當大後方七國咁亂嘅時候,軍事工業委員會嘅彈藥補給終於運到去前線,俄軍又開始生猛返啲。
1916年2月,俄軍擊敗土耳其,佔領咗埃爾祖魯姆,之後又佔領咗特拉布宗。
到咗1916年3月,俄軍襯住德國嘅主要精力被牽制喺西線嘅凡爾登絞肉機,決定喺納拉奇湖(今白俄羅斯)向德軍進攻。
35萬名俄軍向5萬名德軍發動攻勢,但由於天氣不佳以及俄軍各部隊同以前一樣缺乏協同配合,俄軍又損兵折將10萬人。
經過呢次戰敗,尼二世決定任命阿列克謝.布魯西洛夫將軍為新嘅西南戰線總司令,希望能夠一雪前恥。
布魯西洛夫富有想像力又深思熟慮,佢經過周詳嘅計劃,決定喺烏克蘭向最弱嘅奧匈軍隊進行一次大規模攻勢。
俄軍喺6月4日正式發動攻勢,布魯西洛夫選擇咗用精準而簡潔嘅轟炸面唔係慣常嘅全日持久性炮轟,佢命令少量士兵攻擊奧軍戰壕嘅薄弱環節同炸開缺口,令俄國大軍可以長驅直進。
布魯西洛夫嶄新嘅突擊戰術大破奧軍,佢成功突破奧軍嘅防線,令奧軍損失近150萬人(包括400,000戰俘),幾乎要退出戰爭。之後亦只能夠依靠盟友德國頂住個雞頭。
但作為勝方嘅俄國傷亡亦都有50萬人之多,呢場戰爭亦被列入世界歷史上最多死傷嘅戰役之一,史稱布魯西洛夫攻勢。