其實就等於點解咁多西方科學家會信神,唔係因為耶教教義合符科學,而係宗教信仰本身畀到佢哋一啲科學永遠都畀唔到人嘅嘢(e.g. 人生意義)。放返落佛教嚟講,科學無論有幾大進步、理論幾咁精密都唔會幫到人對治煩惱、除卻執著,所以話兩者其實可以喺各自領域有所發揮、互補長短而唔係終日走去越俎代庖
至於坊間總係有信徒嘗試用佛法附會科學,我只能夠話熱衷於穿鑿附會係華人宗教界自古以來嘅傳統嚟,因為東方宗教嘅重心本來就在於「修心養性」遠多於「解釋世界」,各家各派之間兼容嘅空間或者就相對較大,加上普遍華人都有種奇特嘅思維:家家皆有理就自然要共冶一爐,而唔係嘗試求同存異、各自修行,所以我到最近都仲聽到老一輩師兄分享自己遇到耶教徒之後走去同人講「我哋佛教嘅《普門品》話觀音菩薩係隨類現身而形相不定㗎,所以耶穌……(你懂的
)」
呢種正正係典型嘅「知其語而不明其義」,假如你真係相信對方教主係菩薩化身就應該明白菩薩知道對方只受嗰套先特意噉做,你依家又何必自作聰明枉費菩薩嘅用心良苦呢?其實我覺得有人嘗試攞少少科學元素作為度眾嘅一點點善巧方便唔係問題,就好似樓上師兄都提到近年好幾位藏傳嘅大德都一直有喺呢方面花工夫,但佢哋只係用科學測試稍稍印證禪修嘅果效而唔係隨隨便便引一大堆甚麼甚麼力學嚟自行發揮,噉我會覺得呢啲先係真正經過深思熟慮嘅善巧方便,而唔係自娛自樂完搞到真正科學人覺得你抽水、普羅大眾又其實唔係好知你噏乜,到最後只係製造出兩邊不討好嘅尷尬局面然後自己喺同溫層「哈哈你看看我們佛教是對的」囉