【Ｄ＆Ｍ】《病港ＩＩ》（６７）

等睇隻手入面仲有魚，摩西吞完比D控制

仲有通靈術

我睇緊嗰時都疾一疾
心諗會唔會唔太安全

好似終末的女武神對拳咁

好好睇 要變到怪物先可以打贏怪物

M=Monster

而家一個連技可以打死D 但係如果D有幫手M隨時俾人暗算 就好似三個大病獵咁 都唔係穩贏

咁大隻生物可能要多幾條魚

M：三六

一早話佢變咗戰力單位

我覺得牙D知道自己永生，佢嘅計劃一定可以實行
所以無去加強自己嘅戰鬥力
而M或者其他病獵嘅實力就不斷增加

d本身就無格鬥技巧 只係屈本身能力 一硬個時又手慢腳慢

硬先手慢腳慢應該係錯覺黎，係本身就慢先有依個錯覺
第一季完全無依個變硬會減慢嘅錯覺

要放棄支持牙D了，真係恨鐵不成鋼。連最後拿個彩扮有咩陰謀都做唔到。嗰句”港島唔到我玩啦”，真係好柒，過街老鼠咁。

滿天拎晒毒品同男病童腦過黎用都未用就收隊。
牙m就咁鯨歌又可以慳返個腦。滿天當下有冇覺得失去生存意義，既生瑜 何生亮。

push

「另外有事同你講，M……錦綉王傳召你。」滿天轉身向我。

「係善意定惡意？」

「或者兩樣都有，佢見我同你好似識咁，就向我問起你係邊個。」

「你點答？」

「一個自由業獵手。」

「所以我一定要見佢？」

「你唔去我會好麻煩，你琴日表現咁神勇，佢應該想知你係咩來頭，佢有招攬人才嘅喜好。」

「睇得出……」

「我哋係咪要繼續留喺到？」艾匡嘴嚼著餅乾。

「係，唔好自己出去。」我叮囑他們。

前往錦綉花園的路上可見今天的農田並沒什麼人耕作，各處都水靜鵝飛，主要公路上的小販攤檔都消失不見。

「真係靜過墨豆。」

「墨豆？關墨豆咩事。」滿天露出好奇的表情。

「無……」我想了想，的確不關事：「只係講出嚟順口少少咁解。」

「你見到齊福皇嗰陣，唔好亂講嘢。」

「點解，佢好小氣？我話哂琴日先救完佢。」

「佢外表睇落人畜無害，只係個平凡嘅老男人，但其實佢好睇重權勢，如果你話語間令佢唔滿意……就等斬頭。」

「咁希望佢地把刀夠利。」

「洗唔洗同惡補下佢背景？」

「請講。」

「喺舊社會嗰陣，佢係新界嘅地王，鄉議局嘅主席。病港啱啱開始嗰陣，新界西北當然個個都服佢，視佢為領導人，但時間耐咗就會有利益衝突，唔同嘅圍村人都自立山頭，仲腥風血雨咗一段時間，錦綉無咩好勇鬥狠嘅人物，天然資源都唔多，佢就召集成立咗獵手黨，做佢嘅武者集團，真正贏咗成個倖存區返嚟。」

「聽落都正常。」末日的世界不是你打我，就我打你。

「另外佢有五個仔女，應該都等緊自己老豆死。」

「想坐佢老豆個位？」

「咁當然，而且依個只係正房，仲未計其他情人，二三四房嘅子女。」

「真係好精力。」

「計哂所有後代嘅仔女子孫，大概有十八個左右。」

「你真係起哂底。」

「如果換轉係你，唔係都會咁做？」滿天反問。

「會嘅。」

穿過昨日作戰的地方後，我便邁入錦綉花園，又可稱齊福皇的宮殿。

我的第一眼感覺，是外國的郊野居住區。

路旁長著高度相同的棕櫚樹，紅藍黃綠的兩層式小屋有序地排列，每條行車路都非常寬闊，不少屋主會利用下層充當小賣店舖，有的則整家也是商店，社區內附設日常措施，如學校、餐廳、市集、公園、教堂、診所等，每個街口都有錦衣衛站崗，不漏街上每個死角。

