而正當民意黨人繼續策劃刺殺沙皇,亞二世則準備緊佢嘅立憲計劃。佢準備頒佈憲法,將俄羅斯變為一個君主立憲制國家。並打算喺佢嘅新老婆葉卡捷琳娜加冕禮上宣佈。
但係亞二世嘅政改方案同佢其他嘅改革一樣得唔到太多支持,甚至連佢個仔亞歷山大都唔企喺佢嗰邊。
1881年2月28日,俄國警察探知民意黨計劃喺馬路地下挖地道並放炸藥炸死沙皇。大臣都勸諫亞二世唔好出席次日嘅閱兵活動,但佢堅持參加,因為呢個係佢侄兒作為軍官第一次參與檢閱。
3月1日當天係星期日,亞二世如常乘坐防彈馬車前往閱兵,而佢回程時選擇咗唔行大街而係沿住運河回宮。民意黨領袖索菲亞·彼得羅夫斯卡婭得知路線改變決定放棄引爆馬路下嘅炸藥,並而啟動plan b。
當亞二世嘅馬車沿著運河接近馬廊橋嘅時候,一名民意黨刺客向馬車投擲一枚炸彈。馬車大致上完好無損,但有幾個侍衛同路人受咗傷。
亞二世不顧左右勸阻,執意要落車查看侍衛嘅傷勢。此時喺運河欄杆邊嘅另一名刺客突然向亞二世嘅腳邊投擲另一個炸彈,亞二世雙腳被炸斷,當日搶救無效離世。