嗰啲拎咗去餵狗啦..

我：吓！？涼都沖埋？加下幾點呀？

男隊員E：十一點幾啦..

我聽見即刻嚇一嚇, 拿拿聲喺背囊攞埋包煙、著件風褸就衝出貨倉.

嘩屌囉....唔知係咪呢邊靠海嘅關係, 除咗分堂二樓啲燈未熄同埋男女貨櫃倉叫仲有啲光之外, 成個區域一盞燈都冇, 個環境黑到呢...

好彩隱約見到分堂門口仲有個人坐咗喺到, 仲有幾隻分堂養嘅唐狗喺佢身邊彈嚟彈去, 諗咗諗就決定點著支煙、慢慢行過去睇下仲有冇機會拗飯食.

行經女仔住嗰個貨櫃嗰陣, 聽到入面幾個女仔仲喺到傾緊計, 我見無聊就放慢腳步留心聽下佢哋講乜, 但不外乎都係講下我哋條船啲男仔邊個溝得過、班阿sir幾仆街咁.

聽咗陣覺得佢哋嘅對話內容比無聊更加無聊, 就決定繼續行過去分堂嗰邊, 同時心諗呢班囡囡真係唔知個貨櫃層皮有幾薄, 佢哋講嘅嘢基本上出面全部聽到曬.

好似舊時我太婆同佢班同鄉特登閂埋門、匿係間房入面港人壞話, 但又唔知成班阿婆加埋五六百歲、隻隻耳仔都廢廢哋, 結果把聲大到我哋係出面街都聽到.

當我差唔多行到過去分堂嗰陣先發現, 原來坐喺到撚緊狗嘅, 唔係分堂主或者大sir, 而係一個著住白色tee同藍色短褲, 隨意用支筷子捲起咗啲頭髮、背影望落去有啲瘦削嘅女仔.

正當我諗緊點樣開口問眼前呢個三唔識七嘅女仔, 攞放喺佢身邊紙碟上面嗰塊豬扒同腸仔嚟食而又唔會顯得我好柒嗰陣, 圍住佢嗰兩隻唐狗突然擰住面、對住我喺到吠.

雖然我細個都有養過狼狗（uncle曾, r.i.p）, 但突然無啦啦畀兩隻唐狗兇神惡殺咁望住我喺度吠嗰吓, 都有少少淆底.

呢個時候一直背住我坐嘅女仔, 好慢咁擰過嚟、同時用手撥一撥額頭啲瀏海：咦？C叔你捨得回魂喇？

我：吓？你係..

喺我覺得女仔把聲好鬼熟、但又未嚟得切俾反應嗰陣, 女仔好隨意咁用手拎起一條腸仔, 大大力向我身處嗰方向掉過嚟、同時用把好hea嘅聲音講咗句：go.

然後嗰兩隻唐狗即時發咗癲咁向我跑過嚟.

我：嘩屌！做乜掉鳩我！？
女仔突如其來嘅舉動嚇到我即刻向後閃咗一步, 仲爭啲煙都跌埋, 好彩我眼明手快一手拍開咗條腸, 兩隻唐狗見條腸喺向住我左手邊飛咗過去, 即刻轉身追過去, 望都冇望過我.

女仔好休閒咁舐完自己隻食指同手指公之後, 先笑住答我：我想㗎, 不過我夜晚視力一向好差, 咁啱掉你唔中啫..

正當我想開口抗議唔係我手快, 佢一早掉中咗我嗰陣..

ㄚ屌.

係呢把笑聲啦...

真係化咗灰都認得.

因為幾個鐘前就係呢把笑聲嘅主人識破我哋嘅姦計, 仲害到我哋要抬住張床褥搬房.

原來眼前呢條舉手投足都懶洋洋嘅女仔, 就係傳說中嘅娃娃...

娃娃見我唔出聲, 就用眼神示意叫我坐佢隔離嗰張膠櫈仔.

但因為有過剛剛嘅經驗, 我一時間唔敢即刻坐落去, 只係繼續同佢保持距離, 吸咗啖煙, 以防佢再攞啲豬扒牛丸腸仔掉柒我.

唔係我介意佢攞嘢食嚟掉我, 污糟咗最多洗衫啫, 而係我好撚肚餓, 唔想佢嘥咗我最後嘅希望呀..

大家僵持咗幾秒之後, 娃娃先開口：坐啦, 唔係咁小氣呀話.