屋與屋之間會懸掛小旗、燈籠等裝飾，好有夏日祭的氣氛。

「依到嘅人都係耕田？」

「比較多係管理方面，耕田係區外嗰班平民做，你經常出面見到嘅防疫人員，唔多唔少都係住喺錦綉嘅居民，日常檢測係藉口，搵自己人監控先係真。」

「隻錦綉王喺邊？」

「佢喺銀湖餐廳到，但佢休息緊，下午去見佢，嚟我診所先。」

滿天帶我到自己居住的那條街，其單位下層是診所，上層是自己寢室。

「平時你工作就係睇症？」

「你覺得一個醫生除咗仲會做其他嘢？」滿天又反問。

「我識得有個會製毒。」

滿天不作回應。

「你餓唔餓？」滿天打開廚櫃。

「你識整嘢食？」非常好，我沒有吃早餐。

「簡單嘅都識。」

「咁整個簡單嘅嘢嚟醫下肚先。」

滿天給鍋子燒水，放兩塊麵餅下去。

待熱水稍熱的時候，灑些鹽巴下水變湯。

「雞蛋我就唔落俾你，我一個月拎得一隻。」滿天將麵條倒入圓碗裡。

簡簡單單的麵食安撫我可憐的腸胃，令我不自覺暴風式吸入麵條，

小小一碗麵對昨晚驚人消耗的我當然是遠遠不夠，但作為去銀湖餐廳前見齊福皇的前菜綽綽有餘。

「可以講下點解你身體上嘅變化？」滿天盯著我看好久了。

「件事講嚟都好長……」

我將特種病獵、鯨歌和蘇維眼的事，花了些時間全告訴滿天。

「即係你話你飲咗湯藥後，身體結構變異而強化咗，仲令你喉嚨變成類似鯨魚結構，可以發出專屬嘅特殊聲音影響人嘅大腦，過多排俾另一個醫生半強制性咁移植咗隻新眼……」

「我上世真係同醫生科學家有仇。」

「有冇種感覺係，自己越嚟越似怪物。」滿天有話直說，不怕傷到我的心。

「老實講……點都會有依種感覺，但如果可以達成目標，我無所謂。」

接著我們又談論到目標，什麼南征導彈計劃，滿天就有什麼疫苗計劃，雖然無論什麼時候看來都非常遙遠，但我們確實一點點地前進著。

滿天前來西北區，就是找回血禍。

儘管過程必定好多曲折，好多未知的因素……

但如果第一步都不踏出，那就別談後面的困難了。

和滿天閒聊是開心的，但缺少了酒，口總是有些乾巴巴。

「醫用酒精啱唔啱？」

我現在有個鐵胃當然可以了，但沒有那個興致。

三點斜陽正熱，下午時間。

我們是時候去會會錦綉王。

據滿天說，他每個下午都風雨不改，會在銀湖餐廳中用膳，吃最喜歡的點心，其兒孫都會恆常出席。

銀湖餐廳坐立市中心湖邊，窗外有道水簾，尤如把水傘，聞說本來是屋苑管理處，但坐擁美好景色及位置偏中央關係，給齊福皇強行轉形成私人餐廳，而他本人則居住錦綉花園鄉村俱樂部中。

經過重重的錦衣刀衛，我來到齊福皇所在。

餐廳設有可供三十人共坐的大圓桌，大人、兒女、子孫共坐一檯，桌子中間擺放姹紫嫣紅的錦繡花球作點綴。

那位太監，不……

助手陳章銅依然在此服務，應該是老管家級的存在。

「齊生要我帶嘅人已經拎咗。」滿天腳停門外。

陳章銅打量我幾眼，叫刀衛搜我身體，確認安全後親自開門，回報給廂房中的齊福王：「齊生，琴日嗰位長髮男嚟咗……」

剛用白玉筷夾起蝦多士的齊福王，目光放落門外的我：「俾個位佢。」

靜過墨豆

推

獵手 (slasher)

推

靜過墨巴