[真人真事] 重寫以前香港發生過冷門既命案奇案

話說自己本身對呢命案奇案有d興趣
但係而家成日都翻炒十大奇案之類
所以決定試下自己寫
因為想有返故事性 有d情節同對話自己稍微加修左
如有任何地方需要改善 歡迎巴絲打指教
中意既話歡迎比正皮同留言比我

舉手之勞

如果某日收工就返到屋企，遇到鄰居叫你入屋幫幫手，你會唔會猶疑一下諗諗先應承呢？
事件中被害人，當年只得１６歲嘅阿華可能同大家一樣估唔到幫個手竟然會招來殺身之禍。

事發係１９８９年１月３０日，住牛頭角上邨九座嘅中五女學生阿華，係放學返屋企途中遇到住係附近十一座嘅５８歲退休清潔工人馬安，「妹妹，我想申請回鄉證但我唔識字，你可唔可以幫我填一填表呀？」自稱文盲嘅馬安問阿華。

阿華無諗咁多就答：「填表？我未填過喎，但應該唔難填嘅。」

「係啊你地後生識字填得好快，你上黎幫幫手呀。」

一聽到要入屋，阿華心生危機意識，「唔好意思呀叔叔，我好多功課未做好又有測驗，不如你叫其他人幫你呀。」

「求下你啦妹妹，我無人無物，係你先幫到我架咋。」
「仔女又唔生性唔聽話，我都係想整好回鄉證返鄉下。」

「噫，好啦好啦，我仲要趕住做功課架。」經唔起馬安苦苦哀求，阿華最後都係應承幫手。

第二朝，阿華嘅爸爸見阿女成晚都無返屋企就落樓周圍搵，「唔好意思想問你有無見過我個女啊？佢著白色校服，大概米６高架。」

「佢平時好乖架，放學就即刻返屋企，但今日唔知咩事無返過黎！」阿華爸爸心急如焚。

呢個時候係垃圾站附近調查緊嘅警員阿嚴聽到心知不妙，原來尋晚見到嘅事真係有可疑。

阿嚴同馬安住係同座同層，半夜休班嘅佢返黎見到馬安門外有兩個沾有血漬膠桶，起初佢以為只係豬牛嘅血，但到朝早訓醒見到馬安拖住膠桶去垃圾站倒然後又刻意咁用其他垃圾遮住，唔想比人發現倒咩咁。於是阿嚴決定去垃圾站睇睇，咁岩就遇到一位休班警長就一齊調查件事。

「先生唔洗擔心無事嘅，你返屋企坐坐等等啦，我地會幫手搵架啦。」警長嘗試安慰阿華爸爸。

與此同時，佢地見到馬安又將一袋垃圾扔係垃圾站，係佢離開之後，警長叫阿嚴去報警支援，自己就上前打開垃圾袋——一堆殘缺不整仲冒緊煙嘅熟肉。

另一邊廂，阿嚴引領住伙記上樓進入馬安住所，果然發現到阿華，但可憐嘅佢只係得返一副無頭無手腳嘅軀幹。

「你點解要殺呢個無辜嘅女仔？」

「我無心架，叫佢幫手填個表都推三推四，個格似足我個衰女！」馬安辦解，「係個女仔反抗抓到我臉同手，我自衞先殺死佢！」

「如果只係錯手，咁將個女仔分屍又點解釋呀？」警員不齒咁質問。

馬安霎時之間無言以對。

的確佢口中錯手真係說服唔到人，因為警方之後再係垃圾站搵到十幾個垃圾袋，分別裝住阿華頭、手、腳既殘肢：人頭得返下顎同牙齒完整，天靈蓋都被斬開，而且部分袋入面仲有番茄薯仔湯料殘渣。警方亦相信馬安係被捕之前仲想將女死者身軀劏開，拎出內臟煮熟再掉棄。

案件係同年年底開審，馬安被控謀殺罪。根據庭上透露，有兩女三子嘅馬安為人脾氣暴躁，患有性格不正常症，即係完全唔需要被挑釁就很容易發嬲，係案發前一排，原本同馬安同住嘅大仔，就因為頂唔順佢嘅臭脾氣搬左出去。而另一方面，馬安又鍾意飲酒賭錢睇咸書，時常公諸同好，同街坊分享黃色雜誌及錄影帶，所以絕對有理由懷疑佢當時係動左歪念。

