九十年代少女失蹤案的疑點
1993年11月3日,讀石硤尾某中學且家住土瓜灣既十四歲少女吳麗萍,係晏晝兩點左右同向屋企人講話會去尖沙咀維修電子辭典之後就失蹤。吳麗萍只係一個帶眼鏡且少胖既普通中學生,背景簡單,無同人發生瓜葛,因此警方搜索難以入手,吳麗萍屋企人懷疑佢係被帶往北上賣淫,多年來尋訪各處風月場所後依然無任何線索,佢就咁自此此人間蒸發。
1994年8月31日,係王晶電影創作室任助理製片既廿一歲少女梁嘉敏,由荃灣三棟屋住所去城門水塘揀選拍攝景點後一去不返,警方根據消息懷疑佢係被熟人追求不果後陷害,其後大量派員前往搜索不果。案件係2011年後再度炒熱,有網友聲稱每晚夢見梁嘉敏鬼魂報冤,指自己當年係被先姦後殺,有網友什至因此設立FB群組希望搵到更多線索破案;2014年又有女網友被「鬼上身」講出當年慘死細節:梁嘉敏著黑白裙見工就返到屋企途中被三名男子襲擊,帶去錦田一間鐵皮屋輪姦後再棄屍致死。記者後來根據「線索」往「事發地點」調查都係搵唔到任何蹤跡,時至今日,梁嘉敏生死依然成謎。
1995年2月14日,父親朱義柏為時任輔警警司既廿二歲少女朱敏恒,係情人節當日朝早出門去理工大學返學之後就音訊全無。呢單案雖然涉及警方家屬,出奇地係多年黎都無任何搜索少女消息傳出,不禁令人懷疑係咪同父親幕後背景事件有關。
1998年5月11日,應屆會考生十八歲少女張穎瑜同家姐講會去香港仔田灣街明愛中心拎取准考證,然後再同朋友食晚飯,係六點五十二分,張穎瑜傳呼該名朋友表示已經去到餐廳出面,但朋友後來就再聯絡唔到佢。調查後發現,張穎瑜確實到過明愛中心領取准考證;餐廳職員亦表示係夜晚七點左右見過佢係出面等侯,雖然警方為此懸賞五萬元找尋少女蹤影,但另一方面亦相信佢已遭遇不測。
1998年8月21日,住係大角嘴渡船街只得九歲既女童梁雲華,係朝早十點三十分於朋友旺角深圳街屋企玩耍後離開,稱會去奶路臣街探望另一位朋友後自從失蹤。一名男子「高佬」自稱得知梁雲華行蹤,向其母親索取千五元代尋費後消失,警方尋獲「高佬」後發現佢單純為左呃錢而講大話。四年後,白沙村發生轟動全港既姦殺女童藏屍案,警方一度懷疑梁雲華亦係被兇手唐永強所害,但後來證實兩者無關。
疑點一:無法破案的九十年代
從刑事角度黎睇九十年代發生既失蹤案件係比較怪異,因為相比起八十年代,好多女子失蹤遇害案,諸如屯門雨夜屠夫、維園女童裸屍案,最尾都係成功搵出真兇,就算生不見人,受者人屍體都最終都會被發現,例如鑽石山隧道陳慧敏案;但係九十年代就發生以上過呢堆死不見屍既失蹤案。因為隨住時代科技進步,案件各種留下既證據自然會更多容易追蹤,偏偏九十年代既案件就更加難破,令人不禁聯想到又係同連環殺手有關,可惜既係無論係警方定係民間都無辦法搵出更多線索,真相繼續石沉大海。
疑點二:失蹤者相似背景
針對上面呢幾單失蹤案,其實每個失蹤者背景都係有相似地方,除左最尾唔夠十歲既女童,所有人年紀都係青春少艾之年,而且背景簡單多數都係初出茅爐既學生,佢地接觸既人流無特別所謂壞分子。因此推斷,如果失蹤者係被拐帶,多數係熟人所為或者隨機犯案,然而佢地除左係背景相似,但係現實之間都無任何聯繫,令到警方就算追查都係無從入手。
疑點三:鬧市失蹤
大家細心睇唔難發現,普遍失蹤者消失地點都係鬧市,按道理黎講就算唔係太多人留意,至少都會出現好似張穎瑜案件既情況,起碼有職員見過佢蹤影,但偏偏就無咩人見過佢地,可以話係線索全無,到底係警方搜證不力抑或係根本佢地無出現過係相關地方,而係一早係其他地方唔見左呢?
到今時今日,香港每年都仲係好多失蹤人口,當然大部分人最尾都係順利搵返,但剩低失蹤既人行蹤就永遠成迷...