俄羅斯的眾沙皇(長文)

636 回覆
275 Like 4 Dislike
2021-09-10 19:20:35
樓主俾我喺另一個post野生捕獲先出post
Btw推
2021-09-11 14:04:55
卡爾十二世親率4萬4千精兵進攻俄羅斯,俄軍採取咗過去同將來都經常使用嘅戰略----堅壁清野。卡爾十二世希望速戰速決,同俄軍決一死戰,但俄軍只係一味跟蹤,騷擾同埋誘敵深入。

就係咁,時間一日一日咁過去,瑞典軍因長途行軍已呈現疲態。到咗9月嘅時候,瑞軍已經接近糧盡,而補給部隊又遲遲未到。卡爾十二世面臨一個重大抉擇,一係就繼續等補給,一係就去盟國東歐糧倉烏克蘭搵嘢食。結果佢喺兩枝軍隊距離只剩下130 公里時,決定唔再等拔營出發去烏克蘭。

彼得一世睇準機會,親率俄軍精銳攔截瑞典補給隊伍。結果補給隊伍大敗,損失了一半士兵同埋所以補給物資。

1709年4月,瑞典軍因為嚴寒只淨下2萬4千人,卡爾十二世決定孤注一擲,進攻烏克蘭中部小鎮波爾塔瓦,以求出路,卻被彼得親率俄軍馳援所阻。

1709年7月6日,兩軍進行大決戰,卡爾十二世喺之前偵察敵情時隻腳中咗槍,未能夠親自指揮。喺群龍無首加上俄軍以逸待勞下,結果瑞典軍全軍覆沒,卡爾十二世連身邊嘅侍從都幾乎死曬,佢本人僅以身免,是為波爾塔瓦會戰。



卡爾十二世決定逃亡土耳其搵救兵,1710年,第3次俄土戰爭爆發。1711年,沙皇彼得一世親征普魯特河,陷入土耳其和克里米亞軍重圍。戰敗後俄羅斯被迫將亞速歸還比土耳其,鄂圖曼見有著數就馬上放棄支持卡爾。卡爾十二世眼見形勢比人強,喺1714年亦都同俄國議和。
2021-09-11 17:44:04
俄國擊敗瑞典獲得了波羅的海出海口,意味著面向西歐輸液管道打通,俄國得到咗歐洲嘅先進技術後,從此喺內亞同近東擴張一帆風順。而瑞典則從此失去咗強國嘅地位。

彼得一世同佢老豆一樣娶過兩個老婆,大皇后葉夫多基婭生有皇長子阿列克謝,但佢同彼得志趣不投,感情不睦。最後兩人喺1698年離異,皇后被迫削髮為尼。

之後,彼得喺佢老友緬什科夫介紹下認識咗一個來自立陶宛嘅少女。呢個囡仔不單止成為咗佢一生嘅摯愛,仲做咗俄國第一個女沙皇。



呢個立陶宛妹原名瑪爾塔·斯卡烏龍斯卡婭,皈依東正教後改名為葉卡捷琳娜。佢出身立陶宛農家,曾經嫁予一名瑞典士兵,喪夫後被俄軍俘虜。之後被送給大臣舍列梅捷夫做洗衣婦(可能同佢有路),再之後做咗緬什科夫嘅洗衣婦(亦都可能同佢有路)。

葉卡捷琳娜同彼得一樣咁爛飲咁劈得,彼得一直對佢十分寵愛。佢先後同彼得生咗11個仔女,但最後只有兩個女養得大。

而就喺彼得同葉卡捷琳娜恩恩愛愛嘅時候,彼得對佢個大仔阿列克謝就越嚟越睇唔順眼,雷帝殺子嘅戲碼又要再次上演。
2021-09-12 12:02:29
阿列克謝呢個不肖子性格同愛好都同老豆南轅北轍,佢對軍事冇咩大興趣,反而較熱衷於考古學與教會學。與鄙視東正教傳統,熱愛西歐文明嘅彼得不同,阿列克謝篤信東正教,亦都反對俄國人同外國人通婚。彼得一世開始對佢是否能夠繼承自己嘅豐功偉業感到懷疑。

1711年,彼得罔顧兒子的意願,安排佢迎娶神聖羅馬帝國皇后嘅細妹夏洛特為妻。

1715年,夏洛特在兒子誕生後不久去世。而葉卡捷琳娜亦都為彼得生下一子,彼得一下子得到了三個繼承人。

喺夏洛特葬禮上,彼得一世將一封信交俾阿列克謝,威脅要取消佢嘅皇儲資格。作為回應,阿列克謝自願放棄皇位,將繼承權讓給兒子彼得(後之彼得二世)。彼得同意,但要求阿列克謝進入修道院,成為一名僧侶。

