俄羅斯的眾沙皇(長文)

樓主加油！

亞二世雖然俾面出席拿三世個party，但就對呢個累佢老豆早死嘅元凶無咩好感。當時法國同意圖統一德意志嘅普魯士關係越發緊張，亞二世就喺普魯士首相俾斯麥倡議下，同普魯士國王威廉一世(亦都係亞二世舅父)結成戰略同盟，協議當普法交戰，俄國要負責喺東翼牽制奧地利，條件係普魯士會協助俄國廢除克里米亞戰敗後所簽訂嘅條約。

1870年，普法戰爭爆發。普魯士出乎意料地擊敗法國，威廉一世喺凡爾賽宮加冕為德意志皇帝，俾斯麥亦都被後世人稱作"鐵血宰相"。



戰後德國兌現承諾，幫助俄國喺1870年11月廢除咗喺黑海修建軍事要塞嘅禁令，俄國亦因此得到籌碼一雪克里米亞戰爭前恥。

統一後嘅德國無論財富同工業技術都吊打俄國，同俄國領土接壤嘅佢注定日後成為俄國的心腹大患，甚至喺數十年後成為羅曼諾夫王朝嘅掘墓人。

但亞二世當時當然並不知道，佢喺俾斯麥拉攏下，同奧匈帝國皇帝弗蘭茨·約瑟夫一世冰釋前嫌。1873年，俄德奧簽訂咗"三帝同盟"，以孤立法國為目標。

多謝樓主
當年高中歐洲史就係三帝同盟開始教

Push

自從喺克里米亞戰爭奶咗鑊甘鼎以來，亞二世喺外交上就改行欺善怕惡政策。一方面避免同英法正面衝突，另一方面轉而攫取中亞諸汗國同東亞病夫滿清嘅地盤。

俄軍先後征服咗浩罕、希瓦同布哈拉三個汗國(位於今日嘅烏茲別克)，同埋喺清廷手中奪取咗外東北同外西北近一百四十四萬多平方公里土地。

而到咗1875年，俄國又同佢個老襯家(仇人)土耳其再起干戈。1875年7月，波斯尼亞和黑塞哥維那嘅斯拉夫東正教徒發動咗反鄂圖曼蘇丹嘅起義。俄羅斯國內嘅斯拉夫主義者高聲疾呼，要求沙皇出兵，支援斯拉夫兄弟。

反抗由波黑燃燒至塞爾維亞、黑山及保加利亞境內。當時俄國朝野都一片主戰之聲，甚至連沙皇嘅妻兒都對佢嘅保守謹慎頗有微言。終於沙皇喺輿論捆綁之下，喺1877年向土耳其宣戰。

而喺戰前俄國已經成功爭取到奧匈帝國保持中立，俄國承諾戰後將波黑分俾奧匈，自己淨係要保加利亞。

而因為鄂圖曼軍隊喺保加利亞進行嘅殺戮太過慘烈，有多達3萬人被殺。呢件事喺英國透過輿論發酵，公眾一片嘩然，英國政府亦因此不便介入，只能作壁上觀。

1877年4月，俄軍喺巴爾幹半島發動攻勢。俄軍主力進入羅馬尼亞後，6月及7月在不同地點渡過多瑙河，12月攻佔咗土軍重要據點普列文。喺1878年1月更加一度打到君士坦丁堡城下。

欺善怕惡
呢個世界不嬲都係弱肉強食

係就好，比俄羅斯或希臘統治君士坦丁堡點都好過比包頭佬統治

正當俄國人發住春秋美夢，幻想收復拜占庭古都，將君士坦丁堡變成沙皇格勒嘅時候。英國人終於出手了，佢哋出動皇家海軍，駛入伊斯坦堡海峽。

正當俄國人猶豫係咪真係攻佔君士坦丁堡嘅時候，土耳其蘇丹提出議和，兩國就喺君士坦丁堡城外嘅聖斯特凡諾締結城下之盟。

條約內容包括建立一個包括亞得里亞堡同薩洛尼卡嘅巨大新國家保加利亞，羅馬尼亞、塞爾維亞、黑山完全獲得獨立，俄軍喺戰爭中佔領嘅比薩拉比亞、卡爾斯同巴統都被割讓予俄國，並賦予俄國船隻通行兩道海峽嘅權利。俄國可以話取得了全面勝利。

