卡雲尼(炒粉王)
2021-01-05 23:58:48
牛頭角下邨灶底水泥藏屍案
「你睇下地下,一滴、兩滴、三滴」無線經典劇集《隔世追凶》大結局入面,石修以匪徒流血催眠一幕到今時今日依然被瘋狂鞭屍恥笑,但係現實中就發生過相似又另類嘅情節,如果大家係目擊者分分鐘會嚇到有陰影,以後都驚弓之鳥咁思疑樓上做緊乜...
「殺生」來的血水
1975年夏天8月下旬,係牛頭角下邨九座開士多嘅莊先生同阿妹如常一早返去開鋪,佢地發現近門閘天花板有血水「一滴兩滴三滴」咁流落黎而且仲有一陣屍臭味。開頭佢地以為係拉捲閘時整到死老鼠,但又搵唔到鼠屍,唯有先用個鐵桶裝住啲血水,然後再搵住係樓上做三行工人嘅阿泰問下知唔知咩事。
阿泰好鎮定咁答:「哦...我早幾日係屋企殺生斬雞食,可能係無清理好姐,我轉頭搞搞佢啦。」莊生同阿妹聽完,半信半疑咁返左間鋪。
奇怪嘅係血水滴左成幾個鐘都仲有未見有流完嘅跡象,佢地就再搵管理員同屋邨區長,係商量之下報警求助。
可疑的灶底
警察到場後一行人浩浩蕩蕩咁再上多次阿泰屋企睇下咩事,而佢呢次個反應明顯好慌張,言談間又唔係好想佢地入屋。所謂「醜婦終須見家翁」,阿泰最後都係打開左門,其實佢屋企家徙四壁,一眼望哂除左得個櫃同張床就無其他家私雜物。
正當大家以為無咩特別想走人之際,有個醒目警長留意到有唔妥地方—當時房署為安全起見嚴禁將灶底密封,但阿泰由開門之後就一直企係英泥封住嘅灶底嘅附近,好似想隱藏啲野咁;加上同場嘅莊生兄妹對話間無意咁講左句「今日唔見李太嘅?」但阿泰支吾以對咁答唔出。於是警長當場命令阿泰親自鑿開灶底。
阿泰聽到之後默不作聲,轉身拎架餐出黎,一邊飲住啤酒一邊慢慢鑿開灶底,而事情嘅真相亦都隨住「角角」聲浮現...係水泥密封口被鑿開大半後,「啪啦」一聲—一對半屈曲嘅人腳伴隨住惡臭味應聲而出,嚇到在場人士目定口呆。血水的確係自殺生而來,阿泰終於係呢個時候直認不諱,承認殺死「阿媽」李婦。
與「阿媽」因財失義
時間返返去1973年,當時24歲嘅阿泰多次進出精神病院治療後,終於「康復」被安排住係牛頭角下邨呢個百幾呎嘅單位,因為當時嘅佢一直都未搵到野做,係機緣巧合之下就識到相鄰單位嘅李姓婦人,佢地雖然相差幾十年但出奇咁好傾,感情仲好到後來以母子相稱。
好景不常,係1974年中,本來與李姓婦人同住嘅金蘭姊妹突然係單位內上吊先殺,唔想觸景傷情嘅李婦就萌生出讓單位念頭。係呢個時候嘅阿泰盤算過後,認為以自己同李婦嘅交情應該可以用低於市價入手,然後再轉售圖利,於是佢就同「阿媽」傾好傾錢最後以三千蚊成交。李婦係收齊錢之後唯一要求係,因為另搵新屋要時間所以想遲啲先搬走,當然「兒子」阿泰對此未有異議。
但隨住交吉嘅時間一次又一次咁推遲,阿泰亦變得愈來愈唔耐煩,開始覺得「阿媽」有心玩野呃佢錢,而係事發當日正正係佢地又大吵一場之際—係1975年8月16日,阿泰決定「最後通碟」要求李婦盡快搬出單位:
點知「阿媽」突然聲大夾惡咁話:「你估我唔知咩?呢度出面賣到五六千蚊架,你想搵我笨姐嘛!」
「阿媽你講咩呀?我地當初傾好三千蚊架嘛,況且你都拖左咁耐啦!」阿泰不解咁反問,「你比返果筆錢我,我地當無數—你繼續係到住啦。」
「一係你拎多兩千蚊出黎,我拎到就即刻搬走!」李婦完全無讓步嘅意思。
「我岩岩先轉搵到工咋邊度拎到二千蚊出黎比你呀?媽,我求下你比返三千蚊我算啦...」
「無呀果筆錢我一直洗哂啦,總之無多兩千蚊就無得傾,呢度我會再搵人賣架啦!」李婦唔單止得寸進尺咁講,仲一巴摑落阿泰到,係糾纏之間又一手捉住佢下體。
「死八婆!」經受男人最痛嘅阿泰係呢下完全被撻著,佢用隨手拎黎嘅啤酒樽一野扑向「阿媽」到,又推佢落地鍊住條頸邊用將報紙塞把口,「我當你親生阿媽咁,你就當我契弟,把口咁衰呀啦!」終於係前幾分鐘仲聲大大嘅李婦永遠咁收左聲。
真相難藏
阿泰係冷靜過後發現自己闖下大禍,一下子反應唔過黎就由得「阿媽」攤左係地下成晚,但因為當時正正係最熱嘅時候,條屍已經出現屍斑同惡臭。最後阿泰決定運用自己嘅工作知識,打算用英泥將「阿媽」永遠封係灶底:
阿泰先將「阿媽」身上嘅衣物全脫,然後用英泥一層層咁鋪係上面,點知係第朝英泥裂開流出血水。於是佢又將條屍鑿返出黎,用刀猛插放血,又用清水洗乾淨之後包上報紙,仿如木乃伊一樣咁再次封印係灶底。當然「紙係包唔住水」,係一星期後,屍水逐漸流去樓下士多,李婦早已腐爛並且滿佈蛆蟲嘅屍體最終都係重見天日。
其實據講,早係事發後幾日,已經有鄰居表示半夜聽到有把老女人嘅喊聲,但因為屋邨本來就充充滿各種燥音,大家都不以為而;另一方面,亦有街坊提到話係爬上平台裝天線時,望入阿泰單位見到佢反應緊張,估唔到原來當時係「目擊」埋屍經過。
殺人者的下場
多次進出精神病嘅阿泰係庭上話自己係一時錯手殺死「阿媽」,佢雖然話就話好番但成日都比人笑係痴線,同屋企人關係亦因為有戒心而唔多好,所以難得同李婦感情咁好,估唔到佢都同其他人一樣咁恰佢。雖然係咁,全男班嘅陪審員根據醫生報告,認定阿泰係殺人嘅時候精神正常,法官依例判處死刑之後改判終身監禁。
撲朔迷離嘅係正當阿泰係坐左差唔多廿年監就黎有得假釋之時,1994年12月,佢係小欖精神病院同做緊清潔工作嘅時候,以要去廁所為由用褲頭帶—就好似「阿媽」嘅金金蘭姊妹咁上吊自殺,結束罪惡嘅一生...