1716年,彼得給予阿列克謝最後一次機會,要求佢加入軍隊。阿列克謝同身邊支持佢嘅貴族商量後,決定著草,走咗去佢嘅連襟、神聖羅馬皇帝查理六世嗰度。查理六世相當同情阿列克謝,安排佢住喺那不勒斯。

正在歐洲國事訪問嘅彼得對個仔離家出走感到極度憤怒,佢派遣咗一名使者將阿列克謝帶回俄羅斯,使者答應阿列克謝唔會受到處罰,天真愚蠢嘅阿列克謝咁就信咗,跟隨使者回國。

回國後嘅阿列克謝被囚禁喺監獄,喺嚴刑敲打下供出咗同佢關係親密嘅貴族,亦都承認自己意圖向神羅帝國借兵同弒父。



阿列克謝嘅支持者都被彼得處以極刑,而阿列克謝亦都因為酷刑而傷重不治。
2021-09-12 13:41:56
LM
2021-09-12 19:10:02
彼得同阿列克謝嘅矛盾反映咗傳統貴族對西化改革嘅不滿,佢哋明白彼得實際上係破壞緊斯拉夫民族嘅自由。

皇儲阿列克謝死後,彼得同葉卡捷琳娜所生嘅小兒子亦都夭折咗,傷心欲絕嘅彼得一連將自己鎖喺室內幾日足不出戶,但佢明白自己仲有數要同瑞典計清。

1721年,彼得一世親征瑞典,當時卡爾十二世已經戰死沙場,俄軍輕易擊敗瑞軍,正式結束大北方戰爭。

凱旋而歸嘅彼得被俄羅斯元老院授予“全俄羅斯的皇帝,彼得大帝”頭銜,正式稱帝。

彼得大帝喺歐洲戰場獲勝後,將新嘅目標鎖定為亞洲嘅波斯帝國,再次親征。戰事頗為順利,俄國奪得波斯手上嘅巴庫,但係彼得喺訪歐期間call g 染上性病,因為性病而導致膀胱感染,炎熱嘅天氣令到佢病情惡化,最終佢返回莫斯科。

1725年,一代雄主彼得大帝因為膀胱炎惡化而病逝。



彼得大帝嘅西方改革無疑令到地處歐亞邊陲嘅俄羅斯一躍成為了歐洲強國,但就好似伊凡三世為俄國繼承了拜占庭帝國的道統,佢直接喺落後嘅斯拉夫農業社會上嫁接先進的西方軍事技術部門,短期內的確可以令到民愚而國強。但長遠而言則令到歐化上層同本土草根永成死敵,就好似兩個靈魂爭奪一個身體,為日後俄羅斯帝國的覆亡埋下隱患。
2021-09-12 22:55:45
樓主出文快左
2021-09-13 10:21:57
由於彼得大帝彌留之際沒有留下遺囑,帝國因而陷入了繼承權危機。

當時有三個人有皇位繼承資格,第一個係阿列克謝個囝,皇長孫彼得,佢得到舊貴族嘅支持。但如果彼得登基,咁有份幫手折磨佢老豆嘅人(以緬什科夫為首,由彼得大帝提拔嘅新貴)就好可能會遭到報復。

第二個人選係彼得大帝嘅大女安努什卡。

而第三個人選就係葉卡捷琳娜皇后,佢自從得到緬什科夫引薦入宮之後,兩人一直係政治盟友。有好幾次緬什科夫得罪彼得大帝,都係靠葉卡捷琳娜求情倖免於難。

緬什科夫等新貴以彼得只得9歲,而安努什卡未嫁人為理由,支持"從丈夫那裡學會了治理國家的藝術"嘅葉皇后上位。佢哋吹雞叫咗近衛軍出嚟迫宮,皇后得以成功繼位,是為葉卡捷琳娜一世。



葉一世權力欲不大,佢將國事交比緬什科夫把持,自己就繼續召開亡夫生前嘅全醉會議,日日飲酒作樂。

葉一世因為終日酗酒而攪壞了身體,喺1727年病逝。臨終前喺緬什科夫操作下傳位皇長孫彼得。
2021-09-13 12:14:12
點解當初極力反對彼得繼位嘅緬什科夫會嚟個180度轉彎?原因係佢眼見葉卡捷琳娜一世健康惡化嘅時候,早已安排自己的女兒同彼得訂婚,咁自己就可以以沙皇外父嘅身份,繼承把持朝政。

1727年5月,彼得繼承帝位,史稱彼得二世。



權勢滔天嘅緬什科夫認為自己可以繼續控制少年皇帝彼得二世,做無冕君王。但係喺專制王朝之下,大臣嘅權力不過是帝王賞賜之物,就算你係九千歲魏忠賢,只要失去咗皇上嘅恩寵,一樣會成為階下囚。

