新婚生活係點?好美滿。
雖然我地無去咩新婚旅行,留左係香港,但都係好開心。
我地日日都係埋一齊,有時係我陪佢返去餐廳幫手,有時則係佢陪我去影相,總之我地就係形影不離。
我好似晨哥講既咁,拎住佢俾我既相機去睇呢個世界。
Eh…唔可以話係世界既,睇香港囉。
呢幾個月黎,我帶著部相機同Ada走遍幾乎全港九新界,影左成千張相。
每張相對我黎講都好有意義,佢地好似幫我記錄緊我既生活,我既足跡咁。
亦係有佢地,我更加感受到自己既生命。
呢D相,係我留下既足跡,係我活過既證明。
晨哥佢地好似都好喜歡我既相咁,話同我出本攝影集咁話。
我唔好意思拒絕佢地既好意,而且我可以有自己既作品都係一件開心事,所以我就欣然接受左。
係出版既同時,另一件開心事又來到了。一浪接一浪咁黎。
Ada話佢有左。
我當初聽到呢個消息真係開心到不得了,開心到幾乎跌倒。
我真係無諗過自己咁快就可以做爸爸。
不過,亦係因為咁,我做左一個決定。
Ada:「你話…你想去流浪?」
我:「嗯,我想去更多既地方,影更多既相,記錄同睇呢個世界。唔想只係局限係香港。」
Ada:「咁不如我同你一齊去啦。」
我:「唔得,你而家有左就應該安心養胎啦,唔好同我四圍去。」
Ada:「咁不如…等個BB出左世之後我地一齊去?
」
我:「等BB出左世之後我就要做一個好爸爸,無辦法再去咩流浪lu,所以只可以趁而家。」
Ada:「不過我唔想我自己一個人..
」
我:「放心啦,就算我地分隔幾遠都好,有呢樣野係度我地就係連埋一齊架啦。」
我一邊講一邊指住手上既戒指。
就算我講到咁,佢既表情仍係十萬個不願意,仲開始流淚,睇得我好心痛。
我忍唔住伸手抹走佢既眼淚,仲輕撫佢既面頰。
我:「我一定會返黎既,我應承你。」
佢無即刻答我,而係緊緊咁捉住我個隻停留係佢臉上既手。
Ada:「你返黎之後就唔準再離開我,唔準再掉低我一個人,得唔得?
」
我:「得,我應承你。
」
Ada:「好,總算賣到個好價錢,值得。
」
我:「值得?你講乜呀老婆。
」
Ada:「哼,我知就算我點講都好你都會堅持要去,咁倒不如我開條件等你應承咪仲好。
」
敗給她了。
我:「原來一切早已掌握於妳手,厲害厲害。
」
Ada:「哼,洗乜講。
」
「去啦,唔好令自己後悔。」
嗯,我知道。
就係咁,我開展左一年左右既流浪生涯。