(live) 裸辭獨遊日本四國三星期 (2)

估你唔到 本身有諗過買多幾粒，但買粒石仔送比人好似好仆街

我唔信水晶能量 純粹覺得靚所以會買
不過我鍾意冇乜點打磨過嘅石 多過呢種圓碌碌滑劣劣

睇完石仔，去到八栗寺，我嚟嘅主因，就係因為有登山纜車如果唔係我應該懶得上去我睇網上華文媒體，都係得一兩篇廣告文，應該都係一個算冷門嘅景點




好復古嘅風格，每15分鐘一班車，都算幾方便





坐五分鐘就落車，去到88遍路嘅第八十五座寺，八栗寺。我係對88遍路呢樣嘢有少少感興趣嘅，今日就特登嚟到其中一座寺，觀摩一下。

88遍路可能之前都有提到，就係跟隨日本嘅空海大師嘅足跡，行一次佢去過嘅八十八座寺。

影一影低個地圖，睇落好似好大，有排行咁樣，估唔到其實好快行得完




近纜車嗰個部分嘅寺廟，明顯係有用現代建築翻新過，睇落又整齊又靚，加上呢度又冇乜人，輕輕鬆鬆行下係幾舒服


背後嘅山就係五劍山，睇落似係五指山啲friend，加添咗一種神佛色彩，籠罩住山腳下一眾寺廟 呢張影得座山唔太清楚，之後補返張完整嘅



本寺，一場嚟到就當然要參拜下嘅



行到去最入，有一個觀景台，雖然有少少霧，但天氣整體都ok，周圍又開揚有冇乜嘢人



呢個咁現代化嘅觀景台，同背後行緊傳統風格嘅寺廟，有啲格格不入，但如果有得揀，我都會揀呢種新潮啲嘅

跟住周圍隨便影下，係一個唔多人嘅山上面，慢慢行下係真係幾舒服，但呢度始終未必適合趕行程嘅人，未必值得山長水遠走過嚟，但適合我呢啲慢活躺平嘅人







講起有一點，我見到呢個寺，用咗好多五花八門嘅方法，去收費或者收捐款，我知道佢要運行一個寺廟，係需要錢 但見得多，就有種太世俗嘅感覺，冇咗我理想中嗰種遠離塵世間嘅88遍路feel