緬什科夫因為臥病在床,威望值下降90%。貴族們一早就對呢個出身寒微嘅下等人睇唔順眼,於是彼得二世就喺俄國傳統貴族支持下,將一代權臣緬什科夫流放西伯利亞,無幾耐佢就死在徙所。

彼得二世同佢嘅支持者企圖廢除祖父所有改革,並遷都回莫斯科。但佢好快就罹患天花病死,羅曼諾夫家族男性譜系至此絕嗣,皇位又陷入真空期。
2021-09-13 12:32:04
留名
2021-09-13 13:47:02
彼得二世死後大貴族又為繼位人選費煞思量,甚至連佢阿嫲,彼得大帝嘅前妻都毛遂自薦想當上沙皇之位(❓),但無人理佢。

如果按照葉卡捷琳娜一世嘅遺囑,帝國繼承人嘅順序依次為彼得二世,彼得嘅子女,女兒伊利沙伯。由於彼得二世無後,照道理應該由伊利沙伯繼承皇位。但係大貴族們唔想俾伊利沙伯登基,原因係佢代表咗彼得大帝推行嘅改革路線。加上佢哋對葉卡捷琳娜呢個出身卑賤嘅外國女人同佢嘅子女都冇咩好感,於是伊利沙伯公主就被剔除。

喺經過一輪挑選,彼得大帝兄長伊凡五世嘅女兒安娜浮上水面。



安娜公主喺1710年同庫爾蘭(位於今日嘅拉脫維亞)公爵結婚,但唔夠三個月佢老公就死咗,遂以遺孀身份成為庫爾蘭女公爵,統治庫爾蘭公國。安娜近20年來一直住喺庫爾蘭,同俄羅斯皇室沒有聯繫,喺俄國冇任何政治勢力,作為大貴族嘅傀儡非常合適。

貴族們期望安娜成為虛君,議定安娜成為沙皇後不能結婚,不能指定繼承人,亦不能在未經貴族同意下對外開戰。
2021-09-13 13:54:36
伊凡四世秉承咗莫斯科大公一貫嘅謹慎作風?
2021-09-13 14:11:55
2021-09-13 20:01:37
喺庫爾蘭嘅安娜對貴族們嘅決議一無所知,當佢知道自己當選為沙皇,為咗離開偏遠荒涼嘅封國,對貴族們所有要求都𦧲飯應。

但安娜答應條件回國登基後,反而拉攏咗彼得大帝留低嘅西方軍事系統,最後喺近衛軍支持下,撕毀咗之前承諾嘅條約(佢真係用手撕爛咗)。俄國貴族嘅君王立憲努力就咁就失敗咗。

安娜登基後重用波羅的海日耳曼人,當中包括佢嘅面首比隆。馬伕(真係養馬,唔係扯皮條)出身嘅比隆被安娜任命為大總管同祕密警察嘅負責人,對權位缺乏安全感嘅女皇給予祕密警察毫無限制嘅權力,對莫斯科貴族們進行咗大規模清洗。



安娜為人懶惰,政績足陳乏善。佢將政事托付比隆同埋一眾日耳曼人,自己主要嘅興趣係八掛各大臣嘅流長蜚短,同埋化下佢嘅侏儒馬戲團。

另外,安娜女皇亦都收回彼得二世還都莫斯科嘅決定。1732年,佢宣佈將皇宮遷回聖彼得堡,恢復佢嘅首都地位。

安娜任內視堂妹伊利沙伯為眼中釘,對佢嚴以管束同迫害。佢為咗想將皇位繼承留喺伊凡五世一系,指定姨甥女安娜·利奧波多芙娜(安娜女皇家姐個女)嘅子女為繼承人。

1740年,安娜收養咗安娜·利奧波多芙娜啱啱出世嘅仔伊凡,並宣佈佢為俄羅斯皇位嘅繼承人。就喺呢個聲明發表後嘅幾個禮拜,安娜女沙皇去世了,遺命佢個契家佬比隆為攝政王。
2021-09-15 10:49:50
2021-09-15 13:59:56
尚在襁褓嘅小伊凡繼位為沙皇,是為伊凡六世。佢父母好快就同攝政王比隆發生衝突,喺比隆威脅要將佢兩公婆驅逐返德國之後,安娜·利奧波多芙娜聯同陸軍元帥米尼赫將比隆拘捕推翻。呢個俄國嫪毐掌權僅僅只有三個星期,就被流放到西伯利亞。



