又一次,我又一次咁有個種奇怪既反應,我真係解釋唔到點解會咁。
明明我係第一次見佢,但居然有種好耐無見,我係識得呢個人咁。
而且我個心仲跳得咁快…好似話我知我係鐘意呢個女人咁。
唔得唔得,我應承過美星架,我唔可以打Cherry主意,而且我而家只係暫代魯路修!
要扮好D!唔好俾佢識穿!
我:「嘛…而家我成個人都已經企係你面前囉,你話呢?
」
Cherry:「衰人,又話下星期先返黎既。
」
我:「呃…D野做得比預期中快所以咪快左右返黎見你地囉。
」
Cherry:「哦?咁即係好順利?
」
我:「算係啦,所以暫時可以休息下,陪下你地。」
Cherry:「順利就好啦~咦你買左餸嗱?今晚打算煮咩?
」
我:「哦,無啊想簡簡單單,煮個拿破崙意粉同忌廉湯就算。」
Cherry:「拿破崙意粉..?
」
我:「唔?係啊Nicole話想食意粉嘛,所以我咪煮拿破崙意粉囉,你唔岩食?」
Cherry:「呃,唔係,只係…算喇都係無野啦我去換衫先。」
唔?係咪我講錯D乜呢?
Chase:「喂。」
我:「唔?有咩事呀Chase?」
Chase:「我想打陣機,得唔得?」
我:「哦,好喇玩一陣啦,食飯果陣就要停架啦。
」
Chase:「嘖,煩。
」
吖屌你呀我俾你打機你仲嫌我煩?細路你係咪想打呀?
講下笑啫,我個人係十分反對暴力,尤其係對細路用暴力。
我之後就入左廚房開始煮意粉同煲湯,整整下美星就入左黎。
美星:「喂。」
我:「係,係咪有咩事?
」
美星:「我要返去啦。」
我:「你…唔留低食埋飯?
」
美星:「唔啦,我仲想去睇下佢...」
係啊…佢仲係擔心緊魯路修。
「你要記得你應承過我d乜。你千其咪對Cherry…」
我:「得喇我明白架啦,我好清楚自己咩身份,你去睇佢啦,叫佢唔洗擔心。」
美星:「咁…呢度就交俾你啦。」
佢講完就走左,我亦繼續煮我既飯。
我明白既,我係一個複製品,我而家只係暫代佢,我終究都唔係佢。
萬幸,野食煮得尚可見人,不過不失咁,兩個細路仲不斷要添食。
食完飯我原本仲打算洗埋碗,點知Cherry佢話等佢黎,經歷過一番雄辯之後,我決定投降等佢做。
洗完碗,送左兩個細路去訓之後先係最大既問題,個廳得返我同Cherry兩個。
好尷尬。
我同佢兩個坐係梳化度睇電視,大家都無出聲。
唔知係咁岩定我下意識要同佢保持距離,就算係坐係梳化我都係同佢保持一個身位。
夫妻之間做到咁係人都睇得出有古怪啦…
終於,佢出左聲,仲係一鳴驚人。
Cherry:「你係咪有野瞞住我?
」