(live) 裸辭獨遊日本四國三星期 (2)

仲有人睇緊架
等緊你再寫

進軍香港隨時又係大家樂/美心集團旗下

時間去到5月8號，終於重返高松，今日出發去女木島。

通常大部分人都係一日裏面玩曬男女島同女木島，但係樓主行開廢青路線決定拆開咗兩日，一日去一個島，慢慢玩。


今日又遲咗起身趕唔切食早餐，唯有去lawson買少嘢食頂住，可能係我喺日本耐咗嘴叼咗，但呢幾串串燒真係世界級難食




時刻表，畀大家參考下


女木島好近高松，20分鐘就到，而且仲可以清晰望到高松嗰邊嘅沿海建築。

落船之後，即刻有個阿婆問我去邊，我以為係sell我，估唔到佢係觀光案內所啲人，見到喺度望緊水牌，直接帶我去介紹地方

行過見到一塊好有心思嘅壁畫，基本上畫曬成個島嘅地點出嚟



租咗架電動單車，咁就開始踩上去女木島著名景點，鬼ヶ島大洞窟，相傳就係當年桃太郎打鬼嘅地方。

在此勸世，好唔建議大家租電動單車，因為上大洞窟條路實在太斜，即使有電動單車都係有啲吃力，新手嘅話真係會上唔到去


我知我影得唔好，睇落唔係好斜，但信我，真係唔好踩上去啦...



租咗架電動單車，咁就開始踩上去女木島著名景點，鬼ヶ島大洞窟，相傳就係當年桃太郎打鬼嘅地方。


見到隻大鬼，終於知道自己去到鬼ヶ島大洞窟。

其實感覺都幾有趣，我啱啱喺岡山返嚟，而岡山就係桃太郎出世嘅地方，jr站附近仲有佢個雕像，依家又去到佢打鬼嘅地方，好似成個瀨戶內海周邊，醞釀咗桃太郎呢個傳說故事出嚟



其實巴士班次都唔差呀，來回都係800 yen，租電單車要1500 yen，大家會嚟嘅話坐巴士好啦

去到洞穴門口，入口處睇落去好似張保仔洞咁



行到入去，原來係闊落唔少，開始洞穴探險了




行下行下，就開始幻想，如果突然間停電會點算，真係會伸手不見五指，係一個全黑嘅空間唔知點樣走返出去 跟住見到原來佢好多地方擺咗支緊急電筒，幾周到




洞穴入面真係比較凍，即刻要著番件褸，今晚見到佢有溫度計，裏面得番13度



其實我就覺得冇咩好睇，只係一個普通嘅景點，只係套咗個桃太郎的故事入去，然後放啲雕像入去，不太推薦。值得一提既係，裏去仲有幾隻蝙蝠，應該有成個竇喺度

鬼大將之會議
本來明明幾型，結果比人係咁揼錢去佢個盤度，搞到變咗街頭賣慘乞錢嗰啲友



擺咗好多小型嘅石雕



鬼子來了我帶路！

離開洞穴之後，出口上面仲有一個男木島觀景台，全程都得我一條友，今日真係完全冇人




行呀行呀，終於去到終點，沿途見到景色，老實講唔算好靚，但行上僅兩層高嘅觀景臺之後，估唔到景觀可以差咁遠



真係靚，接近360度睇曬周圍，真係可以清楚感受到自己處於瀨戶內海，畀群島所包圍，海風同埋陽光撲面而來

呢個位都幾靚


踩返落去，真係要好小心踩，佢落山斜得滯



去到島上唯一今日有營業嘅餐廳，佢寫住收四點半，但我兩點半去到佢已經話收咗，話今日要提早返高松食飯 呢班人真係唔憂做架全部

可憐我今日全日，淨係食咗幾串垃圾lawson串燒，明明琴日先應承自己，會盡量保持三餐定時飲食



老細見我望住食物雙眼發光咁嘅樣，施捨咗少許零食比我醫肚

去外島真係要袋定啲嘢食先去
上次去直島行到一點幾開始餓想搵嘢食
一係排咗勁多人 一係就落場
最後搵到間便利店衝入去
好多嘢俾人清晒
淨係買到個麵包

咁快開到2 學少少日文再去日本玩會唔同feel

全中，除罩見真章

Book marked, 打算出年3月黎睇櫻花

唔知你講緊乜嘢 我就不嬲都講緊骨付鳥嘅

真心多謝你，好在有你喺度

可能我唔好彩，女木島上真係冇任何藝術館或者餐廳開門，但最快都要兩個鐘後先有船，好肚餓呀今次真係荒島求生

踩咗上去望一個不知名嘅神社，上網搵唔到乜嘢資料，而且都冇開門



邊個一間好似幾有趣嘅電影院，估計係會上卓別靈嘅電影，但都係冇開門




踩咗去島嘅盡頭，係 女木島野営場，我相信即係露營地點，就係好普通一片平坦嘅沙地，隔離仲有一個明顯冇經過打理嘅湖




最後附上幾張周圍影嘅相

最後坐喺觀光案內所嗰度hea，等船到，入邊有隻好痴人嘅白貓，一見到人就會好似碰瓷咁撞上去





尾班船終於到了(呢張相好似影得ok)

今日畀我嘅教訓係，男女木島盡量唔好喺平日嚟啦，真係冇嘢做架



全日冇乜食過嘢嘅情況下，冇乜點諗，隨便見到一間，門面睇落去係welcome外國客嘅餐廳就入咗去。問佢哋攞咗張英文menu，但我不嬲習慣會睇埋日文menu，因為有時會認到日文漢字，但英文反而睇唔明 例如骨付鳥嘅英文，我係唔會係得明。