最終選擇唔自辯嘅馬安，被陪審團裁定謀殺罪名成立，依例判處死刑。諷刺嘅係翌年，依然想委過於人嘅馬安上訴，要求改判誤殺罪，但被上訴庭以證據不足為由駁回。而係１９９１年，時任港督衞奕信決定赦免死囚，馬安亦因此逃過一死改判終身監禁。

原文維基參考
案發日期：1989年1月30日
案件：牛頭角上邨11座17樓碎屍案
案情：一名16歲中五女學生阿華放學回家途中，被同邨一名58歲陌生男子馬安藉代為填寫表格，引入兇手居住的單位內殺害。兩天後，兇手烹屍後將部份已被肢解的軀體分別用數個白色垃圾膠袋棄置垃圾房。棄屍過程令居住相同樓層的一名休班警員途經時起疑，最後案件被揭發。兇手並無精神病記錄，在警方偵查時聲稱死者貌似令他非常恨透的一名女兒。經法庭審訊，陪審團一致裁定謀殺罪名成立，法官依例判處死刑 ，1991年改判終身。

呢啲人唔判死罰都曬米飯

寫得好睇
鬼故從來都唔及人性醜惡恐怖

多謝支持
個女仔死果時先16歲
仲要係原意想幫個阿叔 估唔到遇到個變態

後尾search左search
見FB有人話佢坐左十年監就死左
真係益左佢唔洗死又有得食皇家飯

我有時都唔明 點解要廢除死刑
有啲犯好似連環殺手咁 根本唔應該俾機會佢地

agger
太撚離譜既真係死刑算，死者家屬又可以好過少少，市民又唔洗出錢養呢d人
冇咁嚴重既既比如話之前個教授殺妻咁，呢d咪終身夠皮

呢啲人應該用返同樣方法處死佢

成日睇外國啲case 有啲殺左N條友或者犯啲好嚴重既殺人案都可以坐番幾十個就出黎真心痴線
或者最近韓國條撚樣又係

今晚祝大家冬至快樂先
見都有巴絲打支持 會繼續寫落去
盡量會搵返而家比較少人提但其實都幾轟動既案件

最ON9係 政府無野可以做到
果條撚樣聽講係監獄入面仲性力旺盛 60歲人可以做過千下sit-up
放返出黎真係二次傷害受害者同家屬

我覺得一來死咗就冇得返轉頭
如果係誤判 死咗就冇得補救
二來如果真係比呢個權力政府
首先死嘅一定係政治犯

我都有諗到呢兩點既
但一見到好多重案犯仲可以舒舒服服過世就覺得好唔公平

我最近都睇返麗的十大奇案，仲搵返原案資料睇。

www.youtube.com/watch?v=0aiWeB1qAXU
呢單係二戰後香港第一單碎屍案，發生於1965年。打工仔日日俾老細兼親戚屌，盛怒下殺人碎屍，仲帶埋條屍返屋企通街走。

好似樓主個case咁，終身監禁到佢死咗我覺得係人道啲同公平嘅做法，個兇手都冇得出返嚟害人

但我都明你嘅意思 所以邵家臻果啲成日講囚權我都好掙扎
一方面想坐監嘅手足有好啲嘅待遇
另一方面其實有好多渣滓係deserve 更差嘅待遇

係 公平同公道之間真係好難搵到個平衡
不過自問我諗法都幾偏激下

lm

兇殘無分年齡

對於大家黎講，１２歲應該係一個無憂無慮嘅年齡，但好不幸地今次呢件事件中嘅受害人正正係呢個美好嘅童年時期慘遭毒手，兇手仲要係一個同邨未到廿歲嘅少年，而佢更加係深思熟慮企圖將兇案布置成意外...

