儘管梅特涅親王權勢大得有如張居正,然而造化弄人,時局喺佢垂老之年忽然轉向相反方向,梅特涅縱是殫精竭慮,亦都難敵民族主義嘅浪潮。
1848年1月,兩西西里王國首先爆發反抗國王費迪南多二世專制統治嘅起義,之後米蘭同熱那亞都先後爆發革命,迫使奧軍撤出該地。之後威尼斯、倫巴底、威尼托、帕爾馬、摩德那各地都陸續出現民眾起義。
而喺1848年2月22日,巴黎民眾本嚟想舉辦宴會慶祝喬治·華盛頓嘅生日,但係政府卻出面禁止。呢次行動成為咗革命嘅導火線,當日中午人民紛紛上街遊行示威,要求推翻國王同首相。
民眾上街後開始喺街上構築工事,點燃雜物,之後佢哋又開始同巴黎國民衛隊交火。最後首相被迫辭職,法王路易·菲利浦一世被迫流亡英國。法蘭西第二共和國成立。