「係咪你講個種？」
我扔手機給亞娜，她抱著阿布揉臉的手馬上接住。
「係，黑色細字，嘩有冇…２０個?」
「２２個。」我說，「全部都係黑色細字STORY…點解唔直接一次過ＰＯＳＴ啦？啲字細到咁到底想唔想人睇？唔想俾人睇又點解要PＯＳＴ？」
亞娜苦笑:「你唔明依加啲後生女架啦泰思…幫你打左俾佢啦。」
早前亞娜說如果Fiora上傳超多限時動態，然後全是黑色細字的話多半是和人吵架，最大可能就是Jesscia，我本來還是半信半疑，現在才知道是真的，她們喜歡這種表達方法。
我接過手機放到耳邊，「喂，別離公子?」
「伯爵?」
「你咪同你講過，Fiora同Jesscia鬧交要同我講?」
「咁快收到風?」
「佢自己放上網既。」
「都係…個晚佢地出完後就咁。」別離公子說，「好少可見Jesscia咁嬲，又好少可見Fiora咁委屈…你知唔知Fiora差啲車左佢一巴?你做左咩黎?」
「唔關你事。」我說，「你只要哄返掂Fiora就得，同埋睇熟我俾你個啲筆記，下星期會考你沽空，軋空，超額沽空…」
「係～係～，日日睇緊架啦我，唉。」他嘆一口氣說，「但我見到Fiora咁唔開心，自己都無咩心機。」
「你應該咁諗：佢唔開心對你黎講係一個機會，佢咁樣係IＧ上面叫春一定好多兵仔會去哄佢，但係如果你係佢身邊哄得掂佢既話，你就贏。」
「…我唔覺得人地既情緒係一種機會…咁樣利用人地唔開心好咩？」
「唔好咩？」我說，「唔係咁樣你點會有機可乘?」
「係就係…我會哄佢先，你個啲筆記我會繼續溫。」
「仲有…」
「叫佢堅持啦嘛，同Jesscia撐行啦嘛。」
「無錯，有咁行撐到咁行。」
「嗯，我會陪佢，唔需要個個Jesscia。」別離公子堅決地說，難得他有這樣的志氣。
「只要佢同Jesscia反面，佢唯一依靠就係你，對你有著數。」
「…」他好像想說甚麼，但最後還是支支吾吾。
當然，我還是知道他在說甚麼的：「你仲因為Fiora傷心而心痛?」
「…係，覺得自己好似利用左佢咁。」
「呢個局面對你有利，你記住呢點就夠。」
「但係…伯爵，你咁樣當人地既情緒係計算，我唔係咁既人。」
「唔計算既，你點贏班公子哥兒?財力?靚仔?」
「…」他再次無言以對。
「佢既傷心只係一時。」亞娜在我旁邊開始教我如何說話，「日後你可以哄返佢，定係你連帶俾佢幸福既決心都會輸俾其他二世祖?」
「絕， 絕對唔會！」
我向亞娜舉起大姆指，這小子還真易騙。
就與林牧師和賈姑娘一樣，痛苦，傷心，內疚是一時的。相對於日後長遠的幸福，一時間的犧牲，一時間的陣痛是必要的。應該這樣問吧：世界上有沒有犧牲的快樂嗎?即使是那些在現代社會天生就是皇族者，不憂衣食，萬千寵愛的皇子公主們，還是有人在說犧牲了人生，犧牲了自由。
沒有幸福是不需要犧牲的，沒有快樂是沒有代價的。
犧牲別人，以別人為代價—已經算是一種幸運。
「咁樣你就陪下佢，諗下其他兵仔會點樣哄佢，然後超越佢地。」我說，「呢樣野我都幫你唔到。」
「唔使你幫，雖然我唔夠伯爵你有錢，但我哄女仔係唔會輸既！」
亞娜忍不住口:「你肯定?」
「嗄？！亞娜小姐！？你聽住架?！」
「哈哈，加油啦別離公子。」
「多…多謝。」
「好啦唔同你傾，有進展同我講，拜。」
掛斷電話，放到茶几上。
亞娜看著我說：「其實…別離公子咁樣先係正常。」
「嗯？咩意思。」
「唉反正收左工，我就直講，泰思。」亞娜在沙發上挪向我些許，「對於其他人黎講，他人既唔開心，情緒…唔單只係一個參數，唔單只係一個計算咁簡單。」
「我知你想講咩。」我說，「冷血，無同理心，完全唔係人…我無所謂。」
我看看她，別別頭不以為然，我本來就不是甚麼好人，而是在眾人背心編織陰謀的復仇者。
「即使係咁，你都係你。」
感覺「你就是你」這句話我可以咀嚼上一晚。
本來我們這一通電話到此為至，但是這電話帶來的沉思馬上化成為痛苦的現實，並噬咬了我一口。
我放在茶几上的電話突然響起，正如先前所說有我這個電話號碼的人不多，聯絡我的人多數會聽到亞娜的聲線和那句「我同伯爵講低，之後佢會聯絡返你」。
來電顯示：林牧師。
「喂？」亞娜拿起電話，「係，係……」
「…」亞娜臉色閃過一下陰沉，「好，我地即刻到，唔該你，拜拜。」
這時間？
她放下電話變回了工作模式:「白先生，林牧師既老婆…」
連亞娜也要這樣猶疑？
「林太佢岩岩被人發現係長洲渡假屋燒炭自殺，岩岩送左去醫院，危殆。」
亞娜臉色發青。
第九章：星星燎原火
完
第十章：人子的羔羊
