奧軍司令道恩得知布拉格被圍後帶領3萬將士從東面前去支援,但佢抵達戰場時間已晚,只能夠收攏敗兵然後緩慢進軍支援布拉格。
普軍喺圍城嘅同時仲要面對道恩嘅援軍,不得不分兵對抗,腓大帝喺圍城部隊中抽調5千將士前往現今捷克嘅科林支援。
由於奧軍士兵力佔優,腓大帝決定先發制人攻擊奧軍,1757年6月18日兩軍喺科林爆發戰爭。
由於腓大帝喺此役中太過輕敵,僅憑部分兵力就輕率發動進攻。而奧軍又佔有地利同埋人數較多,導致普軍最終戰敗。普軍被迫撤退,解除布拉格嘅重圍,全面撤出波希米亞。
科林戰役雖然不大,但被認為係七年戰爭嘅轉捩點。此役之後,腓大帝就陷入四面受敵嘅困境,被西面嘅法國、南面嘅奧地利、東方嘅俄國同埋北方嘅瑞典圍攻。
而喺同年夏天,俄軍亦都加入戰團。俄軍帶兵入侵東普魯士並攻下梅梅爾要塞,瑞典亦都喺9月份派兵入侵普魯士波美拉尼亞省。
普魯士此時嘅形勢非常嚴峻,奧軍正在向普魯士控制區進攻,而法軍亦都正由西方趕來。但腓大帝畢竟係一個軍事天才,佢先後喺羅斯巴赫同洛伊滕擊敗咗法軍同奧軍,然而普魯士依然要面對強敵環伺嘅局面。