到咗1704年,英國海軍更攻佔咗西班牙南面嘅直布羅陀,直接威脅西班牙本土。到咗8月份,神英聯軍又喺布倫海姆戰役擊敗咗法國同巴伐利亞聯軍,巴伐利亞戰敗後決定退出戰爭。
而法軍喺其他戰線亦都陷入劣勢,法軍喺1706年9月在意大利被歐根親王打敗,另外弗蘭德地區亦都被反法同盟搶咗。
戰事進行至1706年,法軍幾乎陷入絕境,反法同盟喺西班牙發動進攻,成功迫使腓力退出馬德里,神羅嘅查理成功喺1706年7月2日登上西班牙王位。
正當反法同盟諗住實食冇痴牙之際,法軍卻於1707年4月反敗為勝,進佔西班牙王國大部份地區。
之後雙方陣營繼續打嚟打去,互有勝負。戰事從此進入膠著狀態,由1710年開始雙方都只打消耗戰而避免再度決戰。
眼見俄國喺大北方戰爭擊敗瑞典,英國開始視佢為比法國更大嘅威脅。因此英國開始獨自同法國進行和談,停止對法戰事。
而由於英國轉軚嘅關係,其他反法同盟亦都開始同法國停戰。再加上1711年,神羅皇帝約瑟夫一世去世(其父利一世早於1705年病逝),其弟查理即位,是為查理六世。由於祖宗家法神羅皇帝不得兼任西班牙國王,令查六世對西班牙王位要求嘅合理性降低,和平出現曙光。