雖然奧匈喺7月28日已經宣戰,但老朽嘅國家機械明顯對戰爭準備不足,一直拖到3日後先正式下達軍事總動員嘅命令。
奧匈動員能力嘅薄弱喺戰時表露無遺,如果話打仗要兵貴神速,咁奧匈絕對係相反。帝國嘅軍官仲喺度hea hea下蹉跎歲月,帝國總參謀長康拉德·馮·赫岑多夫就選擇同二奶去阿爾卑斯山渡假,而唔係爭取時間準備好軍需。
因為大佬去咗旅行嘅關係,赫岑多夫嘅手下都紛紛請AL去玩,完全唔似面對大敵當前。奧軍更加批准數萬名農民兵返鄉下,幫忙收割夏收。
相反塞國就積極備戰,短時間已經動員咗30萬士兵。俄國亦都宣布全國總動員,以支援盟友塞爾維亞。
協約國和同盟國兩大陣營因為各自嘅盟約所束縛,好快就各自歸邊。德國亦都聯同奧匈向俄宣戰,之後又以俄國盟友法國唔肯宣佈中立為由,向法國宣戰,並且意圖借道比利時攻擊法國。因為比利時係英國安全嘅關鍵,英國亦都只好不情不願地介入戰爭。