我：梗係唔係啦, 我怕支煙燻到你啫..
講完就扮曬嘢咁揮一揮手上面揸住個支煙.

娃娃：叫得你坐就坐啦.

我：哦...
聽見佢咁講, 我唯有戇鳩鳩坐喺佢隔離.

當我坐低之後, 先叫真真正正望下娃娃到底係咩樣, 佢個樣唔係話好靚, 第一眼望過去會覺得個樣有啲怪怪哋, 但之後越望越順眼, 尤其配合佢嗰種懶洋洋嘅語氣同眼神.

如果你問而家嘅我, 我會答你娃娃個樣好似希咲アリス.

娃娃：望夠未？開始收錢㗎喇喎？

我：屌, 又唔係望你！

娃娃用眼神問我：咁你望咩呢先生？

我：er... 望緊你..ㄚ屌.
幫我正準備答娃娃我望緊佢隔離個碟腸仔嗰陣, 佢竟然拎起淨低嗰一條腸仔啖咬咗三分一.

娃娃又再笑出聲：認喇咩？仲話唔係望我？

我：er....
我用揸住嗰支煙止一指佢身後.

娃娃望下我、又望吓條腸、又再望下我, 又再望下佢身後嗰隻紙碟：er..乜佢哋...唔係話...你食咗飯先入嚟㗎咩？

我：食咗....晏晝飯吖嘛...

娃娃：err.... 冇事嘅, 我仲有塊豬扒..
講完就將條腸仔放入口咬住、擰轉面想幫我攞個塊豬扒, 但其實我想同佢講, 嗰塊豬扒剛剛畀隻唐狗擔走咗..

娃娃咬住條腸仔, 有少少口齒不清又好驚訝咁話：咦？？塊8呢？

我：喺呢到.

娃娃一擰過嚟見我指住佢, 刻即一腳踢過嚟, 雖然我係跆拳道紅帶（師承小童群益會）,但我同佢之間距離太近、而且佢一直都好似懶懶洋洋咁, 冇諗到突然出腳, 仲要一踢就中我上五吋下五吋, 痛到我支煙都跌埋落地.

我一路執煙一路問候佢：喂屌！唔係話你呀叻唔切！

娃娃：咁你又指住我？

我一路捽自己隻腳, 一路屌柒佢：我指住你後面嗰兩隻唐狗呀屌！！

娃娃順住我指個方向望過去, 真係見到兩隻唐狗分屍緊塊豬扒, 就有啲唔係幾好意思咁望住我.

畀娃娃望咗兩望, 梗係覺得週身唔聚財：點呀又？

娃娃諗咗諗, 突然將一直擔住喺佢個口嗰條腸仔遞畀我：畀你喇.

我望住條腸仔上面仲明顯有佢啲牙齒印：吓！？

娃娃：食、唔食？

我再望真啲條腸仔, 上面除咗娃娃嘅牙齒印之外,當然仲有佢啲口水...

娃娃好似睇穿咗我諗乜嘢：放心喎, 我自己吞咗十幾年, 都幾肯定我啲口水無毒..不過你會唔會對我啲口水敏感就另一件事...

我聽見就忍唔住笑出聲：ㄚ屌..
我望一望佢身邊空咗嘅紙碟：唔係呀, 不過唔係幾好意思食埋你最後半條腸啫..

娃娃靜咗幾秒之後, 望住我揸住嗰支煙問我：薄荷？

我：吓？oh, 唔係..紅萬...

娃娃：乜你哋啲男人咁鍾意食紅萬？又“確“喉又苦..

我：err.....
心諗其實我都覺, 不過食呢d咁“哽”同苦嘅煙好似man dㄚ嘛 , 同我大個之後淨係飲黑啤相同原理..不過扮到好輕描淡寫咁答娃娃：um..冇乜嘢ㄚ, 我第一支煙就係紅萬, 食吓食吓咪食到而家囉...

娃娃笑住問我：咁長情？睇唔出喎？

丫屌...雖然娃娃仲係揸住條腸, 但笑起上嚟真係好好鬼靚...

娃娃可能見我戇鳩鳩冇反應, 又再fing一fing條腸：喂？有冇人？

我回一回魂之後答佢：er... 冇又話長唔長情嘅....習慣咗啫...

娃娃：ㄚ！？想讚下你都唔得喎...

我：er..... 咁吸煙又唔係啲咩良好嗜好...讚唔讚都冇乜所謂啦...