係１９８５年５月某個星期三嘅中午，住係葵涌石籬邨一座嘅工廠女工阿田行樓梯返屋企準備食午飯，係一個轉角暗位見到有個女仔雙腳跪地，上半身用趴住嘅姿勢，頭浸係個近乎滿瀉嘅水盆入面。阿田有少少嚇親，因為個情景實在太奇怪，於是佢即刻跑返屋企搵阿爸一齊去睇下咩事，當時女童已經昏迷，經送院搶救後證實不治。

好快就查出身亡女童係住係同座８樓嘅阿美。阿美係屋企五兄弟姊妹入面排行最細，係附近嘅小學讀五年級，雖然佢好成日逃學同埋貪玩到左右鄰舍無人不曉，但佢學業成績都仲係好好，經常考全級頭幾名。當阿美嘅媽媽知道咁可愛嘅細女遇害，更加係激動到暈低要送院治理。

法醫驗屍後發現阿美頸部有深深嘅手指印，雙手有繩被綁過痕跡，而且肺部無積水，死因唔係因為浸親引致嘅窒息。警方隨即係事發大廈搜索，逐家逐戶進行問卷調查，為左盡快破案又懸賞五萬港幣緝兇。起初案件毫無頭緒，因為遇害女童只有１２歲，背景簡單係普通家庭出身，按道理黎講亦都唔會同任何人積怨，而發現屍體位置亦離居住單位唔遠，因此推斷兇手好大機會係認識女童嘅同邨人所為。

估唔到嘅係破案關鍵係同燥音有關。係其中一次問卷調查期間，有街坊同警察投訴佢地經常被住係７樓一名１９歲趙姓青年嘅巨大音樂聲浪騷擾，但係案發當日有唔少街坊都表示當時出奇地無聽到燥音，因此警方鎖定趙姓青年，對佢展開針對性調查。

「趙生，我地係警察，想問你係上個星期三嘅早上到中午時間，你係邊同做緊乜野？」

「我...我...果日放假所以咪係屋企訓教，起左身之後又聽下音樂咁囉。」

「但根據我地調查所得，果日附近嘅街坊都聽唔到你開音樂聽嘅聲喎？」警員反問。

趙姓青年嘗試掩飾：「我果日一起左身出左去呀嘛...無開咪無囉。」

「咁你又話果日放假留左係屋企？趙生，我地而家懷疑你同案件有關，麻煩跟我地返去協助調查。」

趙姓青年眼見法網難逃，雙腿一軟跪左係地。

「果日我經過阿美門口，見佢一個人坐係到做緊功課，我又無野做所以咪叫佢黎我屋企一齊玩下囉...」

但係趙姓青年口中嘅玩，竟然係除哂阿美嘅衫，非禮之餘仲綁起哂阿美手腳想強姦佢。只得１２歲嘅阿美當然唔夠力反抗，係混亂之間，趙姓青年腦海一閃驚會東窗事發，於是就痛下毒手扼死阿美。

「你係點諗到呢個咁奇怪嘅方式去棄屍？」警員面對呢個廿歲唔夠嘅靚仔好奇一問。

「因為我見九樓裝修緊，有膠盆係到咪就地取材囉...」
「跟住原本我想就咁擺佢係九樓架...但係佢住七樓...咁遠你地一定會懷疑，所以咪放佢係六樓囉...」
「我真係無心殺佢架...其實我好後悔...我識阿美又成日同佢兩個阿哥一齊打波，佢大家姐阿儀又係我同校同學...」
「我內疚到唔知點算好...我諗過跳樓死左佢算...」
趙姓青年喊哂口為自己所作所為懺悔，但係再多嘅後悔都已經挽回唔到阿美嘅性命。

而係同年１２月，趙姓青年係高等法院否認謀殺，陪審團係經過３個半鐘相議後一致裁定謀殺罪成，依例判處死刑然後按慣例改處終身監禁。趙姓青年一時嘅淫念唔單止扼殺左阿美嘅美好童年，更加係一手摧毀左包括佢自己在內嘅兩個家庭，永遠都係無法磨滅嘅痛...

lm

支持+幫推

原文維基參考
案發日期：1985年5月15日
案件：石籬邨女童命案
案情：一名就讀區內麗澤譚肇康紀念學校的女童張偉珍（12歲），在梯間被一名居於同一座大廈7樓的夜班印刷工人趙守禮（19歲）性侵犯，期間發生糾纏，女童遇害後被頭浸水盤當中，意圖製造成溺斃假象。

推