望一望之後先發現，中英文嗰張menu，竟然係貴咗！各位望下兩張menu骨付鳥嘅價錢，兩者係唔同㗎 使唔使水遊客水到出曬面


我叫個侍應埋嚟問佢咩事，佢竟然答我，價錢以中英文(即係貴啲嗰張)為準，跟住話日文嗰張未update價錢，我真係好難相信你喎大佬，我個樣睇落真係咁好呃？


當下有兩個方案，其一，嗌個最平嘅嘢食，食飽個肚先，其二，直接拍枱走人。當我掙扎緊，有個睇落經理級嘅人走咗埋嚟講對唔住，還原來我中英文嗰張係黃金周嘅價錢，日文嗰張先係啱㗎，跟住講咗好多聲唔好意思，咁我啖氣都消返





雖然誤會解開咗，但我叫嘅兩樣嘢食，蛋炒飯同埋骨付鳥都係好普通，炒飯似係中國平民餐館嗰啲十蚊人仔左右嘅炒飯，骨付鳥喺我食過幾餐之中都算唔好食，不推薦

時間去到5月9日，今日訓到十一二點先起身，然後去咗上次係高松食過嘅一間餐廳食lunch，仍然保持到水準

今次份炸雞係中上水平，唔算好出色，但最正都係嗰份白飯魚玉子燒，同上次一樣咁好食，仲係只需要加250 Yen

香川の食堂 まいしょく家 兵庫町店





食飽之後就去咗，香川縣立博物館，其實我近排已經不斷見到相關廣告，就係博物館有一個特別展覽，史上最強空海大師 (個名咁中二病嘅.....)，今日就去望一望



空海大師



冇呃你哋，佢真係自稱史上最強


入面唔畀影相，但全程真係冇咩好講。我本身的確係對空海大師有興趣，但入邊完全係100%日文，佢根本就冇打算喺外國人去參觀，加上展品大多數係古舊嘅經文，咁我睇唔明d字，其實成份展品對我乜嘢意義都冇，不建議




睇完展覽之後，對住展館出面hea下，的確係幾靚嘅，當時我就係諗緊八十八遍路同埋朝聖之路，呢個展有冇令我對遍路認識多咗？答案都係冇乜

行完無趣嘅特別展覽館，就行咗去附近一個小有名氣嘅文青咖啡店，三享絲打推介嘅umie，佢係由一個廢棄倉庫改建而成，可以整到依家咁靚，一定係下咗唔少功夫






呢張我覺得影得幾有feel



試咗三享絲打推介嘅西多士 (一排冇見到三享你啦) @三享

味道的確係比較油，仲有好重嘅糖漿同埋蜂蜜嘅甜味，但我本來預期係類似香港咁樣嘅西多士，估唔到完全係另一樣嘢 我會加少少分當創意分







我背對著身後人聲鼎沸嘅咖啡館，坐喺貼住窗嘅邊緣位，對住海景獨酌啤酒，孤獨卻自在，幾舒服嘅一次體驗，我幾推介呢度。




講起，我坐咗喺度三個鐘左右，我嘅隔離位不斷換人，起碼都換咗七、八次，有好多慕名而來的遊客，特登嚟呢個海景打卡，主要都係台灣同香港人，咁我呢啲自摺嘅就唔相認啦。


但我觀察到每一組旅客，都係買個甜品或者一杯嘢飲，然後花好多時間影食物相同埋自拍，最後就一邊低頭揀相，一邊快快手食嘢，然後好快就走咗。覺得佢哋其實冇感受過呢一刻，冇將五官所感受到嘅信息，轉化為個人情緒。


可能係留低咗一啲幾靚嘅相，但係感官上就未必有留低深刻嘅記憶，我覺得係比較可惜嘅一點

真係 但短期唔會了，我自己本身學緊西班牙文

想食下牛肉火鍋或者壽喜燒，因是透過google map 搵咗一間店，明明話十點閂門，我七點九去到去已經收咗 老細見有有條友企喺出面遊蕩，就出嚟同我講sorry

咁我就隨口聽日會唔會開到呢個時間？佢話會！咁我就答佢，咁我聽日差唔多時間嚟啦。我以為佢係會好認真，攞個客人預約清單出嚟mark低佢，但估唔到佢冇咁做，大家就咁樣口頭約定就ok







轉移陣地，去咗 文八 食燒肉，佢嘅評分係google map同 tabelog 都係出奇地高分，所以我期望都高。去到已經差唔多九點，好彩有得walk in

我問店員有乜嘢推介，佢就介紹咗最有人氣嘅兩個牛肉，就係下圖箭咀指住嗰兩個



店員推薦，兩樣都堅係唔錯，單純粹係個人口味，我唔鍾意又薄又大塊嗰一種，呢一種係適合用嚟做火鍋，但係燒肉。另一隻就真係出色嘅




大塊嘅比較難燒，店員會示範一次幫你燒 必須一讚員工態度幾好



另外自己揀咗一堆其他嘢，的確係冇店員推薦咁好食



埋單，8822 yen，有少少over budget，但如果變返做港紙之後，又會覺得呢餐都算抵其實 香港分分鐘要貴一倍，仲要未必咁好食

另外，其實我見到佢有啲二人set套餐，人頭都係4500 yen左右，睇落都幾抵，只係本毒撚自己一個，唯有硬食，去叫佢啲單點嘢

喺....真係有教訓了

等更新