[真人真事] 重寫以前香港發生過冷門既命案奇案

類似篤灰咁囉我估
如果唔篤佢出嚟分分鐘俾差佬鋤佢串謀謀殺就仆街

文呢

我記得有單案都好癲
條友係好好先生 有家庭又係教徒
點知私底下沉迷av
捉左幾個女仔去深山犯案
仲要set晒機拍片
勁到監聽警方既通訊設備

條友好似就快放監
希望樓主既文警惕下大家
支持樓主繼續寫

如果佢行為良好分分鐘放左

Sor 大家
聽日30號晚前一定會出到篇
因為呢幾晚有野做 硬係斷斷續續寫唔好

慢工出細貨

收緊個尾同重睇一次執一執
麻煩大家再等等好快

Lm

係咪搭晒帳篷嗰個
有本危險人物有講好似

留個名，好鐘意睇呢d，呢d冷冷地門幾好

新年鑽石山隧道女屍懸案

１９８０年絕對係令香港年輕女性人心惶惶嘅一年，因為係呢年先後發生兩單年輕女子被殺後棄屍懸案，而係年頭農曆新年期間發嘅呢單，發現受害人陳慧敏嘅正正係佢親生老竇...

與朋友相約買波鞋後不知所終

當年只有１６歲嘅陳慧敏讀緊中五，同父母住係鑽石山大磡嘅寮屋區。係年初五，阿敏約左個同性密友下晝２點係慈雪山一間快餐店門口等，準備一齊去買波鞋。阿敏朋友到左之後等左半個鐘，但阿敏依然係無出現，因為佢平時都好有交帶，所以以為阿敏係臨時有野做先甩底，於是就返屋企再算。大約晚上６點，阿敏朋友無收到佢任何消息，所以好唔放心咁再打去阿敏屋企睇下佢係唔係到，然而另一邊廂阿敏父母都唔知阿敏去左邊，只知道佢係出去同朋友買波鞋後，就無再返過屋企。焦急嘅阿敏父母即刻出門四圍搵阿敏嘅蹤影，又去黃大仙警署報案希望警方幫手搵。

遠在天邊 近在眼前

雖然香港話大唔大話細唔細，但一個人突然之間唔見左，就算係而家周圍都有閉路電視，要搵返佢出黎都要花費好多人力物力，何況係以前資訊不通嘅年代。阿敏父母搵左成晚都係無個女嘅消息，只好返屋企休息，等第二朝親友過黎幫手先再搵過。

係年初六嘅大清早，阿敏爸爸匆匆咁食左碗粥就繼續去尋人，佢突然心血來潮嘅，決定唔再係黃大仙搵住，相反行去屋企附近近大磡窩村一條好辟靜嘅行人隧道，果度平時人跡罕至，係流浪漢同隱君子流連之地。果然未行到去臭氣沖天嘅隧道入口，佢地已經有所發現—一個有人咁大嘅帆布袋用粗繩綁好，靜靜咁擺左係隧道中間。阿敏爸爸下意識咁打開個袋一睇，個情景就好似電影「七宗罪」個結局咁震撼，全身赤裸面無血色嘅阿敏，睜開雙眼，雙手被鐵線綁住坐係個袋入面，阿敏爸爸即刻嚇到四肢無力靠牆痛哭。

慘不忍睹的「全屍」

法醫到場檢驗，發現阿敏身上有超過百幾處由半圓形水喉通造成嘅傷口，死因係顱頂骨被擊碎，死亡時間大概係前一晚凌晨３點到５點，隧道亦非案發現場。由於女死者傷口上無任何衣物纖維，警方推斷阿敏係赤裸嘅情況之下被虐殺，另外因為阿敏處女膜完好，反映兇手好可能只係單純想滿足虐待嘅欲望，所以無做出任何性侵犯行為。詭異嘅地方係，隧道盡頭仲有個似係裝住野嘅黑色垃圾膠袋，警員最初以為係同案件有關嘅作案工具之類，打開睇「又」係一具屍體—一條頭部受重擊致死嘅黑狗（後來發現係附近村民養黎看門口）。