安娜接替比隆擔任兒子嘅攝政王,但佢對愛情嘅興趣大於政治。根據歷史記載佢似乎係bisexual,同時同佢嘅侍女朱莉婭同埋薩克森大使萊納伯爵莫里茨保持關係。更加有人認為佢哋間中會玩下threesome。22歲嘅安娜日日除咗同佢兩個愛人攪下嘢就係睇愛情小說,幾乎從來唔參加內閣會議。

安娜係一個懶散而寬大嘅執政者,佢喺有能力對付威脅者嘅時候卻不願意對政敵趕盡殺絕,注定要為自己嘅心慈手軟付出代價。

對安娜權位最大嘅威脅來自彼得大帝嘅女兒伊利沙伯。呢位公主同法國大使拉謝塔廸係情人關係,佢本身對掌權沒有很大興趣,但拉謝塔廸向佢進言,恐嚇安娜遲早會向佢落手,倒不如先發制人。伊利沙伯就係佢慫恿之下決定發動政變。

1741年12月6日清晨,伊利沙伯率領近衛軍發動不流血政變,攝政王安娜喺之前有收到佢圖謀作反嘅風聲,但良善如佢選擇咗信任伊利沙伯。

政變者喺沒有遇到任何阻礙將安娜全家逮捕,嬰兒沙皇伊凡六世餘生就喺單獨囚禁中渡過,任何人都不被允許同佢交談,導致其心智依然處於幼兒水平。1764年,伊凡六世喺一次未成功的營救活動中被殺。不知佢臨終之時是否也慨嘆但願生生世世,再不生在帝王家呢?

2021-09-16 08:47:33
伊利沙伯自幼就美貌出眾,甚至連佢嘅侄仔沙皇彼得二世都暗戀佢,憑住個靚樣同埋親民嘅性格,佢一直都好受到百姓嘅歡迎(face fate)。



伊利沙伯登基後,宣佈恢復所有亡父嘅改革措施,以證明自己係彼得大帝嘅正統繼承人。佢解散了內閣,恢復彼得大帝時代的樞密院。另外,佢又取消咗死刑。

未婚嘅伊利沙伯即位後喺德意志地區接咗自己嘅姨甥仔彼得(後之彼得三世)為佢嘅繼承人,仲同佢安排咗一個新娘子。



嗰個少女名喚索菲亞·奧古斯特,佢出身於普魯士嘅小貴族家庭,父親是普魯士軍隊中的一位將軍,後被封為公爵,獲封一個小公國。

索菲亞被選中為太子妃一來係因為普魯士國王腓特烈二世嘅安排,腓特烈搵咗最好嘅宮廷畫家幫佢畫肖像畫,供伊利沙伯女皇過目。



另外一個原因係索菲亞嘅舅父係女皇英年早逝嘅未婚夫卡爾·奧古斯特。女皇愛屋及烏,決定挑選佢為甥媳。

1744年,索菲亞同佢老母來到了莫斯科。佢來到俄國後努力學習俄語同埋皈依東正教,伊利沙伯以自己母親嘅名字替佢改名為葉卡捷琳娜·阿列克謝耶芙娜,佢就係日後嘅葉卡捷琳娜大帝。
2021-09-16 15:54:11
2021-09-17 05:21:49
2021-09-17 05:25:11
Lm
2021-09-17 05:43:49
good post
2021-09-17 09:40:00
1745年8月,俄羅斯宮廷為二人舉行了盛大的婚,但係婚後兩人感情並不和睦,佢兩個可以話係唔同世界嘅人,彼得為人中二病又on9,每日嘅活動除咗飲酒就係操練佢嗰隊所謂嘅荷爾斯泰因軍團(佢嘅出身地)。

而對比起努力學習俄語同融入俄羅斯嘅妻子,彼得亦顯得同俄國格格不入,佢幾乎唔識講俄語,仍然當自己係一個德意志人。

彼得亦都試過喺教堂度扮鬼臉同埋喺宴會場合倒瀉酒然後哈哈大笑,眞係望之不似人君。

相反葉卡捷琳娜風評就好得多,佢用心同俄國貴族交往,佢待人接物同公關,算係佢咁既年資同年紀好撚成熟,並唔係好似佢老公咁恃住紅周圍串柒柒目中無人。葉卡捷琳娜喜歡閱讀孟德斯鳩等啟蒙主義作家嘅作品,甚至同佢保持書信往來。

而另一邊箱,葉卡捷琳娜之母就因為幫普魯士國王腓特烈二世做間諜而被伊利沙伯發現。佢哋嘅密信對伊利沙伯極盡挖苦之能事,女皇見到後勃然大怒,憤而將她驅逐出境,呢件事亦都埋下日後俄普交惡嘅伏線。
2021-09-17 09:42:34
留名一身蟻
2021-09-17 13:55:21
*婚禮
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