可惜快樂時間太短似場流星雨。正當俄國上下普天同慶之際，英國同奧地利(俄國冇按承諾將波黑交俾佢)都大力反對聖斯特凡諾條約，而其他國家亦都憂慮俄國勢力會過於坐大。於是喺1878年6月，由俾斯麥做主持人舉辦咗柏林會議，邀請各國協商巴爾幹問題。

俄國方面派咗首相兼外交大臣戈爾恰科夫出席會議。會議開幕時，年紀老邁嘅戈爾恰科夫同佢嘅老朋友俾斯麥親熱擁抱，點知俾斯麥突然風濕發作，兩個老坑一齊碌咗落地下。俾斯麥嘅愛犬誤以為主人遇襲，即刻衝前咬傷戈爾恰科夫。



唔知戈爾恰科夫係咪俾隻狗嚇破咗膽，佢喺會議上誤將俄國讓步嘅最大談判底線地圖，攞咗出嚟比英國代表睇，英國佬自然𦧲飯應啦。

談判最後得出嘅結果同聖斯特凡諾條約相差甚遠 : 大保加利亞被分為三部分：東魯米利亞同馬其頓要歸還比土耳其，北部則成立一個自治公國，由亞二世嘅姨甥巴滕貝格的亞歷山大任大公。



俄國仍持有比薩拉比亞同巴統，而英國就得到賽普勒斯，波黑主權名義上仍歸土耳其，但行政管轄權就俾咗奧匈帝國。

結果俄羅斯喺戰爭中用鮮血換來嘅領土就俾英奧兩國冷手執煎堆咁執撚咗去。亞二世嘅心情就好似比俾斯麥放狗咬一樣咁down，佢開始認為德國佬表面和事老實質攪屎棍，立心勾結奧匈標佢松柴，三帝同盟嘅關係開始出現裂痕。

而喺散會嘅時候俾斯麥再次表達佢對巴爾幹問題嘅憂慮，佢話: "終有一日，巴爾幹發生嘅蠢事可能會導致全歐大戰。"

不幸地，一語成讖。

lm

lm

土耳其佬而家諗住將君士坦丁堡變「島」。
https://en.wikipedia.org/wiki/Istanbul_Canal

根據1906年《俄羅斯帝國基本法》，俄羅斯帝國皇帝的頭銜全稱為：
「蒙上帝恩典，全俄羅斯、莫斯科、基輔、弗拉基米爾、諾夫哥羅德的皇帝和獨裁者，喀山沙皇，阿斯特拉罕沙皇，波蘭沙皇，西伯利亞沙皇，陶立克克森尼索沙皇，格魯吉亞沙皇，普斯科夫的領主，兼斯摩棱斯克、立陶宛、沃里尼亞、波多里亞和芬蘭大公；愛沙尼亞、利沃尼亞、庫爾蘭和瑟米加利亞、薩莫吉希亞、比亞韋斯托克、卡累利阿、特維爾、尤格拉、彼爾姆、維亞特卡、保加爾以及其他區域的王公；下諾夫哥羅德的領主和大公，切爾尼戈夫、梁贊、波洛茨克、羅斯托夫、雅羅斯拉夫爾、別洛焦爾、烏多利亞、奧勃多利亞、孔迪亞、維捷布斯克、姆斯齊斯拉夫國君和所有北部區域的君主；伊比利亞、卡塔林尼亞、卡巴爾德尼亞土地和亞美尼亞區域的君主；切爾卡斯亞和山地王公及其他的世襲領主和統治者；突厥斯坦的君主；挪威王位繼承人，石勒蘇益格-荷爾斯泰因、施托爾曼、迪特馬爾申和奧爾登堡公爵......。」

講欺軟怕硬太中國話

多謝支持