無聲電話

警方係搞清楚阿敏生前一星期嘅生活後，發現有唔少可疑嘅地方，共同之處都係同電話裡頭嘅人有關：

二月十五日年三十晚
阿敏係６點收左個電話後，同阿媽講因為約左朋友７點半去行花市，所以想早啲食飯，如果７點仲未開得飯，佢就唔食直接出去，結果阿敏係７點左右好快食完就出左去。而係阿敏離開無耐，有人打電話黎但唔出聲，阿敏媽媽見無人應就收左線。

二月十六日年初一
阿敏係朝早８點先返屋企，阿爸阿媽好擔心佢怕開壞個頭，女仔一個第時都會咁夜返好危險，於是就責問佢去左邊搞到咁遲。據阿敏解釋係行完花市就去荔園玩，然後DISCO跳完舞之後又同朋友係海邊傾計。阿敏答完就訓教，係晏畫起身食完飯後繼續訓，係呢段期間，阿敏媽媽又接過兩個「無聲電話」，直到夜晚１０點阿敏親自接到個電話傾左大約一個鐘。

二月十七日年初二
下晝一點，有個自稱姓馮嘅人打黎搵阿敏，呢次係阿媽接先所以「知」係邊個，阿敏傾左陣之後就換衫話約左同學出去行下。

係夜晚７點，阿敏打返黎講同學屋企人留佢食飯所以要夜啲先返屋企；阿敏係１０點再打返黎話食完飯，同幾個同學一齊去旺角買啲就返屋企，佢係１２點左右返左去但無買任何野。

二月十八日年初三
當日係「赤口」同埋阿敏已經連續玩左幾日，阿媽下左禁足令，佢就留左係屋企睇電視。而只要電話聲一響，阿敏就即刻沖去接，仲好似係電話到推左幾個約會。

二月十九日年初四
同前一日一樣，阿敏都係無得出去而且繼續一有電話就搶住接。去到夜晚時，阿媽醒起朝早阿收過一個「無聲電話」，於是順口問阿敏有無接過，佢諗左諗答有，但阿媽就反問點解佢從來都無向佢地提起過。

二月二十日年初五—失蹤當日
差唔多正午，有位馮姓女同學打黎搵訓緊教嘅阿敏，話想約佢２點左右出去買波鞋，阿媽見佢呢幾日真係無出街乖乖地留係屋企，就批准左，阿敏係１２點半左右出門口。馮姓女同學係３點左右打去阿敏屋企話佢無出現，當時阿敏媽媽認為阿女有機會係因為塞車先遲到，但實際上佢地係約左係鳳凰新邨雙鳳街某快餐店等，以果度離鑽石山嘅路程，就算係行過去一到。

去到傍晚６點，馮姓女同學再打黎搵唔到阿敏，又表示阿敏從來都唔會甩底，擔心佢可能係出左意外。於是阿敏媽媽就發散人手通知親朋戚友留意，偏偏係呢個時候佢又接到幾個「無聲電話」，心煩意亂之下就忍唔住屌左幾句，但電話筒裡另一邊無任何回應。

二月二十一日年初六
凌晨３點，有個自稱姓鄧嘅男人打黎搵阿敏—
鄧男：「我是陳慧敏嘅啲朋友，想問佢返左黎未？」
陳媽：「阿敏仲未返黎。」
鄧男：「唉！佢真係無返黎呀？我一早估到會咁架啦，不過如果佢返黎嘅話，請伯母你一定要同佢講話我有好重要嘅野搵佢，叫佢一定要比返電話我：ＸＸＸＸ ＸＸＸＸ。」（電話號碼）
阿敏媽媽係未問得清咩事嘅時侯，個男人就收左線。之後佢地打返鄧男提供嘅電話，但對方表示號碼無錯但係無姓鄧嘅男人，究竟係陳媽寫錯定聽錯已經無從判斷。

係朝早６點半，阿敏媽媽去黃大仙警署報案，被列為一般失蹤人口案處理。直到１０點，阿敏爸爸係大磡窩村一條行人隧道搵到阿女條屍。

二月二十一日年初七
警方通過「警訊」電視節目，搵黎外形同阿敏身形差唔多嘅女警模擬案發過程希望有市民可以提供線索—陳慧敏係下午１２時半，由於鑽石山住所門口（華園路十三號E）沿龍翔道西行，經蒲崗村道，轉鳳德道到達某快餐店門口。

