1867年2月,喺匈牙利革命20年後,奧地利帝國簽訂咗《奧地利-匈牙利折衷方案》,改組為奧匈帝國。匈牙利從此獲得“匈人治匈”高度自治權,但仍然由奧地利皇帝兼任匈牙利國王,成為奉行一君兩治、兩國兩制嘅雙元帝國。其正式名稱為‘帝國議會所代表的王國和皇室領地以及匈牙利聖史蒂芬王冠領地’。
呢次改制猶如為百年老店哈布斯堡王朝進行架構重組。奧地利帝國本嚟係中歐嘅霸主,亦係高度中央集權嘅國家。但隨住1859年意大利統一同1866年普奧戰爭,奧地利喺中歐嘅勢力江河日下。而同時帝國內嘅民族主義思想則不斷加強,造成咗空前嘅叛亂。皇帝法蘭茲·約瑟夫為咗留住匈牙利,不得不作出大幅度妥協,佢希望藉著給予帝國第2大民族自治權,以減輕帝國解體嘅壓力。
1867年6月,法蘭茲·約瑟夫特登喺匈牙利加冕為匈牙利國王,以證明匈牙利喺帝國內嘅特權。然而國內其他少數民族如羅馬尼亞人同斯拉夫人,則同奧地利帝國甚至神聖羅馬帝國嘅時候一樣無權無力。佢哋希望得到匈牙利人同等嘅自治權,反而受到奧地利人同匈牙利人聯手打壓。
帝國嘅改組為佢暫時續命,然而亦只係將佢土崩瓦解嘅結局推遲咗50年,民族主義嘅浪潮最終都係將佢吞沒。