西班牙公主胡安娜被稱為癲婆胡安娜,呢個名字嘅背後隱藏住悲慘嘅故事。佢係卡斯蒂利亞女王伊莎貝拉同阿拉貢國王斐迪南嘅第三個仔女,因為兄姊相繼早死而獲得繼承權。
佢喺16歲時被安排嫁俾哈布斯堡嘅美男子腓力,靚仔通常都冇本心,胡安娜就因為老公時常拈花惹草而患上咗抑鬱症。佢為咗實老公於是走咗去佛蘭德,但比佢發現老公又偷食,於是歇斯底里咁發作。腓力索性操縱當地法庭認定胡安娜精神失常,將佢囚禁。
1504年,其母伊莎貝拉女王去世,菲利普帶埋胡安娜回國,希望用丈夫嘅身份獲得卡斯蒂利亞嘅王位(好似以前劇集啲奸仔角色)。
但係胡安娜嘅老豆斐迪南並唔同意,佢宣告胡安娜已經成為腓力嘅囚徒,兩人嘅衝突差啲引致西班牙內戰。但因為腓力無幾耐就病死咗,所以打唔成交。
靚仔腓力英年早逝,令痴情嘅胡安娜憶夫成狂。佢將老公條屍留喺身邊,喺產下遺腹女後更將老公棺材打開,等佢見下個女
。
斐迪南設法使胡安娜承認咗佢嘅共治權,之後就將佢囚禁喺托德西利亞斯城堡之中。斐迪南死後由胡安娜個仔卡洛斯(即神羅皇帝查理五世)繼位,胡安娜繼續被囚禁,直到佢1555年去世。
歷史學家認為胡安娜係精神分裂症患者(可能係產後抑鬱引發),由於佢係正統嘅卡斯蒂利亞王位繼承人,令佢嘅親人都要不斷利用佢先可以得到合法嘅統治權。胡安娜嘅悲劇人生就喺在家囚by父,出嫁囚by夫,老來囚by子中渡過。