後來警方真係收到個匿名舉報電話，令佢地以為睇到破案曙光。

警方被刻意誤導？

個電話係由公眾電話亭打黎，果個人提到只要搵到姓鄧嘅男人就可以破案，但係果個時候警方根本無公布過鄧男嘅資料，所以專案組分析案情之後斷定鄧男係知情，阿敏嘅死會係同販毒集團有關：

鄧男用「無聲電話」嘅單向聯絡方式同當時毒販嘅手法一樣，佢用阿敏黎販毒但「黑吃黑」之下自己扣起左，結果阿敏就被販毒集團捉到，虐打佢籍此供出主腦。而鄧男大概估到阿敏會出事所以就打電話去陳家，當知道佢真係失蹤之後就留低左其實係密碼嘅電話號碼，只要阿敏睇到就知點搵返佢。

如果以上推理係成立，咁就至少解釋到阿敏點解係屋企會成日搶電話聽、經常出去但實際行蹤不明、「無聲電話」的來源，什至反映佢被虐殺原因係源自販毒集團想起殺雞儆猴作用。好可惜，或者係專案小組諗得太戲劇化，當佢地花費大量人力物力搵到鄧男之後，發現佢同案件完全無關係，當晚打去陳家嘅可疑答話只係佢無心一講，警方明顯係被人引導錯方向。

四十年兇案真相永遠成迷

警方為左破案，將懸紅金額由１萬元提升至３萬５千元，然而唔單止搵唔到任何線索，更諷刺嘅係同年６月係相距唔遠嘅牛池灣發生另一宗港大女學生陳玉玲棄屍案，同樣地死者全身赤裸，被鐵線綑綁裝左係尼龍袋入面，兇手此舉似係想挑戰警方權威。

案件至今發生超過四十年，阿敏父母可能早已不在人世，大磡村亦已改建成龍蟠苑，但不變嘅係現女死者嘅隧道仍在，阿敏嘅孤魂亦一樣無法得到安息...

聽日會補多篇講呢單懸案既傳聞同埋補充下女死者背景
歡迎巴絲打討論
因為個案情實在太鬼異
其實我自己寫果時都睇到有好多唔合理地方
例如
點解警方係唔夠證據之後斷定係同販毒有關？
果個人知道鄧男存在 會唔會係警方入面有內鬼想帶風向？
另外果單港大女屍案亦一樣奇怪
聽日再講多ｄ

等你

已出

樓主加油呢半年喺youtube睇外國嘅案睇得多 係呢排睇x調查先知多左本地嘅兇案 希望你繼續寫多啲冷門案

網上有個鬼故話女死者陰魂不散ＦＣ左只係創作
真正鬼異既地方係我搵資料見到有自稱識問米網友話
女死者真正死亡地點係黃宜洲村
如果計佢１２點半出門口唔見左
去到死亡時間３點—５點
直到早上１０點被發現
的確有機會係呢段時間先比人移屍過去

我自己覺得兇手好大機會係認識死者
所以知道熟悉附近地形　知條屍放係邊會比人搵到
但又大機會遲下先被發現
同埋馮姓女同學好似都有Ｄ怪咁
正常約人唔係應該早一兩日約
點解佢係果日晏晝先約阿敏同埋憑擔心佢出事一句
會唔會有Ｄ內情佢係知但無講返出黎呢
可能巴絲打聽日睇埋補充資料會有所諗法

呢張相係女死者被發現時影既相
大家有心理準備先好睇

係嗰個
之前上網都睇過單案
但冇咩後續資料
冇見新聞話放左出黎

單嘢好古怪

1980 年d人應該仲係好傳統
新正頭同屋企人話出去買波鞋應該會俾人屌到飛天

陳慧敏個好朋友有無俾人check清楚有無問題

終於追到進度
辛苦哂樓主，等更新

同埋個個年代新正頭唔係同屋企人親戚朋友拜年，反而係咁出街蒲到三更半夜先返屋企，屋企人仲要忍咁多日先屌都已經好奇怪

多謝支持
遲下會將d文重新執過 改順文筆結構
不過要大家耐心等下

黎緊補番死者背景
可能會令你覺得件事更奇怪

推一推 今晚去CAMPING
星期六補返文 祝左大家新年快樂先