娃娃諗咗諗, 又再笑住講：... 又好似係呀可？

我：er...係囉..
心諗娃娃你唔該唔好再笑啦....

因為我就嚟沉船㗎喇...

娃娃：..不過...有冇人同你講過我都食煙㗎？

我：吓！？er...

娃娃突然依起棚牙, 然後指住自己嗰隻犬齒：你睇？

我：睇乜嘢呀？睇你有隻虎牙？

娃娃：你就虎牙！我隻犬齒大隻少少啫..

我：er.... 咁...即係有乜睇呀？

娃娃：你唔覺我成排牙都白雪雪, 唯獨呢隻有啲黃㗎咩？

靠住分堂二樓著住嘅燈光, 我望咗娃娃棚牙一段時間之後, 終於睇得出佢嘅意思, 佢指住嗰一隻犬齒對比其他牙真係黃少少：嘩..真係你唔講都唔為意, 但你一講突然就好明顯...

娃娃：因為我食煙永遠都係放喺同一個位,吸得耐咪變成咁囉.

我：嘩你個死煙剷..

娃娃隨手fing一fing條腸：妖, 大家咁話啦..

我望住我份餐晚喺佢手上面fing嚟fing去, 嚇到即刻同佢講：小姐, 你小心我條腸呀..

娃娃：大腸定小腸？

我：咪一鳩樣用攞嚟裝屎..

娃娃聽完我咁講又再笑出聲...

仆街丫, 佢真係笑得好鬼好聽, 要我成晚戇鳩鳩坐喺到聽佢笑都冇所謂...

笑咗陣娃娃又再隊返條腸去我塊面前：：大半條腸同你換支煙, 最多幫你搽埋蜜糖, good deal？

我今次諗都冇諗就答佢：可止good屌？直頭底屌啦..

娃娃：咁屌啦..
講完成條腸仔插落啱蜜糖到, 之後隊過嚟.

我：係係...
我見係咁唯有拿拿聲擘大個口硬接, 費事一陣啲蜜糖滴到周身都係.

結果幾分鐘前仲擔住喺娃娃個口、吊吊揈嗰大半條腸仔, 呢一刻就變成由我負責擔住吊吊揈, 而我亦都遵守承諾, 一路咬條腸一路拎支煙同個火機出嚟遞畀佢.

當娃娃點著支煙吸咗幾啖之後, 講咗句：ㄚ屌, 真係好鬼苦.

我：好苦咩？我有蜜糖呀？
我將食淨少少、但仲滴緊蜜糖嘅腸仔遞過去佢面前.

本來諗住講笑咁講, 但係冇諗過娃娃講咗句係喎之後, 真係直接喺我條腸仔上面奶咗一嘢, 但因為條腸仔實在得返好少嘅關係, 佢唔單止奶到條腸, 仲舐埋我隻手指, 搞到我突然打過冷震.

我：丫屌.

娃娃奶完之後好似若無其事咁再吸咗啖煙：屌乜鬼？

我拿拿聲將佢奶完嗰條腸仔放埋入口,：冇...冇...見你食得咁開心, 我又想食啫...

娃娃聽見我咁講, 就將佢食緊嗰支煙帶返畀我：嗱.

我：吓？

娃娃：好鬼苦呀, 你食埋佢啦,我夠啦.

我：er.. 哦.
我望咗兩眼發現附近好似冇紙巾嘅物體, 唯有拿拿聲舐乾淨自己隻手指, 之後接返支煙.

雖然我一直扮到冇乜嘢咁, 但其實咁大個人真係第一次同個女仔不斷各種花式咁交換口水.

吓？乜我之前唔係同奶媽拍過拖嘅咩？

係呀, 咪講咗囉, 奶媽聖母嚟呀嘛, 性冇呀！

我同奶媽除咗拖手之外, 真係乜柒都冇做過...

樓主依家仲有冇吸煙？
有冇考慮過健康問題？

有、轉咗電子煙.
冇、人終須一死.

大c真係好多女埋身

我呢啲毒撚成世注定冇女，淨係可以ff同k一齊、俾佢強姦

你行出街、迫地鐵甚至搭巴士都好多女埋身㗎


剛剛睇完異能, 個結局好似倉卒得滯, 而家睇緊惡鬼, 過兩日出文

冇女啫, maybe有仔？

呢排酒店典

好正常, 繼續有痴線嘅人出沒

定係你想問其他嘢？