1894年11月日,尼二世喺繼承皇位唔到一個月後迎娶咗黑森和萊茵大公國公主阿歷克絲為妻,阿歷克絲公主婚後改宗東正教,並改名為亞歷山德拉·費奧多蘿芙娜。
亞皇后嘅母親乃係英國維多利亞女王次女愛麗絲公主,佢喺亞皇后6歲時就因為白喉病去世,同樣不幸離世嘅仲有亞皇后其中一個家姐。心痛外孫女喪母嘅維多利亞女王於是就接咗佢哋幾兄妹到英國居住。
但係亞皇后並未因此擺脫喪親嘅厄運,佢阿哥亦因為罹患血友病,喺一次意外墮樓後失血過多而死。接二連三失去親人令皇后性格變得內向孤僻,但亦都造就咗佢堅強倔強嘅性格。
12歲時亞皇后同尼二世喺一場婚禮上認識,兩人一見鍾情,於是開始秘密通信交往。但因為亞皇后始終唔願意放棄佢原本嘅新教信仰,兩人嘅親事一直膠著。
終於喺1894年4月,亞皇后同意改信東正教,兩人就喺嗰年成婚。
而到咗1896年,尼二世同亞皇后喺莫斯科進行咗奢侈嘅加冕典禮,正式成為俄國嘅沙皇同皇后。
加冕典禮後,皇室喺莫斯科郊外按照傳統向民眾發放紀念品。因為俄國鐵路網嘅發展,不少嚟自外省嘅農民都蜂擁而至,比預期嘅40萬人嚟多咗接近一倍。
派發禮物嘅地方係一個練兵場,嗰度有好多練習時留低嘅戰壕同坑窪。由於聽聞禮物即將發完,俄國小農們慌死蝕底爭先恐後,結果導致好多人跌咗落坑,引發人踩人慘劇。
事件造成過千人死亡,萬幾人受傷,為呢個大喜之日蒙上一片陰霾。