反法聯軍從海陸兩邊進攻法國,普魯士同奧地利喺比利時同萊茵河進攻,英國則支持法國各省嘅起義,並於1793年10月圍攻土倫。
法國因為對外戰爭失敗,於是喺各國徵召所有18至25歲男子入伍。法國隨即成功鎮壓國內動亂,並且喺1794年佔領咗整個比利時同萊茵蘭地區。喺南線,法軍則成功攻入西班牙嘅加泰羅尼亞和納瓦拉等地區 。
1795年,普魯士同法國簽訂和約退出聯軍,同年西班牙亦都同法國講和並成為咗法國嘅盟友。
1796年,法軍在萊茵河戰線接連受挫,被迫退過萊茵河。但北意大利戰線卻喺戰場之鬼拿破崙·波拿巴帶領下,獲得咗巨大嘅勝利。蒙特諾特之戰後,拿破崙迫使撒丁王國簽訂條約,退出戰爭。之後佢佔領咗米蘭並開始圍攻意大利另一城市曼圖亞,並多次擊敗前來解圍嘅奧軍。
1797年,拿破崙指揮法軍喺裏沃利戰役中大敗奧軍,曼圖亞陷落。法軍入侵奧地利更兵臨維也納城下,不敵嘅奧皇法二世只好遣使向拿破崙求和。
奧地利喺1797年10月18日同法國簽署《坎坡福爾米奧條約》,將比利時割比法國,第一次反法同盟戰爭即此結束。