hea完一輪之後，坐纜車落返山，喺纜車站嗰度周圍睇下，先見到原來呢部登山纜車都更新過好多次，舊時同香港山頂纜車好似差唔多



前往八栗寺嘅登山纜車，竟然就咁擺咗部售賣機賣煙
阿彌陀佛，罪過罪過....🙏🙏🙏🙏



落返山之後，補番一幅清晰嘅五劍山圖 佢應該係因為太陡峭，正常係準備進入的，只可以遠觀

離開八栗寺，開始長征，行廿幾分鐘落去，搭個幾鐘一班嘅巴士

行落山嘅沿途中，又見到好多石製品工廠，件件工藝都靚過石藝館 隻哥斯拉真係好屈機








連室內golf 都有



其實呢一帶除咗交通唔方便，真係一個幾舒服嘅社區

遊記好睇，幾時再去

感謝支持 好開心

近排都未必啦要儲下錢先，向現實低頭

返到庵治，再去幫襯多次間居酒屋 其實我係為咗今晚去食多次，特登改行程走返去庵治，食完再返市區


日文門外漢一見到就打冷震嘅手寫餐牌 搞不撚掂，今次直接交比老板娘發板，窮撚omakase






醬炒魷魚勁好食黐線的 配佢食咗兩大碗飯
傾落原來係老闆今朝手釣上嚟的 唔怪得之個魷魚味咁出，即使用濃味嘅醬汁炒完，仍然有明顯嘅魷魚鮮味





交咗畀老闆娘發板，所以我都唔知係乜嘢魚，淨係知係今朝捉嘅 味道都唔錯，但我個人唔多鍾意呢啲部位，太少肉食得唔爽



應該係油甘魚？我始終唔太鐘意食生嘢，對我嚟講都係普普通通



筍，老板娘話呢個季節啲筍最正




今次傾偈加入咗隔離枱幾位老人家，都係Google translate傾下small talk ，內容就冇咩營養，主要係感受到當地人嘅熱情


同老板佢哋再傾下，先知原來佢哋都係住喺八栗寺附近，都係五劍山山下 世界真係細



之後老闆娘想我係Google map 留個好評，我為咗唔自爆，特登即刻開咗個假名Google ac再留言正評 好容易可以搵到我
https://maps.app.goo.gl/rgNK6BHoMiAY3Kk9A


我仲要趕夜晚7點嘅巴士尾班車，返去高松市區，可惜冇太多時間傾計 臨走前老闆娘送咗包熊仔餅比我


閂埋門，離開咗熱鬧嘅居酒屋，重新變返自己一個，企係無乜人無乜街燈嘅街道等尾班車，但攞住包餅同埋個靚日落，喺呢一段小小嘅等車時間，我沉澱下自己嘅感受之後，竟覺得好幸福，嘴角不禁向上揚

一方面回歸平靜，比不擅社交嘅樓豬休息下一方面喺發覺原來開心有時可以好簡單，唔係一定用錢先買到，原來世界仲有好多好人好事等緊自己

樓主濕疹又食海鮮又食筍

屌

夜晚返到去高松市區，揀咗一間新嘅酒店，hotel wing，設施同埋位置都幾滿意，推薦畀大家



馬桶同沖涼分咗兩間房，呢樣嘢真係好正呀，好少呀其他地方見到 沖涼嘅時候可以直接企喺地板，自在咗好多





酒店都有一個唔錯嘅景睇



之前喺庵治一間便利店都冇，返到嚟市區忍唔住，又買咗啲嘢做宵夜

今日出發去坂出，相信又係一個比比較冷門的景點之一。


好幾次去到有巴打推介嘅咖哩飯，一係就突發休息，一係就滿人，真係無緣了



喺jr站附近，唔知食乜嘢好，結果揀咗之前德島食過嘅德島麵王，今次食咗個大蒜拉麵，味道都唔錯，餃子就好普通下




坐jr站嚟到坂出站之後，再轉巴士，去到瀨戶大橋紀念公園




巴士一日得五班，係有啲高難度 而且呢架巴士，上到車先知唔收我張ic卡，應該淨係收cash同埋高松自己出嗰張交通卡

又留個名先

估唔到我去到四國，遊記都仲未完
Btw巴打道後溫泉嗰空の散步道真係幾正

因為我更新得慢啫


正啊，我覺得夜晚睇仲正，可惜道後溫泉裝修緊，如果唔係更加好

我去完之後，食咗個小椋鰻魚飯又返咗去
夜晚真係正好多，不過日落都唔差

等道後溫泉裝修完一定再去過

幾時到直島(有冇去埋豐島？) ，想睇

豐島喺post 1 開頭冇幾耐就有

直島就幾日後先寫到

大部分都係巴士，係㗎，所以我係分咗三次慢慢去，景點去耐啲，唔使追巴士

可以考慮租電動單車踩嘅，衡量下自己能力再決定，我自己就有一次踩到去小豆公園

溪我冇去到，個個都話呢個季節唔適合去

去到瀨戶大橋塔，本身我預住係普通一個建築物咁嘅觀光塔，點知睇落去成部跳樓機咁嘅 細佬我頂唔住離心力 唔夠膽玩跳樓機㗎



買咗門票，全場得我一個人，可能係因為平日，都真係幾冷門




好彩佢係慢慢升上去，唔會感受到離心力。喺成場得我自己一個嘅情況下，我就唔使坐喺度，可以360度周圍走，全方位睇曬周圍的景色，而且今日天氣唔錯，終於見到對成個四國至關重要嘅建築，瀨戶大橋




幾好幾好 長到基本上見唔到條橋嘅盡頭，壯觀

仲有更新